கேட்டுப்பார், கேட்டுப்பார்! ஓபசோஉகபமி புதன்

      
இன்றைய பதிவில் மஞ்சள் சீனியரும், நீலவண்ணக் கண்ணனும், முக்கிய காரணங்களுக்காக பிசியாக உள்ளதால், எப்பவும் பதில் சொல்லும் பச்சை மண்ணும், இதுவரை இங்கே தலை காட்டாமல் இருந்த சிவப்பு எழுத்து ஜூனியரும் பதில் அளித்துள்ளனர். 
    

அதிரா :

அந்தப்பூஸூஊஊஊ மலையாளமா பேசுது?

ப: அது மழலையாளம் !  

இந்த வாரம் நீங்கள் பார்த்த அழகான ஒன்று ?//

கெள அண்ணன் தன் வைஃப் ஐச் சொல்லலே அவ்வ்வ்வ்வ்வ் 

ப: இந்த வாரம் பார்த்தது என்றுதானே கேள்வி? எப்பவும் பாக்கற பியூட்டி என்றா கேட்டார்கள்?

எப்பவாவது.. எந்தப் படமாவது பார்த்து நெஞ்சடைத்து கண்கலங்கியதுண்டோ? அது எந்தபடம்?/படங்கள்.. 

ப: ஹோசூர் தியேட்டர் ஒன்றில், ரிக்ஷா மாமா என்று ஒரு படம் எப்பவோ பார்த்தேன். பஸ் ஸ்டாண்ட் பக்கத்தில் இருந்தது அந்தத் தியேட்டர். பல காட்சிகளில் கண் கலங்கினேன். (பக்கத்தில் உட்கார்ந்திருந்த இருமல் தாத்தா ஒருவர் விட்ட சுருட்டுப் புகை, கண்களை பாதித்ததால்!) 

எங்கள் புளொக்கின் 2 வது ஆசிரியர், சிக்கும் போன பின்பு அடுத்து எங்காவது சுற்றுலா போனாரோ? அல்லது போவதற்குப் பிளான் பண்ணியிருக்கிறாரோ?:) 

ப: கேள்வியை அவருக்கு அனுப்பினேன். ஒன்றும் பதில் சொல்லவில்லை! சொல்லாமல் செய்வர் பெரியோர்!

துளசிதரன் : 

அந்த நீலவண்ணக் கண்ணன் யார்?  

ப: அட ராமா! இன்னமும் தெரியவில்லையா! 

என் மனதில் கேள்விகள் எதுவுமே எழவில்லையே! ஏன்? நான் அதிராவைப் போல் ஞானியாகிவிட்டேனா? 

ப: கேள்விகள் எழவில்லை என்றால் கவலை இல்லை. என் பள்ளிக்கூட நாட்களில், ஓர் ஆசிரியர் - எந்தப் பையனையாவது பார்த்துக் கேள்வி கேட்டார் என்றால் பையன் உடனே எழவில்லை என்றால் திட்டுவார். நம்மைப் பார்த்துக் கேள்வி கேட்கும் பொழுது, உடனே எழுந்து, "பதில் தெரியாது " என்று சொன்னால் கூட மன்னித்து, உட்காரச் சொல்லிவிடுவார்!

   

     

கீதா சாம்பசிவம் :

அந்த நீலவண்ணக் கண்ணன் ஶ்ரீராம் தானே கேஜிஜி சார்?  

ப: இல்லை என்று சொன்னால் சரியாக இருக்காது என்பதில் ஏதும் ஐயம் இல்லை.

அப்போ இந்தச் சிவப்பு வண்ண மனிதர் யாராக்கும்? 

ப: யாரோ மர்மயோகி!

//தலய்க்கு மய் போடுவது என்பது மய்யமாக இருக்கவேண்டும். ஆங்காங்கே சர்வாதிகார இருள் முடிக்குள் சில ஜனநாயக வெண்மை ஒளிக்கீற்றுகளும் தெரியவேண்டும். //இது கேஜிஜி இல்லைனு நினைக்கிறேன். நீங்க என்ன சொல்றீங்க? 

ப: இது தவறு என்று சொன்னால் அது சரியாக இருக்கும். 

கேஜிஜி சார்! உப்புமான்னா எல்லோரும் ஓடறாங்க! நீங்க எப்படி?

ப: ஓடமாட்டேன்! ஒளிஞ்சிண்டுடுவேன்!

  

ஓட்ஸ் தோசை என்று புதிய காலை உணவு ஒன்றைக் கண்டுபிடித்தேன். புதிய மார்பிள் நான் ஸ்டிக் தவாவில் வார்த்து சாப்பிட்டேன். பரம திருப்தி.// இது நீலவண்ணக் கண்ணன் பதில் இல்லையோ?  

ப: இல்லை. 

எல்லாரும் மொபைலை வைச்சுட்டு ஏதோ பேசிட்டே இருக்காங்க! ஆனா எனக்கு அப்படி ஏதும் தோணறதே இல்லையே? ஏன்? 

ப: ரொம்பப் பேருங்களுக்கு, மொபைல் ஒரு எஸ்கேப் ரூட். 
சில வருடங்களுக்கு முன்பு, என் பெண்ணின் சிறிய வயதுத் தோழியை, சாலையில், எதிர் திசையில் அந்தப் பெண் வந்துகொண்டிருக்கும் பொழுது, பார்த்தேன். அருகில் வரும்பொழுது, 'சௌக்கியமா?' என்று கேட்கலாம் என்று நினைத்தேன். அந்தப் பெண் என்னை அடையாளம் கண்டவுடன், திடீரென்று அவள் கையில் இருந்த மொபைலில், யாரிடமோ பேசுவதுபோல பேசிக்கொண்டே, என்னைக் கடந்துசென்றாள்! நான், சரி அப்புறமா சந்தர்ப்பம் வந்தால் விசாரிக்கலாம் என்று நினைத்து கடந்து சென்றேன். அப்புறம் திரும்பிப் பார்த்தால், அந்தப் பெண் மொபைலை காதிலிருந்து  எடுத்து, என்னைத் திரும்பிப் பார்த்து, நான் பார்ப்பதை அறிந்ததும், தேள் கொட்டியது போல வேகமாக நடந்தாள்!

நாரத கான சபா வாசலில் ஒருநாள் மதியம் ஸ்ரீரஞ்சனி சந்தானகோபாலன் கச்சேரி கேட்கச் சென்றிருந்தேன். சபா வாசலில், ஸ்ரீரஞ்சனியின் அப்பா, சந்தானகோபாலன் நின்றிருந்தார். அவரருகே நான் சென்றதும், அவர் தன் மொபைலை எடுத்து காதருகே வைத்துக்கொண்டு, யாரோ பேசுவதைக் கேட்பவர் போல, ஊம் கொட்ட ஆரம்பித்தார். 

இதே மொபைல் டெக்னிக்கை, அதற்கப்புறம் நானும் அப்பப்போ செய்ய ஆரம்பித்துவிட்டேன்!

மொபைலில் நீங்க சினிமா பார்ப்பீங்களா? பார்த்திருந்தா என்ன படம் பார்த்தீங்க? 

ப: மொபைலில் சினிமா பார்ப்பது இல்லை. ஐ பி எல் மாட்ச் பார்த்ததுண்டு. ஐ பாடில் சில தமிழ் சினிமாக்கள் பார்த்தது உண்டு. சினிமாப் பெயர் எல்லாம் ஞாபகம் இல்லை. துப்பறிவாளன்(?), வி ஐ பி 2 என்று சில பெயர்கள் ஞாபகம் இருக்கு.

  

ஓட்ஸ் தோசை  ஏற்கெனவே நான், வல்லி எல்லாம் செய்திருக்கோமே! இதுக்கு என்ன சொல்லப் போறீங்க? 

ப: நான் செய்த ஓட்ஸ் தோசை, ரொம்ப சிம்பிள். ஓட்ஸ் எடுத்து மிக்சியில் மாவாக அரைத்து, பின் அதில் தாராளமாக தண்ணீர் சேர்த்து, இஞ்சி, பச்சைமிளகாய், உப்பு போட்டு, வார்த்து சாப்பிட்டேன். 

கேஜிஜி சார், உங்களோட புதிய சமையல் கண்டுபிடிப்பு என்ன? அதுக்குப் பாராட்டுக் கிடைச்சதா? நீங்களே உங்களைப் பாராட்டிக் கொண்டீங்களா? 

இன்றைக்கு, நீர் ஊற்றிய பழைய சாதத்தில், கறிவேப்பிலையைக் கிள்ளிப் போட்டு, உப்புப் போட்டு, கொஞ்சம் ஓட்ஸ் போட்டு, மிக்சியில் அரைத்து, தோசை செய்தேன். சுவையான சீவல் தோசை! நானே என் முதுகில் தட்டிக் கொடுத்துக்கொண்டேன்! 

இந்தத் தோசைக்கு, ஓபசோஉகபமி என்று  பெயரிட்டிருக்கிறேன். 

நாளைக்கு என்ன சமைக்கிறது என்பதை இன்னிக்கே திட்டம் போடுவீங்களா?

எங்க வீட்டில் என் கணவர் எக்கச்சக்கமாய்க் காய்கறிகள் வாங்கிட்டு என்னிடம் வாங்கிக் கட்டிப்பார். அப்படி அனுபவம் உங்களுக்கு உண்டா? 

ப: சமையல் திட்டம் எல்லாம் அப்பப்போ ஃப்ரிட்ஜைத் திறந்து பார்த்து, என்ன இருக்குதோ அதற்குத் தகுந்தாற்போல்தான். நான்கைந்து நாட்களுக்கு வேண்டிய காய்கறிகளை வாங்கி வருவேன். பெரும்பாலும் காரட், முட்டைக்கோஸ், பீன்ஸ், பீட்ரூட், கத்திரிக்காய், புடலங்காய் புதினா, கறிவேப்பிலை வாங்குவேன். 

 புடலங்காயை என்ன செய்யலாம்?  

ப: insomnia என்னும் தூக்கமின்மைக்கு, புடலங்காய் ஒரு சிறந்த மருந்து. சுத்தப்படுத்தி, நறுக்கி, லேசாக வேகவைத்து, மிக்சியில் போட்டு அரைத்து, கொஞ்சமாகத் தண்ணீர் ஊற்றி, அதில் தேவையானால் லேசாக உப்புப் போட்டு, கொஞ்சம் மிளகுத் தூள் தூவி, இரவு எட்டு மணிக்குக் குடிக்கவேண்டும். பத்து மணியிலிருந்து குறைந்தது ஆறு மணிநேரம் அயர்ந்து தூங்கலாம்!

              

பொதுவா எல்லோருக்கும் தெரியச் சாப்பிடுவதை விடத் தெரியாமல் எடுத்துச் சாப்பிடுவது ரொம்ப ருசி! அப்படி நீங்க சாப்பிட்ட உணவு எது? அப்போக் கையும் களவுமா மாட்டிக் கொண்டு முழிச்சிருக்கீங்களா? 

ப: என் அம்மா செய்த ஸ்வீட் வகைகள் எல்லாவற்றையுமே திருடித் தின்றிருக்கிறேன். எல்லோருக்கும் தெரிய சாப்பிடும்போது என்ன ருசியோ அதே ருசிதான், திருடிச் சாபிடும்பொழுதும்! ஆனால் திருடித் தின்பதில் ஒரு திரில் எக்ஸ்ட்ரா! 
   

  

ஶ்ரீராம் சமையல்லே அம்மாவுக்கு ஒத்தாசை செய்வது பத்தி நிறையச் சொல்லி இருக்கார். அப்படி உங்க அம்மாவுக்கு நீங்க ஒத்தாசை செய்திருக்கீங்களா?

ப: அம்மா சமையலில் ஒத்தாசை செய்யக் கூப்பிட்டது இல்லை. படித்த காலங்களிலும் சரி, வேலை பார்த்த நாட்களிலும் சரி காலை ஆறுமணியிலிருந்து, மாலை வரை வீட்டில் இருந்தது இல்லை. லீவு நாட்களில் ஓய்வு மட்டும்தான்! உழைப்பு கிடையாது!

உங்க மனைவி சமையல் நல்லா இருக்குமா? உங்க அம்மா சமையல் நல்லா இருக்குமா? அல்லது உங்க சமையல் தான் உங்களுக்குப் பிடிக்குமா? 

ப: எங்க எல்லோர் சமையலுமே நல்லா இருக்கும். எல்லாமே எனக்குப் பிடிக்கும். 
    

ச்ரீராமுக்கு அனுஷ்கா, நெ.த.வுக்குத் தமன்னா! இன்னும் சிலருக்கு நயன் தாரா! அப்படி உங்களுக்குப் பிடிச்ச நடிகை யார்? ஏன் பிடிக்கும்? 

ப:    

பெயர் : தெரியாது!

ஏன் பிடிக்கும் என்றும் தெரியாது. இன்றைய ஃபேவரிட் நடிகை. நாளை மாறிவிடும்!

இப்போதுள்ள நடிகைகளிலே நன்றாக நடிப்பவர்கள் யார்? 

ப: நடிப்பது என்று பார்த்தால் நயன்தாரா பரவாயில்லை என்று தோன்றும்.   
                
  திரைப்படங்கள் பழைய படங்களின் பெயரிலேயே வரது எனக்குக் குழப்பமா இருக்கு! உங்களுக்கு? அதே கண்கள் என்னும் பெயரில் முன்னர் வந்த ஏவிஎம் படம் ஓர் மர்மப் படம். கிட்டத்தட்ட அதே போல் ஓர் மர்மப் படம் அதே பெயரில் இப்போவும் வந்திருக்கு! இரண்டுக்கும் என்ன வித்தியாசம்? 

ப: எனக்கு அந்தக் காலத்து அதே கண்கள் மட்டும்தான் தெரியும். அந்தக் காலத்தில் மிகவும் ரசித்துப் பார்த்த படம். 

ஏஞ்சல் :

சலாமியா ஒரு இடத்தின் பேர்தானே ? 

ப: விக்ரம் படத்தில் ஜனகராஜ் பேசுவது சலாமியா மொழிதானே? 

1,உங்கள் பொன்னான நேரத்தை விழுங்குவது எது ?

ப: Facebook & WhatsApp.

2,அம்மா சுட்ட தோசை உங்கள் மனைவி சுட்ட தோசை ..3 வித்யாசங்கள் ப்ளீஸ் ?
இந்த கேள்விக்கு வரும் பதில்களால் மூன்று பேரின் வீட்டிலும் நடக்கும் எதற்கும் நான் பொறுப்பில்லை :))

ப: அ தோ நெஞ்சைத் தொட்டது. ம தோ கண்ணைக் கவர்ந்தது.

அ தோ ஏழ்மைச் சுவை. ம தோ வசதியில் வார்த்தது.

அ தோ சைடுக்கு மிளகாய்ப்பொடி, எண்ணை. 

ம தோ சைடுக்கு (எனக்குப் பிடிக்காத) சட்னி.  


3, நல்லவர் , ரொம்ப நல்லவர் வித்யாசம் கூறவும் .?

ப: நல்லவர் = கடன் கொடுத்தவர். ரொம்ப நல்லவர் = கொடுத்தக் கடனைத் திருப்பிக் கேட்காதவர். 

         

4, உங்ககிட்ட ஒரு கடிகாரம் டைம் மெஷின் கவுண்ட் டவுன் டைமருடன் கொடுத்தா சரியா உங்க வாழ்க்கையில் எந்த மறக்க முடியா இனிய சம்பம் நடந்த நேரம் அதை நிப்பாட்டுவிங்க ?
            

ப: ஹைஸ்கூலில் படித்த நாட்கள். 

5 ,உங்களை பற்றிய மூன்று சுவாரஸ்யமான உண்மைகள் ? 

ப: காற்றில் கற்பனைக் கோட்டைகள் கட்டுபவன். 

அமேசான் வெப் சைட்டில் எந்தப் பொருளைப் பார்த்தாலும், அதை வாங்கி உபயோகித்து ஆனந்தப்படுவது போல சில நிமிடங்களைக் கழிப்பேன். 

யாரைப் பார்த்தாலும், யாருடன் பேசினாலும் அவர்களின் அசைவுகளைக் கூர்ந்து கவனித்து, அவர் எப்பேர்ப்பட்ட ஆள் என்று ஒரு கணிப்பு செய்து வைத்துக்கொள்வேன்.

எதற்கும் உணர்ச்சிவசப்பட்டு உடனே ரியாக்ட் செய்யமாட்டேன். எதையும் புன்னகையோடு கேட்டுக்கொண்டு, பிறகு நன்கு யோசித்துதான் ஆக்சன்!   
               

6,ஞாபக மறதியால் அசடு வழிந்தது சமீபத்தில் எப்போது ?

ப: எப்பவும் ஆன் லைனில் மின் கட்டணம் செலுத்துவேன். சென்ற மாதம் மறந்துபோய், பணம் கட்டாமல் விட்டு, மின் இணைப்பைத் துண்டிக்க ஆள் வந்துவிட்டதால் அசடுவழிய வேண்டியதாயிற்று. 

     

7,நமக்கெல்லாம் ஏன் கனவு வருது ?

இதை நிறுத்த வழி இருக்கா ?

ப: கனவுலகம் ரொம்பக் காம்ப்ளிகேட்டட் சமாச்சாரம். பல தியரிகள் உள்ளன. ஆனால் கனவுகள் அந்த எந்தத் தியரியுலும் முழுவதுமாக அடங்குவதில்லை!  நிறுத்த வழி? ரொம்ப சிம்பிள். தூங்கவே கூடாது. 

   
8, ஈமெயில் /கடிதம் /இரண்டின் சாதக பாதகம் ?

      

ப: ஈ - இம் என்பதற்குள் போய்ச் சேர்ந்துவிடும். கடிதம் ஆமை வேகம்தான்! கடிதத்தை snail mail 
என்று சிலர் குறிப்பிடுவது உண்டு. 

(கைப்பட எழுதிய )கடிதம் என்பதில் ஒரு பெர்சனல் டச் இருக்கும். ஈ மெயிலில் அதெல்லாம் உணரமுடியாது. 

ஈ யில் காபி பேஸ்ட் வசதி உண்டு. கடிதத்தில் கை வலிக்க எழுதியே ஆகவேண்டும். 

9,பொன் கிடைத்தாலும் புதன் கிடைக்காது என்கிறார்களே ஏன் ?

    

ப: அந்தக் காலத்தில் பொன் என்பது செல்வத்திற்கும், புதன் என்பது புத்திசாலித் தனத்திற்கும் தொடர்புகொண்டு பேசப்பட்டது. செல்வம் கிடைக்கும்; சம்பாதிக்கலாம். புத்திசாலித்தனம் என்பது இயல்பாக வரவேண்டுமே தவிர பொன்னைப் போல கிடைக்காது அல்லது சம்பாதிக்க முடியாது என்று சொல்லியிருக்கிறார்கள் முன்னோர். 

10, பேய் படம் பார்த்து பயந்த அனுபவங்கள் ?
என்ன படம் அது ?
     

ப: 'யார் நீ ' படத்தைப் பார்த்து அந்தக் காலத்தில் பயந்தது உண்டு. அப்புறம் சைக்கோ படத்தைப் பார்த்தேன். பயப்படவில்லை. 

பேய் படம் இல்லை. ஆனால் ஓர் ஆங்கிலப்படத்தின் கிளைமாக்ஸ் காட்சியில் கேட்ட இசையால் இதயத்துடிப்பு இரண்டு மடங்காகி, இயல்பு நிலைக்கு வர, இரண்டுமணி நேரம் ஆயிற்று. 

(ஒருவேளை இவர் சொல்கின்ற படமும் சைக்கோ படம்தானோ?) 

என்றைக்காவது உங்கள் வீட்டு பாஸை . ஐ மீன் மனைவி , உங்கள் அக்கா தங்கை பேரை சொல்லி (எதோ ஒரு மறதியில் ) அழைத்து :)மாட்டிக்கொண்டதுண்டா :) ? 

ப: என்னது! பாஸை பெயர் சொல்லிக் கூப்பிடுவதா! அதற்கெல்லாம் தைரியம் வந்தது இல்லை! 
ஜோக் ஒரு பக்கம் இருக்க, அக்காக்கள் இருவரும் வயதில் ரொம்ப மூத்தவர்கள். அவர்களை, பெயர் சொல்லிக் கூப்பிட்டதில்லை. தங்கையோடு அதிகம் சண்டைகள் போட்டதுண்டு. ஆனால் மனைவியை பெயர் மாற்றிக் கூப்பிட்டது இல்லை. 

மாதவன் :

That's *Extrapolation* (finding a value of y(x), beyond the given limits of 'x'). (not Interpolation) 

A: My AMIE text book and the evening college lecturer referred it as Newton's forward interpolation only for predicting a future value based on a set of existing values. 

One day during winter in a town, everyone felt that the day was double the cold that was felt the previous day. For, eg. if someone used 1 sweater the previous day, to receive a particular warm comfort, he/she needed 2 sweaters to keep him/her self the same warm-comfort on the day of this report.

The newspaper on that day reads the previous day's temperature was 0 degree Celsius. What's the temperature on that day ? 

A: 16 deg F.

     

வாட்ஸ் அப் 

    

பானுமதி வெங்கடேஸ்வரன் :

      

பள்ளியில் ஆசிரியர்களுக்கு பட்டப் பெயர் வைத்ததுண்டா? அப்படி பட்டப்பெயர் வைத்து மாட்டிக்கொண்டிருக்கிறீர்களா?  

ப: படித்த காலத்தில், நிறைய பேருக்கு நாமகரணம் செய்ததுண்டு. அதற்காக மாட்டிக்கொண்டதில்லை. 

பாலிடெக்னிக் படித்த காலத்தில் சீனியர் வைத்த பெயர்களை ஜூனியர்கள் மாற்றாமல் உபயோகப்படுத்தியது உண்டு. ஜூனியர் பாலிடெக்னிக் படித்த காலத்தில், கார்பென்ட்ரி பிரிவில் அதிகாரம் செய்யும் ஆல் இன் ஆல் அய்யாக்கண்ணு ஒருவருக்கு, பாலிடெக்னிக் சீனியர் மாணவர்கள் வைத்திருந்த பெயர் B.C.
(அதாகப்பட்டது Bachelor of Carpentry).
என்னுடன் படித்த (வெள்ளை உள்ளம் படைத்த)  மாணவன் ஒருவன், அது அவருடைய பெயரின் இனிஷியல்ஸ்  என்று தவறாக நினைத்து, Foundry வகுப்பு ஆசிரியரிடம் சென்று, "சார், என்னை பி சி சார் கூப்பிடறார். போய்ப் பார்த்துவிட்டு வருகிறேன்" என்று சொன்ன அன்று எல்லா வொர்க் ஷாப் ஆசிரியர்களும் விழித்துக்கொண்டனர். ஒவ்வொருவரும் வந்து, அந்த வெ உ மாணவரிடம், 'எனக்கு என்ன பெயர்?' என்று பேரனைக் கொஞ்சுகின்ற தாத்தா போல, ஆர்வமுடன் கேட்டுத் தெரிந்துகொண்டார்கள்!

      

ப: ஆசிரியருக்கு வைத்த பட்டப் பெயர் : கோட்ஸ்டாண்ட். மாட்டவில்லை! 

(அதாவது கோட் ஸ்டாண்டில் கோட்டை மாட்டவில்லை என்கிறாரோ?)

மீண்டும் அடுத்தவாரம் சந்திப்போம்!