22 வயது பொறியியல் கல்லூரி மாணவி ஊராட்சி தலைவராக வெற்றி.

 

ஓட்டளிக்க மூதாட்டியை சுமந்து சென்ற சப் - இன்ஸ்பெக்டர்:

நெல்லை மாவட்டம் வள்ளியூரில் 2ம் கட்ட உள்ளாட்சி தேர்தல் நடக்கிறது. சங்கனாபுரத்தில் மூதாட்டி ஒருவரை மதுவிலக்கு சப்-இன்ஸ்பெக்டர் சையத் நிஸார் தோளில் சுமந்து சென்று ஓட்டளிக்க உதவி செய்தார்.

= = = =  

22 வயது பொறியியல் கல்லூரி மாணவி ஊராட்சி தலைவராக வெற்றி பெற்று சாதனை

தென்காசி: தென்காசி மாவட்டம் கடையம் ஊராட்சி ஒன்றியம் வெங்காடம்பட்டி ஊராட்சி தலைவர் பதவிக்கு 22 வயதுடைய பொறியியல் கல்லூரி மாணவி போட்டியிட்டு வெற்றி பெற்று சாதனை படைத்துள்ளார்.

தென்காசி மாவட்டமாக கடையம் ஊராட்சி ஒன்றியம் வெங்காடம்பட்டி ஊராட்சி மன்ற தலைவர் பதவிக்கு 5 பேர் போட்டியிட்டனர். இவர்களில் வெங்காடம்பட்டி ஊராட்சி லெட்சுமியூர் பகுதியைச் சேர்ந்த ர.சாருகலா (வயது 22) 3,336 ஓட்டுக்கள் பெற்று வெற்றி பெற்றுள்ளார். இவர் தன்னை எதிர்த்துப் போட்டியிட்ட ரேவதி முத்து வடிவு என்பவரை விட 796 ஓட்டுகள் அதிகம் பெற்று வெற்றி பெற்றுள்ளார். மேலும், இதே ஊராட்சியில் தலைவர் பதவிக்கு போட்டியிட்ட மற்ற மூன்று பேர்களும் டெபாசிட் தொகையை இழந்துள்ளனர்.

சாருகலா கோவை நேஷனல் கல்லூரியில் முதுகலை பொறியியல் முதலாமாண்டு படித்து வருகிறார். தந்தை ரவி சுப்பிரமணியன் செங்கல் சூளை நடத்தி வருகிறார். தாய் சாந்தி பூலாங்குளம் அரசு பள்ளியில் ஆசிரியையாக வேலை பார்க்கிறார். இளவயதிலேயே ஊராட்சி தலைவர் பதவிக்கு தேர்வான சாருகலாவை அனைத்து தரப்பினரும் பாராட்டி வருகின்றனர். கிராமத்தின் வளர்ச்சிக்கு பாடுபடுவேன் என கூறினார்.

இவருக்கு 19 வயதில் சந்துரு என்ற தம்பி உள்ளார். தமிழகத்தில் மிகவும் குறைந்த வயதில் ஊராட்சி மன்ற தலைவராக தேர்தலில் போட்டியிட்டு வெற்றியுள்ள ஸாருகலாவிற்கு வெங்காடம்பட்டி ஊராட்சி பகுதியைச் சார்ந்த அனைத்து தரப்பு மக்களும் பாராட்டும், வாழ்த்தும் தெரிவித்து உள்ளனர்.

= = = =

90 வயதில் பஞ்., தலைவராக வெற்றி பெற்ற பாட்டி; எதிர்த்த வேட்பாளர்கள் டெபாசிட் இழப்பு

திருநெல்வேலி: திருநெல்வேலியில் 90 வயதில் பஞ்சாயத்து தலைவர் தேர்தலில் வெற்றி பெற்ற மூதாட்டி. மகிழ்ச்சியில் மூதாட்டியை தோளில் சுமந்து ஆதரவாளர்கள் ஊஞ்சலாடினர்.

தமிழகம் முழுவதும் ஒன்பது மாவட்டங்களுக்கு ஊரக உள்ளாட்சி தேர்தல் கடந்த 6 மற்றும் 9ம் தேதிகளில் நடைபெற்றது. இதற்கான ஓட்டு எண்ணிக்கை நேற்று (அக்.,12) காலை முதல் நடைபெற்று வருகிறது. பெரும்பாலான இடங்களில் தி.மு.க., வேட்பாளர்கள் வெற்றி பெற்றனர். இந்த நிலையில் திருநெல்வேலி மாவட்டம் சிவந்திப்பட்டி பஞ்சாயத்து தலைவர் பதவிக்கு அதே பகுதியைச் சேர்ந்த 90 வயது மூதாட்டி பெருமாத்தாள் போட்டியிட்டார். நேற்று வெளியான தேர்தல் முடிவில் பெருமாத்தாள் 2ம் இடம் பிடித்த வேட்பாளரை விட ஆயிரம் ஓட்டுகள் கூடுதலாக பெற்று வெற்றிப்பெற்றதாக அறிவிக்கப்பட்டார்.

மேலும், தன்னை எதிர்த்து போட்டியிட்ட 2 வேட்பாளர்களையும் மூதாட்டி டெபாசிட் இழக்க செய்தார். பெருமாத்தாளின் மகன் கே.எஸ்.தங்கபாண்டியன், இதுவரை தொடர்ந்து 4 முறை சிவந்திபட்டி பஞ்சாயத்து தலைவராக இருந்தார். இந்த முறை சிவந்திபட்டி ஊராட்சி தலைவர் பதவி பொது பெண்களுக்கு ஒதுக்கப்பட்டதால் தங்கபாண்டியன், கீழநத்தம் ஒன்றிய வார்டில் போட்டியிட்டு வெற்றிபெற்றார். தமக்கு பதிலாக தமது தாயாரை நிறுத்தி வெற்றி பெற்றிருக்கிறார் தங்கபாண்டியன்.

= = = =

திருவனந்தபுரம்:கேரளாவில் 'பெட்ரோல் பங்க்'கில் பணிபுரியும் நபரின் மகள், கான்பூர் ஐ.ஐ.டி.,யில் இணைந்து, அனைவரது கவனத்தையும் ஈர்த்துள்ளார்.

கேரளாவில் இந்தியன் ஆயில் கார்ப்பரேஷனுக்கு சொந்தமான பெட்ரோல் பங்க்கில் 15 ஆண்டுகளாக பணிபுரிந்து வருபவர் ராஜகோபாலன். இவரது மகள் ஆர்யா, நாட்டின் மிக உயரிய கல்வி நிறுவனங்களில் ஒன்றான கான்பூர் ஐ.ஐ.டி.,யில் எம்.டெக்., பிரிவில் சமீபத்தில் சேர்ந்துள்ளார்.

இதுகுறித்து, இந்தியன் ஆயில் கார்ப்பரேஷன் நிறுவன தலைவர் ஸ்ரீகாந்த் மாதவ் வைத்யா தன், 'டுவிட்டர்' பக்கத்தில் குறிப்பிட்டுஉள்ளதாவது:ஆர்யா ராஜகோபாலனின் எழுச்சியூட்டும் கதையை இதில் பகிர்கிறேன். இந்தியன் ஆயில் கார்ப்பரேஷன் பெட்ரோல் பங்கில் பணிபுரியும் ராஜகோபாலனின் மகளான ஆர்யா, கான்பூர் ஐ.ஐ.டி.,யில் இணைந்துஉள்ளார். இது எங்களை பெருமைப்பட வைத்துஉள்ளது. ஆர்யாவுக்கு வாழ்த்துகள்.இவ்வாறு அவர் குறிப்பிட்டுள்ளார்.

இதை, மத்திய பெட்ரோலிய மற்றும் இயற்கை எரிவாயு துறை அமைச்சர் ஹர்தீப் சிங் பூரியும் தன் டுவிட்டர் பக்கத்தில் பகிர்ந்துள்ளார். அதன் கீழ் அவர், 'தன் தந்தை ராஜகோபாலை மட்டும் அல்லாமல் இந்தியன் ஆயில் கார்ப்பரேஷன் துறையைச் சேர்ந்த அனைவரையும், ஆர்யா பெருமைப்பட வைத்து உள்ளார்' என, குறிப்பிட்டு உள்ளார்.