கண் காணாத இயற்கை இடத்திற்குச் செல்லவேண்டும் என்ற ஆசை இருக்கிறதா? + சரோஜாதேவி தொடர்கதை பகுதி 19.

 

கேள்வி பதில்கள் : 

நெல்லைத்தமிழன் : 

1 பெரிய புகழ் வெளிச்சத்தில் இருந்துவிட்டு, அந்த புகழ் வெளிச்சம் மறைந்ததும், பிறரால் ஒதுக்க அல்லது உதாசீனப்படுத்தப் படும்போது அவர்கள் உள்ளம் எப்படி இருக்கும்? ஒரு தடவை பி.பி.ஸ்ரீநிவாஸ் பேச்சை ஆரம்பித்தவுடன் உடனே முடிக்கச் சொன்னதைக் கேட்டு அவர் வருத்தப்பட்டதை காணொளியிலோ இல்லை தொலைக்காட்சியிலோ பார்த்ததனால் இந்தக் கேள்வி  

#  புகழ் என்பது ஒரு போதை மாத்திரை.  கிக் இறங்கினால் அடுத்த டோஸ் ஏற்றிக் கொள்ளத் தோன்றும்.  அடுத்த டோஸ் கிடைக்கும் வரை பிரச்சனை இல்லை. 

ஆனால் பாதாம் அல்வாவே ஆனாலும் (இந்த பாதாம் அல்வா என்ன உயர்த்தியோ அந்த கடவுளுக்குத்தான் வெளிச்சம்.  என்றாலும் வேற நல்ல உதாரணம் கிடைக்கவில்லையே என்ன செய்ய ? ) தினமும் மூன்று வேளை 30 நாள் சாப்பிட்டால் அதற்குப்பின் அதன் மூஞ்சியில் முழிக்கத் தோன்றுமா என்ன ? 

" All good things must come to an end and even the best of friends will have to depart" என்று ஒரு அருமையான பழமொழி ஆங்கிலத்திலே இருக்கிறது. 

புகழ் வெளிச்சத்திலிருந்து நாம் வெளியேற்றப்படும்  தருணம் வந்துவிட்டது என்று தெரியும்போது மனம் உடைந்து போவது இயற்கைதானே.  

ரொம்ப முயற்சி எடுத்து அந்த புகழையும் பெயரையும் தக்க வைத்துக் கொள்ளப் போராடி வெற்றி பெற்றவர்களில் அமிதாப் பச்சனையும் நம்ம ரஜினிகாந்த்தையும் உதாரணமாகச் சொல்லலாம். 

ஆனால் எல்லாருக்கும் அந்த நல் வாய்ப்புக் கிடைப்பதில்லை.  முயற்சிகள் தோல்வியுறும்போது சலிப்பு மேலிட்டு தம் வாழ்வை நாசமாக்கிக் கொண்டவர்களும் உண்டு. இதற்கு உதாரணம் சொல்ல எனக்கு மனம் இல்லை. 

பொது வெளியில் புகழ்பெற்ற ஒருவர் தாம் அடையாளம் காணப்படாத போது மிகவும் நொந்து நூலாகிப் போகிறார். அளவுக்கு மிஞ்சினால் அமிர்தமும் விஷம் என்பதற்கு இதைவிட சிறந்த உதாரணம் வேண்டுமா என்ன ?

2.இமயமலை அல்லது வேறு கண் காணாத இயற்கை இடத்திற்குச் செல்லவேண்டும் என்ற ஆசை இருக்கிறதா? பத்து நாட்களாவது இயற்கையோடு ஒன்றிய வாழ்க்கையை அனுபவிப்போம் என்று தோன்றியிருக்கிறதா?  

# நிச்சயம் பலமுறை தோன்றியிருக்கிறது. காஷ்மீர், மானசரோவரம், இப்படிப் பல இடங்கள்.

& முன்பு தோன்றியது உண்டு. இப்போ எல்லாம் தோன்றுவது இல்லை. அங்கே எல்லாம் மெடிக்கல் ஷாப் இருக்குமா, எனக்கு வேண்டிய மருந்துகள் கிடைக்குமா என்ற சந்தேகம்தான் காரணம்! 

3.தம்முடைய குழந்தைகளுக்குத் திருமணம் ஆகிவிட்டால், ஒருவர், என்ன என்னவற்றை விலக்க வேண்டும்? எதில் எதில் தலையிடக் கூடாது? 

# அவர்களைப் பொறுப்புள்ளவர்களாக நாம் வளர்த்திருந்தால் அவர்களுக்கு Sovereign Democratic Republic அந்தஸ்தைக் கொடுத்து, ஒதுங்கி விட வேண்டும்.

4.நாம் நம் பெற்றோரிடம் கொஞ்சம் அடங்கி இருந்தது போல, பொறுமை காத்தது போல, இப்போதைய தலைமுறை இருக்கிறார்களா? இல்லை நாமே அப்படி இருந்ததில்லையா? 

# நாம் அப்படி நினைப்பது உண்மைதான். ஆனால் உண்மையில் நாம் அப்படி இருந்தோமா என்பது கேள்விக்குரியதாகத்தான் நான் நினைக்கிறேன்.  நம் பெற்றோர் இதை ஆமோதிப்பார்களானால் அதை நம்பலாம்.

5.நம்முடனேயே நம் பையன் இருக்கவேண்டும் (திருமணம் ஆன பின்பும்) என்று எண்ணுவது சரியா இல்லை அவன் வாழ்க்கையை அவனே வாழ வேண்டும், நாம் அவனுடன் சேர்ந்து இருந்து தொந்தரவாக இருக்கக் கூடாது என்று எண்ணுவது நல்லதா?

# இரண்டுமே ஒவ்வொரு சூழ்நிலையில் சரியாக இருக்கும்.  பையன் பெண் இவர்களின் மனப்பக்குவம், பொருளாதார நிலை, பெற்றோர்களின் வயது- உடல் வலு- பணவசதி என்று பல காரணிகள் இருக்கின்றன.

= = = = = = = = =

படமும் பதமும் : 

நெல்லைத்தமிழன் : (கேள்விகள்!) 

வநதே பாரத்தில் திருச்சியிலிருந்து பெங்களூர் செல்லும்போது பச்சூர் இரயில் நிலைய மேடையில் கண்டது. இதைப் பார்த்ததும் மனதில் கவிதை தோன்றுகிறதா? எழுதுங்களேன். 

இந்தச் செய்தியை தினமலரில் பார்த்தேன். என்ன இப்படிப் பண்ணறாங்க தவறல்லவா என்று என் மனதுக்குப் பட்டது. மனிதர்கள் தங்கள் உடலில் அலகு குத்திக்கொள்வது, கத்தியால் வெட்டிக்கொண்டு இரத்தம் சிந்துவது (கோவை சௌடேஸ்வரி அம்மன்) போன்றவைகளே கலவரப்படுத்தும். விலங்குகளுக்குமா? உங்கள் கருத்து என்ன?

பானுமதி வெங்கடேஸ்வரன் : 

பெங்களூரு சர்வதேச விமான நிலையத்தின் வருகை(arrival) பகுதியின் வெளிப்பகுதியில் இருக்கும் சிற்பம்.       

இதன் வயிற்றுப் பகுதிக்குள் சென்று புகைப்படம் எடுத்துக் கொள்கிறார்கள். 

இந்தியாவின் பல்வேறு பிராந்திய மொழி எழுத்துக்களும், எண்களும் இந்த சிற்பத்தில் இருக்கின்றன. 

பெங்களூரின் தொழில்நுட்ப வளர்ச்சியால் இங்கு எல்லா மாநில மக்களும் வசிப்பதைத்தான் இந்த சிற்பம் குறிக்கிறது என்று தோன்றியது. என் யூகம் சரிதான் என்று அருகிலிருந்த அறிவுப்பு பலகை சொன்னது.

=================================================================================

ஸ்ரீராம் :

ஆமாம் பிரதர்... ஒரு காது இல்லை... என்ன செய்யச் சொல்றீங்க...?

========================================================================

மனசாட்சியம் - 7

KGY Raman

சில நாட்களுக்கு முன் இந்தப் பகுதியில் வெளியான பதிவில் பல எழுத்துப் பிழைகள் இருப்பதைப் பார்த்து, அவற்றைத் திருத்தப் புகுந்து,  அப்போதும் ஒரு சில மட்டுமே திருத்தம் பெற்று கவனத்திற்குத் தப்பிய வேறு சில  இருந்ததையும்  கண்டு வியப்புற்றேன்.

தானியங்கித் தட்டச்சு செய்யும் தவறுகள் சில சமயம் சொல்ல வந்த  பொருளையே முற்றிலும் வேறாக ஆக்கிவிடும்.  

என் கவனக்குறைவு எவ்வளவு அதிகம் இருக்கிறது என்பது இப்போதுதான் எனக்கு உறைத்தது. இனி வரும் நாட்களில் எந்த அளவுக்குத் தவறுகள் இல்லாமல் பதிவிடுகிறேன் என்பதைப் பார்ப்போம். 

அச்சுப்பிழை என்பது காலம் காலமாக இருந்து வருகிறது. டைம்ஸ் பத்திரிகையில் காணப்பட்டஅச்சுப் பிழைகளைத் தொடர்ந்து வாசகர்கள் ஆசிரியருக்குக் கடிதங்களாக எழுதிக் கொண்டிருந்ததைப் பார்த்து அந்தப் பத்திரிகை  இப்படி ஓர் அறிவிப்பை வெளியிட்டதாம்:

" இன்றைய இதழில் சில அச்சுப் பிழைகள் வேண்டுமென்றே உங்களுக்காகச் செய்யப்பட்டுள்ளன. அச்சுப்பிழைகளைக் கண்டு, அவற்றை எமக்குச் சுட்டிக்காட்டி ஆனந்தமடையும் நமது அன்பான வாசகர்கள் ஏமாற்றம் அடையக் கூடாதே என்கிற நல்லெண்ணத்தில் இந்தப் பிழைகள் செய்யப்பட்டுள்ளன. "

இது ஒரு சமாளிப்பு யுக்தி தான். என்னதான் எச்சரிக்கையாக இருந்தாலும் பிழைகளை அறவே நீக்க முடியவில்லை என்பதே நிதர்சனம்.

***

"எப்பொருள் யார்யார்வாய் கேட்பினும் அப்பொருள் மெய்ப்பொருள் காண்பது அறிவு" 

இப்படி ஒரு குறள்  இருப்பதாக எனக்கு நினைவு. சொற்களில் ஏதோ சிறு பிழைகள் இருக்கலாம் எனினும் பொதுவான பொருள் சரியாகவே சொல்லி இருக்கிறேன். 

யார் சொன்னால் என்ன, அதில் இருக்கும் உண்மையைப் புரிந்து கொள் என்பது சொல்வதற்கு எளிது.  நடைமுறையில் நம் மனப்பான்மை வேறு விதமாக இருக்கிறது. 

நான் தினசரி ஒரு அரை மணி முக்கால் மணி நேரம்  வேதாந்த வகுப்பிலே ஆன்லைனில் பங்கு கொண்டு வருகிறேன். கடவுள், ஆச்சாரம், அனுஷ்டானம், நமது சாஸ்திரங்கள் என்று பரவலாகப் பல விஷயங்களைப் பற்றி இங்கே சொல்லப்படும். இங்கு குரு நாதராக இருப்பது நான் இல்லை. 

அமெரிக்காவில் இருக்கிற ராமகிருஷ்ண மடத்தில் சர்வப்பிரியானந்தா என்று ஒரு சாது இருக்கிறார். வேதாந்த பரமான பல விஷயங்களைப் பற்றி அவர் மிக விளக்கமாக, மிகத் தெளிவாக ஆங்கிலத்தில் பேசி அவை யாவும் யூடியூபில் காணக் கிடைக்கின்றன. பகவத் கீதை, உபநிஷதங்கள் பற்றி அற்புதமாகப் பேசியிருக்கிறார். 

சர்வ பிரியானந்தரின் இந்தப் பேச்சுக்களை நாம் அனைவரும் பார்த்துப் பயனடையலாம் என்று எங்கள் வகுப்பில் நான் சொன்ன போது, குருநாதருக்கு அது உவப்பாக இல்லை. " ராமகிருஷ்ண மடத்தின் வழி வேற,  நாம் இங்கு செய்வது வேற " என்கிற ரீதியில் எனக்குப் பதில் சொல்லி, அதை முற்றுமாக ஒதுக்கி வைத்து விட்டார். 

வேதாந்தத்துக்கே இந்த கதி என்றால், இலக்கியம், அரசியல், சினிமா இந்தக் களங்களிலெல்லாம்  பிடித்தது பிடிக்காதது என்பது எந்த அளவுக்கு நல்ல விஷயங்களைப் புறம் தள்ளும்  என்பதை நாம் சிறிது யோசனை செய்து பார்க்க வேண்டும்.

" ரிஷிமூலம்,  நதிமூலம் பார்க்கக் கூடாது "  என்று சனாதனம் உபதேசிக்கிறது. (சனாதனம் என்ற சொல்லைக் கேட்ட உடனேயே நம்மில் பலர் நிமிர்ந்து உட்கார்ந்து ஒரு பெருமூச்சு விட்டுக் கொள்வோம் .  பாவம் இந்த சனாதனம். அதற்கு இப்படி ஒரு அவஸ்தை வந்திருக்க வேண்டியது இல்லை.)

விஷயம் என்ன என்று கவனிக்க வேண்டுமே தவிர, அதைக் கொண்டு வந்தது யார், அவர் என்ன உடுத்தி இருந்தார் என்பது போன்ற அனாவசிய ஆராய்ச்சிகள் செய்யக்கூடாது. அதனால் பயனேதும் இல்லை."  இதுதான் நமது பாரம்பரியம் நமக்கு சொல்லிக் கொடுத்திருக்கிற விஷயம். சொல்லிக் கொடுத்ததை எல்லாம் மனதில் வாங்கி அதை நடைமுறைப்படுத்தும் நல்ல குணம் நமக்கு இருந்திருந்தால் நம் சமூகம் எவ்வளவோ சிறப்புகளை அடைந்திருக்கும்.

= = = = = = = = = = = = = = = = = = = = = = = = = = = = =  = = = = =

KGG பக்கம் : 

சரோஜாதேவி தொடர் கதை 

சென்ற வாரம் - சுட்டி : பகுதி 18: ஆனந்த் அனுப்பிய வீடியோ 

இனி 

இந்த வாரப் பகுதி. 

பகுதி 19: " விமலாவை அழைப்போம்" 

பாவனா : " பாஸ் - இது எதிர்பாராத திருப்பமாக இருக்கே? ஆனந்த் - வீணா கல்யாணம் நின்றுபோய் விடுமோ? விமலா - பாபா லவ் ஸ்டோரி என்ன ஆகும்? என்ன செய்யலாம்? 

நாநா : " நாம் அவசரப்பட வேண்டாம். ஆனந்துக்கு, நான் இது பற்றி முழுவதும் விசாரித்து சொல்லும் வரை இந்த வீடியோ பற்றி எதுவும் முடிவு எடுக்காதே என்று செய்தி அனுப்பியுள்ளேன். " 

பாபா : " இது ஒரு இக்கட்டான சூழ்நிலை. இது பற்றி வீணா வீட்டில் யாரிடம் கேட்டாலும் அது பெரிய பிரச்சனை ஆகிவிடும். இப்படி ஒரு நிச்சயதார்த்தம் நடந்திருந்தாலும் ஒரு வகை பிரச்சனை.  இந்த நிச்சயதார்த்தம் fake வீடியோ என்றாலும் இதை வைத்து ஆனந்த் வீட்டார் சந்தேகப்படுகிறார்கள் என்று வீணா வீட்டில் நினைத்தாலும் அதனால் பிரச்சனை. " 

நாநா : " அப்போ நாம் என்னதான் செய்வது?" 

பாபா : " நான் இதற்கு ஒரு வழி யோசிக்கிறேன். எப்படியாவது விமலாவிடமிருந்து இந்த நிச்சயதார்த்த வீடியோ பற்றி தகவல் பெறுவோம். " 

பாவனா : " பாபா - அடிக்கடி விமலாவிடம் பேச என்னிடம் சில ஜெர்மன் மொழி வார்த்தைகள் கேட்டு நானும் சொல்லியிருக்கின்றேனே ஞாபகம் இருக்கா ? "

பாபா : " ஆமாம் - ஞாபகம் இருக்கு. அதுக்குத்தான் நான் உன்னிடம் ஜெர்மன் பாஷை கற்றுக்கொண்டேன். விமலா படிக்கும் காலத்திலேயே ஜெர்மன் பாஷை கற்றுக்கொண்டாள் என்று தெரியும். அதனால் அவளுடைய ஜெர்மனி ஹெட் ஆபீஸ் மீட்டிங் கால் வரும்போதெல்லாம் ஹெட் ஆபீஸில் இருப்பவர்களுடன் உரையாட விமலாவின் presence அவளுடைய மேலதிகாரிக்கு உதவியாக இருக்குமாம். நான் அவங்க வீட்டுக்குப் போகும்போதெல்லாம் - “Hast du gefrühstückt?”, "Wie laufen die Hochzeitsvorbereitungen?" என்றெல்லாம் கேட்டு அவளை இம்ப்ரஸ் செய்வேன். " 

நாநா : " ஓ ! இவ்வளவு சமாச்சாரம் நடந்துகிட்டு இருக்கா! பாவனா இந்த இரண்டு கேள்விகளையும் சென்னைத் தமிழில் மொழி பெயர்த்து சொல் " 

பாவனா : " நாஸ்தா துன்னியா ?" "கண்ணால ஏற்பாடெல்லாம் எப்பூடி போய்கினு கீது? " 

 நாநா : " ஓ ! இதுதானா! தொடர்ந்து அரைமணி நேரம் ஜெர்மன் பாஷை நான் பேசினா பல்லு எல்லாம் உடைஞ்சு கொட்டிடும் போலிருக்கு! " 

பாபா " சரி நாநா - நாளைக்கு நான் ஏதாவது ஐடியா செய்து விமலாவை நம்ம ஆபீசுக்கு கூப்பிட்டு வருகிறேன். நாம அவ கிட்டே பக்குவமா இந்த வீடியோ பற்றி விசாரிப்போம். " 

நாநா : " ஓ கே பாபா - விஷ் யு ஆல் தி பெஸ்ட் " 

(தொடரும்)