புதன் 181031 தோசை ஏன் வட்டமா இருக்கு?

சென்ற வார சமையல் கேள்விக்கு, சுவையான பதில்களை அளித்த கீதா சாம்பசிவம், ரேவதி நரசிம்ஹன், துரை செல்வராஜூ, கோமதி அரசு, பானுமதி வெங்கடேஸ்வரன்
( எனக்கு தெரியாத ஒரு பண்டம் என்றால், ரெசிப்பியை முழுமையாக படிப்பேன். முதல் முறை முயற்சி செய்யும் பொழுது செய்முறையில் குறிப்பிட்டிருக்கும் அளவுகளை கொஞ்சம் கூட மாற்றாமல் அப்படியே பின்பற்றுவேன். அடுத்த முறைகளில் விருப்பத்திற்கு ஏற்றார் போல மாற்றிக் கொள்வேன். "சிறப்பான பதில். ) விவரமான பதில் அளித்த ஞானி அதிரா, ஏஞ்சல் ஆகியோர் பாராட்டுக்குரியவர்கள். 

கருத்துப் பதிந்த எல்லோருக்கும் 'சமையல் சாம்ராட்' விருது பரிந்துரைத்து, ஜனாதிபதி பார்வைக்கு அனுப்பியிருக்கிறோம்! 

–-------

அதிரா: 

பாம்பின்கால் பாம்பறியும் என்பார்களே.. பாம்புக்குத்தான் கால் இல்லையே?:) அப்போ எதுக்கு இப்படி ஒரு பழமொழி வந்துது?...

கால் இல்லாத பாம்பு எப்படி  நகர்கிறது என்பது பாம்புக்கு தான் தெரியும் என்ற பொருளில் வந்திருக்கலாம்.

சில புத்தகப் பக்கங்களைப் புரட்டியபோது, கால் என்ற சொல்லுக்கு பல அர்த்தங்கள் உண்டு என்று தெரிந்தது. இந்த பழமொழியில், கால் என்ற சொல்லுக்கு, தடம் அல்லது வழி என்று பொருளாம். ஒரு பாம்பு சென்ற தடம் அல்லது வழி, இன்னொரு பாம்புக்குத்தான் தெரியுமாம்! 

பாம்புக்குக் கால் கிடையாது என்பதை முன்னோர்கள் எப்படிக் கண்டுபிடித்தனர் தெரியுமா? 

அது சட்டை மட்டும்தானே போட்டிருக்கு, டிரௌசர் போட்டுக்கொள்ளவில்லை அல்லவா ! அதனால்தான்! 

ஏஞ்சல்: 

1, மாப்பிள்ளை முறுக்கு அப்படின்னா என்ன ? முழு விளக்கம் தேவை ?

ஆளுக்கு அடையாளம் மீசை என்று நினைவு படுத்திக்கொண்டு  இதைப் பாருங்கள்.

என் சிறு வயதில், நான் மாப்பிள்ளை முறுக்கு என்றால், கல்யாண சீர் வரிசையில் வைக்கப்படும் மெகா சைஸ் முறுக்கு என்றுதான் நினைத்திருந்தேன்! 

2, உங்களை பொறுத்தவரை வாழ்வின் /வாழ்க்கையின் அர்த்தம் என்ன ? 

உங்களைப் பொறுத்தவரை என்று சொல்லிவிட்டீர்கள்.

புறப் புலன்கள் அகம் இவை இரண்டின் மூலமாகவும் அடுத்தவருக்கு ஊறு செய்யாமலும்,  தாம் மகிழ்ச்சியாகவும் இருப்பது வாழ்க்கைக்கு அர்த்தம் தரும்.

LIFE = Learn and Implement, Find and Encourage.

3, அனுபவங்களால் நம்மை நம் செயல்களை நியாயப்படுத்திக்கொள்ளும் நாம் பிறரிடம் மட்டும் அவர்களின் செயல்பாடுகளை வைத்து அவர்களை இவர் இப்படித்தான் என்று எதற்கு ஜட்ஜ் செய்கிறோம் ?

தம்மைப் போல் பிறரையும் நினைப்பது தவறில்லை. நம் தவறுகளுக்கு நியாயம் கற்பித்துக் கொண்டு அடுத்தவரை விமர்சனம் செய்வதைத்தான் ஏற்க இயலாது.

4, தோசை ஏன் வட்டமா இருக்கு ? யாரும் சதுர தோசை சுட முயற்சிக்கல்லியா ??

எங்கள் வீட்டுச் சின்னப் பிள்ளைகளுக்கு எல்லா வடிவங்களிலும் தோசை செய்து தருவதுண்டு.

அதிரானா மியாவ்ச்காவ் என்ற ரஷ்ய விஞ்ஞானியின் தோசைக் கதையை, (வட்ட வட்ட தோசை சுட்டு ) இன்றைய   "நம்ம ஏரியா" வலைப்பதிவில் படியுங்கள்.  

5,கோபம் இருக்கிற இடத்தில குணம் இருக்கும் என்கிறார்களே எப்படி ?? விளக்கம் ப்ளீஸ் ?

ஆறுவது சினமானவர்கள் அதன்பின் வருந்துவதைச் சொல்கிறோம்.

கோபம் இருக்கின்ற இடத்தில், கோபகுணம் இருக்கும் என்று சொல்லியிருப்பார்களோ! 

6, யாராவது உங்ககிட்ட சிகரெட் பத்த வைக்க நெருப்பு /லைட்டர் கேட்டதுண்டா ?

நாம் தம்மடிக்காத பட்சத்தில் இப்படி திடீர்னு கேட்டா எப்படி உணர்வீங்க அப்படி உணர்ந்த அனுபவம் இருக்கா ?

இல்லை. பெரும்பாலும் இவரிடம் இருக்கும் என்று அனுமானித்துக் கேட்போரே அதிகம். 

என்னிடம் நெருப்பு கேட்டவரில்லை. ஆனால், ஒரு நண்பர், தான் ஒரு சிகரெட்டை தேர்ந்தெடுத்து, வாயில் பொருத்திக்கொண்டு, கிண்டலாக, சிகரெட் பெட்டியை என் பக்கம் நீட்டினார். நான், 'நன்றி' சொல்லி, அதிலிருந்து ஒரு சிகரெட்டை எடுத்துப் பிரித்து, எல்லாவற்றையும் குப்பைக்கூடையில் போட்டேன். திகைத்துப்போன அவரிடம், நான் ஒரு சிகரெட்டை ஸ்மோக் செய்ததாக நினைத்துக்கொள்ளுங்கள் என்று சொல்லிவிட்டேன்!  

7,சாப்பாட்டு ராமன் ,கும்பகர்ணன் ,நளபாக சக்ரவத்தி போன்ற நல்ல பிரச்சினை தாரா அடைமொழிகளை பட்ட பெயர்களை ஆண்களுக்கு கொடுத்து நீலி ,மந்தரை ,சூர்ப்பனகை போன்ற வில்லத்தனமான பேர்களை பட்ட பெயர்களாக பெண்களுக்கு கொடுத்ததன் பின்னணி என்ன ?

இவை அடைமொழி அல்ல. குண விசேஷம் பற்றிய குறிப்பு. கடங்காரப் பாவி என ஆண்கள் சிலரையும் மகாலட்சுமி என்று மகளிரையும் குறிப்பிடுவதும் உண்டுதானே.

8,நடிகர்களின் கட்டவுட்களுக்கு பாலூற்றுவதை அந்தந்த நடிகர்கள் சொல்லி தடை செய்ய முடியாதா ? ஏன் சொல்ல மாட்டேன்கிறார்கள் சொன்னா ஏற்றுக்கொள்ளும் பக்குவம் ரசிகசிகாமணிகளுக்கு இல்லையா ?

பாலபிஷேகம், 16 அடி மாலை போன்றவை நடிகர்களுக்கு அபார திருப்தி அளிக்கும். பால் பூ செலவு அவர்களதானால் கூட ஆச்சரியம் இல்லை.

9, கோழி முட்டை நீள்வட்டமா தானே இருக்கு ஆனா டீச்சர்ஸ் விடைத்தாளில் போடும் முட்டை எதுக்கு வட்டமா இருக்கு ?

சுத்த சூன்யமான விடைக்கு சுத்த  துல்யமான சுழி ? 

பாலிடெக்னிக் முதல் வருடம் படித்தபோது, என்னுடைய பௌதிக பாட ஆசிரியர், சென்டிமென்டலாக யாருக்கும் முட்டை போடமாட்டார். எல்லா விடைகளும் தவறாக இருந்தாலும், சிவப்பு மசியினால் அவற்றை அடித்துவிட்டு, இறுதியாக மார்க் போடும்போது, ஐந்து அல்லது ஆறு மார்க் (நூற்றுக்குதான்!) போட்டு, பக்கத்திலேயே "தருமம்" என்று எழுதிவைப்பார்! 

10,மறதி நல்லதா ? வரமா சாபமா ..?

மறதி என்பது என்னைப் பொருத்தவரை நல்ல வரம்தான். தேவையில்லாத, வம்பு விஷயங்களை அப்பப்போ மறந்துவிடுவேன். ஆனால், பிறர் எனக்குச் செய்த உதவிகளை மறக்கமாட்டேன். 

நன்றி மறப்பது நன்றன்று நன்றல்லது

அன்றே மறப்பது நன்று.

==============================

இந்தவாரக் கேள்வி: 

புள்ளிவிவரம் : 

" பெரு நகரங்களில், காலை (பள்ளிக்கூட) நேரத்தில், சாலையில் சொந்தக்கார் ஓட்டிச் செல்பவர்களில் (அநேகமாக குழந்தைகளை பள்ளிக்கூடத்தில் விடுவதற்காக ) 4 என்ற எண்ணில் முடிகின்ற நான்கு இலக்க பதிவு எண் கொண்ட சிவப்பு வண்ணக் காரை ஓட்டிச் செல்பவர்கள், பெரும்பாலும் அழகிய பெண்கள். "

என்று ஒரு புள்ளிவிவரத்தைப் படிக்கிறீர்கள். 

உடனே உங்கள் ரியாக்ஷன் என்னவாக இருக்கும்?

1) சரியாக இருக்குமா என்று சோதித்துப் பார்ப்பீர்களா?

2) புள்ளிவிவரங்கள் எல்லாம் வேஸ்ட் என்று நினைத்துக் கொள்வீர்களா?

3) இதை ஆராய்ந்து பார்த்து எழுதியவர் யாராக இருக்கும் என்று யோசிப்பீர்களா?

4) அவங்கவங்களுக்கு எவ்வளவோ வேலை கிடக்கு, இதுல இது பத்தி யோசிப்பது தேவையா என்று நினைப்பீர்களா?

5) 'இந்த புள்ளி விவரத்தில் எங்கெல்லாம் தப்பு கண்டு பிடிச்சு, எழுதியவரை விமரிசிக்கலாம்' என்று ஆராய்ச்சி செய்வீர்களா?

6) இதே போலவே, வேறு ஏதாவது புள்ளி விவரம் நீங்களும் எழுத இயலுமா என்று முயல்வீர்களா?

7) இந்த ஆறு தவிர, வேறு ஏதேனும் ரியாக்ஷன் ?

==========================================

தோசை வடிவம் பற்றிய  கேள்வி போல இந்த வாரமும் யாராவது ஒரு கேள்வி கேளுங்கள். நம்ம ஏரியாவில், அதற்கு ஒரு கதை எழுத முடிகிறதா என்று பார்க்கிறேன். 

 ======================================