திருட்டுப் படையல் ... அப்பவே இப்படிதான்! இப்பவும் அப்படிதான்!

இந்து தமிழ் செய்தித்தாளில் வெள்ளிக்கிழமை அன்று இரண்டு மூன்று தொடர் கட்டுரைகளை சுவாரஸ்யமாய்ப் படிப்பேன்.  ஒன்று காலச்சக்கரம் நரசிம்மா எழுதும் சிரித்ராலயா தொடர்.   அவர் தந்தை சித்ராலயா கோபுவுக்கும் ஸ்ரீதருக்கும் இடையே உள்ள நட்பு, அப்போதைய ஸ்ரீதர் பட, தந்தை கோபு அவர்களின் நாடக அனுபவங்கள் குறித்த தொடர். 

இன்னொன்று டாக்டர் ஆர்  ராமானுஜம் எழுதும் 'ராகயாத்ரா' தொடர்.  எந்தெந்த ராகத்தில் என்னென்ன (தமிழ்த்திரைப்) பாடல்கள் என்பது பற்றி சுவாரஸ்யமாய்ச் சொல்லும் தொடர்.

மோகன ராகம் என்று எடுத்துக் கொண்டால் அந்த ராகத்தில் தமிழ்த் திரைப் படங்களில் இடம்பெற்ற பாடல்கள் பற்றிக் குறிப்பிடுவார் - அதிகமாய் இளையராஜா இசையில் இடம்பெற்ற பாடல்கள்.  

கட்டுரையின் இறுதியில் ஒரு கேள்வியும் கேட்பார்.  

ஓரிரு முறைகள் நானும் அந்தக் கேள்விகளுக்கு பதில் சொல்லி இருக்கிறேன்.  இந்தமுறை என் பெயரையும் விடை சொன்னவர்கள் பட்டியலில் அவர் சொல்லி இருக்கிறார்...  (ஒரு சின்ன பெருமைதான்!) 

'எங்கள் ப்ளாக் ஸ்ரீராம்' என்று சொல்லும்படி கேட்டுக்கொண்டிருந்தேன்.  அவர் சென்னை ஸ்ரீராம் என்று சொல்லி விட்டார்.

===================================================================================================================================

அப்பவே இப்படிதான்!  இப்பவும் அப்படிதான்!

================================================================================================================================

திருட்டுப் படையல் ...

எங்கள் ஊர் அம்மன் திருவிழா.  ஆடி முடிந்து ஆவணி தொடங்கிய பின்னும் தீமிதி, கூழ் என்று கொண்டாடுகிறார்கள்.  சென்ற வருடம் கோவில் விசேஷத்துக்கு வசூல் எட்டு லட்சமாம்.  ஊர்க்கார நண்பர் ஒருவர் சொன்னார்.  இந்த வருடம் அதில் 540 ரூபாய் மிச்சம் என்று கணக்கு எழுதி இருந்தார்களாம்! 

அம்மனுக்குக் கூழ் காய்ச்சும்போது சிலர் வந்து "கொஞ்சம் முருங்கைக் கீரை பறித்துக் கொள்கிறேன்" என்று கேட்டு பறித்துக்கொண்டு போவதுண்டு.

சென்ற ஞாயிறு காலை ஆறரை மணி சுமாருக்கு மொட்டை மாடியில் மோட்டார் ஆன் செய்து விட்டு தண்ணீர் வழிவதற்காகக் காத்து நின்றிருந்தபோது நடந்த திருட்டு இது.  காம்பவுண்டுக்கு வெளியிலிருந்து நடந்த திருட்டு.

மேலேயிருந்தே நான் அவருக்குக் குரல் கொடுத்ததை அலறிக்கொண்டிருந்த சீர்காழியும், எல் ஆர் ஈஸ்வரியும் அவர் காதில் விழாமல் தடை செய்து விட்டார்கள் போலும்.  அலைபேசியில் நான் படம் எடுப்பது கவனிக்காமல் கவனமான திருட்டு.    கையில் இருக்கும் அந்த நீண்ட கம்பு இதற்காக வீட்டிலிருந்து (?) கொண்டு வந்திருக்கிறார்கள்.  

"கள்?"  

ஆம், இன்னொருவரும் உண்டு.  இருவரும் இரு சக்கர வாகனத்தில் வந்திருக்கிறார்கள்.  கோவிலுக்கு கைங்கர்யமாம்!

ஆமாம், அம்மன் திருட்டு முருங்கைக் கீரைக்கு அருள் செய்வாளோ?  அதில் ஒருவர் கோவிலுக்கு மாலை வேறு அணிந்திருக்கிறார்.  அடுத்த வீட்டு காம்பவுண்டில் அவர்கள் அறியாமல் திருட, அதுவும் கோவில் விஷயத்துக்கு, இவர்களுக்கு எப்படிதான் மனம் வருகிறதோ....!

=============================================================================================================

"வீடு ஒட்டடையா இருக்கேன்னு நீ கவலைப்படறே...  ஒட்டடையே வீடா இருக்கேன்னு எப்பவாவது சிலந்தி கவலைப் பட்டிருக்கா?"

பார்த்துக்கொண்டிருந்த திரைப்படக் காட்சியில் சட்டெனப் புன்னகைக்க வைத்த வசனம்.

"நீ விடும் ஒருதுளி கண்ணீர் எறும்பு குளிக்கும் படித்துறை  ஆகிவிடுகிறது" - கவியரசர்.

படித்ததில் மனதில் நின்றது.

========================================================================================================

அனுஷ்கா, தமன்னா ஏன், கண்ணாம்பான்னு லேடீஸ் படமாய் போடறாங்கன்னு குற்றம் சொல்றாங்களாம்..  நாகேஷ், சிவாஜி, எம் ஜி ஆர்,  படம் போட்டதை எல்லாம் மறந்துட்டாங்களான்னு தெரியலை..  அதனால்தான் உங்கள் படம்..  தெரியுமா?

மீதி?    அடுத்த வாரம்தான்...   அதுவரை வணக்கம் கூறி விடைபெறுவது....