திருக்காட்டுப்பள்ளி மற்றும் சென்னை விடுமுறை விஜயம்.

 

சென்ற வாரம் எங்களை யாரும் கேள்விகள் கேட்கவில்லை. 

😩

அதனால நாங்க கேட்கிறோம்! 

1 ) உங்கள் முன் சம அளவுள்ள  ஐந்து பாட்டில்கள் ( ஒவ்வொன்றிலும் நூறு கிராம் பொருள் உள்ளது) வைக்கப்பட்டுள்ளன என்று கொள்வோம். அவற்றிலிருந்து ஏதேனும் ஒரு பாட்டிலை மட்டுமே நீங்கள் எடுத்துக்கொள்ளலாம். உங்கள் தேர்வு எது?

அ ) பாதாம் ( Almonds )

ஆ ) பிஸ்தா பருப்பு 

இ ) வால் நட் 

ஈ ) முந்திரி பருப்பு 

உ ) உலர்ந்த திராட்சை 

2) ஒரு இட்லித் தட்டின் எடை 100 கிராம். நான்கு இட்லி ஊற்றிய பிறகு, அதன் எடை 300 கிராம். (200 + 100) இட்லியை தட்டுடன் குக்கரில் வேக வைத்து வெளியே எடுத்து, பிறகு எடை பார்த்தால், அப்பொழுது என்ன எடை வரும்? 

அ) 300 + 

ஆ ) 300 - 

இ) 300 

ஈ) தெரியவில்லை. 

= = = = = = = = =

KGG பக்கம் : 

சென்ற வாரம் திருக்காட்டுப்பள்ளி விடுமுறை காலம் குறித்து எழுதியிருந்தேன். 

அங்கு இருந்த நாட்களில், அதிகாலையில் சுற்றுப்புற குடிசைகள், சிறு வீடுகள் இவற்றிலிருந்து நாதஸ்வர இசை தவழ்ந்து வந்து நம் காதுகளை நிறைக்கும். நாதஸ்வரக் கலைஞர்கள் நிறைந்த ஊர் அது! எல்லோரும் அதிகாலையில் எழுந்து இசைப்  பயிற்சி செய்வார்கள்! 

அங்கு அப்போது கேட்ட தோடி, கல்யாண வசந்தம் ( ஆஹா - நாதஸ்வரத்திற்காகவே ஏற்பட்ட ராகம் - கல்யாண வசந்தம் !) மோகன ராக ஆளாபனைகள் மறக்க முடியாதவை. 

அங்கே கேட்ட தோடி இப்படி இல்லை என்றாலும், இதை நினைவுக்குக் கொண்டுவந்தது! 

திருக்காட்டுப்பள்ளி சென்ற அந்த விடுமுறை தினங்களில், பக்கத்தில் இருந்த திருவையாறு, கல்லணை போன்ற இடங்களுக்குச் சென்று பார்க்கும் வாய்ப்பு கிடைத்தது. 

பல நூற்றாண்டுகள் கடந்த கல்லணையும், ஒன்றரை நூற்றாண்டு சிறப்பு வாய்ந்த திருவையாறும் கண்டு சந்தோஷத்தின் எல்லைக்கு சென்று திரும்பினேன். 

= = = = = = = =

1967 ஆம் வருடம் நவராத்திரி லீவு சமயம் நானும் என் தம்பியும் விடுமுறைக்கு சென்னை வந்தோம். 

புரசவாக்கம் அண்ணன் வீட்டிற்கு வந்து, பிறகு சைதாபேட்டையில் நூர்ஜஹான் தியேட்டர் அருகே இருந்த உறவினர் வீட்டுக்குச் சென்றிருந்தோம். 

வீட்டுப் பக்கத்தில் வசித்த மோகன் என்றொரு பையனுடன் எங்கள் இருவரையும் ஊர் சுற்றிப்பார்க்க அனுப்பி வைத்தார்கள். 

மோகன் எங்களைப் போலவே தெலுங்கு பேசும் பையன். எங்கள் இருவரையும் அழைத்துக் கொண்டு சுற்றுப் பக்கத்தில் உள்ள சுற்றுலா தலங்கள் எல்லாவற்றிற்கும் கொண்டு போய் தனக்குத் தெரிந்த விவரங்களை எங்களுடன் பகிர்ந்துகொண்டான். 

முதலில் சைதாபேட்டை மார்மலாங் பாலம். அந்தக் காலத்தில் அதுதான் சென்னையின் மிக நீளமான பாலம் என்று மோகன் சொன்னான். அப்புறம் அந்த மார்மலாங் பாலத்தில்தான் மெட்ராஸ் டு பாண்டிச்சேரி படத்தின் ஆரம்பக் காட்சியாகிய கல்பனா ஓடி வரும் காட்சி படமாக்கப்பட்டது என்றும் அந்த ஷூட்டிங் நடைபெற்றபோது அவன் எங்கே நின்று அந்தப் படப்பிடிப்பை பார்த்தான் என்ற அரிய விவரத்தை எங்களுடன் பகிர்ந்துகொண்டான். 

நானும் என் தம்பியும் மெய் சிலிர்த்து அந்த இடத்தை எல்லாம் ஆனந்தமாக தரிசித்தோம். 

பிறகு நாங்கள் சென்ற இடம், கிண்டி சில்ட்ரன்'ஸ் பார்க். சைதையிலிருந்து நடந்தே சென்றோம். 

வழியில் பெரும்பாலும் எல்லோரும் நவநாகரிக உடை அணிந்து, மிகவும் ஸ்டைலாக இருந்தனர். 

ஆனால் பாண்ட் சட்டை (அதிலும் கலர் சட்டை ) அணிந்து, கூலிங் கிளாஸ் அணிந்த சிலரைப் பார்த்தால் மட்டும் மோகன் எங்களுக்குக் கூறிய அறிவுரை : " அவங்க பக்கத்துல போயிடாதீங்க. எல்லோரும் பொறுக்கிப் பசங்க ( அந்துரும் பொறுக்கிப் பில்லகாயலு !) "

" அப்படீன்னா என்ன ? அவர்கள் என்ன செய்வார்கள்?" என்று கேட்டேன். 

" எல்லோரும் ரவுடிகள். பிக்பாக்கெட் ஆசாமிகள் " என்று மோகன் சொன்னான். 

அன்றிலிருந்து, சென்னையில் கூலிங் கிளாஸ் அணிந்த யாரைப் பார்த்தாலும் மோகனின் எச்சரிக்கைதான் எனக்கு ஞாபகத்திற்கு வரும். 

அதற்குப் பிறகு, நான் சென்னையில் இருந்த 1971 to 2008 காலத்தில் கூலிங் கிளாஸ் வாங்கியதும் இல்லை; அணிந்ததும்  இல்லை! எப்பொழுதாவது மற்றவர் அணிந்திருக்கும் கூலிங் கிளாஸை அவர்களிடமிருந்து வாங்கி, கொஞ்ச நேரம் போட்டுப் பார்த்தது உண்டு! 

( சென்னை விடுமுறை அனுபவங்கள் தொடரும்)