புதன் 181010 அனுஷ்கா ஆஸ்திரியா சென்றதேன்?

சென்ற வாரக் கேள்விக்கு யார் யார் என்னென்ன பதில்கள் சொல்லியிருக்கிறார்கள் என்று படித்தேன். 

வித்தியாசமான கோணங்களில் நிறைய பேர் எழுதியிருக்கிறீர்கள்! 
வெரி குட்.  

முதல் பதில் எழுதிய பானுமதி வெங்கடேஸ்வரனுக்கு முதல் பாராட்டுகள். 


A யும் / B யும் : 

அயர்ன் செய்யக் கொடுத்தவர்/அயர்ன் செய்பவர், 
பட்சணம் சுவைப்பவர்/பட்சணம் செய்பவர், 
மசாஜ் செய்துகொள்ளச் சென்றவர்/மசாஜ் செய்பவர்.

இதில் பட்சணம் என்னும் கருத்து சரியில்லை. பட்சணம் தீய்ந்துவிட்டால், பட்சணம் செய்பவரை முன்பதத்தில் பட்சணத்தை,  எண்ணெய் சட்டியிலிருந்து எடுக்கச்சொல்வார்கள். சூட்டைக் குறைப்பதால் பட்சணம் சரியான பதத்தை அடையாது. 

நெல்லைத்தமிழன் : 

அரசியல் தலைவர்  / பேச்சாளர் 

கோமதி அரசு :

மதுரை மக்கள் / சூரியன் (ஹ ஹ ! இதெல்லாம் நடக்கின்ற விஷயமா!)  

கீதா ரெங்கன் :

மனைவி / கணவன் மற்றும் சப்பாத்தி ?
சமையல் தெரிந்தவர் அல்லது கற்றுக்கொடுப்பவர் / கற்றுக்கொள்பவர் 
குழுத் தலைவர் / விவாத உறுப்பினர். 
அயர்ன் செய்யச்சொல்பவர் / அயர்ன் செய்பவர் 
குளிர் பிரதேசத்தில் வார்மர் பயனாளி / இயக்குபவர் 
குடிக்கும் காபி அ குளிக்கும் வெந்நீர் பயனாளி / ஆக்குபவர் 

ஏஞ்சல் : 

கணவன் பேப்பர் ரோஸ்ட் செய்ய மனைவி சூட்டைக் குறைக்கச் சொல்கிறார். 

வீட்டு ஓனர் , ரேடியேட்டர்/தெர்மோஸ்டாட் சம்பந்தமாக டெக்னீசியனிடம் 

A குற்றங்குறைகளை குணமா சொல்லுபவர் :)
B எவ்வித ரெஸ்பான்ஸையும் பொறுமையா ஏற்றுக்கொள்ளும் மனபக்குவமுள்ளவர் 

அதிரா : 

A B இருவருமே நகைச்சுவை உணர்வு உள்ளவர்கள் , தலைக்கனம் இல்லாதவர்கள், மரியாதையைக் கடைபிடிப்பவர்கள். A கொஞ்சம் கோபக்காரர். 

(அட வைரவா ! இதை எல்லாம் நான் கேட்டேனா! நகைச்சுவை உணர்வும் கோபமும் எங்காவது ஒன்றாக ஒரு இடத்தில் குடியிருக்குமா! கொடுக்கப்பட்டுள்ள ஒரே ஒரு உரையாடலில் நகைச்சுவை உணர்வு, கோபம் எல்லாம் எங்கேயிருந்து உங்க கண்ணுக்குப் பட்டது!) 


===================================
A & B உரையாடலை நிதானமாக, ஆழ்ந்து படித்துப் பார்த்தால், B என்பவர், A யின் மரியாதைக்கு உரியவர். NOTE: "ங்க" 

 " இன்னும் கொஞ்சம் சூட்டைக் குறைச்சீங்க என்றால் நல்லா இருக்கும்." 

B, என்பவர், A யின் வேண்டுகோளை, ஏற்கவோ அல்லது மறுக்கவோ செய்யக்கூடிய நிலையில் இருப்பவர். 

சூட்டைக் குறைப்பது, A யின் கட்டுப்பாட்டில் இல்லை, அல்லது A யால் செய்ய இயலாது. 

அதிக எண்ணிக்கையில் யோசித்து யூகங்களை பட்டியல் இட்ட கீதா ரெங்கனுக்கு இந்த வாரப் பரிசு அளிக்கப்படுகிறது. 

=============================

நெல்லைத்தமிழன் :

(REF: 

உப்பு மாவுமட்டு முப்புமா வாகிடுமோ

தப்பு தான்செய்வீரோ தகையீர் - உப்பிட்ட

மிளகாய் பெருங்காயம் மணக்கத் தாளிக்க

அழகாய் இருக்கு மது.)

கவிதைல (வெண்பா) தவறு இருக்கிறதா என்று பார்த்தேன். பொருட்குற்றம். உப்புமா முன்னப் பின்ன செய்திருக்கிறாரா இல்லை ருசியாகச் செய்ததில்லையா?

அழகா யிருக்கு மது. என்ற ஈற்றடிக்குப் பதில் சுவையா யிருக்கு மது

என்று எழுதாத்தனால் வந்த சந்தேகம். கேஜிஒய் சார்...

மிளகா அழகா மாட்சிங்.. (அதாவது யமுனை என்கிறீர்களா? யதுகை/மோனை) 

அப்றம் .....  

உப்மா பற்றி உணர்வது சொலப் போக

தப்மா கப்மா சிப்மா என்பதோ

தேமா புளிமா தெரியாது நமக்கு

ஆமா காமா சோமா கவி. 

ஏகாந்தன் : 

உப்புமாவைப்பற்றி ஏதோ சொல்ல ஆரம்பித்து, மது அழகாய் இருக்கு என்கிறாரே? மது நன்றாக இருந்ததா அல்லது மதுக்கோப்பை அழகாக இருந்ததா? 
காலையில் காப்பிக்கு பதிலாக மதுவைக் கையிலெடுத்த அந்த போதைக் கவிஞர் யார்?

  
நிச்சயம் கவியரசில்லை.

ஏஞ்சல் : 

நீங்கதான் பிரச்சினையை க்ராஸ் செக் மூலம் முடித்து வைத்தீர்கள் என்பது அந்த பெண் வீட்டாருக்கு தெரியுமா ?

ப: தெரிஞ்சிருந்தா அப்பவே ஆட்டோ அனுப்பியிருப்பாங்க! பிரச்சினையின் தீர்வு, கிராஸ் செக் மட்டும் அல்ல - அதை மாமா பெயருக்கு எழுதி, அப்பா விலாசத்திற்கு அனுப்பியதுதான். 

1,எனக்கு இந்த பாட்டு என்ன மொழி என்று தெரியணும் ?
//பல்டி பாக்குற டர்ல
வுடனும் பல்தே//
அத்துடன் இந்த வரிக்கு விளக்கமும் வேணும் ?
அப்புறம் சிம்டங்காரன் அப்படினா என்ன ?

ஹி ஹி இதெல்லாம் தமிழ்ப் பாட்டுச் சொற்களா? ஆனால் .... 
இதை ஆழ்ந்து படித்துப் பார்க்கையில், பல திடுக்கிடும் உண்மைகள் தெரிய வருகின்றன. 

'பல்டி' என்பது அந்தக் காலத்தில், சர்க்கஸ் கோமாளிகள் செய்து, பார்வையாளர்களைக் கவர்ந்த யுக்தி. இந்நாளில், பல்டி என்பது அரசியலிலும், சினிமாவிலும் அதிகம் காண முடிகிறது. டர்ல என்றால், ஆடையை, 'டர்'ரென்று கிழித்துக்கொள்ளும் பைத்தியக்காரன். ஆகவே, முதல் வரிக்கு அர்த்தம், 'சினிமா பார்க்கும் ரசிகன், அரசியல்வாதியை ஆராதிக்கும்  தொண்டன், எல்லோரும் துணியைக் கிழித்துக் கொண்டு அல்லாடும் பைத்தியங்கள்; அவர்கள் பல் தேய்க்காதவர்கள்' என்பதாகும்.

சிம்டங்காரன் என்பது தரைமட்டமாக, போட்டி நடிகரைத் தாக்கி எழுதப்பட்ட வார்த்தைகள். விஜய டி ஆர் சமீபத்தில் என்ன சொன்னார்? 'விஜய்க்கு அடுத்து சிம்பு' என்று சொன்னார் அல்லவா? அதனால், விஜய் தன் படப்பாடலில், 'சிம்பு கடங்காரன்' என்பதை,  சுருக்கி 'சிம்டங்காரன்' என்று பாடி, ஆடி இருக்கிறார்!

2,பிஸிபேளா பாத், சாம்பார் சாதம் ..இவை இரண்டில் எது உங்கள் சாய்ஸ் ?

ப: பிஸிபேளா பெயர் மட்டும்தான் கவர்ச்சி. செய்முறை கடினம். சுவையில் அப்படி ஒன்றும் சுகம் இல்லை. இந்த இரண்டில் சா சாதத்திற்கு  ஆதரவாகத்தான் என் வோட்டு. பி பா வுக்கு நாட்டு.

3,கனவுகள் பின்னால் வரப்போவதை நமக்கு முன்கூட்டியே அறிவிக்கின்றனவா ?

கனவுகள் முன்பதிவுகளின் தாக்கம் என்கிறார்கள். 

கனவுகள் சில சமயங்களில், முன்கூட்டி அறிவிக்கின்றன என்றபோதும், அந்த நிகழ்வுகளுக்குப் பிறகுதான், நமக்கு அந்தக் கனவுகளின் அர்த்தம் விளங்குகின்றது. ஆனால், கனவுகளால் பெரும்பாலும் நிகழ்வுகளை மாற்றியமைக்க அல்லது நிகழாமல் தடுக்க இயலாது. 

4,SELFIE கலாச்சாரம் அவசியமா ?

 சில சமயம் செல்ஃபி ஒரு சந்தோஷம்தான். 

சந்தோஷ தருணங்களில், ஒரு செல்ஃபி எடுத்து, தேதி வாரியாக, உங்கள் கணினியில் சேமித்து வையுங்கள். சில சலிப்பு / அலுப்பு தோன்றும் நாட்களில், அந்த செல்ஃபி படங்களை, ஸ்லைட் ஷோவாக ஓடவிட்டுப் பாருங்கள். நிச்சயம் ஒரு பாசிடிவ் மாற்றம் உங்களிடம் தோன்றும். நான் நிறைய செல்ஃபி  படங்கள் எடுத்து, சேர்த்துவைத்துள்ளேன். ஆனால், அதை எதையும் பார்க்கவேண்டிய சந்தர்ப்பம் இதுவரை வந்ததில்லை! 

5, ராஜிவ் அவர்களின் மகள் பெயர் ப்ரியங்கா அப்புறம் சுஜாதா அவர்களின் பிரிவோம் சந்திப்போம் கேரக்டர் மதுமிதா போன்ற பெயர்களை தாக்கம் மற்றும் செலிப்ரிட்டி காரணங்களால் அந்தந்த காலத்தில் மக்கள் வைச்சாங்க இப்போ அந்த மாதிரி சமீபத்தில் அதிகமாக வைக்கும் பெயர்கள் என்ன ? 

ராஜீவ் அவர்களின் மகன் பெயர், மகள் பெயர் எல்லாம் ராஜீவின் காலத்திற்குப் பிறகுதான் பிரபலமாயின. ஆனால் பிரியங்கா என்ற பெயர் அதற்கு பல வருடங்களுக்கு முன்பே வைக்கப்பட்டது உண்டு. பிரியங்காவுக்குக் கூட பூர்வாசிரமப் பெயர் பியங்கா என்று எங்கோ படித்த ஞாபகம். 

அது போலத்தான் மதுமிதா என்ற பெயரும். மதுமிதா, மதுபாலா போன்ற பெயர்கள் ஆந்திராவிலும், வடநாட்டிலும் அதிகம். அவர்களின் பெற்றோர்கள்  எல்லோரும் தமிழ் நாவல்கள் படித்தவர்களாக இருக்கமுடியாது! 

6, அன்றாட வாழ்க்கை பிரச்சினைகளை தீர்க்கும் முக்கிய காரணி எது ?

 சுய பரிசோதனை. 

உற்சாகம், உழைப்பு, விடாமுயற்சி. 

7, அறிவு ,ஞானம் இரண்டும் ஒன்றா வெவ்வேறா ?

அறிவு பயன் படுவது ஞானம் அமைதி தருவது. 

அறிவு, ஐம்புலன்களால் அறியப்படுவது. ஞானம் புலன்களுக்கு அப்பாற்பட்டது. யாருக்கு, எந்த நேரத்தில், எப்படி, எந்த போதி மரம் வாய்க்கும் என்று சொல்லமுடியாது.   

   
8,ஒருவரின் குணம் சார்ந்த இயல்பு அல்லது வளர்ப்பு இதில் எது முக்கியப்பங்கு வகிக்கிறது ?

பிறக்கும்போது பிளாங்கா பிறக்கிறோம் வளர்ப்புதான் நம்மை செதுக்குகிறது என்பது உண்மையா ?

கற்பதில் திறன் ஏற்றத் தாழ்வுகளைப் பார்த்தால் டிசைனிலும் சூட்சுமம் இருப்பதாகத் தோன்றுகிறது.

9,ocd ,aat டிஸ்லெக்சிக் போன்றவைப்பற்றி சமீப வருடங்களாக நம் நாட்டில் அதிகம் பேசுகிறார்களே இது வெளிநாட்டு /சோஷியல் மீடியாக்கள் தாக்கமா ? அல்லது உணவு மற்றும் வாழ்க்கை முறையால் ஏற்பட்ட மாற்றமா ?

ஹி ஹி! எனக்கு DOG டாக், CAT கேட் தான் தெரியும்! OCD AAT எல்லாம் தெரியாது! 

10, குடும்பம் ,உறவினர்கள் இவற்றுக்கு வித்தியாசம் என்ன ?

அன்றாடம் குடும்பம் ஆபத்துக்கு உறவினர்.

அதிரா : 

யாரையாவது நேரில் சந்திக்கோணும் எனும் பேராசை உண்டோ? அல்லது அப்படி பைத்தியமாக இருந்து அவர்களை சந்திக்க முன் அவர்கள் போய் விட்டால்கூட சொல்லலாமே.. உதாரணம் எங்கட கண்ணதாசன் அங்கிளும் நானும்போல:)

தி ஜானகிராமனை சந்திக்கத் தவறியது பெருங்குறையாக உணர்ந்ததுண்டு.

“திருவாரூருக்கு வாருங்கள் ஒரு குழந்தை சிரிப்பதைப் பாருங்கள்.. ஒருவாய் சோறு ஊட்டும் தாய் முன் முக்கால் இருப்பதைப் பாருங்கள்”..

இதன் அர்த்தம் என்னவாக இருக்கும்?

எண்டே குருவாயூரப்பா! ஈ பெண்குட்டி ஞின்னே சடனாயிட்டு திருவாரூருக்கு டிரான்ஸ்ஃபர் செஞ்ஞு! ஞான் எந்தா  பரஞு ... ! 

கால்நடைகள் எனச் சொன்னால் மிருகங்களைப் பற்றியே நினைக்கிறோமே? ஏன் மனிசர்களும் காலாலதானே நடக்கிறோம்ம்?

நாலு கால்களால் ஒரு மிருகம் நடக்கிறது. அதனால் 1/4 நடை. One walks with 4 legs. நாம் இரண்டு கால்களால் நடக்கிறோம். அதனால் 1/2 நடை. நாம் எல்லோரும் கால்நடை இல்லை அரை மனிதர்கள். ஆடை அணிந்திருப்பதால், முழு மனிதர்கள். (ஆடை இல்லாதவன் அரைமனிதன்.) மிருகங்கள் ஆடை அணிந்தால், அரை(நடை) மிருகம் ஆகிவிடும்! 

வளவளவெனப் பேசுவோரில் விசயமில்லை.. வெள்ளாந்திகள், ஆனா மெளனமாக இருப்போர் விசயகாரர் என ஒரு பொதுக் கருத்துண்டு.. இது எவ்ளோ தூரம் உண்மை? அனுபவத்தில சொல்லுங்கோ.

இருப்பின்றி அதிகம் பேசுவோர் மிகப் பலர். 

Still waters run deep என்பது பழமொழி. குறைகுடம் கூத்தாடும் (நிறைகுடம் அதைப் பார்த்து ரசிக்கும்!) Empty vessels make the most sound. பாலிடெக்னிக் படித்த காலத்தில், ஒரு வொர்க் ஷாப் ஆசிரியருக்கு, empty vessel என்று பெயர் வைத்திருந்தோம். அவருடைய ஒரிஜினல் பெயர் மறந்துபோயிடுச்சு! 

ரேவதி நரசிம்ஹன் : 

வாழ்க்கையில் இக்கட்டான சூழ்னிலையில் இருக்கும் போது,
இதுவும் கடக்கும் என்பதை எத்தனை நாள் நம்புவது? 

கஷ்டம்தான். என்றாலும் கடந்த கால பெரும் பிரச்சினைகள் காலக் கிரமத்தில் நீர்த்துப் போன உண்மை சிறு ஆறுதல் தரக்கூடும்.

கீதா ரெங்கன் : 

எனக்குத் தெரிந்தவரை அதாவது சிறு வயது முதல் வளர்ந்த வரை கோயில்களில் பிரசாதம் என்பது கோயில் மடப்பள்ளியில் செய்து அதை இறைவனுக்கு நெய்வேத்தியம் செய்த பிறகு வரும் பக்தர்களுக்கு விநியோகம் செய்வதுதான். எங்கள் ஊரில் கோயிலில் வீட்டிலிருந்து அரிசி வெல்லம் நெய் எல்லாம் கொடுத்து அரவணை செய்து ஊருக்கே விநியோகம் செய்வதுண்டு முன்பு. அப்படிச் சாப்பிட்ட நினைவுகள். ஆனால் இப்போது அப்ப்டி ஃப்ரீயாக இறைவனுக்குப் படைக்கப்படும் மடப்பள்ளி பிரசாதம் வினியோகிப்பதாகத் தெரியவில்லை. ஸ்டால்கள் போட்டுவிட்டார்கள்.ஸ்டால்களில் விற்கப்படும் பிரசாதம் எனப்படுவது இறைவனுக்குப் படைக்கப்பட்டு விற்கப்படுகிறதா? அதுவும் தோசை வித் மிளகாய்ப்பொடி என்று ஹோட்டல் போல விதம் விதமாக!..

பிரசாத விற்பனைக் கூடம் ஒரு சுமாருக்கும் கீழான பட்சணக் கடையாகவே பெரும்பாலும் இருக்கிறது.

ஆம். கோயில்கள் வர்த்தகஸ்தலங்கள் ஆனது, வருத்தத்துக்குரிய நிலைதான். 

இந்தவாரக் கேள்வி : 

ஒரு நண்பரைச் சந்திக்க, வெளியூர் செல்கிறீர்கள். அந்த நண்பர் உங்களை வரவேற்றுவிட்டு, சற்றுநேரம் உங்களுடன் பேசிக்கொண்டிருக்கிறார். பிறகு, தான் ஒரு டின்னர் பார்ட்டிக்கு செல்வதாகவும், நண்பர்களை உடன் அழைத்துவர டின்னர் பார்ட்டி கொடுப்பவர் ஓ கே சொல்லிவிட்டதால், உங்களையும் அழைத்துச் செல்கிறார். அந்த ஊரில், உங்களுக்கு, அவரைத் தவிர வேறு யாரையும் தெரியாது. வேறு வழியில்லை, நீங்கள் அவரோடு சென்றுதான் ஆகவேண்டும் என்னும் சூழ்நிலை.

டின்னர் பார்ட்டி ஹால்.

உங்களுக்கு, உங்கள் நண்பரைத் தவிர வேறு யாரையும் தெரியாது.  

நீங்கள், 

1) நண்பரோடு சேர்ந்து, பார்ட்டி ஹாலில் அவர் செல்லும் இடங்களுக்கெல்லாம் நீங்களும் சென்று, அவர் யாரோடெல்லாம் பேசுகிறாரோ அவர்களோடு ஒன்றும் பேசாமல் அல்லது ஓரிரண்டு வார்த்தைகள் மட்டும் பேசுவீர்களா?

2) ஏதேனும் ஒரு மூலையில் நின்றுகொண்டு, நடக்கின்ற நிகழ்வுகளை மௌனமாகப் பார்த்துக்கொண்டிருப்பீர்களா?

3) கலகலப்பாக, எல்லோரிடமும் சிரித்த முகத்துடன், வலியச் சென்று அறிமுகப்படுத்திக்கொண்டு கலந்து பேசுவீர்களா?

4) மேலும் நிறைய நண்பர்களை ஏற்படுத்திக்கொள்ளக் கிடைத்த சந்தர்ப்பமாகக் கருதி, நண்பர்கள் பட்டியலை விரிவுப் படுத்துவீர்களா?

5)  கூட்டத்தில் உங்களைப் போன்று தனியாக நிற்கும் ஏதேனும் ஒருவரைக் கண்டுபிடித்து, அவரோடு மட்டும் மனம் விட்டுப் பேசிக்கொண்டிருப்பீர்களா?

6)  பார்ட்டி ஹாலில் ஒவ்வொருவரும் ஒரு ஜோக் அல்லது பாட்டுப்பாட வேண்டும் என்று டின்னர் விருந்து அளிப்பவர் கூறினால், அதை ஏற்று, உங்கள் முறை வரும்பொழுது, ஜோக் / பாட்டு அல்லது குறைந்தபட்சம் ஏதேனும் சுவையான சம்பவம் பற்றிப் பேசுவீர்களா? 

அல்லது யார் கண்ணிலும் அகப்படாமல், நழுவிவிடுவீர்களா?

7) இவற்றை எல்லாம் தவிர, வேறு ஏதாவது செய்வீர்களா? 

(பி கு 1: தேவையான இடங்களில், வாசகிகள், நண்பி, நண்பியின் நண்பி கொடுக்கும் பார்ட்டி என்று கொள்க! வாசகர்கள் செல்லும் பார்ட்டி ஆண்களுக்கான பார்ட்டி என்றும், வாசகிகள் செல்லும் பார்ட்டி, பெண்களுக்கு மட்டுமான பார்ட்டி என்றும் வைத்துக்கொள்வோம். 

பி கு 2: நண்பர்கள் / நண்பிகள்  கிடையாது, நண்பரோடு / நண்பியோடு  பார்ட்டிக்கெல்லாம் போகமாட்டேன் என்பது போன்ற பதில்கள் வேண்டாம். போயாச்சு. அப்புறம் என்ன? என்பதுதான் கேள்வி! ) 

==============================
                 
அனுஷ்கா உடல் இளைப்பு பயிற்சிக்காக ஆஸ்திரியா நாட்டுக்குச் சென்றுள்ளதால், இந்தவாரமும் இங்கு ஆப்சென்ட். ஒரு நாளைக்கு பயிற்சிக்கு ஒரு லட்ச ரூபாயாம்! பதினைந்து நாளுக்கு பதினைந்து லட்சம் + பயண செலவு எல்லாம் செய்வதைவிட. பதினைந்து நாட்கள் மஹாளய பட்சம் என்று சொல்லி, பட்டினி கிடந்தாலே பாதி தமன்னா ஆகியிருக்கலாமே!

ஹூம்! எனக்கெதுக்கு  ஊர் வம்ஸ் !

================================