மேங்கோ ஜூஸ், பைனாப்பிள் ஜூஸ், லெமன் ஜூஸ், பின்னே வாட்டர்மெலான் ஜூஸ்... அப்புறம் கொஞ்சம் காஃபி

 ​

சென்ற வாரம் உண்ணும் விழா நாட்கள் பற்றி குறிப்பிட்டிருந்தேன்.  அது செவ்வனே நிறைவேறியது.  முதல் திருமண வரவேற்பு படா ஆர்ப்பாட்டம்.  

போகும் வழியில் நெல்லையில் கடையில் கருப்பட்டி காஃபி சாப்பிடலாமா என்று யோசித்து, பின் அந்த எண்ணத்தைக் கைவிட்டு நேராக வரவேற்பு நடக்குமிடம் சென்று விட்டோம்.

                                                 

வரவேற்பு ஹால் உள்ளே சென்றதும் முதலில் இருந்த காஃபி சுவைத்து விட்டேன்.  ஆனால் நான் எப்போதுமே எதிர்காலத்தை யோசிப்பவன்!  எனவே காஃபி சுவையை நாக்குக்கு அறிமுகப்படுத்தும் அளவு எடுத்தேனே தவிர, கப் நிறைய எடுக்கவில்லை.  நானே ஒரு கப்பை எடுத்து அதில் ஒரு சிட்டிகை சர்க்கரை போட்டு கப்பில் காஃபி எவ்வளவு இருக்க வேண்டும் என்று விரல்களால் கோடிட்டு வாங்கினேன்.  

நார்மல் காஃபி வித் 'லோ...' சுகர்.  இது நம்ம சுவை.  

சிலர் சர்க்கரை கம்மியா என்றதுமே டிகாக்ஷனை அடித்து விட்டு 'இஷ்ட்ராங்' காஃபியாக கொடுக்க முயல்வார்கள்.  தனக்கு எல்லாம் தெரியும் என்று நினைத்துக் கொண்டிருக்கும் அவர்களின் புரிதல் அவ்வளவுதான்.  ஏன், இதற்கு அடுத்த கல்யாணத்தில், என்னோடு பிளேடு போட்டுக்கொண்டிருந்த உறவு ஒன்றே அப்படிதான் கேட்டு வாங்கி பெருமையாகக் குடித்தது!  அவரைப்பற்றியும் சொல்ல இருக்கிறது.  இரண்டு தடவைகளில் காஃபிக்காரர் எனக்கு பழகி விடுவார்.

இந்த முதல் வரவேற்பில் காஃபி சுவைத்து ஐந்து நிமிடம் அங்கேயே நின்று, பின் அருகிலேயே இருந்த வாட்டர்மிலான் ஜூஸுடன் ஒரு இருக்கையை பிடித்தேன்.   கொஞ்ச நேரத்தில் ஒரு பிளேட்டில் அடுக்கப்பட்ட சிறிய கப் வரிசை என்னைத் தேடி வந்தது.  

"என்ன இது?"

"இளநீர் ஜெல்" வென்றார் இறுக்கமாக புடவை அணிந்திருந்த அந்த கான்டராக்ட் பெண்.

'இளநீர் ஜெல்லா...   பார்றா...'  என்று வாங்கி கொண்டேன்.  இளநீரை Freze செய்து ஜெல்லாக்கி கொடுத்திருந்தார்கள்.  ஸ்லாப் ஸ்லாப்ப்பாக எடுத்துச் சுவைக்க முடிந்தது.  எந்த எக்ஸ்டரா சுவையும் சேர்க்காத பியூர் இளநீர். 

வாட்டர்மிலான் ஜூஸ் குடித்தேன் என்று சொன்னேன் இல்லையா, அங்கிருந்து பத்து நிமிடத்துக்கு ஒரு பானம் தேடி வந்து கொண்டே இருந்தது.  மேங்கோ, பப்பாயா, பைனாப்பிள், கிரேப்ஸ்...   அம்மாடி...  நாங்கள் நான்கு பேர் ஒரு ஐடியா செய்து ஒரு கப் வாங்கி எல்லோரும் ஓரொரு வாய் சுவைத்து உவகை கொண்டோம்.  எல்லாம் டெஸ்ட் / டேஸ்ட் பார்க்கணுமில்ல...!  இப்படியே போனால் டின்னர் எப்படி சாப்பிடுவது என்கிற கவலை வேறு!

மகன் என்னை அந்தப் பக்கம் அழைத்தான்.  அங்கு பாவ்பாஜி, பேல்பூரி, பானிபூரி, கட்லெட் ஆகியவை கொடுக்கப்பட்டுக் கொண்டிருந்தன.

நான் ஒரு கட்லெட்டை எடுத்து பாதி பிய்த்து மருமகளிடம் கொடுத்து விட்டு, பாதியை நான் சுவைத்தேன்.  ஸோ ஹார்ட் யு ஸீ....   பாவ்பாஜி வாங்கி சுவைத்துப் பார்த்து மகனிடம் பாதிக்கு மேல் கொடுத்து விட்டேன்.    அவன் கடுப்பானான்.  பேல் மற்றும் பானி பூரிகள் எங்கைக்கு பிடிக்காது!

டின்னர் சாப்பிட போதிய நேரம் கொடுத்துக் கொண்டிருந்தோம்.  

திடீரென RVS அங்கு ப்ரசன்னமானார்.  மணி எட்டே முக்கால் இருக்கும்.  காரை நிறுத்தி விட்டு உள்ளே வந்தவர், நேராக மொய் கொடுக்குமிடம் சென்று வரிசையில் நிற்கும் முன் வழியின் என்னைப் பார்த்து அவரும் வியப்பாகி கைகாட்டியபடியே சென்று வரிசையில் நின்றார்.  மொய் கொடுத்தார். போட்டோவுக்கு போஸ் கொடுத்தார். இறங்கி டின்னர் ஹாலுக்கு நடக்கும் வழியில் மீண்டும் 'என்ன, சாப்பிட்டாச்சா?' என்று ஜாடை காட்டியபடியே பதிலை எதிர்பார்க்காமல் சென்றார்.  சாப்பிட்டார்.  காணாமல் போனார்!  நட்பின் விழாவாக இருந்தால் நானும் அவ்வண்ணமே செய்யும் வழக்கம்.  இப்பொதெல்லா ம் இது வழக்கமாகிவிட்டது; பழக்கமாகி விட்டது!  கடமை!  என்ன செய்வேன்..  இது உறவின் விழா!

ஒரு வழியாக நாங்களும் டின்னருக்குச் சென்றோம்.  அவர்களும் ப்ரி டின்னர் சமாச்சாரங்களை எஃபெக்டை  எதிர்பார்த்து ஓரளவுக்கு சிம்பிளாகவே வைத்திருந்தார்கள்.  ​ஐந்தாறு இலைகளை ஒன்றாகச் சேர்த்தது போன்ற தடிமனில் ஒரு ரோல் வைத்தார்கள். நான் இதுபோன்ற வகைகளின் பெயர் அறியாதவன்!   அதற்குள் இனிப்பு.  

பாஸ் அதன் மேல்தோலைக் கழற்றிப்போட்டு விட்டு சாப்பிட்டவர், என்னைப்பார்த்து 'ஓ..  அதையும் சேர்த்தே சாப்பிடவேண்டுமா?' என்று கேட்க, 'விடு போனது போகட்டும்' என்றேன். 

பச்சடி, கறி வகைகள் போன்ற வழக்கமான ஐட்டங்கள் தவிர இரண்டு வகை ஸ்வீட்கள் வைத்தனர்.  குட்டி அடை போட்டு அதன்மேல் இரண்டு ஸ்பூன் அவியல் விட்டார்கள்.  சப்பாத்தி வைத்து பனீர் மசாலா வைத்தார்கள்.  அந்த இனிப்புகளின்  பெயர்களை நான் சாப்பிட்டு முடித்ததும் சமையல் குழுவிடம் சென்று 'ஜாரித்து' தெரிந்து கொண்டேன்.  அதில் ஒன்றை இரண்டு முறை கேட்டும் சரியாக காதில் வாங்காமல் தப்பாகவே FaceBook ல் பகிர, அதை ஆதி வெங்கட் வந்து திருத்தியருளினார்.  ஒன்று பர்வான்ஸ் பனீர்.  இன்னொன்று மால்புவா.  இதை நான் மாங்புவா என்று காதில் வாங்கி அப்படிப் பகிர, திருமதி வெங்கட் திருத்தியதும் திரு(ந்)த்தினேன்.

பக்கத்து இலையில் சாப்பிட ஆரம்பிக்காமல் இருந்ததை நைஸாக ஒரு போட்டோ எடுத்துக் கொண்டேன்.  முதலில் இருக்கிறது பாருங்கள் நான் சொன்ன இலை ரோல் ஸ்வீட்.

​இவற்றைத்தவிர சாம்பார் சாதம், ரசம் சாதம், தயிர் சாதம் எல்லாம் கலந்த சாதமாகவே போட்டார்கள்.  ஊறுகாய்தான் வழக்கம்போல ஒரே உப்பாக இருந்தது.  இளநீர் பாயசம்.  ஒரு கரண்டி புலாவ்.  யதேஷ்டம்!

இந்த மாதிரி நிறைய ஐட்டங்கள் அணிவகுக்கும் சாப்பாட்டு சமயங்களில் அவர்கள் பரிமாறும்போதே நான் இலையை சுத்தம் செய்ய ஆரம்பித்து விடுவேன்.  அப்போதுதான் சரியாக இருக்கும்.  எனவே போட்டோ எடுக்க முடியவில்லை!  ஹிஹிஹி...    

சாப்பிட்டுவிட்டு அங்கே வந்து நின்றபோது இலையை எடுத்தவர்கள் என் இலையைக் காட்டி 'நடுவில் இங்கே யாரும் உட்காரவில்லையா' என்று கேட்டார்கள்.  நான் ஒரு தெய்வீகப் புன்னகை சிந்தினேன்.  என் பெருமையை பாஸ் எடுத்துரைத்தார்.  

அவர்கள் மனதுக்குள் லஷ்மிகல்யாணம் டைட்டில் சாங் வரிகள் நினைவுக்கு வந்திருக்கும்! உறவு ஒன்று பிஸ்தா ஐஸ்க்ரீம் சாப்பிட்டு முடித்து, கப்பை குப்பையில் போட்ட கையோடு வெனிலா ஐஸை கையில் எடுத்தது!  நான் பார்ப்பதைப் பார்த்ததும் அ. புன்னகை!  

நாங்கள் ஐஸ்க்ரீமை புறக்கணித்து பீடாவை மென்றபடி *ஏன்தான் பீடாவில் இவ்வளவு ஸ்வீட் வைக்கிறார்களோ) கிளம்பினோம்.

=================================================================================================

இது 1978 ல்.  

டயல்போன் மாடலுக்கே அப்படி...!  இப்போது நிலைமை இன்னும் மோசமுங்க...

==========================================================================================

FaceBook ல் படித்து ரசித்தது.....

தூக்கணாங்குருவி கூடு

"தூக்கணாங்குருவிக் கூடு,

தூங்கக் கண்டார் மரத்திலே,

சும்மாப் போன மச்சானுக்கு,

என்ன நினைப்பு மனசிலே!"

( வானம்பாடி என்ற படத்தில் இடம் பெற்ற இந்த பாடல் காட்சியில் தேவிகா மிக மிக அழகாக... ஏதோ தேர்ந்த பாடகி ( professional Singer) போல ... தானே பாடுவது போன்று.. வெகு அசத்தலாக பிரமாதமாக நடித்திருப்பார்... அதை கண்டிப்பாக இங்கே குறிப்பிட்டே ஆக வேண்டும் ..அவருக்கேற்ற வகையில் பாடல்களும் சிறப்பாக அமைந்திருப்பது அவரின் அதிர்ஷ்டம்! ..சுசீலாம்மாவின் குரல் கன கச்சிதமாக பொருந்தும் ஒரு சில நடிகைகளுள் தேவிகாவும் ஒருவர் என்பது குறிப்பிடத்தக்கது )

'தூக்கணாங்குருவி’ என்ற பெயர் , பேச்சு வழக்கு , நாட்டுப்புறப் பாடல்கள், மற்றும் சினிமா பாடல்களிலும் கூட இடம் பெற்றிருக்கிறது...!

இலக்கியங்களில் தூக்கணப் புள், தூக்கணக் குருவி என்றெல்லாம் குறிப்பிடப்படும்...!

’தூக்கணம்’ என்ற பெயர், அந்தக் குருவி கட்டும் வித்தியாசமான கூட்டின் காரணமாக அமைந்திருக்கலாம்... !

இந்தக் குருவியின் கூடு போன்ற வடிவத்தில் பெண்கள் காதில் அணியும் தொங்கல் / ஜிமிக்கி வகைக்கும் ‘தூக்கணம்’ என்ற பெயர் உண்டு..!

பறவைகளின் கூடுகளிலேயே மிக அழகான கலைத் திறனோடு அமைக்கப்படுவது தூக்கணாங்குருவிக் கூடு மட்டுமே!

இந்த குருவி ஒரு இயற்கை இஞ்சினியர்!

நூற்றுக்கணக்கான வைக்கோல், நீளமான புல்கள், தென்னை நார்கள், ஈரக்களிமண்,மாட்டுச்சாணம், மின்மினிப்பூச்சி இவைகளால் சுமார் 3 வாரங்களாக முழு மூச்சுடன் இந்த கூடுகளை தூக்கணாங்குருவிகள் நெய்கின்றன...!

இந்த சேமிப்பிற்காக ஆயிரம் முறைக்கு மேல் பறக்கிறது அது ...!
நாம் நம்முடைய சிறிய வயதில் இதை வைத்து ஒரு கதை கூட
படித்திருப்போம்...

ஒரு காட்டிலே அடர்ந்து வளர்ந்த மரம் ஒன்று இருந்தது. ...!,

அந்த மரத்தின் ஒரு கிளையிலே குருவி ஒன்று கூடு கட்டி குடும்பத்தோடு நீண்ட காலமாக வசித்து வந்தது...!

அந்த மரத்தின் இன்னொரு கிளையில் ஒரு குரங்கும் பல காலமாக இருந்து வந்தது. ...!

ஒரு நாள் இரவு மிகவும் பலத்த மழை பெய்ததில் , மரங்கள் புயல் காற்றிலே பேயாட்டம் ஆடின. ..!

மிருகங்கள் எல்லாம் குகைகளில் பதுங்கிக் கொள்ள... பறவைகள் கூடுகளில் ஒளித்துக் கொள்ள...

அந்தக் குரங்கு மட்டும் தன் கைகளால் மரக்கிளையை இறுக கட்டிக் கொண்டு முழுவதுமாக மழையில் நனைந்து , குளிரில் நடுங்கிக் கொண்டிருந்தது. ..!

மழையோ விட்ட பாடில்லை.!

கூட்டில் இருந்த ஆண் குருவி, குரங்கின் நிலைமை கண்டு மனம் உருகித் தவித்து கவலை தாங்க முடியாமல் ,

" நண்பரே! இப்படி பெரு மழையில் வீணாக நனைந்துகொண்டு இருக்கிறீரே....! உமக்குத் தான் மனிதரைப் போல இரண்டு கைகள் இருக்கின்றனவே....! எங்களைப் போல நீரும் முன்னரே வீடு ஒன்றைக் கட்டிக் கொண்டிருந்தால் இப்போது மழையில் நனைய வேண்டி வந்திருக்காதல்லவா? "

என்றது நிஜமான வருத்தத்துடன்..! .

தூக்கணத்தின் வார்த்தைகளைக் கேட்ட குரங்கோ , கோபத்தின் உச்சிக்குச் சென்று .. அந்த குருவி இருந்த கிளைக்குத் தாவி , தன் இரண்டு கைகளாலும் அதன் கூட்டை பிய்த்து எறிந்தது...!

விவேகசிந்தாமணி என்ற நீதி நூலிலே இடம் பெற்ற அழகான பாடல் ஒன்று இந்த கருத்தை மிக அழகாக எடுத்துரைக்கிறது ...!

அதாவது, தீயவர்களுக்குப் புத்தி சொல்லப் போனால் , அது சொல்பவர்களுக்கே ஆபத்தாக முடியும் என்கிற அர்த்தத்தில் ..!

" வானரம் மழைதனில் நனையத் தூக்கணம் தானொரு நெறிசொலத் தாண்டிப் பிய்த்திடும் ஞானமும் கல்வியும் நவின்ற நூல்களும் ஈனருக்கு உரைத்திடில் இடரது ஆகுமே"

சற்று ஆழ்ந்து சிந்தித்தால், இந்தப் பாடலில் இன்னொரு உண்மையும் பொதிந்து கிடக்கின்றது என்பதை நாம் அறியலாம் ...!

அதாவது , இறைவன் தந்த உடம்பை கொண்டு, அதை அழகாகப் பேணி, உலகியல் நிலைகளால் தனக்கு துன்பம் வராதபடி காத்துக் கொள்ளுகின்றவர்கள் , அறிவுடைய தூக்கணம் குருவியை போன்றவர்கள்...!

என்றாலும், மனமானது சில நேரங்களில் , அது தன் போக்கில் இஷ்டப்படி செல்வதால் துன்பத்தை அனுபவிக்க நேரும். ..!

அதனால் , குருவியின் கூடு போன்ற உடம்பும்...கூட்டில் உள்ள குருவியைப் போன்ற உடம்பில் உள்ள உயிரும் துன்பத்தை அடையும்...!

நம்முடைய மனம் என்பது ஒரு குரங்கைப் போன்றது. ..!

இறை வழிபாட்டில் ஈடுபட்டு இருக்கும்போது, இறைவன் தன்னோடு உள்ளதாக எண்ணி உருகும்....!

தவறு செய்யும்போது, தன்னோடு இறைவன் உள்ளான்...அவன் நாம் செய்யும் காரியங்களை கண்காணிக்கிறான் என்பதை அறவே மறந்துவிடும். ...!

தவறு செய்து விட்டு , பின்னர் துன்பத்தை அனுபவிக்க நேரும் போது, மீண்டும் மனம் இறைவனை நாடும். ..!

இவ்வாறு , பலவேறு நினைவுகளைக் கொண்டு, ஒன்றை விட்டு ஒன்றை பற்றி சென்று கொண்டே இருக்கும். ..!

ஒரு நிலையில் இல்லாது உழன்று கொண்டேயிருக்கும். ...!

அந்த மனமாகிய குரங்கை அடக்கி வைத்திருந்தால், உயிரானது தீய நெறிகளில் சென்று இடர் படாமல், நல்ல நெறியில் செல்லும்..!

உடம்பும் நெடு நாள் நிலைத்து இருக்கும்...!

ஆக, 'மனம் ' என்னும் குரங்கை, நல்வழி செலுத்துகின்ற ஆசிரியர்,

தனது கையில் 'நன்னெறி'என்கிற ஒரு கோலை வைத்துக் கொண்டு அதட்டிக் கொண்டே இருக்கவேண்டும்...!

அப்போது தான் இந்த மனம் ஒரு வழிக்கு வரும்!

==========================================================================================================

ஸ்வராஜ்பால்...   எங்கேயோ கேட்ட பெயராக இருக்கிறதே...

=================================================================================================

2013 ல் எழுதியது....

நதியில் ஓடும் நீராய்

காலம்

நீரோடு சென்று விட்டாலும்

சில

நினைவுகள் மட்டும்

நனைந்த மண்ணாய்

மனதில்

ஈரமாகவே எப்போதும்.

================================================================================

FaceBook-ல் கந்தசாமி சார் பதிவு / பகிர்வு  - சுசீலா கனகதுர்க்காவின் ***மாரித்தனம்!

எண்டமூரி வீரேந்திரநாத் எழுதிய நாவல்களின் தமிழாக்கம் கெளரி கிருபானந்தன் என்றால் அது நம்பத் தகுந்தது. சுசீலா கனகதுர்க்கா என்றால், சற்று எச்சரிக்கை தேவை.

ஏனெனில் ஆரம்பத்தில் எண்டமூரி வீரேந்திரநாத் நாவல்களை தமிழாக்கம் செய்து வந்தவர் சுசீலா கனகதுர்க்காதான். 1980களிலும், 90களிலும் தமிழ் வார இதழ்களில் எண்டமூரியை அவர் மொழிபெயர்த்திருக்கிறார்.

அப்போது வேறு தெலுங்கு எழுத்தாளர்கள் எழுதிய நாவல்களையும் எண்டமூரி வீரேந்திரநாத் என்று சொல்லியே வெளியிட்டிருக்கிறார். இதற்கு சில தமிழ்ப் பதிப்பகங்களும் துணை போயின. ஒரு கட்டத்தில் தமிழகம் முழுக்க எண்டமூரியின் நாவல்கள். ஆனால், அதில் பெரும்பாலானவை தெலுங்கில் அவர் எழுதியது அல்ல

உதாரணம் ‘முள் பாதை’. பூங்கொடி பதிப்பகம் இந்த நாவலை ஆயிரம் பக்கங்களில் வெளியிட்டது. நடிகர் பொன்வண்ணன் இந்த நாவலை டிடி 2வில் 13 வார தொடராக எடுத்தார். இயக்கமும் அவரே. டைட்டிலில் எண்டமூரி வீரேந்திரநாத் என்றே இருக்கும்.

கடைசியில் பார்த்தால், ‘முள் பாதை’யை எழுதியவர் யத்தனகுடி சுலோச்சனா என்னும் பெண் எழுத்தாளர். அது மட்டுமல்ல, ‘பவித்ர பந்தம்’ என எண்டமூரியின் பெயரில் தமிழில் வெளிவந்த நாவலும் யத்தனகுடி சுலோச்சனா எழுதியதுதான்.

இந்த உண்மை வெளிப்பட்டு சம்பந்தப்பட்ட பதிப்பகம் மேல் வழக்கு போட்டு, சுசீலா கனகதுர்க்காவிடமிருந்து தமிழாக்க உரிமையை எண்டமூரி திரும்ப வாங்கி...

அனைத்தும் ரகசியமாக நடந்து முடிந்துவிட்டது.

இப்போது ‘அல்லயன்ஸ் பதிப்பகம்’ வசம் எண்டமூரியின் நாவல்கள் இருக்கின்றன. கெளரி கிருபாகரன் அவற்றை தமிழாக்கம் செய்கிறார்.

ஸோ, சுசீலா கனகதுர்க்காவின் தமிழாக்கம் என்றால், அது எண்டமூரி வீரேந்திரநாத் அல்லாமல் மற்றவர்களுடையதாகவும் இருக்கலாம் என்பதை அறியவும்

இதற்குத் தொடர்புள்ள இன்னொரு செய்தியும் உண்டு.

அது ‘மீனா’ தெலுங்குப் படம்.

ஆமாம். ‘முள் பாதை’தான் ‘மீனா’ தெலுங்குப் படம்.

தெலுங்கு மொழியின் ‘லட்சுமி’ என கொண்டாடப்படும் யத்தன்னபூடி சுலோசனாராணி எழுதிய 13 நாவல்கள் தெலுங்கில் திரைப்படமாக எடுக்கப்பட்டு வெற்றி பெற்றிருக்கின்றன.

அவற்றில் ஒன்றுதான் 1973ல் ரிலீசான ‘மீனா’ தெலுங்கு படம்.

வார இதழில் தொடர்கதையாகவும் வெளிவந்து வெற்றி பெற்ற நாவலைதான் அதே பெயரில் படமாக எடுத்திருந்தார்கள்.

‘மீனா’ தெலுங்குப் படத்தை திரைக்கதை அமைத்து இயக்கியதுடன் ஹீரோயினாகவும் நடித்திருப்பார் விஜய நிர்மலா.

ஹீரோவாக நடித்தவர் மகேஷ் பாபுவின் அப்பாவான கிருஷ்ணா.

அதுநாள் வரை மாஸ் ஹீரோவாக இருந்த கிருஷ்ணாவை ஃபேமிலி ஆடியன்ஸ் மத்தியில் கொண்டு சென்ற முதல் படம் இதுதான்.

மட்டுமல்ல, பின்னாளில் கிருஷ்ணா - விஜய நிர்மலா ஆகியோர் வாழ்க்கையில் இணையவும் இந்தப் படமே பிள்ளையார் சுழி போட்டது.

தன் வாழ்நாளில் 44 படங்களை விஜய நிர்மலா இயக்கியிருக்கிறார். அதன் வழியாக அதிக படங்களை டைரக்ட் செய்த பெண் இயக்குநர் என்ற சிறப்புடன் கின்னஸ் ரிக்கார்டிலும் இடம் பெற்றிருக்கிறார்.

முக்கியமான விஷயம், முதன் முதலில் விஜய நிர்மலா டைரக்ட் செய்தது இந்தப் படத்தைதான். முதல் நாளே ஆறு காட்சிகளை ஷூட் செய்து அனைவரையும் வியக்க வைத்திருக்கிறார். ‘ராட்சஷி’ என சக நடிகர்கள் இவரை செல்லமாக அழைக்க இவரது இந்த அசுரவேகம்தான் காரணம்.

டிராலி, Zoom Back / In என அன்றைய தொழில்நுட்பத்தை எல்லாம் கச்சிதமாக ‘மீனா’வில் பயன்படுத்தி குறுகியகாலத்தில் படமாக எடுத்து முடித்திருக்கிறார். வெற்றியும் பெற்றிருக்கிறார்.

ஆயிரம் பக்கங்கள் கொண்ட ‘முள் பாதை’ நாவலை எண்டமூரி வீரேந்திரநாத் பெயரிலும், யத்தன்னபூடி சுலோசனாராணி பெயரிலும் வாசித்திருக்கிறேன். ‘மீனா’ படத்தையும் பார்த்திருக்கிறேன்.

ஆயிரம் பக்க நாவலின் முக்கியமான அனைத்து கட்டங்களும் இரண்டரை மணிநேர ‘மீனா’ படத்தில் இடம்பெற்றிருந்தை பார்த்து வியப்பு ஏற்பட்டது. ஒன்றை கூட இயக்குநர் மிஸ் செய்யவில்லை.

அதனால்தான் ‘என் நாவலை சிதைக்காமல் பிரமாதமாக விஜய நிர்மலா எடுத்திருக்கிறார்...’ என யத்தன்னபூடி சுலோசனாராணி புகழ்ந்திருக்கிறார்.

ரூ.6 லட்சத்தில் உருவான இந்தப் படம், ரூ.45 லட்சம் வசூலித்து சாதனை புரிந்திருக்கிறது.

பிறகு இந்த ‘மீனா’ கதை பல்வேறு வடிவங்களில் உருவாய் அருவாய், உளதாய் இலதாய் மருவாய் மலராய், மணியாய் ஒளியாய்க் தெலுங்கு சினிமாவில் தலைகாட்டியிருக்கிறது... தலைகாட்டியும் வருகிறது.

ஆம். Present Tenseதான்.

2016ம் ஆண்டு த்ரிவிக்ரம் ‘கதை திரைக்கதை’ வசனம் எழுதி நிதின் - சமந்தா நடிப்பில் இயக்கியிருந்த ‘அ ஆ’ (அனுசுயா ராமலிங்கம் Vs ஆனந்த் விஹாரி) படம், அப்படியே ‘மீனா’தான். ஒன்றிரண்டு காட்சிகள் அல்லது கட்டங்கள் அல்ல... முழுப்படமும்!

‘அ ஆ’ ரிலீசான பிறகு ரசிகர்கள் ரவுண்ட் கட்டி த்ரிவிக்ரமை அடித்தார்கள். பிறகு அவர் யத்தன்னபூடி சுலோசனாராணியின் ‘மீனா’ நாவலைதான், தான் படமாக இயக்கியதாக ஒப்புக் கொண்டார்.

டைட்டிலில் இதை குறிப்பிட்டதாகவும் ரிலீஸ் நேரத்தில் ‘தவறுதலாக’ அது விடுபட்டுவிட்டதாகவும் வருத்தம் தெரிவித்ததுடன் யத்தன்னபூடி சுலோசனாராணயின் வாரிசுகளிடம் ஒரு தொகையையும் வழங்கினார்...

-கே.என்.சிவராமன்

================================================================================================================================

ரிப் கெர்பி.

வாட்ஸாப்பிலோ FaceBookkiலோ மரண அறிவிப்புகள் வரும்போது நம் மக்கள் கடமையாகப் போடும் 'Rip' மூன்றெழுத்தைப் பார்க்கும்போதெல்லாம் இவர் ஞாபகம் வரும் எனக்கு!

இவரது கதைகள் படித்திருக்கிறீர்களா? முத்து காமிக்ஸில் நான் முதற்கண் மாயாவியின் ரசிகன். அப்புறம் லாரன்ஸ் - டேவிட், ஜானி நீரோ - ஸ்டெல்லா. பிறகுதான் இவர், முகமூடி வேதாளர் Phantom.

கெர்பியின் கதைகள் கொஞ்சம் மாறுபட்டவை. கொஞ்சம் வளர்ந்த வாச்கர்களுக்கானது. கீழே அவரது படத்தில் அவரது கருத்தைப் பாருங்கள். எனக்கு அதில் உடன்பாடு இல்லை. ஒருவித பயத்தில், ஒருவித எச்சரிக்கை உணர்வில் அவன் அங்கு வந்து பார்ப்பான் என்பது என் கணக்கு.

==================================================================================================

ஜோக்ஸ்..

சிரிப்பு வராவிட்டால் நான் பொறுப்பல்ல. 1978 இதயம் பேசுகிறதுதான் பொறுப்பு!