நல்ல மழைக்காலத்தை நீங்கள் அனுபவிப்பீர்களா இல்லை வெயில் காலத்தையா?+ சரோஜாதேவி கதை பகுதி 06

 

கேள்வி பதில்கள் :

நெல்லைத்தமிழன் : 

1) மறைந்த ஒருவரது  உடலைப் பார்த்து அரசியல் பிரபலம்  உடைந்து போனார்னு செய்திகள்ல எழுதறாங்களே... அப்புறம் அவரை எப்படி திரும்ப ஒட்டியிருப்பாங்க? ஃபெவிகாலா அல்லது வேறு ஏதேனும் புதுப் பசையா?

# நண்பர் காலமானால் உண்டாகும் சோகம் உண்மையானதாகவும் இருக்கலாம்.  அதை விமரிசித்து எதுவும் சொல்வது நன்றாக இராது.

& உடைந்து போவதெல்லாம் நிருபர் சேர்த்த மசாலா ! 

2) நண்பர் காலமானதும் அவரது நண்பர் "இனி நான் எப்படித் தனியாக நம் ஊருக்குப் போவேன்? மலைகள் அருவிகளால் அழுதுகொண்டே கேட்குமே..  என்பது போல எழுதுகிறார்களே  ஜால்ராவுக்கு அளவே கிடையாதா?  மறைந்த அவர் உயிரோடு  ஆஸ்பத்திரியில் இருந்தபோது இவங்களைப்போல நண்பர்கள் என்ன செய்வார்கள்?

# சில கவிஞர்கள் என்ன சொன்னாலும் கவிதைத்தனமாகத்தான் சொல்லவேண்டும் என்று நினைப்பார்கள் போலிருக்கிறது !

& ஊர் பிரபலங்கள் காலமானால் அந்த ஊர் மலைகள், அருவியாக கண்ணீர் சிந்தும் என்றால், அந்தப் பிரபலம் நன்றாக இருந்த காலத்தில் அருவி சினிமா பார்க்கப் போயிருக்குமோ! 

3) வெளியில் ரோட்டோரத்தில் அல்லது பயணம் செய்யும் இடங்களில் மிகச் சாதாரண கடைகளில் பாட்டிம்மா போட்டு விற்கும் பஜ்ஜி வடை போன்றவை அவ்வளவு ருசியாக இருக்கிறதே என்று நினைத்து, அவங்களை நம் வீட்டுக்குக் கூட்டி வந்து, நல்ல பொருட்களைக் கொடுத்து அவற்றை வீட்டில் செய்யச் சொன்னால் அதே ருசி வருமா?

# இருந்தாக வேண்டும் என்றுதான் நினைக்கிறேன்.

4) நல்ல மழைக்காலத்தை நீங்கள் அனுபவிப்பீர்களா இல்லை வெயில் காலத்தையா?   மழையில் நடக்க இப்போதும் ஆசை உண்டா?  

# கன மழை என்றால் சின்ன வயசில் பயம் !  மழைநடை எனக்கு ஒவ்வாதது. இளவெயில்தான் எனக்கு உற்சாகம்.

& மழையில் நடக்க இப்போது ஆசை இல்லை. 

5)  தீதும் நன்றும் பிறர் தர வாரா - என்று சொல்வது எதை வைத்து? அதில் உங்களுக்கு நம்பிக்கை உண்டா?

# தீது நன்று இரண்டும் செய்த செயற் பயனாகத்தான் இருக்க வேண்டும் என்பதால் அவை பிறர் தந்து வாரா என்பது சரிதான்.

6) மக்களுக்காகவே பார்த்துப் பார்த்து ஒரு அரசியல் தலைவர் செய்தால், அதனை மக்கள் மதிக்கிறார்களா இல்லை அடுத்த தேர்தலில் ஆளை மாற்றி வாக்களித்து அவமதிக்கிறார்களா?

# இதற்கு சரியான பதில் கிடையாது.  தேர்தல் முடிவுகளைப் பார்த்து அதன் பின் அதற்கு ஒரு லாஜிக் காண்பதுதான் கெட்டிக்காரர்களின் வேலை.  ஒருவர் வோட்டுப் போடுவது பல காரணங்களுக்காக ஆனாலும் அது ஆட்சியின் தரம் பற்றிய விமரிசனமாக இருப்பது அபூர்வம்.  அரசு பெரிய தவறுகள் செய்யும்போது கூட எதிர்ப்பு நிச்சயமல்ல.

& மக்கள் - குறிப்பாக தமிழ்நாட்டு இளைய தலைமுறை மக்கள் மாற்றங்களை விரும்புபவர்கள், 

= = = = = = = = =

படமும், பதமும் : 

நெல்லைத்தமிழன் : 

இது 2008ல்  நான் என் அண்ணன் வீட்டிற்கு மும்பையில் ஹிராநந்தினி வளாகத்துக்குச் சென்றபோது அவன் வீட்டிலிருந்து எடுத்த படம். அந்த பொவ்வையில் உள்ள ஹீராநந்தினி வளாகமே தனி நகரம் என்று சொல்லும்படி இருக்கும்.அங்கு இல்லாத கடைகள், வணிக வளாகங்கள், உணவுக்கான பெரிய ரெஸ்டாரண்ட், சிறிய கடைகள் என்று இல்லாத வசதிகளே இல்லை. நான் அப்போ சென்றிருந்தபோது, நான்கு படுக்கை அறை கொண்ட பெரிய பெரிய ஃப்ளாட்கள் 1 கோடி ரூபாய் என்று சொன்னார்கள். ஏன் அப்போது வாங்கவில்லை என்று யோசிக்கிறேன். பிறகு அந்த அனுபவத்தில் சென்னையில் ஹீராநந்தினி வளாகம் வந்தபோது அதில் வீடு வாங்கினேன் (ஃப்ளாட்). ஆனால் அங்கு வீட்டின் விலை அப்ரிஷியேட் ஆகவில்லை. அந்த மாதிரி வளாக கல்சருக்கு சென்னை தயாராக இல்லை என்றே எனக்குத் தோன்றியது. ரொம்ப வருடங்கள் கழித்து நான் அந்த வீட்டை (அதாவது 3 பெட் ரூம் குடியிருப்பு) விற்றுவிட்டேன். எத்தனையோ கனவுகளுடன் அதற்கு இண்டீரியர் செய்தேன்.

நான் பார்த்த வரையில் மற்ற எந்த கன்ஸ்ட்ரக்‌ஷன் கம்பெனிகளை விடவும், ஹீராநந்தினி கன்ஸ்ட்ரக்‌ஷன் மிக மிக அருமையாகவும், ஒவ்வொரு வீடும் நூற் ஆண்டுகள் ஆனாலும் பத்திரமாக இருக்கும் என்ற நம்பிக்கையை ஏற்படுத்தும் விதமாகவும் இருக்கும். இத்தகைய வளாகங்களின் சிறப்பு, பாதுகாப்பு, எந்தப் பிரச்சனைகளும் வராது-தண்ணீர், மின்சாரம் போன்று, தினமும் நடைப்பயிற்சி செய்யவும், பலருடன் நட்பு கொள்ளவும், வயதானவர்களை நம்பிக்கையாக தனியாக விட ஏற்றதாகவும் இருக்கும்.  ஹீராநந்தினி வளாகத்தின் சிறப்பு, வளாகத்திற்குள்ளேயே பள்ளி வசதி, நல்லா வளர்ந்த பிறகு ஹாஸ்பிடல் வசதிலாம் வந்துவிடும். சூப்பர்மார்க்கெட், வங்கிகள் என்று பல வசதிகளும் ஒவ்வொன்றாக வந்துவிடும். 

= = = = = = = = = = = = = =

KGG பக்கம் : 

சரோஜாதேவி : 

முன்கதை சுருக்: 

பகுதி 01 :  பாபா ஒரு துப்பறியும் நிறுவனத்தில் private detective ஆக வேலையில் சேர்கிறான். நாநா என்பவரிடமிருந்து appointment கேட்டு - சந்திக்க நேரம் கேட்டு வாட்ஸ் ஆப் செய்தி வருகிறது. பாபா சம்மதிக்கின்றான். 

பகுதி 02 :  நாநா வருகிறான். சரோஜா மெமரி கார்ட் பற்றி விளக்குகிறான். பாபாவின் ஜாதகம் கேட்கிறான். பாபா உள்ளே சென்று ஜாதகம் கொண்டுவருகிறான். 

பகுதி 03 :  நாநா பாபாவிற்கான சரோஜா மெமரி கார்ட் உருவாக்கி, அதை இயக்கி ஒரு ஜோதிட முன் நிகழ்வை சொல்கிறான். 

பகுதி 04 : நாநா சொன்னபடியே பாபாவின் நெற்றியில் இரத்தக் காயம் ஏற்படுகிறது. 

பகுதி 05 : நாநா, பாபாவின் நெற்றிக்கு பெரிய கட்டுப் போட்டு, எதிர் வீட்டு விமலாவின் கடைக்கண் பார்வை பெற யோசனை சொல்கிறான். தெருவில் கூடிய கலாட்டா கும்பலை போலீஸ் வேன் ஏற்றிச் செல்கிறது 

பகுதி 06 : பாவனா நீ எந்திரி! 

மறுநாள் காலை நாநாவின் மைலாப்பூர் வீட்டுக்கு வந்தான் பாபா. 

நாநா கதவைத் திறந்ததும் உள்ளே வந்த பாபாவை திகைக்க வைத்தது ஒரு பெண் குரல். 

" வாங்க பாலச்சந்தர்! விமலா ஜயராமன் சௌக்கியமா இருக்காங்களா?பாஸ் நீங்க பாபா நெத்தியில போட்ட கட்டு சூப்பரா இருக்கு" 

குழம்பிப் போன பாபா, நாநாவிடம் " யார் அது?" என்று கேட்டான். 

" அது என் உதவியாளர் பாவனா" என்றான் நாநா. 

" எங்கே இருக்காங்க?"

" அதோ அந்த மானிட்டரில் ஒரு மூஞ்சி தெரியுதா? அதுதான் பாவனா. " என்று ஒரு கம்ப்யூட்டர் மானிட்டரைக் காட்டினான் நாநா. 

" உங்க பி ஏ பாவனா வெறும் கம்ப்யூட்டர் பிம்பம்தானா? உயிர் கிடையாதா?" 

" கிடையாது. வாசலில் இரண்டு கண்ணு. வீட்டுக்குள் ஒவ்வொரு ரூமுலயும் ஒரு கண்ணு. வீடு முழுவதும் காதுகள். ஒரே ஒரு வாய். அதுவே அதுக்கு அதிகம்.‌ வாயாடி. நிறைய செயற்கை நுண்ணறிவு மூளை. மொத்தத்தில் அது ஒரு எந்திரி. அதாவது எந்திரனின் பெண் வடிவம். அவ்வளவுதான். 

பாவனா என்றால் 

Blu-ray

Audio

Video

Analyser &

Narrator

Assistant" என்றான் நாநா. 

" சரிதானே பாவனா? " 

" எஸ் பாஸ்" 

" சரி பாவனா. நீ கொஞ்ச நேரம் வாயை மூடிக்கொண்டு கண்ணையும் காதையும் மட்டும் திறந்து வெச்சுக்கோ. பாபா நேற்று நான் அங்கிருந்து வந்த பின்னர் என்ன நடந்தது என்று சொல்லட்டும். " 

பாபா சொன்னான். 

" நீங்க சொன்னபடியே நல்ல ஆக்ட் கொடுத்தேன். என் வேலைக்காரப் பெண்மணி மூலம் விஷயம் எதிர் வீட்டுக்கு சென்றது. 

ஜயராமன் ஆபீஸிலிருந்து திரும்பி வந்ததும் நடந்ததைக் கேள்விப்பட்டு என்னைப் பார்த்து நன்றி சொல்ல வந்தார். பேச்சுவாக்கில் தனக்கு இப்போது இருப்பது இரண்டே இரண்டு கவலைகள்தான் - வீணா மற்றும் விமலா. அவங்க ரெண்டு பேர் கல்யாணத்தையும் முடிச்சுட்டேன்னா, வி ஆர் எஸ் வாங்கிக்கிட்டு, கவலை இல்லாம என் வொய்ஃப்&  பையன் கூட போய் செட்டில் ஆயிடுவேன் என்றார்" 

" நீங்க கவலையே படாதீங்க. உங்க பொண்ணுங்க கல்யாணம் ரெண்டும் சீக்கிரமே நடக்கும். வீணாவின் ஃபோட்டோ ஒன்று எனக்கு அனுப்புங்க. என்னுடைய பிசினஸ் பார்ட்னரின் நண்பன் அமெரிக்காவில் நல்ல வேலையில் இருக்கிறார். அவருக்கு வீணாவைப் பிடித்திருந்தால் மேற்கொண்டு பேசி இருவருக்கும் பிடித்திருந்தால் கல்யாணத்தை முடிச்சிடலாம். விமலாவுக்கு என்ன மாதிரி மாப்பிள்ளை வேண்டும் என்று நான் பேசி அதன்படி செலக்ட் செய்வோம்னு சொன்னேன்" 

" அப்போ என் கூட பிசினஸ் பார்ட்னரா சேர சம்மதமா"

" ஆமாம். உங்க ஐடியாவாலதான் எதிர் வீட்டுக்காரர்கள் என்னோடு நெருங்கிப் பழகும் வாய்ப்பு ஏற்பட்டுள்ளது" 

" பிசினஸ் பார்ட்னர் என்றால் நமக்கு இடையே இன்னமே வாங்க போங்க எல்லாம் கிடையாது. வாடா போடா உறவுதான். சம்மதமா பாபா? " 

" சரிடா நாநா" 

இருவரும் கைகுலுக்கிச் சிரித்தார்கள். 

" பாஸ் எனக்கு இந்த பம்ப்ளிமாஸ் பாபாவைப் பிடிச்சிருக்கு. கொஞ்ச நேரம் அவன் கூட பேசட்டுமா?" என்றது பாவனா. 

" பேசு. விமலா ஜயராமன், விமலா பாலச்சந்தர் ஆகும் வரைதான் உனக்கு சான்ஸ். அப்புறம் பாபாவை பம்ப்ளிமாஸ் என்று சொன்னா விபா உன்னை பப்படம் பண்ணிடுவா! " 

" அப்புறம் ஒரு விஷயம் பாபா - பிசினஸ் பார்ட்னர் உனக்கு என்ன சம்பளம் தருவது?" 

" பாஸ் எனக்கு ஒரு யோசனை தோணுது" என்றது பாவனா. 

" என்ன?" என்று ஒரே குரலில் கேட்டனர் நாநா & பாபா. 

" முதலில் பாபா, விமலாவிடம் அவங்க எதிர்பார்க்கிற மாப்பிள்ளை என்ன சம்பளம் வாங்குபவராக இருக்கணும்னு கேட்டுத் தெரிந்து கொள்ளட்டும். அவங்க எதிர்பார்க்கிறதுக்கு மேலேயே சம்பளம் ஃபிக்ஸ் பண்ணிடலாம். ஓ கே யா பாஸ்?" 

" சூப்பர் ஐடியா பாவனா" என்றான் நாநா. 

அதற்குப் பின்னும் அரட்டை கொஞ்சம் நடந்தது. 

" பாஸ் சரோஜாதேவி மெமரி கார்டு பத்தி பாபாவுக்கு சொல்லணும்னு சொன்னீங்களே. சொல்லலாமா? " என்றது பாவனா. 

" ஓ கே. ஆனா அதுக்கு முன்னாடி பாபா நான் கொடுத்த ஹோம் வொர்க்ல இருந்த புத்தகம் படிக்கும் எக்ஸர்சைஸ் செய்தானா என்று கேள். " 

" ஹி ஹி ஜயராமன் வந்து போன பின்பு கற்பனைகள் கனவுகள் எல்லாத்திலேயும் விமலாதான்" 

" ரொம்ப ரொமான்டிக் ஆக இருக்கு பாஸ். இந்த சிச்சுவேஷனுக்கு ஒரு டூயட் சாங் எழுதி பாடட்டுமா"

" பாடு" 

" அதல புதல விமலா!

கதலி பழ உடலா?

மதன மோகன சிற்பமே

மனம் சொன்னது சொற்பமே" 

" இது ஏதோ எம் கே டி பாகவதர் காலத்துப் பாட்டுப் போல இருக்கு இந்தக் காலத்துக்கு ஒத்து வராது பாவனா" 

" பாவனா. நீயாவது நான் சொன்ன யோகியின் சுயசரிதம் புத்தகம் படிச்சியா?" 

" படிச்சுட்டேன் பாஸ்" 

" அஞ்சாவது அத்தியாயம் கந்த பாபா பத்தி சொல்லு" 

" கந்த பாபா சில அதிர்வுகள் உருவாக்கி அதன் மூலம் பொருட்களை தோன்றச் செய்வார். அவர் உருவாக்கும் பொருட்கள் கையால் தொட முடியும். உண்ண முடியும். " 

"பதினெட்டாவது அத்தியாயத்தில் சொல்லப் பட்டிருக்கும் அஃப்சல் கான்   பற்றி சொல்லு"

" அவர் கைகளால் எந்தப் பொருளைத் தொட்டாலும் சற்று நேரத்தில் அந்தப் பொருள் காணாமல் போகும். ஆனால் அது எப்படியோ அவரிடம் போய்விடும். " 

" நாற்பத்து மூன்றாம் அத்தியாயத்தில் என்ன அதிசய நிகழ்வு?" 

" அந்த அத்தியாயத்தில் உடலைத் துறந்து உயிர் பிரிந்து சமாதியில் அடக்கம் செய்யப்பட்ட குரு யுக்தேஸ்வர் சத்ய லோகத்திலிருந்து சாதாரண வடிவம் கொண்டவராக வந்து யோகியுடன் பேசிக்கொண்டு இருப்பார். யோகியால் அவரைப் பார்க்க முடிகிறது. அவருடன் பேச முடிகிறது. அவரைத் தொட்டுப் பார்க்கவும் முடிகிறது. " 

"நன்றி பாவனா"

நாநா, பாபாவிடம் சொன்னான். " இதிலிருந்து எனக்குத் தெரிய வந்தது, சில அதிர்வுகள் மூலம் பொருட்களை உண்டாக்கலாம், சில அதிர்வுகளை அகற்றி பொருட்களை மறைய வைக்கலாம். இதையே மனிதர்களுக்கு ஏற்ற வகையில் அமைக்க நான் பல ஆராய்ச்சிகள் செய்து கண்டுபிடித்ததுதான் சரோஜாதேவி மெமரி கார்டு. 

சரோஜா கார்டு மூலம் உணரப்பட்ட அதிர்வுகளை செலுத்தி சரோஜாDevi ( here Devi is short form for de-vibrate) செய்து உருவமாக இருப்பவர்களை அருவமாக மாற்றுவது. உருவாய் அருவாய் உளதாய் இலதாய்...என கந்தரனுபூதியில் வருவது போன்று" 

" என்னால் நம்ப முடியவில்லை " என்றான் பாபா.‌

" பாவனா,  நம்ம பாபாவுக்கு ஒரு டெமோ செய்து காட்டலாமா?" 

" எஸ் பாஸ் " என்று பாவனா சொன்னபோது பாபாவின் செல்ஃபோனிலிருந்து செய்தி வந்த சிறு ஒலி கேட்டது. 

எடுத்துப் பார்த்த பாபா, " ஏதோ தெரியாத எண்ணிலிருந்து யாரோ ஃபோட்டோ ஒன்று அனுப்பியிருக்கிறார்கள் போலிருக்கு" என்றான். 

" என்ன நம்பர் என்று படி" என்றான் நாநா. 

பாபா படித்தான். 

பாவனா, " பாஸ் - ட்ரூ காலர் ஸேஸ் திஸ்  காலர் ஈஸ் விமலா ஜயராமன் " என்றது. 

" ஆ! அப்படியா " என்று ஆச்சரியமாக சொல்லியபடி செய்தியை க்ளிக் செய்தான் பாபா. 

'அப்பா சொன்னபடி அக்கா வீணாவின் ஃபோட்டோ அனுப்பியுள்ளேன். விமலா' என்று இருந்தது. வீணாவின் ஃபோட்டோவும் இருந்தது.‌

(தொடரும்)