"திங்க"க்கிழமை : பீடர்ஸ்பர்க் பிரியாணி - அப்பாதுரை ரெஸிப்பி

 

பீடர்ஸ்பர்க் பிரியாணி

அப்பாதுரை 

டிசம்பர் கடைசியில் என் நண்பர் குடும்பத்துடன் என்னைக் காண வந்திருந்தார். குடும்பம் என்றால் என் வட்டத்தில் இந்நாளில் இரண்டு பேர் என்று அர்த்தம். பிள்ளைகள் பறந்து விட்ட கூட்டம். வங்காள நண்பரும் அவர் மனைவியும் என்னுடன் சில நாட்கள் தங்க சிகாகோவிலிருந்து மிசௌரி கொலராடோ ஓக்லஹோமா என்று சாவதானமாக நாலு நாள் சுற்றுப்பயணத்தில் டெக்சஸ் வந்து சேர்ந்தார்கள். வரும் பொழுதே சாப்பிட என்ன வேண்டும் என்று சொல்லிவிட்டார் நண்பர். ஹௌராவிலிருந்து திப்யேந்தர மனோஹர் சாடர்ஜி, கரக்பூரிலிருந்து ப்ரீதி சுராபி சாடர்ஜி ஆகியோருக்காக உங்கள் விருப்பத்தின் அடுத்த சமையல்குறிப்பு இங்கே பதிவாகிறது. தேவையானவை (சர்க்கரை A1C அளவு ஏழுக்குள் இருக்கும் ஐம்பது வயதைக் கடந்த இரண்டு பேருக்கு):    கால் கப் பாஸ்மதி அரிசி (ஏழுக்கு மேல் A1C இருந்தால் இதைப் படிப்பதோடு நிறுத்திக் கொள்ளவும்)    காய்கறிகள் (உங்கள் இஷ்டத்துக்கு ஜமாயுங்கள் என்றாலும் இது என்னுடைய சமையல் குறிப்பு என்பதால் இவற்றை அவசியமாகக் குறிப்பிடுகிறேன்)       இஞ்ச் நீளத்துக்கு வெட்டிய இளசான பீன்ஸ் அரைக்கால் கப்       பச்சைப் பட்டாணி அரைக்கால் கப்       சிறிதாக நறுக்கிய சிவப்பு அல்லது வெள்ளை வெங்காயம் மற்றும் தக்காளி அரைக்கால் கப்       பொடியாக நறுக்கிய முட்டைக்கோஸ் அரைக்கால் கப்       பொடியாக நறுக்கிய கறிவேப்பிலை கொத்தமல்லி கலவை ஒரு டேபிள் ஸ்பூன்       புதிதாக இடித்த ஜீரகம் மிளகு ஏலக்காய் சோம்பு லவங்கம் தனியா பொடிக் கலவை ஒரு டீஸ்பூன்       புதிதாக இடித்த இஞ்சி பூண்டு கலவை அரை டீஸ்பூன்       வெந்தயம் அரை டீஸ்பூன் (வாசனைக்கும் உதவும் A1Cக்கும் உதவும்)       கரம் மசாலா கால் டீஸ்பூன் (பிடித்தால் அதிகம் சேர்க்கலாம்)       மிளகாய்ப் பொடி ஒரு டேபிள் ஸ்பூன்       உப்பு ஒரு டேபிள் ஸ்பூன்       கட்டி வெண்ணை ஒரு சதுர இஞ்ச் அல்லது இரண்டு டீஸ்பூன் அல்லது உங்கள் தேவையைப் பொறுத்து       தயிர் கால் கப்       நல்லெண்ணை அல்லது ஆலிவ் எண்ணை ஒரு டீஸ்பூன்

சமையலை ரசிப்பவர்களுக்கான செய்முறை:     பாஸ்மதி அரிசியைக் கழுவி அரை கப் குடிநீரில் ஊற வையுங்கள். அகலமான சட்டி ஒன்றைச் சுடவைத்து அதில் வெந்தயத்தை வறுத்து, பொன்னிறமானதும் ஊறிக்கொண்டிருக்கும் அரிசியுடன் கலக்கவும்.பதினைந்து நிமிடமாவது ஊற வைத்த அரிசியை தனிப் பாத்திரத்தில் சாதமாகும் வரை வேக வையுங்கள். குக்கர் பயன்படுத்தினால் உங்களுக்கு சமைப்பதில் ரசனை இல்லை என்ற சந்தேகம் வரும். பாதிக்கு மேல் வெந்ததும் தண்ணீரை வற்றி சூட்டிலிருந்து அகற்றி அப்படியே மூடி வைக்கவும்.     இன்னொரு அகலமான சட்டியை மறுபடி சூடாக்கி நல்லெண்ணை விடவும். இடித்து வைத்த ஜீரகம் மிளகு ஏலக்காய் சோம்பு லவங்கம் தனியா பொடிக் கலவையை மிதமான சூட்டில் இலேசாக வறுக்கவும். இதில் வெங்காயம் மற்றும் தக்காளியைச் சேர்த்து ஐந்து புரட்டல் புரட்டவும். இதில் அரை இஞ்ச் வெண்ணைக் கட்டியைச் சேர்க்கவும். உடன் இடித்து வைத்த இஞ்சி பூண்டு கலவையைச் சேர்த்துப் புரட்டவும். பிறகு பிற காய்கறிகளைச் சேர்த்து இரண்டு புரட்டு புரட்டவும். பிறகு மிளகாய் கரம் மசாலா உப்பு இன்னும் ஏதாவது விட்டுப் போயிருந்தால் சேர்த்துப் புரட்டவும். சூட்டிலிருந்து விலக்கி கடைசியாக தயிர் கால் கப் சேர்த்துப் புரட்டவும்.     அரிசிச் சட்டியில் காய்கறிக் கலவையைச் சேர்த்தாலும் சரி காய்கறிக் கலவையில் அரிசியைச் சேர்த்தாலும் சரி அல்லது மூன்றாவதாக ஒரு அகலமான சட்டியில் இரண்டையும் சேர்த்தாலும் சரிதான். (பாத்திரம் கழுவப்போவது நானா?)     அரிசியும் காய்கறியும் சேர்த்த சட்டியில் அரை கப் குடிநீர் சேர்த்து மூடி மிதமான சூட்டில் எட்டு நிமிடம் சமைக்கவும். மூடியை விலக்கி ஒரு கிளறு கிளறி சூட்டிலிருந்து அகற்றவும். மிச்சமிருக்கு வெண்ணையை அப்படியே போட்டு (இன்னொரு அரை சதுர இஞ்ச் வெண்ணை சேர்த்தாலும் சரிதான்) மூடி வைக்கவும். ஐந்து நிமிடங்களில் சாப்பிடும் சூட்டில் பதமான பிரியாணி தயாராக இருக்கும். கொதிக்கக் கொதிக்க சாப்பிடுவோர் ஐந்து நிமிடங்கள் பொறுக்க வேண்டிய அவசியம் இல்லை.

சாப்பாட்டை ரசிப்பவர்களுக்கான செய்முறை:     நல்லெண்ணை/ஆலிவ் எண்ணை தவிர ஏனையவற்றை ஒரு குக்கரில் கொட்டவும். குக்கரை மூடி வேக வைக்கவும். இரண்டு விசில் வந்தால் அதிகம். அதற்கு முன்பே நிறுத்தி உடனடியாகவோ ஐந்து நிமிடம் பொறுத்தோ தட்டில் பரிமாறி ஒரு பிடி பிடிக்கவும்.     ஓ, நல்லெண்ணை/ஆலிவ் எண்ணையா? தலை கை காலில் தேய்த்துக் கொள்ளவும். வறட்டுத் தோலுக்கு நல்லது.

இரண்டு பேருக்கான மதியச் சாப்பாடு மேற்சொன்னது. மிச்சம் இருந்தால் இரவுச் சாப்பாட்டுக்கு வைத்துக் கொள்ளலாம்.

அட, அதுவா? பிரியாணி படம் கைவசம் இல்லை. டிசம்பரில் செய்த பிரியாணி படத்துக்கு எங்கே போவது? கேஜிஜியின் வாட்சப் குறிப்பைப் பார்த்தவுடன் இப்போது எழுதிய குறிப்புக்கு இன்று செய்த ஸாலட் படம் சேர்த்தேன். பொன் வைக்குமிடத்தில் ஏதோ பூ வைப்ப்து போல பிரியாணி படம் வைக்கும் இடத்தில் சாலட் படம் வைத்திருக்கிறேன். பிரியாணிப் படப்பிரியர்கள் பொறுத்து அருள் பாலிக்கவேண்டும். (ஆமாம்.. இங்க என்ன சிக்கன் மட்டன் பிரியாணியா பாழாய்ப் போவுது? இதுவும் காய்கறி, அதுவும் காய்கறி. போவிங்ளா?) அப்புறம் இந்த பீடர்ஸ்பர்க், என் சமையற்கூடம் இருக்கும் இடம். அதான் பெயர்க்காரணம். போகிற போக்கில் இன்னொரு குறிப்பு. சமையலை ரசிப்பவர்கள் எல்லாவற்றையும் அரைப்பதில்லை என்று கவனிக்கத் தொடங்கியிருக்கிறேன். இடிக்கிறார்கள். ஹிஹி. நானும். தமிழில் என்ன, ஆட்டுக்கல்லா? சொல் மறந்தே போன பொருள் பத்து டாலருக்குள் அமெசானில் கிடைக்கிறது, இரண்டு வருடமாக உபயோகிக்கிறேன். டீயிலிருந்து அனேக சமையலுக்கும் மசாலா இடிக்கிறேன்.