சிறுமிக்கு கல்லீரல் தானம்; இந்திய வம்சாவளி இளைஞருக்கு விருது - நான் படிச்ச கதை

 

= = = = 
சிறுமிக்கு கல்லீரல் தானம்; இந்திய வம்சாவளி இளைஞருக்கு விருது.

சிங்கப்பூர் : சிங்கப்பூரில் வசிக்கும் இந்திய வம்சாவளி இளைஞர் சக்தி பாலன் பாலதண்டாயுதம், உயிருக்கு போராடிய ஒரு வயது சிறுமிக்கு கல்லீரல் தானம் செய்ததற்காக அவருக்கு விருது வழங்கப்பட்டு உள்ளது.

தெற்காசிய நாடான சிங்கப்பூரில் வசிக்கும் இந்திய இளம் தம்பதியருக்கு, 2019ல் பிறந்த மகள் ரியா. பிறந்து சில மாதங்களில், குழந்தைக்கு கல்லீரலில் அரியவகை நோய் இருப்பது கண்டறியப்பட்டது.குழந்தைக்கு ஒரு வயதான நிலையில், அறுவை சிகிச்சை மேற்கொள்ள டாக்டர்கள் முடிவு செய்தனர். இதற்காக கல்லீரல் தானம் வழங்கும்படி கேட்டு, பெற்றோர் சமூக வலைதளங்களில் பதிவிட்டனர்.

சிங்கப்பூரில் வசிக்கும் இந்திய வம்சாவளியை சேர்ந்த விற்பனை பிரிவு அதிகாரி சக்திபாலன் பாலதண்டாயுதம், 28, உடனடியாக அவர்களை தொடர்பு கொண்டார். பின், தன் கல்லீரலின் 23 சதவீதத்தை குழந்தைக்கு 2020 செப்., மாதம் தானம் வழங்கினார். இதையடுத்து நடந்த அறுவை சிகிச்சை முடிவில், குழந்தையின் நோய் பிரச்னைக்கு தீர்வு கிடைத்தது.

இந்நிலையில், பாலதண்டாயுதத்திற்கு 2021ம் ஆண்டிற்கான சிங்கப்பூரின் சிறந்த நபர் என்ற விருது வழங்கப்பட்டு உள்ளது.அவரிடம் விருது மற்றும் 11 லட்சம் ரூபாய் பரிசுத்தொகையை நேற்று நடந்த விழாவில் அந்நாட்டு அதிபர் ஹலிமா யாக்கோப் வழங்கி பாராட்டினார்.

= = = =

வெள்ளி கிரகத்தை படம் பிடித்தது 'நாசா'வின் 'பார்க்கர்' விண்கலம்

வாஷிங்டன் : 'நாசா' எனப்படும் அமெரிக்க விண்வெளி ஆய்வு நிறுவனத்தின், 'பார்க்கர்' விண்கலம், வெள்ளி கிரகத்தின் மேற்பரப்பை மிக தெளிவாக படம் பிடித்து அனுப்பி உள்ளது.

சூரியனின் வெளிப்புறத்தை ஆய்வு செய்வதற்காக, 'பார்க்கர்' விண்கலத்தை, நாசா 2018ல் விண்ணில் ஏவியது. இது 2025ல் சூரியனுக்கு மிக அருகில் சென்று ஆய்வு மேற்கொள்ளும் என, எதிர்பார்க்கப்படுகிறது. சூரியனுக்கு மிக அருகே வெள்ளி கிரகம் உள்ளது. இந்நிலையில், சூரியனை நெருங்கிக் கொண்டிருக்கும் பார்க்கர் விண்கலம் வெள்ளி கிரகத்தை கடக்கையில், அதன் மேற்புறத்தை ஏற்கனவே மூன்று முறை புகைப்படம்எடுத்துள்ளது.

ஆனால், வெள்ளி கிரகத்தின் மேற்புறத்தில் உள்ள அடர்த்தியான மேக கூட்டங்களால், அதன் மேற்புற காட்சிகள் சரிவர பதிவாகாமல் இருந்தன. சமீபத்தில் நான்காவது முறையாக வெள்ளி கிரகத்தை பார்க்கர் விண்கலம் கடந்தது. அப்போது, அதன் மேற்புறம் மிக தெளிவாக படம் பிடிக்கப்பட்டுள்ளது. இது வெள்ளி கிரகம் குறித்த ஆய்வில் மிகப்பெரிய முன்னேற்றமாக பார்க்கப்படுகிறது.

'இதன் வாயிலாக, வெள்ளி கிரகத்தின் தட்ப வெப்பம், அங்கு உள்ள வளங்கள், மண்ணின் தன்மை, எரிமலைகள் குறித்து மேலும் துல்லியமாக ஆய்வு செய்ய, இந்த புகைப்படம் பேருதவியாக இருக்கும்' என, ஆய்வாளர்கள்கருதுகின்றனர்.

= = = = ====================================================================================================================

நான் படிச்ச கதை

ஜெயக்குமார் சந்திரசேகரன் 

பாச்சி

கேரளத்தில் அதுவும் திருவனந்தபுரத்தில் தமிழ் எழுத்தாளர்கள் இருந்தனர் என்பது எ பி வாசகர்கள் அனைவருக்கும் தெரியும் என்று சொல்லமுடியாது. . இவர்களில் சிலர் சாஹித்திய அகாதமி விருது பெற்றவர்கள் என்பதும் அவர்களுக்கு வியப்பூட்டும். நகுலன், நீல பத்மநாபன், ஆ. மாதவன் ஆகியோர் திருவனந்தபுரத்து தமிழ் எழுத்தாளர்கள். இவர்களில் நகுலன், மாதவன் ஆகியோர் இன்று இல்லை. இன்று நாம் காணப்போவது இவர்களில் ஒருவரான ஆ. மாதவன் எழுதிய ஒரு சிறுகதை பற்றிய ஆய்வு.

ஆ. மாதவன் (1934-2021) திருவனந்தபுரத்தில் பிறந்து வளர்ந்தவர். வணிகம் அவரது தொழில். முக்கிய கடைவீதியான சாலையில் செல்வி ஸ்டோர்ஸ் என்று ஒரு பாத்திரக்கடையின் உரிமையாளர். சாஹித்ய அகாதமி விருது பெற்றவர்.

காவியம், மரபு, யதார்த்தம், நவீனத்துவம், பின் நவீனத்துவம் என்று மணிக்கொடி காலம் முதல் சென்ற வருடம் வரை பலரது எழுத்துக்களையும் எழுத்தாளர்களையும் பார்த்தவர், எழுத்தாளர்களுடன் பழகியவர். திராவிட கொள்கைகளில் பிடிப்புள்ளவர். இதைப்பற்றி ஒரு பேட்டியில்

“எனக்கு கடவுள் நம்பிக்கை உண்டு, கடவுள்களிடம் நம்பிக்கை இல்லை. ஆனால் இந்து மதம் தான் ஆழமான தத்துவ சாரம் கொண்டது. “

 என்று கூறுகிறார்.

இவரை மற்ற எழுத்தாளர்கள் கடைத்தெருவின் கதைசொல்லி என்று கூறுவார்கள். இவர் பற்றிய விவரங்களை

https://en.wikipedia.org/wiki/A._Madhavan

https://ta.wikipedia.org/s/1haq

தளங்களில் காணலாம்.

இவரது கதைக்களம் கடைத்தெரு என்பதால் அதை பற்றிய சில விவரங்கள் தர வேண்டியிருக்கிறது.

சாலைத்தெரு மன்னர் காலத்தில் இருந்தே பிரசித்தி பெற்றது. சுமார் 350 வருட பழமை.

 திருச்சியில் பெரிய கடைத்தெரு மலைக்கோட்டை பிள்ளையார் கோவிலில் துவங்கி காந்தி மார்கெட்டில் முடியும். பல கிளைத்தெருக்கள் சந்துகள் நிறைந்தது. அதே போன்றது தான் சாலைத்தெருவும். பத்மநாப சாமி கோயில் கிழக்கு கோபுரம் முதல் கிள்ளி ஆறு பாலம் வரையிலும் நீண்ட தெரு. கிளை தெருக்களும் சத்துக்களும் உண்டு.

திருவனந்தபுரம் தமிழ் மலையாளம் கலந்ததாக இருக்கும். காரணம் சில சொலவடைகளுக்கும் சில வார்த்தைகளுக்கும் நேரடி தமிழ் கிடையாது. அதே போன்று ஒரே சொல் பல அர்த்தங்களில் உபயோகிக்கப்படும். உதாரணமாக சரக்கு என்ற வார்த்தை. இந்த வார்த்தை சொல்லும் இடத்தைப் பொருட்டு சொல்லும் முறையைப் பொறுத்து அர்த்தம் மாறுபடும். சாமான், விலைமாது, சாராயம், நண்பன் போன்ற அர்த்தங்களில் பிரயோகிக்கப்படும்.

இதுபோன்ற திருவனந்தபுரம் தமிழில் தான் மாதவன் யதார்த்தமாக இந்த கதையை எழுதியிருக்கிறார்.

இவரது சிறப்பம்சம் கதையை கதைச் சித்திரமாக அல்லது சித்திரக்கதை போன்று (டாக்குமெண்டரி) மாதிரி விவரிப்பது. ஆகவே சில நிகழ்வுகளை வாசகர்களின் குறிப்புணர்வுக்கே விட்டு விடுகிறார்.

பாச்சி என்பது நாய் என்று அவர் கதையில் எங்கும் குறிப்பிடவில்லை. சில பத்திகள் கழிந்தபின்

  விடியக்காலம் பார்த்தபோது பாச்சி காலைப்பரப்பி, நாக்கையும் துருத்திக்கொண்டு செத்துக் கிடக்கிறது.

 என்று வாசிக்கும்போது தான் பாச்சி ஒரு தெரு நாய் என்று தெரிய வருகிறது.

அதேபோன்று பாச்சி செத்து போனதும் காவல்காரன் நாணுவுக்கு ஏன் அவ்வளவு துக்கம் என்பதை கதையின் கடைசியில் தான் சொல்கிறார். ஆம் யதார்த்த காவல்காரன் பாச்சி தான்.

இந்தக்கதையின் முழு சாரமும்  இந்த ஒரு படத்தில் அடங்கிவிடும். படம் இணையத்தில் சுட்டு எடுத்தது.

பாச்சி செத்துப் போனாள்.

இப்படித்தான் கதையே ஆரம்பிக்கிறது. அதே போன்று கதையின் கடைசி வரியும்

பாச்சி செத்துப் போனாள்.

இனி பாச்சியும் நாணுவும் எப்படி ஒன்றானார்கள் என்பதை பார்ப்போம்.

பாச்சி நாணு விடம் வந்த கதை

இந்த வாக்கிலேதான் ஒருநாள், தேங்காய் தொண்டு வண்டி ஒன்றின் பின்னால் யாரோ கழுத்தில் கயிற்றைக் கட்டி விரட்டி விட்டிருந்த பாச்சியைக் கண்டது. ‘மொள் மொள்’ என்று அழுது கொண்டு, வண்டியின் வேகத்துக்குக் கால்களைக் கீழ் ரோட்டில் உரசிக் கொண்டு இழைந்து வந்த பாச்சியை நாணு கண்டான்.

அவளை வண்டியிலிருந்து அவிழ்த்து வந்து அப்பு சாயாக் கடையிலிருந்து ஒரு இணுக்குப் புட்டு வாங்கிக் கொடுத்தான். சிரட்டையில் காப்பி வாங்கிக் கொடுத்தான்.

இனி நாணுவின் கதை

இன்னும் யார் இருக்கிறா? சின்னப் பிராயத்திலேயே அம்மா, மேத்தன்கூட ஓடிப்போனது. அப்புறம் அப்பன் எறச்சிக் கடைச்சண்டையிலே வெட்டுப்பட்டுச் செத்தது. பத்துப் பதினெட்டு வயசு வரையில கருமடம் சேரியில் புல் வெட்டி விற்று, எருமைகளைக் குளிப்பாட்டிக் கொடுத்து வாழ்ந்தது… அப்புறம் சாலைக் கடைக்கு வந்து சுமடு தூக்கிப் பிழைத்தது. வருஷங்களாயிற்று கடைசியலெ, கால் ரெண்டிலும் ஆணிப்புற்று வந்ததுக்கப்புறம், நடக்க மாட்டாமெ, கிட்டங்கித் திண்ணையே கதின்னு கிடந்தது…

ஆக இரண்டு அநாதைகளும் சேர்ந்து

நீ ஒரு அநாதை

நான் ஒரு அநாதை

நாம் இருவர் அல்ல

இனி ஒருவர் தான்

பிரியமாட்டோம்.

என்று காலத்தை நகர்த்தியபோது தான் இந்த அபகடம் நடந்தது.

பாச்சி செத்துப் போனாள்!

நாணுவிற்கு எல்லாவற்றின் பேரிலும் வெறுப்பாக வந்தது, ”சே! என்ன வேண்டிக் கிடக்கிறது? போச்சு, எல்லாம் போச்சு.”

நாணு பாச்சியைக் கடைசியாக ஒரு முறை பார்த்தான். திறந்த வாயில் முந்திரிப் பருப்புச் சிதறல் போல வெள்ளை வெளெரென்று பற்கள் வெளியே தெரிகின்றன. ஈக்கள் விடாமல் மொய்க்கின்றன. கால்கள் நாலும் விரிந்து கிடக்கின்றன. ராத்திரியெல்லாம் தன் விரிப்பில் கிடக்கும் அதே கோலம்…”

பாச்சி செத்துப் போனாள்

நாணு வெறுமையில் நின்றான். வெயில் ஏறிக் கொண்டிருந்தது.

பாச்சி இல்லாமல் நாணு  எங்ஙனம் காவல் புரிய முடியும். ஜீவிக்க முடியும் என்பதை வாசகர்களின் ஊகத்துக்கே விட்டு விடுகிறார்.

பாச்சி - கதையை இங்கு க்ளிக் செய்து படிக்கலாம்.

எஸ்ரா இவரைப்பற்றியும் இவரது இன்னொரு படைப்பான வேஷம் என்ற சிறுகதை பற்றியும் கூறுவதை

https://azhiyasudargal.blogspot.com/2009/12/blog-post_15.html

என்ற சுட்டியில் காணலாம்.

சில சொற்களுக்கு விளக்கம்

 மறிமாயம் : கண்கட்டி  வித்தை.  அலமலங்கள் : ஹரி பரி

ஏச்சுபிட்டோம் : ஏய்த்து விட்டோம். ஸக்காத்து : ஓசி  

ஆங்காரம் : பலம் தெம்பு . பதனமாயிருக்கணும்: கவனமாக இருக்கணும்  

தூம்பா : மண்வெட்டி போல் நீள கைப்பிடி உடையது.

 

சவத்துப் பயலுக : கட்டையிலே  போறவங்க

வள்ளக்கடவு : boat jetty . சுமட்டுக்காரன் : load man

மடிச்சிறாதே: மடிக்காதே. Don’t avoid. மேத்தன் : துலுக்கன்

அபகடம்: accident