வெள்ளி வீடியோ 18022018 : விரியும் பூக்கள் பாணங்கள் ; விசிறி ஆகும் நாணல்கள்

​     பாடலுக்கேற்ற சூழலை இசையிலேயே கொண்டு வர முடியுமா?  முடியும் என்று பலமுறை நிரூபித்தவர் இளையராஜா.  இந்தப் பாடலும் அதில் ஒன்று.   இசையிலேயே காட்சிகளை உணர வைக்கிறார் இசைஞானி.

     நண்டு.  பெயரிலேயே தெரியும், கேன்ஸர் பற்றிய படம்.   மகேந்திரன் இயக்கத்தில் 1981 இல் வெளிவந்த படம்.  ​ அதனுடைய சோக முடிவால் படம் ஓடவில்லை என்று நினைக்கிறேன்.  தோற்ற படத்தில் இரண்டு நல்ல பாடல்கள்.  ஒன்று இந்தப் பாடல்.

     படம் (நல்லவேளையாய்ப்) பார்த்ததில்லை.  இந்தப் பாடல் மிகவும் பிடிக்கும்.  எங்கேயோ பிறந்து எங்கேயோ வளர்ந்து அரைக்கிழவன் ஆன நிலையிலோ, அதற்கும் பின்னோ இளமையில் வாழ்ந்த இடத்துக்கு வந்தால் மனதில் உணர்வுகள் எப்படி இருக்கும்?  அவற்றை மீட்டெடுக்கும் பாடல்.  

     மதுக்கூர் கண்ணன் எழுதிய பாடல்.  பல வரிகள் நம் இளமையை மீட்டெடுக்கும். வரிகளில்  இன்னும் கொஞ்சம் ஆழம் இருந்திருக்கலாம்.  நமக்குத்தான் திருப்தியே இருக்காதே!

     ஆரம்ப ஹம்மிங் முதலே இளையாராஜா மனதில் தவழத் தொடங்கி விடுகிறார்.  மலேஷியா வாசுதேவனின் பெருமைப்பாலான இனிமையான பாடல்கள் இளையாராவின் இசையிலேயே அமைந்திருக்கின்றன.  ஏற்கெனவே சொல்லியிருக்கிறோம்!  இதுவும் அதில் ஒன்று.  குரலில் தெரிவது பரவசமா, சோகமா, இரண்டும் கலந்தா?

     உங்கள் வசதிக்காக படக்காட்சி இல்லாத காணொளி இணைத்திருக்கிறேன்.  பாடலை (மட்டும்) ரசிக்கலாம்!

     ஒவ்வொரு சரணத்துக்கும் இடையிலான இசை..   குறிப்பாக இரண்டாம் சரணத்துக்கு முன்... இசையிலேயே ஒரு பயணத்தை உணரலாம் 

அள்ளித் தந்த பூமி அன்னை அல்லவா

சொல்லித் தந்த வானம் தந்தை அல்லவா

ஆடும் நாள் பாடும் நாள் தாளங்கள்

இனி ஆனந்தம் ஆரம்பம் வாருங்கள்

அள்ளித் தந்த பூமி ....

சேவை செய்த காற்றே பேசாயோ ?

ஷேமங்கள் லாபங்கள் யாதோ? ?

பள்ளி சென்ற காலப் பாதைகளே

பாலங்கள் மாடங்கள் ஆஹா

புரண்டு ஓடும் நதிமகள்

இரண்டு கரையும் கவிதைகள் 

கனித்த காலம் வளைத்த இடங்களே

இளமை நினைவை இசைக்கும் தெருக்கள்

அள்ளித் தந்த பூமி ....

காவல் செய்த கோட்டை காணாயோ ?

கண்களின் சீதனம் தானோ ?

கள்ளி நின்ற காட்டில் முல்லைகளே 

காரணம் ஆதனும் தேனோ ?

விரியும் பூக்கள் பாணங்கள்

விசிறி ஆகும் நாணல்கள்

மரத்தின் வேரும் மகிழ்ச்சிப் படுக்கையே 

பழைய சோகம் இனியும் இல்லை 

அள்ளித் தந்த பூமி ....