நாங்கள் தரிசனம் செய்த கோயில்கள் - 19 :: நெல்லைத்தமிழன்

 

பழையாறை வடதளி

பிற்காலப் பல்லவர்கள், ஏறத்தாழ 5ம் நூற்றாண்டிலிருந்து 9ம் நூற்றாண்டுவரை கோலோச்சியவர்கள், அதாவது கிபி 500லிருந்து 900 வரை. இந்தக் காலகட்டத்தில்தான் பெரும்பாலான நாயன்மார்களும் (சைவத் திருமுறைகளை உண்டாக்கியவர்கள்), ஆழ்வார்களும் (வைணவ பிரபந்தங்களை உண்டாக்கியவர்கள்) வாழ்ந்தனர். பல்லவர்களுக்கு முற்பட்ட காலத்தில் கோயில்கள் செங்கற்களாலும் மரங்களாலும் ஆனவைகளாக இருந்தன. இவற்றைக் கற்றளியாக (கற்களை வைத்துச் அமைத்தது) ஆக்கியவர்கள் பல்லவர்கள். தமிழகத்தில் குகைக்கோயில்களை உருவாக்கியவர்களும் அவர்கள்தாம்.

இதற்கு தர்க்கரீதியான விளக்கமும் இருக்கிறது. சமணர்கள் பெரும்பாலும் குன்றுகளில் வாழ்ந்துவந்தனர். உணவுக்காக மாத்திரம் அவர்கள் நிலப்பகுதிக்கு வருவர். அவர்களுடைய இடத்தில் கற்களாலான படுக்கைகளையும் தங்குவதற்கான குகைகளையும் இப்போதும் காணலாம். அதுவன்றியும் அவர்கள் காலத்தில்தான் வழிபாட்டிற்காக குன்றுகளில் தீர்த்தங்கரர்கள் போன்றவர்களின் சிலையும் அங்கு செதுக்கப்பட்டிருந்தன. அதனால் ஆரம்பத்தில் சமண சமயத்தைச் சார்ந்திருந்த பல்லவ அரசர்கள் (இதிலும் சில வேறுபாடுகள் உண்டு. சில அரசர்கள் வைணவத்தையும் சார்ந்திருந்தனர்) திருநாவுக்கரசர் காலத்தில் சைவ சமயத்தைத் தழுவினர்.

வடமொழி என்பது தமிழகத்தில் இரண்டாயிரம் ஆண்டுகளுக்கு முன்பே வழக்கத்தில் இருந்தது. அதனால்தான் தமிழில் பல வடமொழிச் சொற்கள் கலந்திருந்தன.  (அதுபோல தற்காலத்தில் ஆங்கில, போர்ச்சுக்கீசியச் சொற்கள் பலவும் தமிழில் கலந்துள்ள நிலை கவனிக்கத்தக்கது) ஆனால் இலக்கியங்களுக்கான இலக்கணம் (தொல்காப்பியர் போன்று) முழுமையான தமிழ்ச் சொற்களே பயன்படுத்தவேண்டும் என்று சொன்னது.

களப்பிரர்கள் தொண்டை நாட்டின் ஒரு பகுதியையும், சோழநாட்டின் பெரும் பகுதியையும் ஆண்டுவந்தனர். இவர்கள் காலத்தை இருண்ட காலம் என்று வரலாறு வருணிக்கும். சோழர்கள் உறையூரைத் தலைநகரமாகக் கொண்டு மிகச் சிறிய நிலப்பகுதியை (தஞ்சாவூர் முத்தரையர் வசம் இருந்தது) ஆண்டுவந்தனர். இவர்கள் களப்பிரர்களுக்குக் கட்டுப்பட்டு ஆண்டு வந்தார்களா என்பது தெளிவில்லை. ஆனால் உறையூர்தான் சோழர்களின் தலைநகரம். உறையூர் வைணவக் கோயிலின் தாயார் கமலவல்லி நாச்சியார் என்பவர் சோழகுலத் தோன்றல்.  கிபி 250-550 வரை களப்பிரர்களே பாண்டிய நாட்டை ஆண்டனர். 550வாக்கில் பாண்டிய மன்னர்கள் தலையெடுக்க ஆரம்பித்தனர்.  (கடுங்கோன் என்பவன் முதல் பாண்டிய மன்னன்)

நாம் பார்க்கப்போவது பல்லவ அரசர்கள் பற்றி. அதில் சிம்ம விஷ்ணு, வைணவ சமயத்தைச் சார்ந்தவன்.  சிம்ம விஷ்ணுவே புதுக்கோட்டை வரையிலான பகுதியை வென்று பல்லவ அரசனாக ஆண்டான். அவனுடைய மகன் முதலாம் மகேந்திரவர்மன், பட்டம் பெற்ற பிறகு சமண மதத்தைத் தழுவியிருந்திருக்கலாம். மஹாபலிபுரத்தில் அமைந்துள்ள ஆதிவராகர் கோவில் சிம்மவிஷ்ணு காலத்தில் அமைக்கப்பட்டது.  மகேந்திரவர்ம பல்லவன் கிபி 615லிருந்து 630 வரை அரசாண்டான். முதலில் சமண சமயத்தைச் சார்ந்தவனாக இருந்த இவன், அப்பர் சுவாமிகளால் சைவ சமயத்தைத் தழுவிய செய்தியை முன்னரே பார்த்தோம். இவன் காலத்தில்தான் குகைகளைக் குடைந்து கோவில்களாகச் அமைப்பது நடந்தது. பாறைகளைக் கோயில்களாக மாற்றியவனும் இவனே. ஆரம்பத்தில் சமணர் சொற்கேட்டு திருநாவுக்கரசருக்குக் கொடுமைகள் இழைத்ததும் பிறகு சைவ சமயத்தைத் தழுவியதும் பல சிவன் கோயில்களையும், வைணவக் கோயில்களையும் அமைத்ததை இவனுடைய வரலாறு சொல்லும். அரசன் சைவனாக மாறியதும், குடிமக்களும் சைவர்களாக ஆனார்கள். அதனால் இவன் காலத்தில்தான் தமிழகத்தில் சைவ சமயம் வளர்ச்சியுற்றது என்று கூறலாம். மகேந்திரவர்ம பல்லவன், திருப்பாதிரிப்புலியூரில் இருந்த சமணப் பள்ளிகளையும் பாழிகளையும் அழித்து அங்கிருந்த கற்களை உபயோகித்து கடலூர் அருகில் திருவதிகையில் ஒரு சிவன் கோயிலைக் கட்டினான் (இவனுடைய பட்டங்களுள் ஒன்றான குணபரன் என்பதை வைத்து குணபரனீச்வரம் என்று அந்தக் கோயில் பெயர் பெற்றது)

இவன் காலத்தில் சித்தன்னவாசல் சமணர் கோயில் குடையப்பட்டது. இவனே மாமண்டூர், மகேந்திரவாடி, சிங்கவரம், நாமக்கல் போன்ற இடங்களில் குன்றைக் குடைந்து வைணவக் கோயில்களை அமைத்தவன். அதுபோல பல்லாவரம், திருக்கழுகுன்றம், சிராப்பள்ளி போன்ற இடங்களில் சிவன் கோயில்களைக் குடைந்தான்.  இவன் காலத்தில் குடையப்பட்ட கோயில்கள், மலைச் சரிவுகளைக் குடைந்து (அதாவது மலையின் நடு பாகத்தில்) அமைக்கப்பட்டன. (இந்த வரலாறையெல்லாம் படிக்கும்போது எப்படி சைவ மற்றும் வைணவர்களுக்குச் சொந்தமான இந்தக் குடைவரைக் கோயில்களில் சில இப்போது முஸ்லீம்கள் வசம் சென்றிருக்கிறது, அதில் இருந்த மூர்த்தங்களை நீக்கிவிட்டு அவற்றை தொழுகை செய்யும் இடமாக ஆக்கியிருக்கிறார்கள் என்ற செய்திகளையும் படிக்க நேர்கின்றன)

நாமக்கல் மலைக்கோயில் (அரங்கநாதர் கோயில்) மகேந்திரவர்மன் காலத்தது. மிக அழகுற அமைந்துள்ள கோயில் இது. இங்குள்ள நரசிம்மர் கோயிலை நரசிம்மவர்மன் கட்டினான் என்றும் கூறுவர்.

நாமக்கல் குடைவரைக் கோயில் (லக்ஷ்மி நரசிம்மர் ஆலயம்)

மகாபலிபுரத்திலும் மகேந்திரவர்மன் சில குடைவரைக் கோயில்களை அமைத்துள்ளான் (அவன் தந்தை அங்கு ஆதிவராகர் குடைவரைக் கோயிலை அமைத்திருந்தார்). பிறகு மகேந்திரவர்மனுடைய மகன் நரசிம்மவர்மன் நிறைய கோயில்களையும் சிற்பங்களையும் அங்கு அமைத்தான் என்பது நமக்குத் தெரிந்த வரலாறு.

நரசிம்மவர்மன், தான் கட்டிய குடைவரைக் கோயில்களில் உள்ள தூண்களை தந்தை காலத்தில் இருந்ததைவிட வேறு வகையில் அமைத்தான் (என்று வரலாற்று ஆசிரியர்கள் கருதுகின்றனர். மகேந்திரவர்ம பல்லவன் காலத்தைய தூண்கள் தட்டையாக, சதுரமாக, கனமாக இருக்கும். ஆனால் நரசிம்மவர்ம பல்லவன் காலத்தையது உருண்டையாகவோ இல்லை கீழ்ப்பகுதியில் சிங்கம் அமைந்திருப்பது போலவோ இருக்கும். இத்தகைய தூண்களை நாம் மகாபலிபுரப் பகுதியில் கண்டிருக்கிறோம். திருவெள்ளறையிலும் ஒரு பெரிய குடைவரைக் கோயில் ஆரம்பிக்கப்பட்டு பாதியில் நிறுத்தப்பட்டுள்ளதை இன்றும் காணலாம். (திருவெள்ளறை கோயில் பற்றி அதற்குரிய சந்தர்ப்பத்தில் எழுதுகிறேன். ஆயினும் குடைவரை மற்றும் தூண் படங்களை இங்கே கொடுத்திருக்கிறேன்)

திருவெள்ளறையில் முழுமை பெறாத குடைவரைக் கோயில் (நரசிம்மவர்ம பல்லவன் காலத்தது). 

திருவெள்ளறை குடைவரைக் கோயில்

முதல் படம்-திருவெள்ளறை. இரண்டாவது படம் மகாபலிபுரம். இரண்டுமே நரசிம்மவர்மன் காலத்தையது. இத்தகைய தூண்களை (தூண்களின் கீழ்ப்பகுதியில் சிம்மம் உட்கார்ந்திருப்பதுபோல)  திருவரங்கம் கோயிலிலும் காணலாம். அதை பல்லவர் மரபையொற்றி சிற்பிகள் பிற்காலத்தில் அமைத்ததாகக் கொள்ளலாம்.

மகாபலிபுரத்தில் இருக்கும் நரசிம்மவர்ம பல்லவன் காலத்தைய குடைவரைக் கோயில் தூண்களைப் பார்த்தாலே தெரியும்.

இது மகேந்திரவர்ம பல்லவன் காலத்தையது. (மகாபலிபுரம்). தூண்களின் வித்தியாசத்தைப் பாருங்கள்.

சரி.சரி.. எங்கேயோ ஆரம்பித்து எங்கேயோ போய்விட்டேன். நாம் இப்போது பார்த்துக்கொண்டிருப்பது பழையாறை வடதளிக் கோயில். சமணர்களிடமிருந்து இதனை மீட்டு சைவ சமயத்துக்கு அளித்தவன் மகேந்திரவர்ம பல்லவன். இனி கோயிலில் உள்ள சிற்பங்களைப் பார்ப்போம்.

மாதொருபாகன். எவ்வளவு அழகாக வடிவமைத்திருக்கின்றனர் என்று பாருங்கள். வலதுபுரம் சிவன், இடது புறம் உமையவள்.

சங்கு சக்கரத்தோடு நாள் தோள் எந்தாய். 

அருள் பொழியும் முகத்துடன் விஷ்ணு துர்கை/மஹிஷாசுரமர்த்தனி. 

சிறிய கிணறா இல்லை சுரங்கப் பாதையா? நானென்ன பழுவேட்டரையரா, இதனைத் தெரிந்துவைத்திருப்பதற்கு?

இன்றைக்கு பல்லவர் காலத்தைய வரலாற்றில் ஆரம்பித்து அவர்களுடைய குடைவரைக் கோயில்களின் அமைப்பையும் சிறிது பார்த்தோம். ஆனால் நாம் இருப்பதோ சோழர் காலத்தில் மஹோன்னதத்தைப் பெற்ற பழையாறை வடதளி சோமேசுவரர் ஆலயம். இந்த இடங்களில்தான் ராஜமாதா செம்பியன் மாதேவி, தன் பேரன் ராஜராஜ சோழன், பேத்தி குந்தவை ஆகியோரோடு நிறைய முறை வந்திருந்திருப்பார், திருநாவுக்கரசர் போன்ற நாயன்மார்கள், மகேந்திர பல்லவன் தொட்டு எப்படி சைவ சமயம் வளர்ந்தது என்பதையெல்லாம் குழந்தைகளிடம் சொல்லியிருப்பார். அதுதான் பிற்காலத்தில் தில்லை சிதம்பரம் கோயிலில் செல்லரித்துக்கிடந்த திருமுறைகளை மீட்டெடுக்க வைத்து, மீண்டும் படிகள் தயார் செய்ய வைத்து, திருமுறை கண்ட சோழன் என்ற பெயரை ராஜராஜ சோழன் பெறும்படி வைத்தது என்று சொன்னால் மிகையாகாது.   இனி அடுத்த வாரம்தான்.

 (தொடரும்) 

= = = = =