சீறி வரும் பாம்பும் சிரித்து வரும் பெண்ணும்

 பல வேடிக்கை மனிதரைப் போல நான்

 வீழ்வேனென்று நினைத்தாயோ 

இந்த வரிகளை நான் ஒரு ஆட்டோவின் பின்னால் கண்டபோது சட்டென பாரதி நினைவில் வந்தாலும் இது எதற்காக இங்கு எழுதப் பட்டிருக்கிறது என்றுதான் தோன்றியது.  மேலும் பாதி பாரதி பாடல்கள் ஓரிரு வரியைப் போட்டு அர்த்தத்தையே அனர்த்தமாக மாற்றுவார்கள்.  உதாரணமாக 'மெல்ல தமிழ் இனி சாகும்' வரி.  தமிழ் இனி பிழைக்காது என்று பாரதியே சொல்லி இருப்பதுபோல நிறைய அரைகுறைகள் சொல்வதுண்டு.  

எல்லைத்தமிழன் (நெல்லை அல்ல!)  என்ற ஒருவர் பாரதியார் இப்படி கூறி இருப்பது போல எழுதி இருப்பதை இங்கே தொடர்ந்து படிக்கலாம்.

தமிழ் இனி மெல்லச் சாகும் - என்றான் பாரதி . இப்போதைக்கு அந்த நிலைமை இல்லை என்றே தோன்றினாலும், ஒரு மொழி அழிவதற்கு உண்டான அத்தனை அம்சங்களும் இப்போது தமிழுக்கும் உள்ளது. 

அதுபற்றி விளக்கம் தேடினால் பாரதியின் முழு பாடலுடன் 'கோரா'வில் ஒரு விளக்கம் கிடைக்கிறது.  சங்கர் நீதிமாணிக்கம் என்னும் தமிழர் எழுதி இருப்பதை கீழே தருகிறேன்.

"உண்மையில் "மெல்லத் தமிழினிச் சாகும்" என்று சொன்ன ஒருவரைத்தான் பாரதி ரௌத்திரம் கொண்டு "கடிந்து" ஒரு பாடல் பாடியுள்ளார்.

ஆனால் எதையும் குதர்க்கமாக பொருள் கொள்ளும் அல்லது தங்களுக்கு தேவையான பகுதியை மட்டும் வெட்டி எடுத்து ஒருவர் வேறு ஒருவரை அல்லது ஒன்றை பழித்துச் சொன்னது போல உருவாக்கும் நபர்களால் "மெல்லத் தமிழினிச் சாகும்" என்று பாரதி சொன்னதாக பரப்பப்பட்டுள்ளது.

சரி அப்படியானால் பாரதி யாரை இப்படி கடிந்து கொள்ள இந்தபாடலை பாடினார் ?

அதைப் பற்றிய ஆய்வில் இறங்குவதற்குமுன், பாரதியின் இப்பாடலை, தமிழ்த் தாய் என்னும் பாடலை, முழுமையாய் பார்ப்போம் வாருங்கள்.

"கன்னிப் பருவத்திலே அந்நாள் - என்றன்  காதில் விழுந்த திசைமொழி எல்லாம்  என்னென்னவோ பெயருண்டு - பின்னர்  யாவும் அழிவுற்று இறந்தன கண்டீர்!  தந்தை அருள் வலியாலும் - முன்பு  சான்ற புலவர் தவ வலியாலும்  இந்தக் கணமட்டும் காலன் - என்னை  ஏறிட்டுப் பார்க்கவும் அஞ்சி இருந்தான் 

இன்றொரு சொல்லினைக் கேட்டேன் – இனி
ஏது செய்வேன் என தாருயிர் மக்காள்
கொன்றிடல் போலொரு வார்த்தை – இங்கு
கூறத் தகாதவன் கூறினான் கண்டீர்
புத்தம் புதிய கலைகள் – பஞ்ச
பூதச் செயல்களின் நுட்பங்கள் கூறும்
மெத்த வளருது மேற்கே – அந்த
மேன்மைக் கலைகள் தமிழினில் இல்லை
சொல்லவும் கூடுவ தில்லை – அவை
சொல்லுந் திறமை தமிழ்மொழிக் கில்லை
மெல்லத் தமிழினிச் சாகும் – அந்த
மேற்கு மொழிகள் புவிமிசை யோங்கும்
என்றந்தப் பேதை உரைத்தான் – ஆ
இந்த வசையெனக் கெய்திடலாமோ
சென்றிடுவீர் எட்டுத்திக்கும் – கலைச்
செல்வங்கள் யாவும் கொணர்ந்திங்கு சேர்ப்பீர்
தந்தை அருள் வலியாலும் – இன்று
சார்ந்த புலவர் தவவலி யாலும்
இந்தப் பெரும்பழி தீரும் – புகழ்
ஏறிப் புவிமிசை என்று மிருப்பேன்"

இப்பாடலின் தொடக்கத்திலேயே, இங்கு கூறத் தகாதவன் கூறினான் கண்டீர் என்று வருகிறதல்லவா?

கூறத்தகாத வார்த்தைகளைக் கூறிய அந்தப் பேதை யார்?

இது பற்றி அறிய ஒரு ஆய்வாளர் வேகமாய் ஆய்வில் இறங்கினார்,

பாரதி குறித்த அத்துணை படைப்புகளையும் ஒரு வரி விடாமல், ஒரு எழுத்து விடாமல் ஆராய்ந்தார்

விடை கிடைத்தது

கூறத்தகாத வார்த்தைகளைக் கூறிய அந்தப் பேதை யார் என்பதைக் கண்டுபிடித்தார்.

1979 ஆம் ஆண்டு பாரதி அவர்களின் தமையனார் சி.விசுவநாதன் அவர்கள் பாரதி நூல்கள் தொகுப்பு கட்டுரைகள் என்ற நான்கு தொகுப்புகளை வெளியிட்டிருந்தார்

அந்தத் தொகுப்பின் நான்காம் பகுதியில், சமூகம் – பருந்துப் பார்வை என்னும் கட்டுரையில், பாரதியே இந்தக் கேள்விக்கான விடையினைக் கூறியிருப்பதை அறிந்து, தெளிந்து நெகிழ்ந்து போனார்.

தட்சிணப் பாஷையில், அதாவது தமிழ், கன்னடம், தெலுங்கு, மலையாளம் போன்ற மொழிகளில், சாஸ்திரங்களை அதாவது அறிவியல் நூல்களைப் படைக்கும் ஆற்றல் இல்லை என்று பச்சையப்பன் கல்லூரி தலைமை வாத்தியார் மிஸ்டர் ரோலோ என்பவர் சொல்லுகிறார்.

அவருக்கு இவ்விடத்து பாஷைகள் தெரியாது. சங்கதி தெரியாமல் விவரிக்கிறார்.

சாஸ்திர பாஷையை நமது பாஷையில் மிகவும் எளிதாக சேர்த்து விடலாம். மேலும் சாஸ்திரம் கற்பிக்க தமிழ் நேர்மையும் எளிமையும் கொண்ட மொழி என்பது, நம்மவர்களில்கூட, சில இங்கிலீஷ் பண்டிதர்களுக்குத் தெரியவில்லையே என வேதனையோடு குறிப்பிட்டுள்ளதைக் கண்டார்.

பாரதியின் இக்கூற்றில் இருந்து, கூறத்தகாதவன் என்பதும், அந்தப் பேதை என்பதும், பச்சையப்பன் கல்லூரி முதல்வர் ரோலோ என்பவரைத்தான் என்பதை தனது ஆய்வின் மூலம் நிரூபித்தார் அந்த ஆய்வாளர். அவர் முனைவர் த.செந்தில்குமார் அவர்கள், காவல்துறை அதிகாரி.

படித்த கட்டுரையில் இருந்து எடுத்தும், தொகுத்தும் வழங்கியுள்ளேன்.​"

இங்கு சொல்லி இருக்கும் ரோலோவுக்கு பதிலாக நீலகண்ட சாஸ்திரிதான் அப்படிச் சொன்னார் என்று ஒரு பக்கம் இங்கே சொல்கிறது.  ஆனால் அப்பாதுரையின் கருத்தே நம்பக்கூடியதும், ஏற்க்க கூடியதும்!

சரி, ஆட்டோவில் எழுதும் சம்பிரதாயத்துக்கு வருவோம்.

ஒவ்வொரு மனிதர்க்குக்கும் ஒவ்வொரு உணர்வு, ஒவ்வொரு அனுபவம்.  நண்பர்களாலோ, உறவினர்களாலோ மோசமான அனுபவங்களை அடையும் மனிதர்கள் இல்லாமல் இல்லை.

ஆனால், நாம் ஏன் அதை பொதுவில் பறைசாற்ற விரும்புகிறோம்?  என்ன லாபம் அதில்? என்ன மாதிரியான மனநிலை? யாரோ ஓரிருவருக்கு சொல்ல வேண்டிய செய்தியை பொதுவில் சொல்லி நிம்மதி அடைகிறோம்!  'அவரி'டம் நேரில் சொல்ல முடியாத கோபம், அவஸ்தை!  'அவரு'ம் பார்ப்பார் என்கிற திருப்தி!

உள்ளேயே அடைத்து வைத்து, குமைந்து குறைந்தபட்சம் ஒரு மனநல மருத்துவரை நாடும் நிலையை தவிர்க்கிறோம்.

தாண்டிச் செல்லும் சமயம் அதைப் படிக்கிறவர்கள் மனதில் ஒரு புன்னகையுடன் ஓட்டுனரைப் பார்க்க முயற்சிக்கிறார்கள்...  

"நீதானா?  என்னய்யா உன் பிரச்சனை?"  அவர்கள் மனதுக்குள் ஒரு கதை ஓடும்!

ஒருவேளை இதுபோன்ற அனுபவம் அடைந்தவர்கள் சிறு அல்ப திருப்தி அடைவார்களோ என்னவோ...  

'பல வேடிக்கை மனிதரைப்போல....' என்று நான் படித்ததும் இவர் யாரையோ தோற்கடிக்க விரும்புகிறார் என்று தோன்றியது.  இவரால் நேரடியாக மோத முடியவில்லை; வெற்றி கொள்ள முடியவில்லை.  என் எஸ் கிருஷ்ணனின் "ங்கொப்பன் மகனே அடிப்பியோ...  சிங்கண்டா..."  ஜோக் நினைவுக்கு வந்தது.  நீங்கள் பார்த்திருக்கிறீர்களோ?  இணைப்பை க்ளிக்கி மூன்று நிமிடங்கள் கணக்கிலிருந்து பார்க்கலாம்!

 சரி, ஆட்டோவின் பின்னால் ஏதாவது வாசகம் இருந்தே ஆகவேண்டுமா என்ன!  பெண்ணின் திருமண வயது 18, நான் உன்னை எப்போதும் கைவிட மாட்டேன் போன்ற சாதாரண வாசங்களுக்கு நடுவே எழுத்துப் பிழைகளுடன் 'சீறி வரும் பாம்பை நம்பினாலும் சிரித்து வரும் பெண்ணை நம்பாதே' என்கிற வார்த்தை இருக்கும்.  ஆட்டோ ஓட்டுநராக ஒரு புள்ளிங்கோ கட்டிங் பையன் இருந்தாலும் பரவாயில்லை, ஒரு நடுத்தர வயது ஆசாமி அமர்ந்திருப்பர்.  அதுசரி, அது அவர் சொந்த ஆட்டோவாக இருக்க வேண்டும் என்று கட்டாயமா என்ன?  நாள் வாடகைக்கு கூட எடுத்திருக்கலாம்!  நமக்குதான் எத்தனை விதமாக கற்பனை ஓடுகிறது!

இந்த உலகத்துக்கு ஏதோ ஒரு செய்தி சொல்ல ஆசைப் படுகிறவர்கள் நிறைய இருக்கிறார்கள்.  ஒரு காருக்குப் பின்னால் "செத்தே போகும் நிலை வந்தாலும் சொந்தக்காரர்கள் கிட்ட போகாதே" என்பது போன்ற வரி இருந்தது.  சரி, அதை பப்ளிக்காக போட்டு அவர் ஆறுதல் அடைகிறார்.  அப்புறமும் அவர் டாஸ்மாக்கை நாடாமல் இருந்தால் சரி!  அல்லது டாஸ்மாக்கை நாடுவதற்கு ஒரு காரணம் வைத்திருக்கிறார் என்றும் வைத்துக் கொள்ளலாம்.

சரி, நீங்கள் ஆட்டோவின்  பின்னால் பார்த்த வித்தியாசமான வாசகம் ஏதும் உண்டா?

==================================================================================================

'சினிமா பட்டி' என்கிற பக்கம் பேஸ்புக்கில் பகிர்ந்து இங்கே....

நடிகர் ஒய்.ஜி.மகேந்திரன் செவாலியே சிவாஜி குறித்த பல சுவையான நினைவுகளை இவ்வாறு பகிர்ந்துள்ளார். வாங்க பார்க்கலாம்.

நான் சிவாஜியோடு 33 படம் நடித்து விட்டேன். இதை விட எனக்கு வேறு எந்த அவார்டும் தேவையில்லை. எனக்கு ரெண்டே ரெண்டு பேர் தான் நான் வெஜ் பழக்கம் பண்ணி விட்டார்கள். ஒன்னு சிவாஜி. இன்னொன்னு கமல். சூட்டிங் சமயத்தில் சிவாஜி வீட்டுல இருந்து சாப்பாடு வரும். ஆனால் அவரு வெளியில சொல்லிக்கிறது இல்ல.

உருவங்கள் மாறலாம் படத்தில் எல்லாரும் வருவாங்க. அதுல சிவாஜி தான் கடவுள். இவருக்கு ஒரே ஒரு நாள் தான் சூட்டிங். எஸ்.வி.ரமணன் இயக்குனர். கதை வசனம் எழுதியவர் ராம்ஜி. அவர் கே.சுப்பிரமணியம் பேமிலி. ஒருநாள் எங்கிட்ட வந்து சிவாஜி, டேய் இன்னைக்கு வந்து இந்த யூனிட்ல இருக்குற அத்தனை பேருக்கும் என்னோட சாப்பாடுடான்னு சொன்னாரு. கிட்டத்தட்ட 150 பேரு இருந்திருப்போம்.

என்ன சார் திடீர்னு இப்படி சொல்றீங்க…? தெரியாது மகேந்திரா. இந்த கே.சுப்பிரமணியன் வீட்டுல நாங்கள்லாம் பசிக்கும்போது எத்தனையோ தடவை உட்கார்ந்து சாப்பிட்டுருக்கோம் தெரியுமா? அப்படி சாப்பாடு போட்டவருடா இவங்க அப்பா. எனக்கு எப்படி அந்த நன்றிக்கடனை திருப்பி சொல்றதுன்னு தெரியல.

ஏதோ என் மனசுல இவங்களுக்கு எல்லாம் சாப்பாடு போட்டா அதுல கொஞ்சம் மனநிறைவுன்னாரு. ஒரு சாதாரண மனுஷனோட மனசுல என்ன ஆசாபாசம் உண்டோ, அதெல்லாம் அவரிடம் உண்டு.

ஒண்ணே ஒண்ணு தான் அவரோட குறிக்கோள். இந்த கேமரா ஆன் ஆயிடுச்சுன்னா மக்களைக் கவரணும். அவ்வளவு தான். அவர் மத்தவங்களுக்கு நிறைய உதவி பண்ணிருக்கார். ஆனால் அதை சொல்லிக்கிறது இல்ல. சிவாஜி அரசியலுக்கு வர வேண்டாம்னு அப்பவே சொன்னேன்.

ஏன்னா அவரு எல்லாருக்கும் சொந்தம். எம்ஜிஆரே அவரோட மிகப்பெரிய ரசிகர். இவ்வாறு அவர் தெரிவித்துள்ளார். சிவாஜி எனக்கு வைத்த செல்லப்பெயர் பரதேசி. வாடா பரதேசின்னு கூப்பிட்டார்னா அன்பா இருக்காருன்னு அர்த்தம். இவ்வாறு அவர் தெரிவித்துள்ளார்.

===========================================================================================

1970 வரிவிதிப்பு முறை பற்றி தினமலரில் வந்த கட்டுரை 

வெளிநாடுகளில் செல்வந்தர்களுக்கு மிக அதிகமாக வரி விதிப்பதாகவும், இந்தியாவில் அப்படி இல்லை என்றும் பலர் கருதுகிறார்கள். ஆனால், ஒரு காலத்தில் இந்தியாவில் வருமான வரியாக 97.50 சதவீதம் செலுத்த வேண்டிய நிலை இருந்தது என்பது தெரியுமா?

செல்வத்தை பகிர்ந்தளிப்பது, வாரிசுரிமை வரியை அறிமுகப்படுத்துவது போன்ற விவாதங்கள் எழுந்து, தற்போது பரபரப்பாக பேசப்பட்டு வருகிறது. ஆனால், நம் நாட்டில் 50 ஆண்டுகளுக்கு முன்னரே, அதிகபட்சமாக 97.50 சதவீதம் வரை வரி வசூலிக்கப்பட்டுள்ளது. அப்படி ஒரு காலகட்டமும் இந்தியாவில் இருந்தது.

இந்திரா காந்தி பிரதமராக இருந்தபோது, இந்தியாவில் வருமான வரி 97.50 சதவீதம் வரை வசூலிக்கப்பட்டது. ஆனாலும், சிறிது காலத்திலேயே இந்த வசூல் முடிவுக்கு வந்துவிட்டது.

வருமானம் மற்றும் செல்வத்தில் சமநிலையை ஏற்படுத்த, வரி விதிப்பை ஒரு முக்கிய இயந்திரமாக கருதினார், இந்திரா காந்தி. இதன் அடிப்படையில், கடந்த 1970ம் ஆண்டு பிப்ரவரி மாதம், பார்லிமென்டில் பட்ஜெட் தாக்கல் செய்து அவர் உரையாற்றினார்.

சமூக நலன் என்பதே அந்த பட்ஜெட்டின் கருப்பொருளாக இருந்தது. பசுமைப் புரட்சி நடைபெற்று வந்த காலகட்டம் என்பதால், விவசாயத் துறை சார்ந்த பல்வேறு அறிவிப்புகள் பட்ஜெட்டில் இடம்பெற்றிருந்தன. இதற்கு நிதியளிக்க மிகப்பெரிய தொகை தேவைப்பட்டது.

இந்திரா காந்தி அன்னிய முதலீடுகளை ஆதரிக்கிறவராக இல்லாத காரணத்தால், வரி செலுத்தும் மக்கள் இந்த சுமையை சுமக்க வேண்டியிருந்தது. இதையடுத்து, அதிக செல்வம் மற்றும் பரிசாக பெற்ற பொருட்களுக்கான வரியை உயர்த்துவதாக அவர் அறிவித்தார்.

குறைந்தபட்சமாக 5,000 முதல் 10,000 ரூபாய் வரை வருமானம் பெறுவோருக்கு 10 சதவீதமும்; அதிகபட்சமாக 2 லட்சம் ரூபாய்க்கு மேலாக வருமானம் பெறுவோருக்கு 85 சதவீதமும் வரி விதிக்கப்படும் என அறிவித்தார்.

இதுபோக, இப்பிரிவினருக்கு 10 சதவீத கூடுதல் வரி விதிக்கப்பட்டது. இதையடுத்து, 2 லட்சம் ரூபாய்க்கு அதிகமாக வருமானம் பெறும் நபர்களுக்கான வரி விகிதம், 93.50 சதவீதத்தை எட்டியது. இதைத் தொடர்ந்து, கடந்த 1973-74 பட்ஜெட்டின் போது, அப்போதைய நிதியமைச்சர் ஒய்.பி. சவான், இப்பிரிவினருக்கான கூடுதல் வரியை, 15 சதவீதமாக உயர்த்தினார். இது வருமான வரியை 97.50 சதவீதமாக உச்சத்துக்கு கொண்டு சென்றது.

இந்த அதிகமான வரிவிதிப்பு, கடைசியில் வரி ஏய்ப்புக்கு வழிவகுத்துக் கொடுத்தது. இதனால் வரி வருவாய் குறைந்தது. இதுபற்றி ஆராய விசாரணை குழு அமைக்கப்பட்டது. வரி விகிதங்கள் அதிகமாக இருப்பதே வரி ஏய்ப்புக்கு முக்கிய காரணம் என விசாரணை குழு அதன் அறிக்கையில் தெரிவித்தது.

இதையடுத்து, அடுத்த நிதியாண்டு முதல் வரி விகிதங்கள் தொடர்ந்து குறைக்கப்பட்டு வந்தது. கடந்த 1985 - 86ம் நிதியாண்டில், அதிகபட்ச வரி விகிதம் 50 சதவீதமாக குறைக்கப்பட்டது. தற்போது நடைமுறையிலுள்ள அதிகபட்ச வரி விகிதமான 30 சதவீதம், கடந்த 1997 - 98ம் நிதியாண்டு முதல் அமலில் இருந்து வருகிறது.

============================================================================================

நியூஸ்ரூம் 

பானுமதி வெங்கடேஸ்வரன் 

News room  - 02.05.24

- சென்னை விமான நிலைய கழிப்பறை குப்பைத் தொட்டியில் இருந்த ரூ.90 லட்சம் மதிப்புள்ள தங்க கட்டிகள்.

- பீகார் மாநிலம் அராரியா பகுதியிலிருந்து, உ.பி. மாநிலம் சஹரன்பூருக்கு கடத்தப்பட்ட 95 குழந்தைகள் மீட்கப்பட்டனர்.

- 2000 ரூபாய் நோட்டுகளை திரும்ப பெறுவதாக அரசாங்கம் அறிவித்த பிறகும் கூட திருப்பதி உண்டியலில் 2000 ரூபாய் நோட்டுகளை காணிக்கையாக பக்தர்கள் செலுத்தி வருகின்றனர். அதனால் அவற்றை மாற்ற ரிசர்வ் வங்கியிடம் தி.தி. தேவஸ்தானம் சிறப்பு அனுமதி கோறி, ஐந்து தவணைகளாக அவற்றை மாற்றிக் கொள்ளும் சலுகையும் பெற்றிருக்கிறது. அதன்படி, மார்ச் 24 வரை 3.20 கோடி மதிப்புள்ள 2000 ரூபாய் நோட்டுகள் மாற்றப்பட்டிருக்கின்றன.

- சென்ற அண்டு 75000 ஊழியர்களை வேலையிலிருந்து நீக்கியிருக்கிறதாம் முன்னணி ஐ.டி. நிறுவனங்கள். அதே சமயத்தில் HCL, Tech.Mahindra போன்ற நிறுவனங்கள் வரும் 2025ல் 25000 புது ஊழியர்களை வேலைக்கு எடுக்க இருக்கின்றனவாம்.

- ஆன்லைன் விளையாட்டிற்கு அடிமையான பள்ளி மாணவனை மிரட்டி பணம் படித்தவர்கள் கைது.

- ஆனந்தராகம், பூங்கதவே தாழ் திறவாய் போன்ற பல இனிமையான பாடல்களை பாடிய பிரபல பாடகி உமா ரமணன் மே ஒன்றாம் தேதி இரவு காலமானார்.

==============================================================================================

கொரோனா சமயத்தில் செய்த வெட்டி ஆராய்ச்சி - கொரோனா பயமுறுத்தல் செய்திகளே எங்கும் கண்ணில் பட்டு கொண்டிருந்த நேரம்.....  அப்போதைய ஒரு மனமாற்றத்துக்காக ....  

============================================================================================

உற்றுப் பார்க்கும் கண்களுக்கு 

தயங்கி 

அழுவதைக் கூட 

மறைவாகத்தான் அழ வேண்டியிருக்கிறது.

மறைப்பதற்கு பல காரணங்கள் 

கண்ணீர் வெட்கம் பார்க்கிறது 

சங்கோஜம் பார்க்கிறது 

சந்தோஷங்களுக்கு 

சங்கோஜம் உண்டா?

அணை உடைக்கும் கண்ணீர் 

வரும் சந்தர்ப்பங்களும் உண்டு 

அப்போது கரை உடைந்து வரும் வெள்ளம் 

=========================================================================================================

பொக்கிஷம் :-