என் கேள்விக்கென்ன பதில்? புதன் 180606

கடி :      
  

துரை செல்வராஜூ :

அதெப்படி ஒரே நேரத்தில ரெண்டு கருடன்!?....

ப: ஆனாலும் கொத்திச்சென்றது ஒன்றுதானே!


கீதா சாம்பசிவம் :

எனக்குச் சில, பல சமயங்களீல் கிழமை என்னனு குழப்பம் வருது! நேத்திக்குச் சனிக்கிழமைன்னே நினைச்சுட்டு இருந்தேன். :)))) அப்படிப் பார்த்தா இன்னிக்கு ஞாயிற்றூக் கிழமை தானே! ஹூம், புதன் கிழமைனு சொலறீங்க! :))))))) கேஜிஜி சார், இந்தக் கேள்விக்கு என்ன பதில் சொல்லப் போறீங்க? 

ப: நீங்க என்ன வேண்டுமானாலும் நெனச்சுக்குங்க! என்னை ஏன் வம்புக்கு இழுக்குறீங்க! 

கௌதமன் சார், வெங்காயத்தோட மணத்தக்காளி வற்றல் போட்ட குழம்பை அப்புறமா என்ன செய்தீங்க?

ப: சுத்தமா மறந்து போயிட்டேன். ஃபிரிட்ஜ் கீழ்த்தட்டு ஈசான்ய மூலையில், இன்னமும் உறங்கிக் கொண்டிருக்கிறது!

கௌதமன் சார், தியாகராஜரைச் சந்திக்க ராமர் குடும்ப சமேதரா வந்தப்போ அவர் மனைவி உள்ளே இருந்து எட்டிப் பார்ப்பதைப் பார்த்ததும் நீங்க என்ன நினைச்சீங்க? பெண்களுக்கு இழைக்கப்படும் அநீதின்னா? அதோட அந்த வாட்சப் பதிவில் அப்பாதுரை தியாகராஜர் மனைவி வரும் வரை காத்திருக்காமல் கிளம்பி ராமரோடு போயிட்டார்னு சொல்றார். ஆனால் தியாகய்யர் படத்திலும் ஒரு சில தியாகய்யர் வாழ்க்கைச் சரிதங்களிலும் சரி அவர் மனைவி முன்னரே இறந்துவிட்டதாகச் சொல்றாங்க! இது குறித்து நீங்க என்ன சொல்றீங்க?

ப: கதவுக்குப் பின்னே நிற்பவரின் தலை நரைத்து இருக்கிறது. அவர், தியாகராஜரின் அம்மா சீதம்மா. (கணவரை இழந்தவராக இருப்பாரோ? கதவுக்குப் பின்னால் மறைந்திருப்பதால் இந்த சந்தேகம் )
தியாகராஜரின் முதல் மனைவி, பார்வதி. பார்வதிக்குக் குழந்தைகள் கிடையாது. தியாகராஜரின் இருபத்துமூன்றாம் வயதில், பார்வதி காலமானார். பிறகு தியாகராஜர், இரண்டாம் தாரமாக, பார்வதியின் தங்கை கமலாம்பாளை மணந்தார். அவர்களுக்கு சீதாலக்ஷ்மி என்ற பெண் பிறந்தார். சீதாலக்ஷ்மி திருமணம் செய்துகொண்டது, அகிலாண்டபுரம் குப்புசாமி (அ)ய்யா. அவர்களுக்குப் பிறந்த மகன் பஞ்சாபகேசய்யா. இந்தப் பஞ்சாபகேசய்யா சிறு வயதிலேயே இறந்துபோனதால், தியாகராஜர் சந்ததி, அவரோடு முடிவுக்கு வந்தது. 


ஏகாந்தன் :

கீ சு அம்மா .. சரி, தெரிந்து கொண்டீர்! கமுக்கமா இருக்கலாமுல்ல? படம் போட்டு வேற மினுக்கணுமா, சின்னப்பசங்க உலாவுற எடத்துல?

ப: நீங்க எழுதியதைப் படித்தவுடன், இந்தப் பாடல் நினைவுக்கு வந்தது! 

(இந்தப் பாடல் காட்சியில் வேறொரு சிறப்பு உண்டு. இதைப் பார்ப்பவர்கள், படிப்பவர்கள் அது என்ன என்று கூறுகிறார்களா பார்ப்போம்!) 

கீதா ரெங்கன் : 

நீங்கள் எந்த டிஷ் சமைப்பதில் கில்லாடி?

ப: ரா டிஷ். 

உங்கள் சமையலுக்கு வீட்டில் வரவேற்பு எப்படி? குறிப்பாக பாஸ் எனப்படும் மனைவி, மற்றும் பிள்ளைகள் (கௌ அண்ணா நீங்களும் ஸ்ரீராமும் சமைப்பீர்கள் என்று தெரியும்.!!!)

ப: மனைவி என் சமையலை சாப்பிடுவார். நூறு விஷயங்களில் ஏதோ ஐந்து / ஆறுதான் பாராட்டுப் பெறும். மற்றவை ... பெயில் மார்க்.


திங்க பதிவுக்கு வருவதை முயற்சி செய்ததுண்டா? குறிப்பாக பூசாரின் ரெசிப்பியை??? அதுவும் அவரது ஃபேமஸ் ரெசிப்பிகளான குழை சாதம், கத்தரிக்காய் ரெசிப்பி செய்ய முயற்சியேனும் செய்ததுண்டா? 

ப : பூசாரின் பாஷை எனக்குப் புரியாது. நெ த சமையல் குறிப்புகள் சிலவற்றை ( உதாரணம் : மாங்காய் சாதம்) முயற்சி செய்து, வெற்றி கண்டிருக்கிறேன்.

துளசிதரன்

நீங்கள் சமீபத்தில் பார்த்த திரைப்படம்? 

ப: அமேசான் பிரைமில், எம் எஸ் தோனி. 

பிடித்தது பழைய படங்களா? புதிய படங்களா?

ப: பல பழைய படங்கள்; சில புதிய படங்கள்.

அதிரா :

கெள அண்ணன் காத்து எப்பவும் ஒரே மாதிரி அடிக்காது என்பினமெல்லோ?.. இப்போ புதன் கிழமைப் பதிவு பார்த்து அது உண்மை என நம்புறீங்களோ?

ப: நான் கையில் கறுப்புக் கயிறு கட்டியுள்ளேன். காத்து, கருப்பு எதுவும் அடிக்காது. 

ஏஞ்சல் :

1,யார்கிட்டயும் சொல்லக்கூடாதுன்னு ப்ரண்ட் சொன்ன ரகசியத்தை பத்திரமா பாதுகாத்தது உண்டா ? அது என்ன ரகசியம் ?

ப : உண்டு. அது ரகசியம். 

2,100 வருஷத்துக்கு முன் கௌதமன் சார் , 75 வருஷத்துக்குமுன் ஸ்ரீராம் எப்படி இருந்திருப்பாங்க ?

ப: அகத்தியர் நாடி ஜோதிடம் பார்த்தால்தான் தெரியும்! என்னுடைய போன பிறவியில் நான் ரமண மகரிஷியாக இருந்தேனோ என்று சிலசமயம் தோன்றும்! 

3, உங்களுக்கே உங்கள்கிட்ட ரொம்ப பிடிச்ச விஷயம் எது ?

ப : என்னுடைய நகைச்சுவை உணர்வு. 

4,10 தடவைக்கும் மேலே நீங்க அதிகமுறை பார்த்த திரைப்படம் ?

ப : காசு கொடுத்து எந்தப் படத்தையும் இரண்டாவது முறை பார்த்ததில்லை. ஒரு முறை என்னுடைய அண்ணன் வற்புறுத்திக் கூப்பிட்டதால், சுமதி என் சுந்தரி படத்தை, அவர் செலவில், இரவு நேர, இரண்டாம் காட்சி பார்த்தேன். டி வி யில் என்றால், அந்தக் காலத்தில் TCP (Tambaram, Chrompet, Pallavaram?) சானலில் "காதலா காதலா " படத்தை நாற்பது முறை பார்த்திருப்பேன். எவ்வளவு முறை பார்த்தாலும் அலுக்காத படங்கள் வரிசையில், காதலிக்க நேரமில்லை, திருவிளையாடல், தில்லானா மோகனாம்பாள், நாயகன், மைக்கேல் மதன காமராஜன் ஆகிய படங்களை சொல்லலாம். 

5, ரீசன்ட்டா எப்போ செல்பி எடுத்தீங்க ? யார் கூட ?

ப: மே 22 ஆம் தேதி. கேள்வி பதில் பகுதிக்காக. கூட யாரும் இல்லை. (நல்ல வேளை ... இருந்திருந்தா பயந்துபோயிருப்பாங்க!)

6, சின்ன பிள்ளைலருந்து இப்போ வரைக்கும் நீங்க உடைச்ச விலையுயர்ந்த பொருள் எது ?

ப: ஜூனியர் பாலிடெக்னிக் படித்த காலத்தில், கார்பென்ட்ரி பகுதியில், மரத்தை இழைத்துவிட்டு, Jack Plane ஐ மரக்கட்டையின் மீது நிறுத்தி இருந்தேன். நண்பன் குணசேகரன் என் சட்டைப் பையில் இருந்த பேனாவையோ எதையோ எடுக்க முனையும்பொழுது, தடுக்கப் போன என் கையும், அவன் கையும் பட்டு, UK make Jack Plane கீழே விழுந்து இரண்டு துண்டுகளாக சிதறிவிட்டது. எனக்கு Rs 39.80 அவனுக்கும் Rs 39.80 அபராதம் விதித்தார்கள், வலிவலம் தேசிகர் பாலிடெக்னிக் நிர்வாகத்தினர். அந்தக் காலத்தில் அது மிகப்பெரிய தொகை.

7, அப்படி உடைச்சிட்டு நைசா போன பின் அடுத்து வருவர் மேல் பழி விழுமே அப்போ வரும் feeling ?

ப: அடுத்தவர் உடைத்த பழிகளும் என் மீது போடப்பட்டுள்ளன. நான் உடைத்தவைகளை மறுத்தது கிடையாது.

8, அலறி ஓட வைக்கும் உணவு ? இதில் விடைகள் உப்புமா ரவா பொங்கல் எழுதுவது தடை செய்யப்படுகிறது. 

ப: எப்பவோ ஒருமுறை, எங்கோ, "சாபுதானா வடா " என்று ஒரு சமையல் குறிப்புப் படித்து, திருமதியிடம், சொல்லச் சொல்ல அவர் செய்தார். அவற்றில் ஒரே ஒரு வடை ... விண்டு வாயில் வைத்துக் கடித்ததும் ...... வாயையே திறக்கமுடியாமல் ஒட்டிக்கொண்டுவிட்டது. அப்புறம் யாராவது சாபுதானா வ .. என்று சொல்வதற்குள் வாயை இறுக மூடியபடி, மௌன அலறலுடன் ஓடிவிடுவேன்!
 
9, காக்காய் கடி என்கிறார்களே காக்கா எப்படி கடிக்கும் ?

ப: 'கால் , காலாய் கடி' என்பதுதான் மருவி காக்காய் கடி ஆயிடுச்சு என்று நினைக்கிறேன். அதாவது 1/4 of 1/4 (=1/16) பதினாறில் ஒரு பங்கு. 

10, உங்கள் ஹேர்ஸ்டைலை எத்தனை முறை மாத்தியிருக்கிங்க இதுவரைக்கும் ?

  
 
ப: ஏழாம் வகுப்பு படித்த காலத்தில், ஜான் கென்னடி போல வாரியிருப்பேன். அப்புறம் ஜெய்சங்கர், அப்புறம் ரஜினி, அப்புறம் அப்துல் கலாம் .... என்றெல்லாம் சொல்ல ஆசை. ஹூம்! 

11,சின்ன வயசில் இது உண்மைன்னு நம்பி விவரம் அறிந்த வயசு வந்து ஹையோ நம்மை ஏமாத்திட்டாங்களேன்னு நினைத்த விஷயம் ?
பிக்காஸ் நானா சின்னத்தில் கொக்கு பூ போட்டு போகுதுனு நம்ம்பிருக்கேன் மயில் குட்டி போடுதுன்னு நம்பிருக்கேன் .மேகத்துக்கு அந்த பக்கம் கடவுள் வீடு இருக்குன்னு நம்பியிருக்கேன் .அட மரத்து மேலேறி போனா கடவுள்கிட்ட போலாம்னு கூட நம்பியிருக்கிறன் :)

ப: குழந்தைப் பருவ நம்பிக்கைகள் நிறைய, நிறைய ! செங்கல் பொடியை, சர்க்கரை சேர்த்து, தண்ணீர் ஊற்றி கொதிக்கவைத்தால் மைசூர் பாகு செய்யலாம் என்பதில் ஆரம்பித்து, பென்சில் சீவிய மரச்சுருள்களை பாலில் ஊறவைத்தால், ரப்பர் செய்யமுடியும் என்று நினைத்து, நண்பர்கள் அளந்து விடுகின்ற எல்லா கதைகளையும் நம்பி  ..... பல முறை சந்தோஷமா ஏமாந்திருக்கிறேன்! சினிமாவில் வரும் நடிகர்கள்தான் சொந்தக்குரலில் பாடல் இயற்றிப் பாடுகிறார்கள் என்றும் நம்பியது உண்டு.


12, உங்களுக்கு ஒருத்தர் ஒட்டக சிவிங்கியை கொடுத்து ஒளிச்சி வைக்க சொன்னா எங்கே ஒளிச்சி வைப்பிங்க ?

ப: கெட்டுப் போகாம இருக்கணும்னா ஃபிரிட்ஜ்லதான் வைக்கணும். 

13,சொந்த குரலில் பாடியிருக்கிறீர்களா ? எங்கே ?

ப: எப்பவுமே சொந்தக்குரல்தான். வீட்டில், அதிகம் பாடியது குளியலறையில்! 

14, சின்ன சின்ன ஆசைகள் 3 ?

ப: 
1) முதல் தோசை கல்லில் ஒட்டாமல் எடுக்க வரவேண்டும். இதுவரை நிறைவேறவில்லை.

2) பாதாம் அல்வா செய்ய வேண்டும் என்று நினைப்பேன். இதுவரை முயன்றதில்லை. 

3) முந்திரி பகோடா செய்யவேண்டும் என்றும் ஆசைப்படுவது உண்டு. செய்ததில்லை 

( ஹி ஹி இதெல்லாம் சின்ன சின்ன ஆசை இல்லை! தின்ன தின்ன ஆசைகள்!) 
    
15 , ஏஞ்சல் /அதிரா குறைந்தது 6 வித்யாசம் கூறவும் .. ?

ப: என்னுடைய அனுமானத்தில் சொல்கிறேன். 
தவறாகவும் இருக்கலாம். 

ஏ கொஞ்சம் சீரியஸ் டைப். அ அப்படி அல்ல.
ஏ ஒல்லி. அ அவ்வளவு ஒல்லி இல்லை.
அ வாயாடி. ஏ அப்படி கிடையாது.
அ நகைச்சுவை உணர்வு அதிகம் ஏ ஊஹூம்!
அ எதையும் லைட்டா எடுத்துப்பார். ஏ சில சமயங்களில் பயங்கரமா ரியாக்ட் செய்வார்.
என் கேள்வி : அ வும் ஏ யும் ஒருவரை ஒருவர் சந்தித்தது உண்டா?

16, காதல் ஜோடிகளுக்கு உதவி அடிபட்ட அனுபவங்கள் ?

ப: உதவியதும் இல்லை, அடிபட்டதும் இல்லை.

இந்த வாரம் தெரிந்துகொண்டது: 

Dr Masaru Emoto வின் நீர் ஆராய்ச்சிக் கட்டுரைகள்.