நாங்கள் தரிசனம் செய்த கோயில்கள் - 22 :: நெல்லைத்தமிழன்.

 

இந்தப் பள்ளிப்படைப் படங்களை உங்களுடன் பகிர்ந்துகொள்ளும்போது பாலகுமாரன் இராஜேந்திரனுடைய வரலாறை தன்னுடைய ‘கங்கைகொண்ட சோழன்’ நாவலில் எழுதியுள்ள ஒரு பகுதி எனக்கு நினைவுக்கு வருகிறது.

சோழர் அரசகுலத்திலேயே (விஜயாலயச் சோழனில் ஆரம்பித்த) ராஜராஜ சோழன் மிக உன்னத இடத்தை அடைந்தான் என்று சொன்னால் அது மிகையாகாது. பொதுவாக உன்னதமான அரசனுக்குப் பிறகு அவனுடைய குலம் சரிவை நோக்கித்தான் செல்லும். வரலாற்றில் இதற்கு ஏகப்பட்ட உதாரணங்கள் உள்ளன. அப்படி இல்லாமல் ராஜராஜ சோழன் மகன் இராஜேந்திர சோழன், தந்தைக்கு ஏற்ற தனயனாக சோழ சாம்ராஜ்யத்தை இன்னும் உன்னத நிலைக்குக் கொண்டுவந்தான். ஆனால் பாருங்க, அவனுக்குப் பிறகு அவனுடைய மூன்று மகன்களே ஒருவர் மாற்றி ஒருவர் அடுத்த முப்பது வருடங்களுக்கு சோழ சாம்ராஜ்யம் சிதையாமல் ஆண்டுகொண்டு வந்தனர். அதன் பிறகு வாரிசுகள் இல்லாத தால், சாளுக்கியச் சோழ அரசு வந்தது என்பதை முன்பு படித்தோம்.

பாலகுமாரன் எழுதியுள்ள ஒரு சிறு பகுதியைப் பார்ப்போம். இராஜேந்திர சோழன் அரசனாக இருக்கிறான். அவனுடைய தங்கை குந்தவையை வேங்கி நாட்டு விமலாதித்தனுக்குத் திருமணம் செய்துகொடுத்திருந்தார்கள். விமலாதித்தன் மகன் ராஜராஜ நரேந்திரன். விமலாதித்தன் மறைந்த பிறகு, ராஜராஜ நரேந்திரனை கீழைச் சாளுக்கிய தேசத்துக்கு அரசனாக்க விழைகிறான் ராஜேந்திரன். (விமலாதித்தனுக்கு இன்னொரு மனைவி மூலம் விஷ்னுவர்த்த விமலாதித்தன் என்ற மகன் இருக்கிறான்) அப்போதுதான் சோழ தேசம் பாதுகாப்பாக இருக்கும் என்பது அவன் எண்ணம். ராஜராஜ நரேந்திரன் மருமகன் ஸ்தானம். ஆனால் ரொம்பவே திறமை இல்லாதவன். உறவைப் பலப்படுத்த தன் மகளை அவனுக்கு மணம் செய்துகொடுக்க எண்ணுகிறான்.  தன் தங்கை குந்தவை, விமலாதித்தனுடன் அனுசரணையாக இல்லை என்ற வருத்தம் ராஜேந்திரனுக்கு.  இந்தச் சமயத்தில் மனம் விட்டுப் பேச தன்னுடைய மூன்றாவது மகனான வீர ராஜேந்திரனை ஆள் விட்டு அனுப்பி வரச் சொல்லி அவனிடம் பேசுகிறான். அந்தப் பகுதிதான் நான் பகிர நினைக்கும் பகுதி.

நம்முடைய குந்தவைக்குப் பிறந்த  இராஜராஜ நரேந்திரனுக்கும் உன்னுடைய வயதுதான். ஆனால் உன் முகத்தில் இருக்கின்ற பொலிவு, களை, உன் உடம்பில் இருக்கின்ற கம்பீரம் அவர்களிடம் இல்லை. நீதான் இராஜராஜ நரேந்திரனை உற்சாகப்படுத்த வேண்டும், தந்திரங்கள் சொல்லித்தரவேண்டும், அவனுக்கு உற்ற தோழனாக இருக்கவேண்டும்.

நான் அவனை அரியணையில் வைத்துவிட்டாலும் மேலைச்சாளுக்கியத்தின் தொந்தரவு இருக்கத்தான் செய்யும். அதைத் துடைக்க உன் தமையன் இராஜ இராஜித்தனும் உன்னுடைய அண்ணன் இராஜேந்திரனும் நீயும் ஒன்றாக முயற்சி செய்து தொடர்ந்து உதவிகள் செய்யவேண்டும். உன்னிடம் ராஜராஜ நரேந்திரன் இயல்பாக இருப்பான் என்று நினைக்கிறேன். நீயே இராஜராஜ நரேந்திரனிடம் போய்ச் சொல்லி அவனைத் தயார் செய்.

அரசனுக்கு தோற்றம் முக்கியம். அந்தத் தோற்றத்தை தயவு செய்து நீ ஏற்படுத்து.

‘என்ன இது, தயவுசெய்து என்று சொல்லிக்கொண்டு… கட்டளை இடுங்கள்’

‘இது கட்டளை இட்டு வராது. ஒரு சகோதரனைப் போன்றவனை, மருமகனை நாம் அரவணைத்துப் போகவேண்டும். நான் விமலாதித்தனை அப்படித்தான் அரவணைத்தேன். அதுபோல இந்த வேலையை உன்னிடம் தருகிறேன். இது தவிர உன்னிடம் ஒரு கேள்வி கேட்க வேண்டும்’

‘என்ன?’

‘இராஜராஜ நரேந்திரனுக்கு திருமணம் செய்ய வேண்டும். யார் மனைவி என்று நினைக்கிறாய்?...... இந்த நேரம் உனக்குத் தெரிந்திருக்க வேண்டும். யார் அவனுக்கு மனைவியாக இருப்பது நல்லது?’

‘என்னுடைய அக்காள், அம்மங்கா தேவி என்று நீங்கள் மனதில் நினைத்திருக்கிறீர்கள். அது எனக்குப் புரிகிறது, எனக்கும் அது சம்மதமே’

‘இந்த உறவு ஏற்படுத்திக்கொண்டால்தான் நமது தேசம் பாதுகாப்பாக இருக்கும்’

‘அம்மங்காதேவிக்கு அவனைப் பிடிக்குமா?’

‘சோழ ராஜ வம்சத்தில் பிறந்துவிட்டால், பிடித்த கணவன் என்று எந்த இளவரசியும் நினைத்துக்கொள்ள முடியாது. தான் விரும்புகின்ற இளவரசன் என்று எந்த இளவரசியும் கற்பனை செய்துவிட முடியாது. அரசியல் காரணமாக நடக்கின்ற திருமணங்கள் சில நமயம் நரபலியாகவும் நடந்துவிடும். குந்தவையினுடைய திருமணம் நரபலி. ஆனால் பலி ஆனது விமலாதித்தன்.

இந்தத் திருமணம் அவ்விதம் இருக்காது. அம்மங்கை மிகவும் கெட்டிக்காரி. என்னுடைய அத்தை குந்தவையால் வளர்க்கப்பட்டாவள். வீரமாதேவியால் போற்றப்பட்டவள். அவளுக்கு நெளிவு, சுளிவுகள் பலதும் சொல்லிக்கொடுத்திருக்கிறார்கள். பரவைநாச்சியார் உடுத்த கற்றுக்கொடுத்திருக்கிறார். திருபுவனமாதேவி பாடவும், பேசவும் கற்றுக்கொடுத்திருக்கிறார். வீரமாதேவி குதிரை ஓட்டக் கற்றுக்கொடுத்திருக்கிறார்.  எனவே அம்மங்கை பொருத்தமுடையவள். அம்மங்கைக்கு இராஜராஜ நரேந்திரன் கொஞ்சம் குறைவோ என்று தோன்றுகிறது. அவனுக்கு அம்மங்கையை வைத்துச் சீராட்ட முடியுமா என்ற பயம் இருக்கிறது. ஆனால் அவன் நல்லவன். என்ன சொல்கிறாய்?’

‘இது அரசியல் எனில் சரி. என் சகோதரி என்னும்போது கொஞ்சம் வருத்தம். அத்தைப் பாட்டி குந்தவையாருக்கு வந்தியத்தேவர் கிடைத்தது போல நம் வீட்டுப் பெண்களுக்குக் கிடைக்கவில்லை.

நமக்குத்தான் அரச குலம் என்ற ஒரு உயர்வான எண்ணம் இருக்கிறது. ஆனால் அரசகுல மகளிருக்கு திருமணம் என்பதும் ஒரு அரசியல் நிகழ்வு. இராஜராஜ சோழனுக்கு பத்துக்கும் மேற்பட்ட மனைவியர்.  ஆனால் அவனுக்கு அரசியல் வாரிசு என்று அமைந்தது இராஜேந்திர சோழன்.

சீன அரசியல் நிகழ்வுகளைப் பற்றிப் படித்தபோது ஒரு விஷயம் தெரிந்தது. அரசனுக்கு நிறைய மனைவிகள் இருந்தாலும், யாருக்கு வாரிசு வரப்போகிறது என்பது மிகப் பெரிய முக்கியத்துவம் வாய்ந்த நிகழ்வாம். அதனால் தங்களுக்குத் தோதானவருக்குத்தான் வாரிசு அமையவேண்டும் என்று அரசியல் நிர்பந்த த்தினால் கருவைச் சிதைப்பதோ இல்லை அந்த அரசியின் உயிருக்கு ஆபத்து ஏற்படுத்துவதோ சகஜமாம். அதுபோல ஆண் மகவு பெற்றுவிட்டால் அந்த அரசிக்கு மிக்க உயர்வு ஏற்பட்டுவிடுமாம், அடுத்த அரசனைப் பெற்ற தாய் என்று. அதுபோல பிறந்த குழந்தைக்கு பால் கொடுப்பதற்கும் மற்ற எல்லாவற்றையும் கவனித்துக்கொள்ளவும் தாதிகள் இருப்பார்களாம்.

இதனை எழுதும்போது பஹ்ரைன் அரண்மனை நிகழ்வுகளை ஒருவர் சொன்னது நினைவுக்கு வருகிறது. அரசர் உணவு உண்ண வரும்போது அவர் எதைக்கேட்டாலும் இல்லை என்று சொல்லாத நிலைக்குத் தயாராக இருப்பார்களாம். 20 பேருக்குக் குறையாத உணவு தயாராக இருக்குமாம். அரசர் எதைச் சாப்பிடுவார் என்றே தெரியாதாம். அவர் எதையாவது ருசித்துச் சாப்பிட்டால் அடுத்துமுறையும் அதனைச் செய்வார்களாம். சில நேரங்களில் அரசர் சரியாகச் சாப்பிடமாட்டாராம். அரசர் சாப்பிட்டு முடித்த பிறகு மிஞ்சும் எல்லாவற்றையும் அவரது விசுவாசிகளுக்குக் கொடுத்துவிடுவார்களாம். அரசரைச் சந்திக்க அவரது மனைவி மற்றும் மகன்களுக்கு அனுமதி தேவையாம். அரசருடன் கூடவே ‘பையா/உதவியாளன்’ என்ற இட த்தில் ஒருவர் இருப்பாராம். அந்த இடத்திற்கு வருவதற்கு நிறைய போட்டி இருக்குமாம். கேரளத்தைச் சேர்ந்தவர்களும் அந்த இடத்திற்கு வந்திருக்கிறார்களாம். அரசர் படுத்துக்கொள்ளும் அறையின் வாசற்கதவின் அருகில் இவர் படுத்திருப்பாராம். அரசர் கூப்பிட்ட குரலுக்குத் தயாராக இருக்கவேண்டும். சொந்த மகனே (இளவரசனாக இருந்தாலும்) அனுமதி பெற்று இவரைத் தாண்டித்தான் அரசரைப் பார்க்க முடியும். இந்தப் பதவியில் இருப்பவர்களுக்கு பணம் ஒரு பிரச்சனை இல்லை. அதுபோல அவரது வேலை, அரசர் மறைந்தவுடன் முடிந்துவிடும்.

இதையெல்லாம் படிக்கும்போது அரச குலத்தில் பிறப்பது நல்லதா?, பிறந்தால் மூத்தோனாகப் பிறப்பது நல்லதா இல்லை கடைசிப் பையனாக இருந்து அரச குலத்தின் அதிகாரம் வசதி போன்றவற்றை மாத்திரம் அனுபவித்து வாழ்ந்தால் போதுமா? பெண்ணாய்ப் பிறந்தால் அதன் பிரச்சனைகள் என்னென்ன? யாரையும் நம்பமுடியாமல், யாரிடமும் எதையும் வெளிப்படையாகப் பேசாமல், ஒவ்வொருவர் பேசுவதற்கும் அரசியல் அளவீடுகள் கொண்டு அர்த்தம் பார்ப்பது என்றெல்லாம் வாழும் வாழ்க்கை சிறப்பாக இருக்குமா? என்றெல்லாம் யோசனை தோன்றுகிறது.

சரி.. நாம் இந்தப் பள்ளிப்படைப் படங்களைக் காண்போம்.

அம்பாள் மங்களநாயகி (மங்களாம்பாள்). விமலநாயகி என்றும் எழுதியிருக்கின்றனர்.

துவாரபாலகர்கள் மிக அழகாக இருக்கின்றன. இது பழுவேட்டரையர்களின் கலைப்படைப்பாக இருக்கலாம்.

நந்தியின் கழுத்து அலங்காரங்களை எடுக்கவில்லை. துணி போர்த்தியிருந்ததால். சிவலிங்கத்துக்குக் கீழேதான் பஞ்சவன் மாதேவியின் உடல் இருக்கிறதாம்   மூலவர் இராமலிங்கஸ்வாமி என்று அழைக்கப்படுகிறார். எட்டு பட்டைக் கோணங்களாலான லிங்கம் (தாராலிங்கம் என்று சொல்கின்றனர்)

பிரமன் மற்றும் மாதொருபாகன். 

பஞ்சவன் மாதேவி பள்ளிப்படை என்று குறிப்பிடப்பட்டுள்ள கல்வெட்டு (கோப்பரகேசரி வர்மரான ராஜேந்திர சோழதேவர்க்கு யாண்டு 7வது சத்திரிய சிகாமணி வளநாட்டு திருநறையூர் நாட்டுப் பழையாறையான முடிகொண்ட சோழபுரத்து பள்ளிப்படை பஞ்சவன் மாதேவீஸ்வரத்து – இதில் பள்ளிப்படை என்ற வார்த்தை கல்வெட்டில் சிதைந்துள்ளது அல்லது அழிக்கப்பட்டுள்ளது.

இந்தப் பகுதியில்தான் இது பஞ்சவன் மாதேவி பள்ளிப்படை என்று கூறும் கல்வெட்டு இருக்கிறது. கண்டிப்பாகக் காணத் தவறாதீர்கள்.  வலது பக்கம் மஹிஷாசுர மர்தனி, அடுத்து அர்த்தநாரீஸ்வரர்,  அதை அடுத்து கங்காதரர்.

நான் குறிப்பிட்டிருந்த பூசாரி அவர்கள்.  இவர், இந்தக் கோவிலின் பகுதியில்தான் முன்பு குந்தவைக்கான சமாதி (அவரது அஸ்தியை வைத்து அதன் மேல் எழுப்பப்பட்ட மண்டபம்) இருந்ததாம், பிறகு இடிந்து தரையில் கான்க்ரீட் போட்டு இருந்த இடமே தெரியாமல் போய்விட்டது என்றார்.

அம்பாள் சன்னிதி. 

இந்தப் பகுதியில்தான் குந்தவையின் சமாதி இருந்த மண்டபம் இருந்தது என்று கோயிலில் இருந்தவர் சொன்னார். அதில் எந்த அளவு உண்மை இருக்கிறது என்று தெரியவில்லை.

நானும் பஞ்சவன் மாதேவி பள்ளிப்படை என்று எழுதியுள்ள கல்வெட்டு அருகே போய்ப் பார்த்ததை நினைவுக்காக போட்டோ எடுத்துக்கொண்டேன்.

இந்தப் பகுதி முழுவதுமே வாழைத்தோப்பு மற்றும் வயல்களாக இருந்தனவாம் (அப்படி பல வரலாற்றுச் சின்னங்கள் கபளீகரம் செய்யப்பட்டுவிட்டன). இப்போதும் இந்தப் பள்ளிப்படை கண்டுபிடிக்கப்பட்ட பிறகு, அதற்கான பாதையை மாத்திரம் விட்டுவைத்திருக்கிறார்கள்.

இந்தப் பள்ளிப்படைக் கோயிலைப் பார்த்த பிறகு எனக்கு சோழர் வரலாறே (எனக்குத் தெரிந்த சில சம்பவங்களே) மனதில் தோன்றிக்கொண்டிருந்தன. அடுத்து நாங்கள் சென்ற இடம் தஞ்சைப் பெரிய கோயில்.  இந்தக் கோயிலுக்கு நான் மூன்று நான்கு முறைகள் சென்றிருக்கிறேன் (றோம்). எனக்கு எத்தனை முறை இந்தக் கோயிலை வலம் வந்தாலும் அலுக்காது. இதன் காரணத்தை யோசியுங்கள்.  

= = = = = = = = = = = = =

சோழர் கால சிற்பங்கள் கட்டுரைகள் மெக்ஸிகோ பயணம் பற்றிய 14 வார தொடர் கட்டுரைகளுக்குப் பிறகு தொடரும். 

 அடுத்த வாரம் நெல்லைத்தமிழனின் (14 வார) மெக்ஸிகோ பயணத் தொடர் ஆரம்பம். 

= = = = = = = =