திங்கக்கிழமை : கோக்கோ ஸ்வீட் - நெல்லைத்தமிழன் ரெஸிப்பி

​

​இந்த இனிப்பு என் பையனுக்கு மிகவும் பிடித்தது. எனக்கு இதிலெல்லாம் இஷ்டமில்லை. நான் டிரெடிஷனல் இனிப்பு வகைகளை, அதுவும் தமிழ்நாட்டு பாரம்பரிய இனிப்புவகைகளைத்தான் விரும்புவேன். (மைசூர்பாக், மனோகரம், அல்வா, அதிரசம், திரட்டிப்பால் போன்று). அவனுக்காக என் ஹஸ்பண்ட், தீபாவளிக்குச் செய்தது இந்த இனிப்பு. நானும் அப்போது அங்கிருந்ததால், எங்கள் பிளாக் தி.பதிவுக்காக எல்லாவற்றையும் படம் எடுத்துக்கொண்டேன். ரெண்டு தெரு தூரத்துல ஸ்ரீகிருஷ்ணாவும், கிராண்ட் ஸ்வீட்சும், இன்னும் சிறிது தூரத்தில் அடையாறு ஆனந்தபவனும் இருக்கும்போது எதுக்கு எல்லா ஸ்வீட்சையும் மெனக்கெட்டு செய்து கஷ்டப்படணும்கறது என் கட்சி. ஆனா, அந்த அந்தப் பண்டிகைகளுக்கு முடிந்த அளவு அதற்குரிய பக்ஷணங்களை செய்துவிடவேண்டும் என்பது என் ஹஸ்பண்டின் கட்சி. உங்களுக்குத் தெரியும், சமையலறையைப் பொருத்த மட்டில், யார் சொல் நிற்கும் என்று.  

​​

தேவையான பொருட்கள்

1 ½ (ஒன்றரை) கப் பால் பவுடர் – நாங்க இங்கிருந்து கொண்டுபோயிருந்த அல்மராய் பால் பவுடர் உபயோகப்படுத்தினோம்.

1 கப் கும்பாரமா ஜீனி

½ (அரை) கப் தண்ணீர்

¼ (கால்) கப் வெண்ணெய்

4 மேசைக்கரண்டி கோக்கோ பவுடர்

எப்படிச் செய்யறதுன்னு பார்த்துடலாமா?

முதல்ல பால் பவுடர் மற்றும் கோக்கோ பவுடரையும் ஒரு பாத்திரத்தில் போட்டு நன்றாக கலக்கிவையுங்கள்.

ஒரு கடாயில் ஜீனியும் தண்ணீரும் சேர்த்து ஜீனிப் பாகு தயார் செய்யுங்கள். ரொம்ப திக்கான பாகு (பக்கத்துல கொஞ்சம் தண்ணீர் உள்ள கப் வைத்துக்கொண்டு, அதுல ஒரு துளி பாகைப் போட்டீங்கன்னா அது உடனே உருண்டையா உருட்டற மாதிரி ஆகணும். அப்படீன்னா நல்ல பாகா ஆகணும்)

ஜீனிப் பாகு தயாராகும்போதே ஒரு தட்டுல கொஞ்சம் நெய் தடவி ரெடியா வச்சுக்குங்க.

பாகு ரெடியானதும் அதில் வெண்ணெயைப் போட்டுவிட்டு, அடுப்பை அணைத்துவிடவும்.

கடாயில், கலந்துவைத்துள்ள பால்பவுடர்+கோக்கோ பவுடர் கலவையை கொஞ்சம் கொஞ்சமாக இட்டு நன்றாகக் கிளறுங்கள் (ஞாபகம் இருக்கட்டும், நாம் அடுப்பை அணைத்துவிட்டோம்). கொஞ்சம் வேகமாகக் கலந்து இந்த மிக்ஸை அப்படியே தட்டில் விடவும்.

மேல் பகுதியை நல்லா ஒரு கரண்டியால் அழுத்தி, ஸ்மூத்தாக இருக்கும்படி செய்துகொள்ளவும்.

கொஞ்சம் சூடு குறைந்ததும் கத்தியை வச்சு துண்டங்களுக்காக கோடு போட்டுக்கொள்ளுங்கள். நல்லா ஆறின பின்பு, அதனை வெட்டி எடுத்துவிடலாம்.​

என்ன தவறுகள் வரலாம்?

ஜீனிப் பாகை ரொம்ப கெட்டியாக்கினோம்னா, பால்பவுடர் மிக்ஸ் சேர்க்கும்போது தட்டில் பரப்பும்விதத்தில் அமையாதுபோகும். அப்படி இருந்தால் கொஞ்சம் வென்னீர் விட்டுக்கொள்ளலாம். இல்லையென்றால், பால்பவுடர்+கோக்கோ மிக்ஸை கொஞ்சம் குறைவாகப் போட்டுக்கொள்ளலாம்.

ஜீனிப் பாகு கெட்டியாவதற்குக் கொஞ்சம் முன்பு தவறுதலா எடுத்துட்டோம்னா, மிக்ஸ் சேர்த்தபின்பு, அது கட்டியாக தட்டில் ஆறுவதற்கு கொஞ்சம் அதிகமான நேரம் பிடிக்கும். அதுவரை உங்க பசங்க ஸ்வீட்டை எடுக்காமல் பார்த்துக்கணும்.

இதேபோல, கோக்கோ பவுடருக்குப் பதில், ஹார்லிக்ஸையோ போர்ன்விட்டாவையோ வைத்தும் செய்யலாம்னு எனக்குத் தோணுது.

நான் சாம்பிளுக்கு ஒரு ஸ்வீட் மட்டும் சாப்பிட்டுப் பார்த்தேன். எனக்கு மனசுல, இந்த ஸ்வீட், சாக்லெட் போன்று (அந்த வகையான சுவை) இருப்பதால் பசங்களுக்குப் பிடிக்கிறது என நினைத்துக்கொண்டேன். என் பையனுக்கு ரொம்பப் பிடித்திருந்தது. நீங்களும் உங்கள் பசங்களுக்குச் செய்துதாருங்கள்.

அன்புடன்

நெல்லைத்தமிழன்

தமிழ்மணம்.