புதன் 191016 : பேய் ஏன் செடிகளில் குடியேறுவதில்லை?

வல்லிசிம்ஹன் :
              
வதன,முக நூல் பக்கம் போகாமலிருந்தால் என்ன ஆகும்?

# முகநூல் பக்கம் போகாமல் இருந்தால் நல்ல நிம்மதியாக இருக்கும். ஆனாலும் என்ன ? முகநூலில் நாம் பார்க்கத் தவறுவதை வாட்ஸ் அப்பில் யாரோ போட்டு நம்மைத் தொல்லை செய்கிறார்களே.

$ வாட்ஸ் அப்பில் வந்தால் கூட உடனே அதை டெலிட் செய்துவிடுவேன்! 

& ஒன்றும் ஆகிவிடாது. மக்களுக்கு மறதி அதிகம். ஒருவாரம் அல்லது பத்துநாட்கள் கொஞ்சம் நெருங்கிய நண்பர்கள் அதாவது நமக்குப் பரிச்சயமானவர்கள் நம்மைத் தேடுவார்கள். பிறகு மறந்துபோய்விடுவார்கள். முகநூலை விட்டு வெளியேறுகிறேன் என்று அறிவித்த சில நபர்களின் அனுபவத்தை வைத்து இதைச் சொல்கிறேன். 

ஏஞ்சல் :

1, ஒருவருக்கு சொந்த ஊர் என்பது எது ?

$ அப்ளிகேஷன் (விண்ணப்பப் படிவங்கள்) நிரப்பும்பொழுது, பெர்மனென்ட் (மாறாத? நிலையான ?) விலாசம் எந்த ஊர் விலாசம் அந்த ஊர் என்று எடுத்துக்கொள்ளலாம். அல்லது ஒரே ஊரில் வாழ்க்கையின் அதிக வருடங்களைக் கழித்திருந்தால் அந்த ஊராகவும் எடுத்துக்கொள்ளலாம்.

# சொந்த ஊர் என்பது ஜமீன்தாரி ஒழிப்பு சட்டம் வந்ததும் காணாமல் போய்விட்டது. ஜமீன்தார்கள் தான் ஊர் முழுவதுக்கும்  சொந்தக்காரர்களாக இருந்தார்கள் -அந்தக் காலத்தில்.

இப்போது புலம்பெயர்ந்து வேலை தேடிப்  பலரும் பல திசைகளிலும் செல்லும்  நிலையில் சொந்த ஊர் என்று சொல்லிக்கொள்ள ஏதும் இல்லாமல் போவதே இயல்பாகிப் போய்விட்டது.

& எனக்கு சொந்தமாக ஊர் எல்லாம் ஒன்றும் இல்லை. சொந்த வீடு மட்டும்தான்! 

2, இது பேய்ப்பற்றிய ஒரு கேள்வி :) ஆலமரப்பேய் ,அரசமரப்பேய் ,புளியமரப்பேய் எல்லாம் கேள்விப்பட்டிருக்கோம் ஆனா ரோஜாச்செடி பேய் செம்பருத்திச்செடி பேய்னு இல்லியே ஏன் ? 

$ ரோஜா செம்பருத்தி எல்லாம் அல்ப ஆயுள் கொண்ட செடிவகைகள். ஆலமரம், அரசமரம், புளியமரம் - ஆஹா! வாழும் பேய்களுக்கு ஏற்ற வாழுமிடம். மேலும் பேயின் வெயிட்டைத் தாங்க செடிகளால் இயலாது! 

# செடிகள் பேயின் சுமையை தாங்க முடியாதே.

& இரவில் தனியாக நடந்துசெல்கிறோம். ஒரு பேய் சிம்பிளா  ஆல/ அரச/ புளிய மரத்திலிருந்து தொப்பென்று நம் கண் முன்னே குதித்தால் கெத்தாக இருக்கும். அதை விடுத்து  ரோஜாச்செடி/ செம்பருத்தி செடியிலிருந்து, கம்பளிப்பூச்சி போல, நூலில் பேய் தொங்கினால்,  ஒரு பய மதிப்பானா அதை?  சொல்லுங்க! 

3, ஒருவரை ஒரு காணொளியில் பார்த்தேன் .யாரையும் பேசவிடாமல் காமெடி என்ற பெயரில் பிறர் பேசும்போது குறுக்கே குறுக்கே பேசிக்கொண்டிருந்தார் இது நார்மலா இல்ல அப்நார்மலா ? இல்லை எனக்கு ரசிப்புத்தன்மையில்லையா ? அதற்கு கைதட்டியது அரங்கம் முழுதும் .

$ எதிர்பார்ப்புகளும் நடைமுறை வாழ்க்கையும் எப்போதும் ஒத்துப்போவதில்லை! 

# காணொளிக் காமெடி கேலிக் கூத்தாகி வெகு நாட்களாகி விட்டது.

& He might be a normally abnormal comedian. பட்டிமன்ற நடுவர்கள் குறுக்கிட்டுப் பேசினால் - அதிக பட்சமாக ஐந்து வார்த்தைகளுக்குள் இருந்தால் ரசிக்கலாம். சாலமன் பாப்பையாவின் குறுக்குக் கமெண்ட்ஸ் அப்படி ரசிக்கும்படி இருக்கும். 

4, Greta Thunberg பற்றி கேள்விப்பட்டிருப்பீர்கள் .ட்ரம்ப் அங்கிள் நடக்கும்போது முறைத்து பார்த்த காட்சி உலகெல்லாம் டிவிக்களில் வலம் வந்தது . ஒரு குழந்தையை குழந்தையாக அதனியல்பில் இருக்க விடாமல் செய்தது எது ? அதன் வளர்ப்பா அல்லது சமூகமா ?

$ குழந்தைகள் குழந்தைகளாக இல்லாமல், பெரியவர்கள் போல நடந்துகொள்ள முற்படும்போது, கை தட்டி அவர்களைக் கெடுத்துவிடுகிறோமோ என்று சந்தேகமாக உள்ளது. 

# நீங்கள் என்ன சொல்கிறீர்கள்? ஒரு சின்ன வயசுப் பெண் அமெரிக்க ஜனாதிபதி யை "முறைத்துப் பார்ப்பது" வளர்ப்புக் கோளாறோ என்று ஐயம் எழுந்தால் அதிலும் ஒரு நியாயம் இருக்கிறது. உலகளாவிய பிரச்சினை யில் ஒரு தனி நபரை (பதவி எதுவானாலும்) முறைப்பதால் தீராது என்று அவர் உணர்ந்திருந்தால் நன்றாகத்தான் இருந்திருக்கும். ஆனால் அது பெரிய தவறா என்று தெரியவில்லை. காரணம் ட்ரம்ப் MR ராதா டைப் என்று நம்மை நினைக்க வைப்பவர்.

  

& உங்கள் கேள்வியைப் படித்தபின்(தான்) விவரங்களை இணையத்தில் தேடிப்பிடித்துப் பார்த்தேன். என்னைக் கேட்டா, இந்த கிரேட்டா தன்னுடைய sweet sixteen முகத்தை இவ்வளவு கடுமையாக வைத்துக்கொள்ளாமல், இனிய புன்னகையோடு, அதே விஷயத்தைக் கூறினால் அதற்கு இன்னும் அதிக reach இருக்கும் என்று தோன்றுகிறது. அதை விடுத்து உலகத் தலைவர்களை எல்லாம் பார்த்துப் பல்லைக் கடித்துக்கொண்டு பேய் காட்டினால், அது ஒரு மனோவியாதியின் வெளிப்பாடாக இருக்கிறதோ என்று சந்தேகம் வருகிறது. 

5, //ஒரு தவறு செய்தால் அதை தெரிந்து செய்தால் //இதில் எனக்கொரு மாற்று கருத்து இருக்கு ..யாராவது தவறை தெரிந்தே செய்வார்களா ?? தெரிந்து தவறு செஞ்சா அவர்களில் பிரச்சினை இருக்கு என்றுதானே அர்த்தம் ? அப்புறம் எப்படி MGR அங்கிள் உணர்ச்சி பொங்க யோசிக்காம தேவன் என்றாலும் விடமாட்டேன் என்று பாடலாம் ?

# தெரிந்து தவறு செய்பவர்கள்தான் அதிகம்.

சினிமாப் பாட்டை உபநிஷதம் மாதிரி எடை போட வேண்டுமா ?

எம் ஜி ஆர் யாரோ எழுதியதை யாரோ பாட, சம்பளத்துக்காக அதற்கு வாயசைத்து டான்ஸ் ஆடினார்.

===============================================

கண்மணியே காடராக்ட் என்பது ......  01

கண்மணியே காடராக்ட் என்பது ......   கற்பனையோ / கண் வரையா(!) ஓவியமோ எத்தனை எத்தனை குழப்பங்கள் .... என்றே மனம் குழம்பிய நிலை என்பது எல்லோருக்குமே வரும் என்று நினைக்கிறேன். 

என்னுடைய இடது கண் பார்வை இயல்பான நிலையில் இல்லை என்பது முப்பது / நாற்பது வருடங்களாகவே எனக்கு இருக்கும் சந்தேகம்.

மூன்று வருடங்களுக்கு முன்பு, 'போ அப்பா ஐ டோன்ட் கேர் ' குரோம்பேட்டை பேருந்து நிலையம் அருகே உள்ள கண் பரிசோதனை  மையத்திற்கு, அவர்கள் முன்பே ஃபோனில் சொன்ன 'அதிகாலை' வேளையில் சென்றேன். கண்ணில் கண்ட வெள்ளை உடை பெண்மணி ஒருவரிடம், "டாக்டர், எனது இடது கண்ணில் பார்வை சரியில்லை. பரிசோதனைக்கு வந்துள்ளேன்" என்றேன். 

அந்தப் பெண்மணி, அனுதாபத்துடன் என்னைப் பார்த்து, தலையை ஆட்டி, சைகையில் ஒரு இருக்கையைக் காட்டி, அங்கே அமரும்படி சொன்னார். அமர்ந்தேன். அந்தப் பெண்மணி, நான் நின்றிருந்த இடத்தில் 'மாப்' வைத்து நீரால் சுத்தம் செய்து அகன்றார். 

அதற்குப் பிறகு அரைமணி நேரம் சென்றபின், ஒரு மினிஸ்கர்ட், ஹைஹீல்ஸ் உதட்டுச்சாயம் பெண், மொபைலில்  பேசிச் சிரித்தபடி உள்ளே வந்தார். ரிசப்ஷன் மேஜையை அடைந்து, சுவிட்சுகளைப் போட்டார். 

கம்பியூட்டரை உயிரூட்டினார். எல்லாமே ஒரு கையில் மொபைலை ஏந்தி, பேசிச் சிரித்தபடி. 

நான் அந்த உதவி மேஜை அருகே சென்று என் வழக்கமான பல்லவி ஆரம்பிப்பதற்குள் மேஜையிருந்து ஒரு எல்லோ கார்ட் எடுத்து என் முகத்துக்கு அருகே நீட்டினார். 

இன்னும் ஏதாவது பேசினால், அடுத்து ரெட் கார்ட் கொடுத்துவிடுவாரோ என்னும் பயத்தில் எல்லோ கார்டை வாங்கிப் பார்த்தேன். 

பெயர் / வயது / இத்யாதி விஷயங்கள் நிரப்பவேண்டிய அட்டைதான். 

எல்லா விவரங்களையும் நிரப்பி, கொடுத்தேன். 

அந்த விவரங்களை அந்தப் பெண் கம்பியூட்டர் உள்ளே விரல்களால் தட்டி அனுப்பினாள். 

சிறிது நேரம் கழித்து நீல உடை சிப்பந்தி ஒருவர் வந்து என்னை மேலே பார்க்கச்சொல்லி - இரண்டு கண்களிலும் மருந்து ஒவ்வொரு சொட்டு விட்டு, 'இப்போ மணி என்னன்னு பாத்துக்குங்க, பத்து நிமிஷம் கழிச்சு கண்ணைத் திறக்கலாம்' என்று சொல்லி சென்றார். இதில் ஏதோ முரண் இருக்கு என்று அவருக்குத் தெரியவில்லை. 

கண்ணை மூடி இருக்கின்ற நேரங்களில்தான் என்னென்னவோ ஐடியா எல்லாம் தோன்றும். அட எங்கள் ப்ளாக் ல இதை எழுதலாமே என்று நினைப்பேன். அப்புறம் மறந்துபோய்விடும். 

பக்கத்தில் ஏதோ செண்ட் வாசனை. 'உஷ்' என்று யாரோ யாரையோ எச்சரிக்கிறார்கள். கண்ணைத் திறந்து பார்க்க ஆசைதான். ஆனால் அந்த நீலக்குயில் எங்கேயாவது உட்கார்ந்து என்னைக் கண்காணித்து, கண்ணைத் திறந்தால் வந்து என் தலையில் குட்டிவிடுமோ என்று பயம். 

சற்று நேரம் கழித்து, "கண்ணைத் திறங்க" என்று குரல் கேட்டு, கண்ணைத் திறந்தால் பக்கத்தில் உள்ள ஒருவருக்கு நீலக்குயில் கொடுத்த கட்டளை! அவசரமாக கண்ணைத் திரும்ப மூடிக்கொண்டேன். 

ஒருவழியாக சொட்டு மருந்து சோதனைகள் முடிந்து, ஒரு டாக்டரின் அறைக்கு அழைக்கப்பட்டேன். அவர் ஒரு வெள்ளைத்தாளை எடுத்து, அதில் 24 என்று எழுதி என் முகத்தைப் பார்த்தார். சரிதான் தமிழ்ப் படங்களில் வரும் டாக்டர், மூக்குக் கண்ணாடியைத் துடைத்து மாட்டியபடி, "எதையுமே இன்னும் இருபத்துநான்கு மணி நேரம் கழித்துதான் உறுதியா சொல்லமுடியும்; நம்ம கைல என்ன இருக்கு? எல்லாம் அவன் செயல் ...." என்று சொல்லி வானத்தைப் பார்ப்பதுபோல இவரும் சொல்லப்போகிறாரோ என்று நினைத்தேன். 

என் முகத்தைப் பார்த்து ஏதோ யோசனை செய்தவர், அந்த வெள்ளைத் தாளில், 24000 என்று எழுதினார். அதற்குக் கீழே  32000,  அப்புறம்   39000,

கடைசியாக   48000 என்று எழுதினார். அப்போதும் நான் ஒன்றும் முகத்தில் உணர்ச்சி காட்டவில்லை என்று தெரிந்ததும் லிஸ்ட் மேலே Per eye என்று எழுதி இரண்டு கோடுகள் கிழித்தார். 

இப்போதான் எனக்கு உண்மை உரைத்தது. இவர் என்னுடைய கண் ஆப்பரேஷனுக்கு என்ன செலவாகும் என்று எஸ்டிமேட் கொடுக்கிறார். 

"எப்போ காடராக்ட் ஆப்பரேஷன் செய்துக்க நினைக்கிறீங்களோ அதுக்கு மூன்றுநாட்கள் முன்னதாக இங்கே வாங்க. நாங்க ஒரு மருந்து தருவோம். அதை மூன்று நாட்களுக்கு ஒவ்வொரு நாளும் நான்கு முறை போட்டுக்கொண்டு, நாலாம் நாள் இங்கே வாங்க - ஆப்பரேஷன் செஞ்சுடலாம். இந்த லிஸ்டுல இருக்கற விலை எல்லாம் லென்ஸ் விலை. எந்த லென்ஸ் பொருத்தவேண்டும் என்று சொல்கிறீர்களோ அதைப் பொருத்திவிடுவோம்." என்றார். 

நான் அந்த லிஸ்டை வாங்கிக்கொண்டு, " சரி டாக்டர். அப்புறம் வந்து சொல்கிறேன்" என்று சொல்லி வெளியே வந்து பார்த்தால் ..............  

உலகமே கோடி சூர்யப் பிரகாசமாய், மின்னலடிக்கும் ரின் வெண்மையாய் இருந்தது. எதுவுமே கண்ணுக்கு சுத்தமாகப் புலப்படவில்லை. சொட்டு மருந்துகள் செய்த மாயம். 

உத்தேசமாக ரோடுல காலை வைத்தால்   ஏதோ ஒரு மஞ்சள் சுவர் டுர்ர்ர்ரென்று சத்தமிட்டபடி என்னை உரசி நின்றது .. "என்னப்பா கண்ணு தெரியலையா?" என்ற குரல் தடுத்து நிறுத்தியது.

"ஆமாம்" என்றேன். 

"நீ மோதிக்க என் ஆட்டோதான் கெடச்சுதா?"  

இதற்கு என்ன பதில் சொல்வது என்று தெரியாமல் அசட்டுச் சிரிப்பு சிரித்தபடி, வீட்டை நோக்கி நடந்தேன் 

மீதி அடுத்தவாரம். 

==================================================