வெள்ளி வீடியோ 20180223 : அடி இரவில் மலரும் பூவே - எந்தன் இளமை பருகும் தேனே

     "மத்தியானம் பன்னிரண்டு மணி, ஒரு மணி இருக்குங்க...   வெய்யில்...   அப்போ என் காதலியைப் பார்த்தேன்..."  என்றோ  

     "காலை எழுந்து பல்விளக்கும் முன்னரே காதலியைப் பார்த்தேன்" என்றோ யாரும் சொல்வதில்லை!  ஏனோ காதலியை எல்லோரும் மாலையில் - அதுவும்  அந்தியும் மாலையும் கூடும் வேளையிலேயே - சந்திக்க விழைகிறார்கள்!  முன்னது கடுப்பு.  பின்னது நடக்க முடியாதது என்பதால் (பெரும்பாலும்)

     இன்று இளமாலை நேரம் வந்த ஒரு காதலியைப் பார்ப்போம்.  

     அனுராதா ரமணன் எழுதிய கூட்டுப்புழுக்கள் நாவல் படமானது.  அதில் வந்த பாடல்.  ஆர் ஸி சக்தி இயக்கம்.  

      புலமைப்பித்தன் எழுதி, எம் எஸ் விஸ்வநாதன் இசையில் எஸ் பி பி பாடிய பாடல்.  எம் எஸ் விஸ்வநாதனும் இடையிடையில் ஸ்வரம் பாடுவார்.  வெளிவந்த ஆண்டு 1987. 

     ஒரு சிறு புதிர்.  ரகுவரன் கையில் வைத்திருக்கும் புத்தகம் என்ன?

     ரகுவரன்-அமலா காதலர்களாக நடித்த படம்.  இதில்தான் ரகுவரனுக்கு அமலா மேல் காதல் வந்தது போலும்.  எப்போதோ அவர் தயாரித்த ஒரு குமுதம் இதழில் சொல்லி இருந்ததாய் நினைவு.  அமலா நாகார்ஜுனைக் காதலித்து கடிமணம் புரிந்தார்.  (இன்று அவர் மகன் நாகசைதன்யா சமந்தாவை காதலித்து மணந்திருக்கிறார்)

      அழகான ரகுவரன் - அழகான அமலா.   தாவணி அணிந்த அமலா.  காட்சியை ரசிக்கலாம்.  ரகுவரனுக்கு காதல் உணர்வை முகத்தில் காட்டவே தெரியவில்லை!  அழகாய் இருந்தால் போதுமா!   ஆனால் எஸ் பி பி குரலின் இனிமையை ரசிக்க காட்சியைப் பார்க்காமலும் ஒருமுறை கேட்கவும்!  

நித்தம் நித்தம் என் கண்ணோடு இன்பக்கனா 

நெஞ்சம் எங்கும் வெண் பன்னீரைச் சிந்தும் நிலா 

இளமாலை நேரம் வந்தாள் விழியோரம் ஏதோ சொன்னாள் 

எதையோ நினைத்தாய்  சிரித்தாய் ஓடினாய் 

மண்ணிலே வீடுகட்டி ஆடவந்தாய் நேற்று நெஞ்சிலே 

கூடுகட்டி வாழவந்தாய் இன்று 

அந்த மலரும் நினைவு தோன்றும் 

அதில் உலகம் மறந்து போகும் 

அந்த உறவு தொடர வேண்டும் இன்பக் 

கனவு பலிக்க வேண்டும் 

மின்னலோ சேலைகட்டி வீதி எங்கும் போகும் அம்மம்மா 

பார்த்திருந்தால் கண்கள் பட்டு போகும் 

இது பருவம் அளித்த சீரோ  உன்னைப் 

படைத்த கலைஞன் யாரோ 

அடி இரவில் மலரும் பூவே  - எந்தன் 

இளமை பருகும் தேனே