'திங்க'க்கிழமை : ப்ரோக்கோலி, பேபி கார்ன் சூப் - கீதா ரெங்கன் ரெஸிப்பி

ப்ரோக்கோலி, பேபி கார்ன் சூப்

வணக்கம் வணக்கம் எபி கிச்சன் பிரியர்களுக்கு!.  எபி கிச்சனுக்கு வந்து பல நாட்கள் ஆகிவிட்டது.  புதிய கணினி மாற்ற வேண்டிய சூழல் என்பதால் நான் மீண்டும் முழுமையாகத் தளம் வர இன்னும் சில மாதங்கள் ஆகலாம்.  இப்போதைக்கு எபி கிச்சன் வழியாக இந்தப் பதிவு. 

இது சொல்லும் அளவிற்கான பெரிய ரெசிப்பியும் இல்லைதான். இருந்தாலும் நான் இப்படி சும்மா ஏதேனும் செய்வதுண்டு. 

சென்னையில் 4 நாட்கள் இருக்கும் சமயத்தில் மைத்துனரின் வீட்டில் இருக்கும் கணினியில் பதிவை எழுதுவதால் வழக்கமாக நான் பயன்படுத்தும் சில பயன்பாடுகள் இல்லாததாலும்- குறிப்பாகத் தமிழ் செயலி, வெளியிட இருந்த அப்கானி நாண், கார்லிக் நாண், பனீர் அப்கானி, ஆப்பிள் டார்ட்போன்ற கொஞ்சம் ப்ராஸஸ் செய்முறைகள் பழுதான கணினி ஹார்ட் டிஸ்கில் மாட்டிக் கொண்டிருப்பதாலும் தர இயலவில்லை. வெளியூர் சென்றிருக்கும் கனினி டாக்டர் என் மற்றொரு மைத்துனர் ஊர் திரும்பிய பிறகுதான் அவற்றை காப்பி செய்ய முடியும் என்பதால் இப்போதைக்கு என் மொபைலில் எடுத்த சில படங்களுடன் - ஸ்டெப் பை ஸ்டெப்  இல்லை என்றாலும் - பதிவை ஸ்ரீராமுக்கு அனுப்பி இதோ எபி கிச்சனில் தலை காட்டியாச்சு. 

எனவே யாரையும் வம்புக்கு இழுக்காமல் குறிப்பாக பனியில் குவில்டில் புதைந்து கொண்டு ஒற்றைக் கண் போட்டு இங்கு எட்டிப் பார்க்கும் தியாகத் திலகம் அவர்களை வம்புக்கு இழுக்காமல் நல்ல பிள்ளையாகச் சொல்லிவிட்டுப் போகிறேன். (ஆமா தியாகத் திலகம்னு பட்டம் யாரு கொடுத்தாங்க? என்ன தியாகம் செய்தாங்க?!! ஏஞ்சல் விளக்கம் ப்ளீஸ்!!!!!!!! ஹா ஹா ஹா)

சரி செய்முறைக்குச் செல்வோம்.  வந்த விருந்தினரின் விருப்பத்திற்குச்  செய்யப்பட்டது. அதாவது சூப் ரொம்ப லைட்டாக இல்லாமல் கொஞ்சம் கெட்டியாக  இருக்க விருப்பம் தெரிவித்ததால்  சோள மாவு எதுவும் கரைத்து விடாமலேயே கொஞ்சம் 'திக்'காக செய்யப்பட்ட சூப்.

மிகச்  சிறிய ப்ரோக்கோலி  1

5, 6 பேபி கார்ன் 

4 ரொட்டிகள்

2 பிரிஞ்சி இலை

சிறிய துண்டு பட்டை (படத்தில் உள்ளது போல்)

இரண்டு டேபிள் ஸ்பூன் வெண்ணை

தக்காளி 2

பெரிய வெங்காயம் ஒன்று

பூண்டுப் பற்கள் 4, 5

மிளகுத் தூள் சுவைக்கேற்ப 

உப்பு தேவையான அளவு

பொதுவாக, சில சூப்பிற்கு, குறிப்பாகத் தக்காளி சூப்பிற்கு ரொட்டித் துண்டுகளை எண்ணெயில்/வெண்ணையில்  வறுத்து, பரிமாறும் போது மேலே போட்டுக் கொடுப்பது வழக்கம்.  இப்படியான காய்கறிகளில் செய்யும் சூப்பிற்குத் தேவை இல்லை என்றாலும் வந்தவர்களின் விருப்பத்திற்கு ஏற்ப பொரிக்காமல் ரொட்டி வாட்டும் கல்லில் போட்டு கொஞ்சமே கொஞ்சம் வெண்ணை போட்டு மொறு மொறுப்பாக வாட்டி துண்டுகளாக்கி வைத்துக் கொண்டேன். 

கொலாஜ் 1

ப்ரோக்கோலியை உதிர்த்து கொஞ்சம் சூடு தண்ணீரில் போட்டு கன்றாகக் கழுவிக் கொள்ளவும். புழுக்கள் இருந்தாலும் வந்துவிடும். கவனமாக ஆய்ந்து விடவும். பூக்களைச் சிறியதாகக் கட் செய்து கொள்ளவும்.

பேபி கார்னை சிறிய துண்டுகளாக கட் செய்து கொள்ளவும். (கொலாஜ் 1ல் படம் 1)

இவ்விரண்டையும் அடி கனமான பாத்திரத்தில் அல்லது வாணலியில் சிறிது வதக்கி விட்டு மூழ்கும் அளவு தண்ணீர் விட்டு கொதிக்க வைத்து வேக வைக்கவும். (இதற்கான படம் இல்லை) இல்லை என்றால் குக்கரில் ஆவியில் அவித்தும் செய்யலாம். உங்கள் விருப்பம். அப்படிச் செய்தால் பின்னர் சூப்பிற்குத் தண்ணீர் சேர்க்க வேண்டும். தண்ணீருடன் கொதிக்க வைத்தால் அப்படியே சூப்பில் சேர்த்துவிடலாம். 

வெங்காயத்தைப் பெரிய துண்டுகளாக கட் செய்து தக்காளி வெங்காயம் பூண்டு இவற்றையும் கொஞ்சம் தண்ணீர் சேர்த்து 5 நிமிடம் கொதிக்க வைத்தால் போதும். (கொலாஜ் 1ல் இரண்டாவது படம் )

கொலாஜ் 2

ஆறியதும் ப்ரிஞ்சி இலை, பட்டை சேர்த்து நன்றாக அரைத்துக் கொள்ளவும். (கொலாஜ் 2ல் பிரெட் துண்டுகளுடன் பிரிஞ்சி இலையும், பட்டைத் துண்டுகளும். படம் 1. நடுவில் உள்ள படத்தில் மேலே இருப்பது தக்காளி, பூண்டு, வெங்காயம் வைத்தது. கீழே இருப்பது வெந்த ப்ரோக்கோலி, பேபி கார்ன்) 

வாணலியில்  அரை  ஸ்பூன் வெண்ணை போட்டு அதில் அரைத்ததை போட்டு கொஞ்சமே கொஞ்சம் புரட்டிவிட்டு அதில் சிறிது தண்ணீர் சேர்த்து ஒரு கொதி வந்ததும் (கொலாஜ் 2ல் படங்கள் 3, 4, 5)  

கொலாஜ் 3

வெந்து, எடுத்து வைத்திருக்கும் ப்ரோக்கோலி, பேபிகார்ன் அதே தண்ணீருடன் சேர்த்து மேலும் கொஞ்சம் தண்ணீர் சேர்த்து சிம்மில் வைத்து சூடு செய்ய வேண்டும். தேவையான உப்பைச் சேர்க்கவும். (கொலாஜ் 3ல் படம் 1, 2, 3.)  ஒரு டேபிள் ஸ்பூன் வெண்ணை மற்றும் மிளகுத் தூளைச் சேர்த்து சிம்மில் வைத்துச் சூடு செய்ய வேண்டும். குழம்பு போல் கொதிக்க விட வேண்டாம். சூப் ரெடி.  (கொலாஜ் 3ல் படம் 4.)

பரிமாறும் போது சில ப்ரெட் துண்டுகள், விரும்பினால், மேலே  போட்டு பரிமாறலாம்.  இங்கு படத்தில் அதிகம் ப்ரெட் துண்டுகள் உள்ளன. இது வந்தவர்கள் விரும்பியதால். (கொலாஜ் 3ல் படம் 5) (ஆ!! இது ரயிலில் கிடைக்கும் சூப்பில் போடப்படும் ப்ரெட் துண்டுகள் போல இருக்கேன்னு தோணுதுதானே உங்களுக்கு?!!!!!!!ஹிஹிஹி.....மீ எஸ்கேப்.)

படத்தில் சூப் கொஞ்சம் கெட்டியாக இருப்பது போல் இருக்கலாம். பொதுவாக ஹோட்டல்களில் கிடைக்கும் சூப்பில் காய் சூப்பில் கூட காய்களை மைக்ரோஸ்கோப் கொண்டு தேட வேண்டும்.  சோள மாவு அதிகம் கரைத்து விட்டுச் செய்வார்கள். அதுதான் அதில் பெரும்பான்மையாக இருக்கும். 

நம் வீட்டில் காய்கள் அதிகம்  சேர்ப்பதால் குழம்பு போல படத்தில் தோன்றலாம். ஆனால் எடுத்துச் சாப்பிடும் போது சரியான பதத்தில்தான் இருக்கும். நல்ல சுவையாகவும் இருக்கும். இப்படி நிறைய வகை சூப் நம் கற்பனைக்கேற்ப செய்யலாம். க்ளியர் சூப்பும் செய்யலாம். இதையே தால் சூப் அதாவது பருப்பு சேர்த்த  சூப்பாகவும் செய்யலாம்...பருப்புத் தண்ணீர் மட்டும் விட்டு. வேறு காய்களிலும் செய்யலாம். விதம் விதமாக. க்ரீம் போட்டும் செய்யலாம். )

ஹூம் சாம்பார் போல செஞ்சுட்டு சூப்னு சொல்றாங்களே எங்க அம்மான்னு எங்கள் வீட்டு அழகிகள் கலாய்க்கறாங்கப்பா! (பூசார் - எங்கள் வீட்டு க்ளோயி. அடுத்து இருப்பவள் உங்கள் எல்லோருக்கும் தெரியுமே. எங்கள் கண்ணழகி!  ஆ!!!! நானே சாம்பார் போலன்னு சொல்லி எல்லார்ட்டயும் மாட்டிக்கிட்டேனோ!!!!!! ஸ்ரீராம் ஏதாவது சொல்லி என்னைக் காப்பாத்துங்க!! நீங்கதானே எபி கிச்சன் டைரக்டர்!!) ஸ்ரீராம்  மற்றும் எபி ஆசிரியர்கள், நட்புகள், பார்வையாளர்கள்  அனைவருக்கும் மிக்க நன்றி.