பூமியில் இருப்பதும்; வானத்தில் பறப்பதும்!

 

நெல்லைத்தமிழன் : 

சமீபத்தைய ஃபோர்ஷே கார் விபத்தைப் போல, minor பசங்களுக்கு காரைக் கொடுத்து இந்த மாதிரி தறுதலைத்தனத்தை வளர்த்துவிடும் அப்பாவுக்கும் அதே தண்டனையைக் கொடுக்க வேண்டாமா?

# சட்டத்தில் அதற்கு இடமில்லை. மேலும் பெற்றோர் சொல்லியும் கேட்காத முரட்டுப் பிள்ளையாகவும் இருக்கலாம்.

& நீங்கள் சொல்வது நியாயமான விஷயம். ஆனால் .. .. ஹூம் என்ன சொல்வது :(( 😔

= = = = = = = = =

எங்கள் கேள்விகள்: 

1) நெல்லை மேலே கேட்டிருப்பது போல - பணத்திமிர் கொண்டு எதையும் செய்வேன், எப்படியும் செய்வேன் என்று திரியும் ஆட்களுக்கு என்ன தண்டனை கொடுப்பது? 

2) இந்தியாவிற்காக ஒரே ஒரு சட்டம் மட்டும் இயற்றும் அதிகாரம் உங்களுக்கு உண்டு என்றால், நீங்கள் என்ன சட்டம் போடுவீர்கள்? 

3) ஒலிம்பிக்ஸ் விளையாட்டுகளில் உங்களுக்கு மிகவும் பிடித்த விளையாட்டு எது? பிடிக்காத விளையாட்டு எது? 

= = = = = = = = =

KGG பக்கம் :

சென்னையில் கழித்த விடுமுறை நாட்கள். 

மோகன் அதற்குப் பிறகு எங்களை அழைத்துச் சென்ற இடம், மீனம்பாக்கம் விமான நிலையம். 

நாகையில் இருந்த சமயங்களில் விமானம் பறக்கும் சத்தம் கேட்டாலே வெளியில் ஓடி வந்து வானத்தில் பறக்கும் விமானத்தை மகிழ்ச்சியாக, ஆர்வத்துடன் கவனிப்பது எங்கள் வயது இருந்த எல்லோருக்கும் வழக்கம். 

மீனம்பாக்கம் விமான நிலையத்திலிருந்து புறப்படும் விமானங்களும் / வந்து இறங்கும் விமானங்களும் சைதாப்பேட்டையில் நாங்கள் தங்கியிருந்த வீட்டின் மேல் மாடியிலிருந்து பார்த்தால் - நாங்கள் நாகையில் பார்த்த விமான அளவை விட இரண்டு / மூன்று மடங்கு பெரிதாக இருக்கும். 

விமான நிலையத்திற்கு சென்று பார்த்தபோது அவைகள் எவ்வளவு பிரம்மாண்டமாக இருக்கின்றன என்று மிகவும் அதிசயமாக இருந்தது. 

எங்கள் ஆசான் மோகன் அப்பொழுது காரவீல் விமானம் மற்றும் போயிங் விமானம் இரண்டையும் காட்டி - இரண்டுக்கும் என்ன வித்தியாசம் என்று கூறினான். போயிங் விமானம் டேக் ஆஃப் சமயத்தில் எழுப்பும் பெருத்த ஓசை மிகவும் பயங்கரமாக இருந்தது. 

இவ்வளவு சத்தத்திற்கு நடுவே எப்படி ஆட்கள் விமானத்தில் பயணம் செய்கிறார்கள் என்று அந்தக் காலத்தில் அதிசயப்பட்டேன். (உள்ளே பயணம் செய்பவர்களுக்கு விமானத்தின் சத்தம் கொஞ்சம் கூடக் கேட்காது என்பது பிறகுதான் தெரிந்துகொண்டேன். ) 

விமானங்களை தூரத்திலிருந்து பார்த்தது அந்த 1967 ஆம் வருடத்தில் என்றாலும் ஒரு விமானத்தின் உள்ளே சென்று பார்த்தது 1970 டிசம்பர் மாதத்தில், பாலிடெக்னிக் எஜுகேஷன் டூர் வந்த சமயம். 

எங்களுக்குப் பார்வையிடக்  கிடைத்தது அப்பொழுது THE HINDU பத்திரிக்கைக்குச் சொந்தமான ஒரு சிறு விமானம். எங்களை அழைத்துச் சென்ற ஆசிரியர்களின் வேண்டுகோளுக்கிணங்கி அந்த விமானத்தின் பைலட் ஐந்தே நிமிடங்களில் படபடவென விமானத்தின் பாகங்களைக் காட்டி அதன் முக்கியத்துவங்களை பொரிந்து தள்ளினார். 

ஆனால் முதல் விமானப் பயணம் வாய்த்தது எப்போது என்றால் - 2003 ஆம் வருடத்தில்தான்! சென்னை to மும்பை + மும்பை to இந்தூர் - இரண்டு வாரங்களுக்குப் பிறகு அதே வழித்தடத்தில் திரும்பி வந்த பயணம். அதற்குப் பிறகு 2009 சமயத்தில் ஒருமுறை சென்னை to பெங்களூர். ஆக வாழ்க்கையில் இதுவரை நான் மேற்கொண்டது ஐந்தே ஐந்து விமானப் பயணம் மட்டுமே! 

ஆனாலும் விமானப் பயணம் என்றால் மனதுக்குள் ஒரு பயம் எப்போதும் எனக்கு உண்டு! 

பயத்துடன் பயணம் செய்ய விமானத்தில் ஏறி உள்ளே உட்கார்ந்தவுடனேயே அஸ்து பாடுவதுபோல இரண்டு பேர் மௌன மொழி - சைகைகளால் விமானம் விபத்துக்கு உள்ளாக நேர்ந்தால் என்னென்ன செய்யவேண்டும் என்று miming செய்து காட்டி வயிற்றில் புளி கரைப்பார்கள். 

விமானம் கிளம்பும்போது அடைத்துக்கொண்ட காதுகள், விமானத்திலிருந்து கீழே இறங்கி அடையவேண்டிய ஏர்போர்ட் சென்று அடையும்போதுதான் திரும்பக் கேட்கத் தொடங்கும்! 

= = = = = =