வெள்ளி வீடியோ : சொல்லுமய்யா நல்ல சொல்லு சொன்னா போதும்

 பாண்டி நாட்டு தங்கம்.  நடுவில் 'த்' வராது!  சினிமா செண்டிமெண்ட்!  அது என்ன பாண்டி நாட்டு தங்கமோ...   சோழநாட்டு வெள்ளி, சேர நாட்டு பித்தளை என்றெல்லாம் அப்புறம் படம், நல்லவேளை வரவில்லை. 

ஆனால் பாருங்க படம் சூப்பர் டூப்பர் ஹிட்.  கார்த்திக்கின் பட வரலாற்றில் சாதனை படைத்த படமாம்.  நேர்மையான காட்டு ஆபீஸர் சந்திக்கும் பிரச்னையில் அங்கு காதலிலும் விழும் கதை.  கார்த்திக்கின் இளமை, அழகு ஒரு கவர்ச்சி என்றால் இளையராஜாவின் இசை படத்துக்கு பெரிய ப்ளஸ்.

சங்கிலி முருகன் தயாரிப்பென்றால் இளையராஜா இசைதான்.  'இளசு' புகுந்து விளையாடி இருப்பார் படத்தில்.  எல்லா பாடல்களுமே ஹிட்.  அதில் மனதை வருடும் இரண்டு பாடல்களை இங்கே இன்று பகிர்கிறேன்!

கார்த்திக், நிரோஷா நடிப்பில், இளையராஜா இசையில், கங்கை அமரன் பாடல்கள்.  மதுரையை மையமாக வைத்து படங்கள் வந்தால் ஹிட் அடித்த நேரம்.  படத்தில் கார்த்திக்கின் பெயர் தங்கபாண்டியனாம்!

முதல் பாடல் மனோ சித்ரா பாடிய பாடல்.  மனோ பாடி இருக்கிறார் என்று பெயர்தான். அவர் ஆரம்பித்து, பாடல் வரிகளுக்கும் ஸ்ருதிக்கும் தடுமாறியவுடன் புன்னகையும் நாயகி, சித்ரா குரலில் பாட்டைத் தொடர்கிறார்.

இந்தப் பாடலிலும் சரி அடுத்த பாடலிலும் சரி பாடல் வரிகள் பெரிய கவித்துவமாக இருக்காது.  அப்படி எல்லாம் எழுத முடியாதவர் அல்ல கங்கை அமரன்.  இந்தப் பாடல்களின் சூழலுக்கு எது பொருத்தமோ அதை எழுதி இருக்கிறார் என்று வைத்துக் கொள்ளலாம்.

சரணம் சுமாராய் ஆரம்பித்தாலும் (மோசமெல்லாம் இல்லை!) பல்லவிகள் (பல்வலிகள் அல்ல!)அழகாய் இருக்கும்.  சித்ரா குரலில் பாடல் இழையும். சரணங்களில் முதல் இரண்டு வரி கட்டியம் கூறுவதும், பின்னர் அது தணிந்து தனக்கே விளக்கம் கொடுத்துக் கொள்வதும், அதன் பின் வா வா குயிலே என்று பல்லவிக்கு வருவதும்...     இந்தப் பாடல் என்ன ராகம் என்று கீதா வந்து சொல்வார்!

காட்சி அமைப்பில் நிரோஷாவும், கார்த்திக்கும்..  காட்சியுடனும் ரசிக்கலாம். 

சிறு கூட்டுல உள்ள குயிலுக்கு ஒருநூறு ஆசை 

ஒண்ணாக் கலந்திருந்தது உலகம் அதமறந்து  பாடாதோ....

சிறு கூட்டுல உள்ள குயிலுக்கு ஒருநூறு ஆசை 

ஒண்ணாக் கலந்திருந்தது உலகம் அதமறந்து  பாடாதோ....

பெண் குயில தான் அது தேடுது தினம் சோ்ந்து பேச 

ஒண்ணாக் கலந்திருந்து உலகம் அத மறந்து பாடாதோ  

சிறு கூட்டுல உள்ள குயிலுக்கு ஒரு நூறு ஆசை  

பாடாமலே... 

பாடாமலே ஒரு புது ராகமா கூடாம சேராம ஒரு தாளமா  

உள்ளந்தான் நல்லாருந்தா எல்லாம் கிட்ட வரும் 

ஊரெல்லாம் கைய தட்டி மாலை கொண்டு வரும்  

செல்லமா துள்ளி துள்ளி சேதி சொல்லி வரும் 

சேர்ந்துதான் வந்து புது சொந்தம் அள்ளி தரும்  

என் நெஞ்சோட மேடை உள்ளது நீ அங்கே வந்தா நல்லது 

வா வா வா குயிலே

பாட்டாலதான் பரலோகமே உன்னோட இடம் தேடி வரலாகுமே 

பாட்டாலதான் மனம் மாறுமே உன்னோட மனம் தேடி உறவாடுமே  

இட்டுத்தான் ராகம் கட்டி பாட்டு பாடி வச்சா 

தொட்டுத்தான் உன்ன கட்ட சொர்க்கம் இங்க வரும்  

சம்மதம் தந்து பல சங்கதி சொல்லி வச்சா 

நிம்மதி எல்லாம் இந்த நெஞ்சில பொங்கி வரும்  

இது தானாக வந்தது வந்தது தேனாக தந்தது தந்தது 

வா வா வா குயிலே

அடுத்த பாடல், இதே படத்திலிருந்து, இதே சித்ரா பாடிய பாடல்.  இது சுத்ததன்யாசி ராகம் என்று அப்போதே ஊரில் பேசிக்கொண்டார்கள்!

இந்தப் பாடல்...   ஆரம்ப ஹம்மிங்கிலிருந்தே ரசிக்க ஆரம்பிக்கலாம்.  அந்தக் குரல்...

முதல் பாடலில் மனோ ஆரம்பத்தில் இரண்டு வரி குரல் கொடுத்தாரா...  இதில் பாடலின் முடிவில் இரண்டு வரி பாடி முடித்து வைப்பார்.  சரியாய் போச்சா?!!

இந்தப் பாடலின் சோக வெர்ஷன் சித்ராவும் எஸ் பி பி யும்.  ஆனாலும் எனக்கு மனோ-சித்ரா வெர்ஷன்தான் பிடிக்கும்.  காரணம் இங்கும் சரணங்கள்தான்.   

பல்லவியும் நன்றாக இருக்கும் என்றாலும் சரணங்கள் ட்யூன் வேற லெவல்!  

'நீ பாடும் ராகம் வந்து நிம்மதியைத் தந்ததய்யா' என்கிற வரிகளில் அந்தக் குரலில் என்ன ஒரு bhaaவம்.. "உன்னோட வாழ்ந்திருந்தா  ஊருக்கெல்லாம் ராணிதான்"  போன்ற வரிகளில் கொஞ்சம் அதிகமாய் உணர்ச்சியைக் காட்டினாலும் செயற்கையாகக் கூடிய சாத்தியம்!  ஆனால் என்ன ஒரு பரவச ஏக்கம் அந்த வரிகளில்..  தன் காதலை பாடல் வரிகளில் சொல்லும் ஏக்கம்...  மிக அருமையான பாடல் 

இந்தப் பாடலை எத்தனைமுறை கேட்டாலும் அலுக்காது.  எனக்கு ஒரு வழக்கம்...  பாடல் கேட்பதென்றால் ஒன்றிக் கேட்கவேண்டும்.  யாரும் குறுக்கே பேசினால் பிடிக்காது.  பாட்டை நிறுத்தி விடுவேன்.  அதனாலேயே தனியாய் இருக்கும்போதுதான் பாடல் கேட்பேன்.  அதுவும் சில பாடல்களில் ஓரிரு வரிகள் கேட்டே ஆகவேண்டும் என்று காத்திருக்கும்போது மர்ஃ பி விதி மாதிரி அந்த வார்தையைக் கேட்க முடியாமல் ஒரு குறுக்கீடு வரும்.  

ஒருமுறை பயணத்தில் இப்படி ஒரு வார்தையைக் கேட்க முடியாமல் பாஸும், உறவினப் பெண் ஒருவரும் பேசிவிட,  என் அதிருப்தியைக் காட்டிவிட்டு பின்னர் எதற்கு இதை எல்லாம் சொல்லிக்கொண்டு என்று வருந்தினேன்.  இப்போது எழுதுகையில் அது என்ன பாடல் என்கிற கேள்வி மனதைக் குடைகிறது!   தேவையில்லாத உபயோகமில்லாத பிரச்னைகள்!  இல்லை?  

அதுபோல குடந்தைப் பயணத்தில் பஸ்ஸில் இந்தப் பாடல் (உன் மனசுல) ஒலிக்க, என் அண்ணணும், ஒரு உறவினப்பெண்ணும் சட்டென தூக்கத்திலிருந்து விழித்து ரெடிமேட் புளிக்காய்ச்சல் பற்றிப் பேசி பேசி மாய்ந்தார்கள்.  சரியாய் பாடல் முடிந்ததும் மறுபடி தூக்கத்தில் ஆழ்ந்து விட்டார்கள்.  

உன் மனசுல பாட்டு தான் இருக்குது என் மனசத கேட்டு தான் தவிக்குது  

அதில் என்ன வெச்சு பாட மாட்டியா நெஞ்ச தொட்டு ஆளும் ராசையா  

மனசு முழுதும் இசை தான் உனக்கு அதிலே எனக்கோர் இடம் நீ ஒதுக்கு

 பாட்டாலே புள்ளி வெச்சு பார்வையில தள்ளி வெச்சு 

பூத்திருந்த என்னை சேர்ந்த தேவனே  

போடாத சங்கதி தான் போட ஒரு மேடை உண்டு 

நாளு வெச்சு சேர வாங்க ராசனே  

நெஞ்சோடு கூடு கட்டி நீங்க வந்து வாழணும் 

நில்லாம பாட்டு சொல்லி காலம் எல்லாம் ஆளணும்  

சொக்க தங்கம் உங்களை தான் சொக்கி சொக்கி பார்த்து 

தத்தளிச்சேன் நித்தம் நித்தம் நான் பூத்து

நீ பாடும் ராகம் வந்து நிம்மதிய தந்ததய்யா நேற்று வரை நெஞ்சில் ஆச தோணல  பூவான பாட்டு இந்த பொண்ண தொட்டு போனதையா போன வழி பார்த்த கண்ணு மூடல  

உன்னோட வாழ்ந்திருந்தா ஊருக்கெல்லாம் ராணி தான் 

என்னோட ஆசை எல்லாம் ஏத்துக்கணும் நீங்க தான்  

உங்கள தான் எண்ணி எண்ணி என் உசுரு வாழும் 

சொல்லுமய்யா நல்ல சொல்லு சொன்னா போதும்