"திங்க"க்கிழமை : சேனை நக்கெட்ஸ் - ஸ்ரீராம் ரெஸிப்பி

 தினமும் சமைத்து சமைத்து அலுத்துப் போனவர்களுக்கு சமையல் என்பது ஒரு நித்திய கடமையாகி ஏதோ சமைத்தோம், வந்தோம் என்கிற நிலை ஏற்பட்டு விடும்.  எல்லோருக்கும் அல்ல என்றாலும் பெரும்பாலானோருக்கு....

ஆண்களுக்காவது 60 வயதில் ஓய்வு என்று ஒரு நிலை வரும்.  பெண்களுக்கு இது கொஞ்சம் ஒத்துவராத விஷயம்!  இந்த மாதிரி சமயங்களில் நடுவில் யாராவது வந்து சமைத்தால் அவர்களுக்கு ஒரு ரிலீஃப் தான்.  

ஆனால் ரிலீஃப் என்று சொன்னாலும், வீட்டில் உள்ளவர்கள் திடீரென ஒரு நாள் மாறுதலாய் வந்து விழும் ருசியைப் பார்த்து 'ஆஹா ஓஹோ' என்றால் ரிலீஃபுக்கு பதில் அவர்களுக்கு லேசான எரிச்சல் ஏற்படுவதும் உண்டு.

இந்த நிலை சமீபத்தில் எங்கள் வீட்டில் வந்தது.  சேனைக்கிழங்கு வாங்கி வந்தால் அப்பாதான் சமைக்க வேண்டும் என்பார்கள் மகன்கள்.  பெரும்பாலும் டிமிக்கி கொடுத்தாலும் அவ்வப்போது வளைந்து கொடுத்து செய்வதும் உண்டு!

அப்படி ஒரு சந்தர்ப்பத்தில் ஏற்கெனவே முன்பு பகிர்ந்திருந்த கோஃப்தா வடிவில் செய்திருந்ததை கொஞ்சமே கொஞ்சம் மாற்றி கட்லெட் வகையில் இந்தமுறை செய்தேன்.  நீங்களும் இப்படி செய்திருப்பீர்கள்!

தோல் நீக்கிய சேனைக்கிழங்கை நன்கு அலம்பி சுத்தம் செய்து கொண்டு குக்கரில் நான்கைந்து  விசில் வைத்து இறக்கி நன்றாக கட்டியின்றி மசித்துக் கொள்ளவேண்டும்.

அதனுடன் இரண்டு மூன்று பச்சை மிளகாய், மூன்று இணுக்கு கறிவேப்பிலை, கொஞ்சம் கொத்துமல்லி ஆகியவற்றை பொடியாய் நறுக்கிச் சேர்க்கவேண்டும்.

பொடியாய் நறுக்கிய வெங்காயத்தையும் சேர்க்கவேண்டும்.

கொஞ்சம் அரிசிமாவு...  தேவையானால் ஒரு ஸ்பூன் ரவா 

இஞ்சி பூண்டு பேஸ்ட்..., கொஞ்சம் கரம் மசாலா 

எல்லாவற்றையும் சேர்த்து பிசைந்து சப்பாத்தி மாவு பதத்துக்கு கொண்டு வரவேண்டும்.

பிறகு அவற்றை கொஞ்சம் கொஞ்சமாக எடுத்து உள்ளங்கையில் வைத்து உருட்டிக்கொண்டு (கைகளில் எண்ணெய் தடவிக் கொண்டால் ஒட்டாது) வடைபோல உள்ளங்கையில் வைத்து லேஸாக பிரெஸ் செய்து தட்டி எடுத்துக்கொள்ள வேண்டும்.  

ஒரு பாத்திரத்தில் கொஞ்சம் கார்ன்ஃப்ளவர் மாவை தண்ணீரில் கலக்கி எடுத்து வைத்துக் கொள்ளவேண்டும்.  கொஞ்சம் கார்ன்ப்லேக்ஸ் எடுத்துக் கொண்டு மிக்சியில் கொரகொரவென அரைத்துக் கொள்ளவேண்டும்.  தட்டி வைத்த வடைகளை கார்ன்ஃபிளார் கரைத்த நீரில் தோய்த்து, கார்ன்ஃப்லேக்ஸ் கொரகொரப்பில் (இவற்றை படம் எடுக்க மறந்து விட்டேன்!)  புரட்டி எடுத்து அரை மணிநேரம் ஃபிரிஜ்ஜில் வைக்கவேண்டும்.  

அப்படியே உடனே எண்ணெயில் போட்டால் கார்ன்ப்ளெக்ஸ் உதிர்ந்துவிட வாய்ப்பிருப்பதால் ஃபிரிஜிஜ்ஜில் வைத்துப் போட்டால் உதிராது.  வீட்டு வேலை செய்யும் பெண்மணி ஒரு ஐடியா சொன்னார்.  அதாவது மொத்த மாவையும் சப்பாத்தி போல சம அளவில் இட்டுக்கொண்டு ஒரு சிறு கப் வைத்து 'கட்' செய்து எடுத்து விடலாம் என்று சொன்னது நடைமுறையில் சரி வரவில்லை.

ஒவ்வொன்றாக உருட்டிதான் தட்டிக்கொண்டேன்.

கார்ன்ஃபிளேக்ஸில் புரட்டிய பிறகு....

உருட்டி, தட்டி எடுத்த வடைகளை கார்ன்ஃப்ளவர் நீரில் நனைந்திருக்க வேண்டாம் என்று தோன்றியது. ஈரத்தால் கொழகொழத்து கொஞ்சம் வடிவம் மாறியது.   நேரிடையாக கார்ன்ஃப்லேக்ஸ் மாவில் புரட்டி இருக்கலாம்.  அரை மணி நேரம் பிரிஜ்ஜில் வைத்திருந்து, பிறகு எடுத்து எண்ணெயில் பொறித்து எடுத்தால் சேனைக்கிழங்கு நக்கெட்ஸ் ரெடி.  சாப்பிட்டால் ருசியோ ருசி என்று மகன்கள் கொண்டாடினார்கள்!

தக்காளி சாஸ் செய்யவேண்டும் என்று நினைத்திருந்தேன்.  மறந்து விட்டது.  அதற்குத் தேவையும் இருக்கவில்லை!  மேலே கொரகொரப்பாகவும் உள்ளே நைஸாகவும், காரம், மணம், குணத்துடன் சிறந்து விளங்கியது!

நான் இப்படி முயற்சிப்பவற்றை வீட்டில் பெருக்க வரும் பெண்மணி பார்த்தவாறிருப்பார்.  இதையும் பார்த்தார்.  செய்ததும் டேஸ்ட்டும் பார்த்து முகம் மலர்ந்தார்.  மறுபடி ஒருமுறை செய்முறை சொல்லி சரி பார்த்துக் கொண்டார்.  அடுத்த முறை வரும்போது தான் சமையல் வேலை செய்யும் ராமச்சந்திரா டாக்டர் வீட்டில் இதை செய்து கொடுத்து பாராட்டுதல்கள் வாங்கினாராம்!  டாக்டர் ப்ரீத்தம் என்னையே பாராட்டியது போல மகிழ்ந்து போனேன்.