பிடிக்கும்.. ஆனா வெளியே சொல்ல முடியாது!

 இந்த வாரம் மறுபடி அந்த கல்யாண நாள் விவரங்களுக்குச் செல்கிறோம்!

உறவினர் வட்டத்தில் ஒரு பெரியவர் இருந்தார்.  அவருக்கு வயது 85 க்கு மேல்.  கையில் ஊன்றுகோல் வைத்துக் கொண்டுதான் நடப்பர்.  அருகில் உறவு வட்டம் இருக்கும் போது நடை தள்ளாடுவது போல தடுமாறுவார்.  

டைனிங் ஹாலில் தெரிந்தவர் யாரும் இல்லையென்றால் சர்வ சாதாரணமாக எழுந்து கைகழுவ நடந்து விடுவார்.  யாராவது இருந்தால் அவர் நாற்காலியிலிருந்து எழ முயற்சி செய்வதே   ஒரு பயங்கர பிராயத்தனமாக இருக்கும்!  ஆ ஆ என்று குரல் கொடுத்தபடி தடுமாறி எழுந்து ஊன்றுகோலைப் பிடிக்க முயற்சி செய்து மெல்ல அதில் வெற்றி அடைவது போல கையில் பற்றி  சிரமப்பட்டு நடப்பார்!

எல்லோருக்கும் இந்த நாடகங்கள் தெரியும் என்பதை அவர் அறிவாரா, தெரியாது.  ஆனாலும் ஒரு சமயம் போல இருக்காது என்று உறவுகள் அவர் கையைப் பிடித்து ஆதரவு கொடுக்கும்.  அறுபது எழுபது வயதுக்கு மேல் இரண்டாவது குழந்தைப் பருவம்தானே!  நிரூபிக்கிறேன் என்று விழுந்து வைத்தால் இவர்கள்தானே அதற்கும் பாடுபட வேண்டும்!  அல்லது புலி வருது கதையாய் ஒரு சமயம் நிஜமாகவே விழுந்து விட்டால்தான் என்ன செய்வது!

இந்த முறை அவர் பேரன் அமெரிக்காவிலிருந்து அவருக்கு ஒரு Tab வாங்கி கொடுத்து விட்டான்.  ஒரே பெருமை அவருக்கு.  அதை வைத்துக் கொண்டு ஆங்காங்கே போட்டோ எடுத்துத் தள்ளிக் கொண்டிருந்தார்.  அப்படி எடுத்த போட்டோக்களை யாருக்காவது அனுப்புவாரா, தெரியாது!  அவரே மறுபடி பார்த்து ரசிப்பாரா, அதுவும் தெ....ரி.....யா.......து!

திருமணத்தின் முக்கிய நிமிடங்களில் எல்லாம் இவரை முன்னணியில் பார்க்க முடிந்தது.  ஊன்றுகோல் துணை இல்லாமலேயே அவர் நாற்காலியிலிருந்து எழுந்து சென்று மேடைக்கு முன்னால் நிற்பதை பலரும் பார்த்து புன்னகைத்தனர்.  அவ்வப்போது ஒரிஜினல் போட்டோக்ராபருக்கே டஃப் கொடுத்தார்!

திருமணத்தில் ஒரு சம்ப்ரதாயம், சீர்வரிசைத் தட்டை எல்லாம் எடுத்துக் கொண்டு பெண்கள் அணிவகுப்பார்கள்.  இங்கும் அப்படி பெண்களை அணிவகுக்க செய்ய ஆயத்தம் செய்தார்கள்.  ஒவ்வொரு பெண்ணாக (என் பாஸ் உட்பட) தாம்பாளத்தைக் கையில் ஏந்தி மேடையிலிருந்து இறங்கி கீழே அணிவகுக்க, நம்ம ஹீரோ உற்சாகமானார்.  நல்ல ஒரு க்ளிக் அவருக்கு மனதில் தோன்றியது போல.  வந்து நின்ற நான்கைந்து பெண்களின் முன்னே தன்"கேமிராவுடன் ப்ரசன்னமானார்.

ஃபோகஸ் சரியாக அமையாததால் அவர்களை கையால் சரியாக நிற்க சைகை செய்தார்.  அவர்களும் இங்கும் அங்கும் நகர்ந்து நின்றார்கள்.  இந்நேரத்தில் இன்னும் இன்னும் பெண்கள் சீர்வரிசைத்தட்டுடன் இறங்கி நிற்கத்தொடங்க,  எண்ணிக்கை அதிகமானது.  இவர் பின்னால் நகர்ந்து, பக்க வாட்டில் நகர்ந்து இன்னும் இன்னும் ஃபோகஸ் செய்தார்.  இவர் போட்டோ எடுப்பதைப் பார்த்துதான் மற்றவர்களும் வந்து சேர்ந்து நிற்பதாக அவருக்கு மனதில் தோன்றியதோ என்னவோ..  தான் சொல்கிறபடிதான் அவர்களும் இங்கும் அங்கும் நகர்ந்து நிற்பதாக எண்ணி விட்டார்.

முக்கியாக ஒரு விஷயம் சொல்ல மறந்து விட்டேன்.  அவருக்கு காது கேட்காது.  எனவே பின்னாலிருந்து ஒரிஜினல் போட்டோகிராபர் போகஸ் செய்ய காத்துக்கொண்டிருப்பதை கவனிக்கவில்லை, அவர் 'மாமா... மாமா... மாமா... தள்ளுங்க....' என்று கதறுவதையும் கேட்கவில்லை.  ஒரு சிறந்த இயக்குனர் போல காட்சிகளை வடிவமைத்துக் கொண்டிருந்தார்.  உண்மையில் அந்தப் பெண்கள் வரிசை பின்னாலிருந்து ஒழுங்கு படுத்திக்க கொண்டிருந்த போட்டோகிராபர் சொல்படிதான் அசைந்து கொண்டிருந்தார்கள்.  

பின்னால் நகர்ந்து நகர்ந்து வந்தவர் ஒரு கட்டத்தில் போட்டோகிராபர் மேலே மோதிக்கொள்ளும் அளவு வந்து விட்டார்.  அவர் இவரை ஒரு இயலாமை கலந்த, அல்லது எரிச்சல் கலந்த புன்னகையுடன் பார்த்துக் கொண்டிருந்தார்.  பெண்ணின் அப்பாவைப் பார்த்து 'என்னதான் செய்ய' என்று சைகையும் காட்டினார்!

பொல்லாதவன் படத்தில் ரஜினி முதலாளி.  சுருளி வேலைக்காரர்.  ரஜினியின் மகள் பள்ளி செல்ல மறுத்து ஆட்டம் காட்டிக் கொண்டிருப்பாள்.  பங்களாவெங்கும் ஓடி ஆட்டம் காட்டுவாள். கோபப்பட்டு ஓங்கிக் குரல் கொடுக்கும் சுருளி, ரஜினியைக் கண்டதும் அடங்கி கெஞ்சுவது போல அழைப்பார்.  ரஜினி 'என்ன ஆச்சு' என்று கேட்க, சுருளி "குழந்தை ஸ்கூலுக்கு போக சமர்த்தா அடம் பிடிக்குதுங்க" என்பார்.  அதிலேயே எரிச்சலை சாமர்த்தியமாகக் காட்டி விடுவார்.  அது என் நினைவுக்கு வந்ததது.

கடைசியில் பெண்ணின் தாய் அணிவகுப்பிலிருந்து வெளிவந்து "அப்பா..  கொஞ்சம் தள்ளிக்குங்க...  அவர் போட்டோ எடுக்கணும்" என்றதும்தான் பின்னால் திரும்பிப் பார்த்தார்!  நிலைமை புரிந்து அ வ சி யை மறைத்துக் கொண்டு மெல்ல நகர்ந்து தன் நாற்காலிக்குச் சென்றார்!  கடைசிவரை அந்த அணிவகுப்பை அவர் போட்டோ எடுக்கவில்லை என்பது குறிப்பிடத்தக்கது!

=============================================================================================

திருமண மணடப டைனிங் ஹாலில் பார்த்த நறுக்ஸ்!

==============================================================================================

 நம் ஆதர்ச கதாநாயகர்களைப் பற்றி படித்தால் மகிழ்ச்சிதானே வரும்...   அப்படி வந்த மகிழ்ச்சியை உங்களுடன் பகிர்ந்து கொள்கிறேன்.

அவர் பற்றி விவரங்கள் இங்கே படிக்கலாம்.

தமிழ் காமிக்ஸைப் புரட்டிப்போட்ட இரும்புக்கை மாயாவி

தமிழில் காமிக்ஸ் என்றால் இரும்புக் கை மாயாவியைப் பற்றிப் பேசாமல் ஆரம்பிக்க முடியாது. இரும்புக் கை மாயாவியின் படத்தைப் பார்த்திராதவர்கள்கூட உச்சரிக்கும் மந்திரப் பெயராக‌ அது புகழ்பெற்றிருக்கிறது.

இரும்புக் கை மாயாவி ஏன் இப்படி கொண்டாடப்படுகிறது? மூன்று விஷயங்களை மட்டும் பார்ப்போம்:

# தமிழகத்தில் இரும்புக்கை மாயாவியின் சகாப்தம் கடந்த நாற்பதாண்டுகளுக்கு மேலாகத் தொடர்ந்துவருகிறது. இப்போதும்கூட அதன் மறுபதிப்பைத் தேடுபவர்கள் உண்டு. சினிமா இயக்குநர்கள் பிரபு சாலமன், மிஷ்கின், ஏ.ஆர். முருகதாஸ், சிம்புதேவன் உள்ளிட்டோர் தங்களுடைய சிறுவயது இன்ஸ்பிரேஷனாக மாயாவியையே குறிப்பிடுகின்றனர்.

# எழுபது, எண்பதுகளில் இரும்புக்கை மாயாவியைப் போலவே தங்கக் கை மாயாவி, இரும்பு விரல் மாயாவி, தங்க விரல் மாயாவி, உலோகக் கை மாயாவி, நெருப்பு விரல் சிஐடி என ஏகப்பட்ட 'போலச் செய்யும்' கதாபாத்திரங்கள் வந்ததில் இருந்தே, இரும்புக் கை மாயாவி எவ்வளவு பிரபலம் என்பதைப் புரிந்துகொள்ளலாம்.

# தொடர்ந்து வந்த கதைகள் மாயாவியின் ஆளுமை, தமிழகத்தில் நிலைத்து நிற்க உதவின. 'தமிழ் காமிக்ஸ் உலகின் தலைமகன்' என்று கருதப்படும் இரும்புக் கை மாயாவி கதாபாத்திரம், அது உருவாக்கப்பட்ட இங்கிலாந்தில்கூட இவ்வளவு கொண்டாடப்பட்டதில்லை.

யார் இந்த மாயாவி?

விஞ்ஞானி பாரிங்கரின் உதவியாளரான லூயி கிராண்டேல், ஒரு விபத்தில் தனது வலக்கையை இழந்து, எஃகினால் செய்யப்பட்ட செயற்கைக் கரம் ஒன்றைப் பொருத்திக்கொள்கிறார். ஒரு பரிசோதனையின்போது பரிசோதனைக் கூடமே விபத்துக்குள்ளாக, அந்த விபத்தில் கிராண்டேல் மீது உயர் அழுத்த மின்சாரம் பாய்கிறது. அதில் யாருமே எதிர்பார்க்காத ஒரு புதிய விளைவு உண்டாகிறது. கிராண்டேலின் முழு உடலும் மாயமாக மறைந்து, அவருடைய உலோகக் கை மட்டுமே கண்ணுக்குத் தெரிகிறது. இந்த விபத்தால் மனக் குழப்பம் அடைந்த கிராண்டேல், தனக்குக் கிடைத்த சக்தியின் மதிப்பை உணராமல், சட்டவிரோதச் செயல்களில் ஈடுபடுகிறார். பின்னர் தெளிவுபெற்று பிரிட்டிஷ் உளவுத் துறையான நிழற்படையில் சேர்ந்து மிகச் சிறந்த உளவாளியாகிறார்.

பொக்கிஷம் காக்கும் மாயாவி

உலகின் அரிதான கலைப் பொக்கிஷங்கள் மர்மமான முறையில் கொள்ளையடிக்கப்பட, நிழற்படையின் தலைசிறந்த உளவாளியான மாயாவி அதைத் துப்பறிய வருகிறார். கலைப் பொருட்களை ஏலம் விடுமிடத்தில் மாயத்தன்மையுடன் காத்திருக்கும் மாயாவிக்குப் பேரதிர்ச்சியளிக்கும் வகையில், அந்த இடத்திலும் அவை கொள்ளையடிக்கப்படுகின்றன. வெளியே தெரியாமல் பின்தொடரும் மாயாவி எதிரிகளிடம் சிக்க, மரணக் கடிகாரத்துக்கு அவரை பலியாக விட்டுவிட்டு, புகழ்பெற்ற மோனலிசா ஓவியத்தை கொள்ளையடிக்க பாரிஸ் செல்கிறார் வில்லன் பால் பிரபு. மாயாவி எப்படி மரணத்திலிருந்து தப்பிக்கிறார்? மோனலிசா ஓவியம் காப்பாற்றப்பட்டதா? கடத்தல், கொலை, கலகக் கூட்டமைப்பின் சதியை மாயாவி எப்படி முறியடிக்கிறார் என்பதுதான் கதை.

எப்படி வந்தது?

ஹெச்.ஜி. வெல்ஸ் எழுதிய 'தி இன்விஸிபிள் மேன்' 1950-களில் காமிக்ஸ் வடிவில் வெளிவந்து சிறப்பாக விற்பனையானது. இங்கிலாந்தின் ஐ.பி.சி. என்கிற ப்ளீட்வே நிறுவனம் 1962-லிருந்து வேலியண்ட் என்ற காமிக்ஸை வெளியிட்டுவந்தது. அதனுடைய ஆசிரியர்கள் கென் மென்னல், ஜாக் லெக்ராண்ட் மற்றும் சிட் பிக்னெல் ஆகியோர், அந்த மாய மனிதனை காமிக்ஸ் வடிவில் கொண்டுவர வேண்டுமென நினைத்தார்கள்.

அப்போது அறிவியல் புனைவு, விஞ்ஞானக் கதைவரிசைகளில் மிகவும் பிரபலமாகத் திகழ்ந்த கென்னத் பால்மரிடம் மாய மனிதனை உருவாக்கும் பொறுப்பை அவர்கள் ஒப்படைத்தனர். முதல் கதைக்கு ஸ்பானியரான ஜீசஸ் ப்ளாஸ்கோ தனது அற்புதமான ஓவியங்களால் மெருகூட்ட, 06-10-1962 அன்று வெளியான 'வேலியண்ட்' இதழில் முதல் இரும்புக் கை மாயாவியின் சாகசம் 'The Steel Claw' என்ற பெயரில் வெளியானது.

அதே கதாபாத்திரத்தை அடிப்படையாகக் கொண்டு இன்னும் அதிக நாவல்கள் எழுத வேண்டி கோரிக்கைகள் முன்வர, இரும்புக் கை மாயாவியின் முதல் மூன்று கதைகளை மட்டும் எழுதிய நிலையில் இந்தக் கதை வரிசையையும், காமிக்ஸ் உலகையும் விட்டு கென் பால்மர் விலகினார். அதற்கு அடுத்துவந்த கதைகளை டாம் டுல்லி எழுதி இரும்புக் கை மாயாவியின் சகாப்தத்தை நிலைநிறுத்தினார்.

தமிழகத்தைக் கலக்கிய கதை

அமர் சித்திரக் கதை, இந்திரஜால் காமிக்ஸ், ஃபால்கன் போன்று மொழிமாற்றம் செய்யப்பட்ட காமிக்ஸ் இதழ்கள் தமிழில் ஏற்கெனவே வெளிவந்திருந்தாலும், இரும்புக் கை மாயாவியின் வருகை தமிழ் காமிக்ஸ் துறையில் மிகப் பெரிய ஆர்வத்தைக் கிளறிவிட்டது.

அம்புலிமாமா நிறுவனத்தின் பிரிண்டிங் மெஷினை வாங்க, சென்னையில் தங்கிப் பயிற்சியெடுத்த சிவகாசியைச் சேர்ந்த முத்து காமிக்ஸ் நிறுவனர் சௌந்தரபாண்டியன், அங்கு வந்திருந்த சாம்பிள் காமிக்ஸ் கதையான இரும்புக் கை மாயாவியைப் படித்தார். பின்னர் லண்டன் சென்று, அதற்கு முறைப்படி அனுமதி பெற்றுத் திரும்பினார்.

மக்கள் குரல் பத்திரிகையின் துணை ஆசிரியர் காமராஜுலு ஆங்கிலத்திலிருந்து அந்தக் கதையை தமிழுக்கு மொழிபெயர்க்க, The Steel Claw என்ற கதாபாத்திரத்துக்கு 'இரும்புக் கை மாயாவி' என்று பெயர்சூட்டினார் சௌந்தரபாண்டியன்.

தமிழில் ஐந்து லட்சம் பிரதிகள் விற்ற காமிக்ஸ், தமிழிலிருந்து ஆறு மொழிகளுக்கு மொழிபெயர்க்கப்பட்ட காமிக்ஸ், நடிகர் எம்.ஜி.ஆரை வைத்து காமிக்ஸ் உருவாக்கியவர் என்று பல்வேறு புதுமைகளைச் செய்த முல்லை தங்கராசன், காமராஜுலுவின் மொழிபெயர்ப்பைத் தனது அசாத்திய மொழி ஆளுமையால் செழுமைப்படுத்தினார்.

இரும்புக் கை மாயாவி கதையைப் பல நடிகர்கள் திரைப்படமாக எடுக்க விரும்பியுள்ளனர். முன்னணித் தொலைக்காட்சி நிறுவனம் ஒன்று தமிழின் முதல் 3டி தொலைக்காட்சித் தொடரை ஆரம்பித்தபோது, இரும்புக் கை மாயாவியைத் தழுவிய கதையையே கொண்டிருந்தது.

நமது கலாசாரம் சார்ந்த கதைகளே பொதுவாகச் சொல்லப்பட்டுவந்த நிலையில் தமிழ் காமிக்ஸ் உலகின் போக்கையே மாற்றி, மொழிமாற்று காமிக்ஸ்களுக்கு முக்கிய இடம் கிடைக்கக் காரணமாக இருந்தது இரும்புக்கை மாயாவிதான்.

_ தி தமிழ் ஹிந்து

============================================================================ 

கொஞ்ச நாட்களாய் கேட்காமல் இருந்து இந்த வாரம் ஒரு கேள்வி!

சிலபேரை, ஆணாயிருக்கலாம், பெண்ணாயிருக்கலாம்...   அல்லது சில நடிகர்களை, சில அரசியல்வாதிகளை  உள்ளூர பிடிக்கும்.  ஆனால் வெளியே காட்டிக் கொள்வதில் தயக்கம் இருக்கும்.  அப்படி உங்களுக்கு?

=======================================================================================

பூத்தூறலாய் வான்மழை

பூமியை லேசாக

நனைக்கிறது

கோடையை இதமாக்கும்

சிறு கொடை.

குடை பிடிக்க மாட்டோம்

கறுப்புக் காட்டி

திருப்பியனுப்ப மாட்டோம்..

காத்திருக்கிறேன் ஒரு

கனமழைக்கு

வெள்ளமாய் வேண்டாம்

உள்ளம் நிறையுமளவாவது

வா மழையே...

வறண்ட குளங்களை

வறண்ட கிணறுகளை

இருண்ட மேகத்தில்

வெயில் மறைத்து

வெப்பம் குறைத்து

மழை சேர்த்து

மனமும் நிரப்ப வா மழையே...  2014 

=======================================================================

உன்னுடைய நாவல் இதைத்தான் சொல்கிறது. வாழ்க்கை என்பது யுத்தம் எதிர்கொள் எனச் சொல்கிறாய். இந்த யுத்தத்தில் எந்த துக்கமும் வலியும் அபத்தமும் தோல்வியும் சாஸ்வதம் அல்ல. அழ வேண்டாம். புலம்ப வேண்டாம். எதுவும் செய்ய வேண்டாம். முதலில் இது இயல்பு, இயற்கை, சுபாவம் எனப் புரிந்து கொள் என்று உன் நாவல் மன்றாடுகிறது. இலக்கியத்துக்கும் உத்தியோகத்துக்கும் உள்ள முரண்பாட்டை மட்டும் பெரிதாக எடுத்துக் கொண்டு பேசாமல் மொத்த வாழ்க்கையையும் எடுத்துக் கொண்டு பேசுகிறது.

எடை போட்டு எழுபது ரூபாய்க்கு எடுத்த விரிசல் சக்கரத்தை இருநூறு ரூபாய்க்குத் தள்ளிவிடுவது அநியாயமா? வியாபாரமா? மூன்று லட்ச ரூபாய் சரக்கை கிணற்றில் இறக்கிவிட்டு ஒரு வார்த்தை கூட சொல்லாமல் ஓடிப் போவது தற்காப்பா? நம்பிக்கை துரோகமா? லட்சக்கணக்கில் வியாபாரம் செய்தவன் ஒரு இரவில் நொடித்துப் போவது துரதிருஷ்டமா? கடவுள் சித்தமா? விபசாரம் செய்த பணத்தில் லாரி வாங்குவதும் விபத்துக்கு ஈடாய் வந்த பணத்தில் விபசாரம் செய்வதும் வயிற்றுப் பிழைப்பா? வக்கிரமா? பிரியத்தின் நிமித்தம் கொடுத்த பிரிவுபசாரப் பணத்தை கணக்கு பார்க்கிற, விமர்சனம் செய்கிற வாத்தியார் ஞானியா? மூர்க்கனா? உதவி செய்தவனை முட்டாள் எனச் சொல்லும் பெண் அகங்காரியா? கணவனின் கவிதையைப் பொறுத்துக் கொள்ளாத மனைவியும் மனைவியின் அவஸ்தையை புரிந்து கொள்ளாத கணவனும் குழந்தை பெற்றுக் கொள்வது காதலா? காமமா?

எல்லாமே இயற்கை. இயல்பு. சுபாவம். அதைப் புரிந்து கொள் முதலில் என்று உன் பாத்திரங்கள் சொல்கின்றன. சரி, இந்தப் புரிதல் இல்லை என்றால் என்ன கஷ்டம்?

புரிந்து கொள்ளாதவனுக்கு வலி நிச்சயம். வாழ்க்கையை, இதன் இயல்பைப் புரிந்து கொள்ளாதவன் அதை ஜெயிப்பது எப்படி சாத்தியம்? இந்த கூரிய முரண்பாடுகள் விளங்காமல் முன்னேறுவது எப்படி? ஜெயிப்பது, முன்னேறுவது எல்லாம் இரண்டாம் பட்சம். இந்தப் புரிதல் இல்லாமல் போனால் இருத்தலே இம்சையாகும். எதிலும் தெளிவின்றி எப்போதும் சுலபமின்றி இருக்கும் வாழ்க்கை நரகமாகிவிடாதா? தன்னையும் துன்புறுத்திக் கொண்டு உடன் வாழ்பவனையும் காயப்படுத்திக் கொண்டிருந்தால் ஒரு மொத்த சமூகமே நாசப்பட்டுப் போகாதா?

இந்தப் புரிதல் இல்லாமல்தான் நமது இளைஞர்கள் தலை கலைந்து போகிறார்கள். அன்னியமாதல் பற்றி பேசுகிறார்கள். எதிலும் நம்பிக்கையற்று சிதைகிறார்கள். எதிர்மறையாய் யோசிக்கிறார்கள். எளிதில் கலங்குகிறார்கள். கவிதை எழுதி இலக்கியம் பேசி ஊர் விட்டு ஊர் போய் கிணற்றில் குதித்து தற்கொலை செய்துகொள்கிறார்கள்.

பாலகுமாரனின் "இரும்புக் குதிரைகள்" நாவலுக்கு மாலன் எழுதிய முன்னுரையின் ஒரு பகுதி.  R  கந்தசாமி சார் பதிவிலிருந்து...

===============================================================================

போச்சுடா!

சுவாரஸ்யமான செய்தி,  கதை எழுதலாம்!

===========================================================================================

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

பொக்கிஷம் :  ஆனந்த விகடன், மஞ்சரி 1964, 66

துக்ளக்கில் இப்போதும் இந்த வழக்கம் உண்டு எனினும் மற்ற பத்திரிகைகளில் கிடையாது.  எது?  வாசகர் கடிதங்களுக்கு பதில் சொல்லும் வழக்கம்.  இது விகடனில் 64 ல் இருந்திருக்கிறது.  இன்னொரு பகுதியில் ஒவ்வொரு வாசகர் கடிதத்துக்கு பதில் இருக்கிறது.  அது  இந்த வரிசையிலேயே இருக்கிறது!.

50 ஆண்டு காலம் புகழ்பெற்றவை என்றால் காலி மார்க் தொண்டாகியது 1964 அல்லது 66.

சார்மிஸ்.   பார்த்த மாதிரி இருக்கிறது.  பௌடர் ரோஸ் நிறத்தில் இருக்கும் என்று நினைவு.  தொடர்ந்து உபயோகிக்காததால் என் மேனியழகு மிகைபட மகாணவில்லை என்று நினைக்கிறேன்!

கேள்வி பதில் மாதிரி வாசகர் கடிதங்களுக்கு பதில்!