புதன் 200108 : கர்நாடக சங்கீதத்திற்கும், கர்நாடகத்திற்கும் என்ன சம்பந்தம்?

பானுமதி வெங்கடேஸ்வரன் : 

ஜனவரி ஒன்றாம் தேதியை புத்தாண்டு என்று ஒப்புக்கொள்ள மறுக்கிறவர்களைப் பற்றி என்ன நினைக்கிறீர்கள்?

$ உலகத்துடன் ஒத்துப் போகாமல் எம் வழி. தனி வழி என்பவர்கள். 

# ஆங்கிலத்தில் கில்ஜாய்ஸ் என்று ஒரு பிரயோகம் இருக்கிறது. தமிழில் அழுமூஞ்சி எனச் சொல்லலாமோ ?

&  யாருக்குப் புத்தாண்டு என்பதுதான் பிரச்னை. Jan 1 ஆங்கிலப் புத்தாண்டு. ஆனால் இந்தியாவில் பெரும்பாலான மக்களுக்கு  மார்ச் அல்லது ஏப்ரல் மாதத்தில்தான் புத்தாண்டு ஆரம்பம் ஆகிறது. சேட்ஜிகள் தீபாவளி நாளை, புதுக்கணக்குத் துவங்கி புத்தாண்டாகக் கொண்டாடுவார்கள். இந்தியாவின் ஒவ்வொரு பகுதியிலும் வாழும் மக்கள் சமூகம், பூமியின் சுழற்சியில் சூரியனுக்கு அருகே பூமியின் மத்தியரேகை வருகின்ற நாளில் (அதாவது சூரியன் மேஷ ராசியில் சஞ்சரிக்கும் முதல் நாளை) புத்தாண்டு எனக் கணக்கில் எடுத்துக்கொள்கிறார்கள். எல்லாம் ஏதோ ஒரு கணக்கு அவ்வளவுதான். 

                   

சென்ற ஆண்டின் சிறந்த நிகழ்வு(உலக அளவில்,இந்திய அளவில்) என்று எதை கருதுகிறீர்கள்? 

$ உலக அளவில் கிணற்றுத்தவளையால் என்ன சொல்ல முடியும்?

# இந்திய அளவில் அயோத்தியா பிரச்சினைக்கு கிட்டத்தட்ட சுமுகமாக தீர்வு காணப்பட்டது.

உலகளவில் ஜனாதிபதியைக்கூட தலையில் குட்ட முடியும் என நிரூபித்த அமெரிக்க ஆட்சிமுறை, எலக்டிரிக் கார் அறிமுகம்.
          

இந்த ஆண்டின் முதல் கேள்வியை கேட்ட வாசகி நான்தானே?

$  ..கலாம்!

# "மணி என்ன ஆச்சு" என்று யாரோ கேட்டதே நான் எதிர்கொண்ட முதல் கேள்வி.

& ஆமாம், ஆமாம். அதுமட்டுமல்ல, இந்த வருடத்தின் முதல் கேள்வி பதில் பகுதியில் இடம்பெற்றுள்ள (பதிவு + வாட்ஸ் அப் ) எல்லாக் கேள்விகளையும் கேட்டவர் நீங்கதான்!
       
பள்ளி, கல்லூரி நண்பர்கள் ரீயூனியனில் கலந்து கொண்டிருக்கிறீர்களா?
   
# ஆசை உண்டு அதிர்ஷ்டம் இல்லை. பள்ளி நண்பர்களோடு தொடர்பற்றுப் போனது ஒரு பெரிய இழப்பு.

& எனக்கும் ஆசை உண்டு. ஆனால் பள்ளித் தோழர்கள் யாரையும் வலை வீசித் தேடியும் யாரும் கிடைக்கவில்லை. 

      

கர்நாடக சங்கீதத்திற்கும், கர்நாடகத்திற்கும் என்ன சம்பந்தம்?
             
# சங்கீதத்துக்கு பீஷ்ம பிதாமகர் எனப் போற்றப் படுபவர் புரந்தரதாசர். அவர் வாழ்ந்த பிரதேசம் கர்நாடிக் ப்ளெயின் என ஆங்கிலேயர்களால் பெயரிடப் பட்ட கன்னட தேசம். பெயருக்கு இது காரணமாகச் சொல்வோருண்டு.

& சென்ற வாரம் அதிராவுக்கு அளித்திருந்த கர்ண விளக்கத்துக்கும் கர்நாடக சங்கீதத்துக்கும் தொடர்பு உண்டு. அந்தக் காலத்தில் music notations மூலம் சங்கீதத்தை யாரும் ஆவணப்படுத்தியதில்லை. 
கர்நாடக என்பதை கர்ண + ஆடக என்று பிரித்துப் பொருள் கொள்ளவேண்டும். 
(கர்ண )காதுக்கு இனிமையான சங்கீதத்தை அளிக்கின்ற (आटक ஆடக)பயணி (Traveler / wanderer) . 
அந்தக் காலத்தில் தென் இந்தியாவில் ஊர் ஊராக சுற்றித் திரிந்த தேசாந்திரிகள், கிருஷ்ணா நதிக்கும் காவிரி நதிக்கும் இடைப்பட்ட பிரதேசத்தில், அவர்களின் குருவிடமிருந்து செவி வழியாகக் கற்ற பாடல்களையும் சங்கீதத்தையும் இனிமையாகப் பாடி, சிற்றரசர்களிடமும், பேரரசர்களிடமும்  பரிசு பெற்று வாழ்ந்து வந்தார்கள். செவிக்கு இனிமையாக அந்த தேசாந்திரிகள் பாடிய சங்கீதம்தான் பிற்காலத்தில் கர்ண ஆடக சங்கீதம் என்று வழங்கலாயிற்று. 

==========================================

எதிர்காலத்தில் ஒவ்வொரு நாட்டின் பாதுகாப்புப் படையிலும் இராணுவ வீரர்களுக்கு பதிலாக சின்னஞ்சிறு துரோன்கள்தான் இருக்கும். 

Mini Drone! (சின்னஞ்சிறு ஆண் தேனீ ...... drone என்றால் சோம்பேறி என்றும் ஓர் அர்த்தம் உண்டு!) 

=====================================================

மீண்டும் சந்திப்போம். 

=====================================================