மோகுஸாட்ஸு

     இருபொருள் அல்லது வெவ்வேறு பொருள் கொண்ட வார்த்தைகளால் எப்போதும் கலகம்தான் விளையும் போலும்!  "நான் அந்த அர்த்தத்தில் சொல்லவில்லை" என்று சொன்னாலும், சொன்னது சொன்னதுதான், விளைவுகள் விளைவுகள்தான்!  சமீபத்திய உதாரணம் எல்லோருக்கும் தெரியும்!  என்ன என்று தெரியாதவர்களை பசித்த புலி தின்னட்டும்!

     எனக்கு எங்கள் வீட்டு கலெக்ஷனில் இது போன்ற ஒரு வரலாற்றுச் சம்பவம் படித்தது - அதுவும் வேறு ஏதோ தேடும்போது சமீபத்தில் கண்ணில் பட்டதால் - நினைவுக்கு வந்தது. அதை உங்களுடன் பகிரலாமே என்று.....

***

     இரண்டாம் உலகப்போர் நடந்து வந்த நேரம். 

     ஏகப்பட்ட இழப்புகளைச் சந்தித்துவிட்ட ஜப்பான், சமாதானத்தை நாடுவது என்று முடிவு செய்கிறது.  நேசநாடுகளிடம் அதை எப்படி தெரிவிப்பது?  ரஷ்யாவிடம் சொல்வது, அவர்கள் மூலம் நேசநாடுகளுக்கு தகவல் போகும் என்று முடிவு செய்து ரஷ்ய தூதரை அழைத்துப் பேசுகிறார் ஜப்பான் பிரதம மந்திரி.  ஆனால் அவரிடம் சொல்லியும் நாட்கள் செல்கின்றதே தவிர, வேறு எதுவும் நடக்கவில்லை.  

     ஜப்பானியர்களுக்கு கவலை பிறக்கிறது. இன்னும் சேதாரம் எவ்வளவு அதிகம் ஆகுமோ?  மீண்டும் தூதரை அழைக்கிறார்கள்.  அவர் 'ஜலதோஷம், இப்போ  வரமுடியாது!' என்கிறார்.  அவருக்கு தரப்பட்டிருந்த  கட்டளை "கண்டுக்காதீங்க".   அப்போது ரஷ்ய தூதராக இருந்தவர் பெயர் ஜேக்கப் மாலிக்.

     ரஷ்யாவுக்கு ஜப்பானின் கவலையும், பயமும் முன்னரே தெரியும்.  அவர்கள் ஏற்கெனவே ஏகப்பட்ட உளவாளிகளை ஜப்பானில் வைத்திருந்திருக்கிறார்கள்.  அவர்களுக்கு இந்த சாக்கில் கொஞ்சம் நாடு பிடிக்கும் ஆசை.  அதை அடைய வேண்டி, நேசநாடுகளிடம் ஜப்பானின் கோரிக்கையை சொல்லாமல் வைக்கிறார்கள். 

     மிகவும் கவலை அடைந்த ஜப்பான் பிரதம மந்திரி,  ஜப்பான் மன்னர் முடி துறக்கவும் தயாராய் இருக்கிறார் என்று  உரியவர்களுக்கு கன்வே செய்கிறார்கள்.  ஜப்பானிய இளவரசரை (கோனாயே)  ரஷ்யாவுக்கு அனுப்பி புல்கானின், ஸ்டாலின், குருஷ்சேவ் போன்றவர்களை சந்திக்க வைக்கலாம் என்று முயற்சித்து அனுமதி கேட்டால், "இப்ப வேணாங்க...  கொஞ்சம் போவட்டும்...  அப்பால வாங்க  என்று பதில் வருகிறது!

     கவலை அதிகரிக்கிறது.  ஏனெனில் ஜப்பான் இனியும் இழப்புகளைத் தாங்கக் கூடிய நிலையில் இல்லை.

     இந்நிலையில் 1945 ஆம் ஆண்டு ஜூலை மாதம் 26 ஆம் தேதி அன்று அமெரிக்க, பிரிட்டன், சீனா மூன்று நாடுகளும் கையெழுத்திட்டு அறிக்கை ஒன்று வெளியிடுகின்றன.  அதில் ஜப்பான் உடனடியாக சரணடைய வேண்டுமென்று கூறப்பட்டிருக்கிறது.

     "அப்பாடி..." என்று பெருமூச்சு விட்ட ஜப்பான் அந்தத் தீர்மானத்துக்கு ஒப்புக்கொள்வதாக செய்தி ஸ்தாபனம் ஒன்றின் மூலம் அறிக்கை ஒன்றை வெளியிடுகிறது.  அங்குதான் வருகிறது அனர்த்தமும், ஆபத்தும்!  

     ரஷ்யர்கள் எதிர்பார்த்ததற்கு மாறாக,  அறிக்கை விஷயம் மூலம் தீர்வு வர வாய்ப்பு வந்து விட்டாலும், தனது உளவாளிகள் மூலம் ரஷ்யா ஒரு தில்லாலங்கடி வேலை செய்கிறது.

     ஜப்பானிய அறிக்கையில் 'மோகுஸாட்ஸு ' என்பதாக ஒரு வார்த்தை கையாளப்பட்டிருந்தது.  அந்த வார்த்தைக்கு இரண்டு அர்த்தங்கள்!  ஜப்பான் மீசையில் மண் ஓட்டவில்லையே என்பது போல 'பொறுத்திருந்து பார்ப்பது' என்கிற அர்த்தத்தில் அதைக் கையாள,  அதன் வேறு அர்த்தமான 'புறக்கனித்தல் என்பதை, அதை வெளியிடும் ஸ்தாபனங்கள் செவ்வனே செய்து ரஷ்யக் கட்டளையை நிறைவேற்றுகின்றன.  மொழி பெயர்த்து முழி பிதுங்க வைத்தவர் டோமே செய்தி ஸ்தாபனத்தில் வேலை செய்து வந்த ரஷ்ய ஒற்றர் ஒருவர்.

     ஜப்பான் கோரிக்கைக்கு இணங்க மறுத்து விட்டது என்று 'புரிந்து கொண்ட' அமெரிக்கா ஹிரோஷிமா மீது அணுகுண்டை தூக்கிப்போட்டது.   "ஜப்பான் சர்வநாசம் அடையக் கூடாது என்று எவ்வளவோ கோரிக்கை விடுத்தும் அதை ஜப்பான் மோகுஸாட்ஸு  ( !! )செய்து விட்டது . எனவே எங்களுக்கு வேறு வழி தெரியவில்லை" என்றார் ட்ரூமன்.

     கதிகலங்கிப்போன ஜப்பான் மீது சந்தடி சாக்கில் ரஷ்யாவும் போர் தொடுத்து மஞ்சூரியாவைப் பிடித்துக் கொண்டது.  கடைசியாக ஜப்பான் சரணடைந்த பின்னும் ரஷ்யா ஆக்கிரமிப்பை நிறுத்தவில்லை   ஜப்பான் கடும் விளைவுகளைச் சந்திக்க மோகுஸாட்ஸு  காரணமானது!

இங்கும் இங்கும்  அதைப்பற்றி படிக்கலாம்.


"ச்சீ....   பாவம் ஜப்பான்" என்று தோன்றுகிறது இல்லை.....  பின்னர் இன்னொரு சந்தர்ப்பத்தில் ஜப்பான் பற்றி ஒரு சம்பவம் பகிர்கிறேன்!




தமிழ்மணம்.