கோவாக்சின்-கோவிஷீல்ட் -கொரோனா தடுப்பூசி - முன்னும் பின்னும்

 ​கொரோனா இரண்டாம் அலை வந்து கொண்டிருப்பது நன்றாய்த் தெரிகிறது.  சென்னையிலும், மற்றும் பல நகரங்களிலும் சட்டென மறுபடி கொரோனா பாதிக்கப் பட்டவர்கள் எண்ணிக்கை ஏறுமுகத்தில் இருக்கிறது.  

---

நெருங்கியவர்கள் வட்டத்தில் சட்டென சில இழப்புகள்...  அது சென்றதடவை போல அவ்வளவு நேரம் கொடுக்கவில்லை என்றும் தெரிகிறது.  ஆக்சிஜன் லெவல் ஓகே, டெம்பெரேச்சர் இல்லை என்றவர்கள் மறுநாள் மதியத்துக்குள் மறைந்து போன சம்பவங்கள் மனதைப் பதைபதைக்க வைத்தது.  

இதோ..  இன்றைய நிலையில் நகரில் எந்த அரசு ஆஸ்பத்திரியிலும் பெட் காலி இல்லை.  இத்தனைக்கும் மூடிய பல யூனிட்டுகளை மறுபடி திறந்திருக்கிறார்கள்.  ராமச்சந்திரா உட்பட தனியார் மருத்துவமனைகளிலும் அதே நிலை.

இவ்வளவு இருந்தும் பொதுமக்களுக்கு இதன் தீவிரம் புரியவில்லை என்பதுதான் சோகம்.

என் அலுவலகத்தில் உடன் பணிபுரியும் ஒருவருக்கு கொரோனா அறிகுறி.  தேடிப்பார்க்கும்போது எந்த மருத்துவமனையிலும் இடம் இல்லை.  அடுத்து இன்னொருவர் கணவருக்கும் கொரோனா தோற்று ஏற்பட்டு, அதன் காரணமாக இவருக்கும் வந்து விட்டது.  ஆஸ்பத்திரியா, வீடா என்று அலைந்து கொண்டிருக்கிறார்கள்.

உறவினர்கள் குழுவிலும் நண்பர்கள் குழுவிலும்  சட்டையை உயர்த்தி ஊசி போட்டுக்கொள்ளும் காட்சியைப் படமாகப் போட்டு கலக்க ஆரம்பிக்க, அவை யாவும் நீ எப்போது, நீ எப்போது என்று கேட்க ஆரம்பிப்பது போல பிரமை!  பிப்ரவரி 22 வரை முன்கள பணியாளர்களுக்கு மட்டும் என்று சொன்னவரை இந்த ரவுசு இல்லை.  அப்புறம் அகவை அறுபதைத் தாண்டியவர்களுக்கெல்லாம் ஊசி என்றானவுடன்தான் இதெல்லாம் ஆரம்பம்.  போகப்போக வயசு வித்தியாசமில்லாமல் போட்டுக்கொண்டார்கள்.   குழு முழுவதும் ஒருவருக்கொருவர் 'நீ போட்டாச்சா, நீ போட்டாச்சா' கேள்விகள்தான் நிறைந்திருந்தன.

தடுப்பூசி போட்டுக்கொள்ள ஆரம்பத்தில் தயக்கம் இருந்தது.  இப்போதைய நிலையில் போட்டுக்கொள்வதே பாதுகாப்பு என்று நினைக்க வைக்கிறது தற்போதைய சூழ்நிலை.  அப்படியே போட்டுக்கொண்டாலும் கோவிஷீல்ட்தான் தெரிவில் இருந்தது.  பாதுகாப்பு என்றார்கள்.  ஆனால்...

கோவிஷீல்ட்​ கோவிஷீல்ட் என்று ஜெபித்துக் கொண்டிருந்து விட்டு கடைசியில் தயக்கத்தை உதறி நானும் தடுப்பூசி போட்டுக் கொள்ளலாம் என்று முடிவெடுத்தபோது கோவாக்சின் தான் இருந்தது.  முதலில் தடுப்பூசிகள் போட ஆரம்பித்தபோது கோவிஷீல்ட்தான் பெட்டர் என்று சொல்லி வந்தார்கள் இல்லையா?

எனவே இப்போது அது இல்லை என்றதும் கொஞ்சம் பக்கென்று இருந்ததென்னவோ உண்மை.  ஆனால் பின்னர் தேர்வுகளில், முடிவுகளில் கோவாக்சின்தான் பெட்டர் தடுப்பூசி என்று சொல்ல ஆரம்பித்தார்கள்.  அதற்கு ஒரு கம்பாரெட்டிவ் ஸ்டேட்மெண்டும் அனுப்பினார்கள் - வாட்சாப்பில்தான்!   சில டாக்டர்கள் வாய்ஸ் மெசேஜ்களில் பரவினார்கள்.

அபிப்ராயங்கள் ஆளாளுக்கு மாறுபட்டாலும் கோவாக்சினே போட்டுக்கொள்ளலாம் என்று முடிவெடுத்தேன்.   நான், என் சகோதரர், என் பாஸ், என் மாமியார் புறப்பட்டோம்.

முன்னரே அங்கு பணிபுரியும் நண்பனிடம் சொல்லி முன்னேற்பாடு செய்து வைத்திருந்தோம்.  அவன் ஏற்கெனவே அங்கு வந்திருந்தவர்களுக்கும் பாதிப்பு இல்லாமல், எங்களையும் தாமதிக்க வைக்காமல் தடுப்பூசி போட்டுக்கொள்ள ஏற்பாடு செய்தான்.   நண்பன் எனக்காக கோவிஷீல்ட் எடுத்துக் கொடுக்கவும் ரெடியாகத்தான் இருந்தான்.  நான் கோவாக்சின் போதும் என்று சொல்லி விட்டேன்.

இன்னொரு காரணம் ஒரு மாதத்துக்கு முன் என் நண்பர் சென்று கோவிஷீல்ட் போட்டுக்கொண்டு வர,  இரண்டாவது டோஸுக்குச் சென்றபோது கோவிஷீல்ட் இல்லை, கோவாக்சின்தான் இருக்கிறது என்று சொல்லவும், இவர் பதற, அவர்கள் அங்கிங்கு விசாரித்து, அவர்களே ஒரு இடம் சொல்லி அனுப்பினார்களாம்.  அங்கு கோவிஷீல்டு போட்டுக்கொண்டாலும் அது பாதுகாத்து வைக்கப் பட்டிருந்த வகையில்  இவருக்கு கொஞ்சம் சந்தேகம் இருந்தது என்று சொல்லி இருந்தார்.

இப்போது கோவிஷீல்ட் கம்மியாகவும் கோவாக்சின் அதிகமாகவும் வருவதும் நான் இதைத் தெரிவு செய்ய ஒரு காரணம்.

நேற்றைய செய்தி மேற்கண்ட என் வரியை மறுக்கிறது என்பதோடு இப்போதைக்கு தடுப்பூசிக்குத் தட்டுப்பாடு என்றும் சொல்கிறது..  இந்தச் செய்தியைப் படிக்கவும்!  கையிருப்பு 10 நாட்களுக்குத்தான் இருக்கிறதாம்!

BP பார்த்தபோது எங்கள் நால்வரில் எனக்கு மட்டும் சற்று அதிகமாக இருக்க, என்னுடைய ரீடிங் மருத்துவருடைய பார்வைக்கு ஸ்பெஷலாக சென்றது.  ஒருவேளை என் கூட வந்திருந்த மற்ற மூன்று பேர்களுக்கும் நான்தான் பொறுப்பு என்பதால் எனக்கு பிரஷர் சற்று ஏறிவிட்டதோ என்னவோ!  பாஸா, அவர் பயங்களை எல்லாம் சொல்லிச்சொல்லி இரண்டு நாட்களாகவே பயமுறுத்திக் கொண்டே இருந்தார்.

எங்கே எனக்கு மட்டும் பின்னர் வந்து போட்டுக்கொள்ளுங்கள் என்று சொல்லி விடுவார்களோ என்று கவலைப்பட்ட நேரத்தில் அங்கிருந்த பொறுப்பு மருத்துவர் இரண்டொரு கேள்விகள் கேட்டு விட்டு கையெழுத்திட்டு தந்து விட்டார்.

1) ஏற்கெனவே உங்களுக்கு ப்ரெஷர் இருக்கா, மாத்திரை சாப்பிடறீங்களா?  2) கோவிட் வந்ததா உங்களுக்கு?

இரண்டு கேள்விகளுக்கும் என் பதில்  "ஆமாங்க!"

நாங்கள் நான்கு பேர்களும் அவசர அவசரமாக சீட்டு போடுதல், கம்பியூட்டர் பதிவு, டெம்பெரேச்சர், பிபி பார்ப்பது என்று இருக்கையில் என்னதான் அங்கு  காத்திருந்தவர்களையும் கூடக்கூட அனுப்பிக் கொண்டிருந்தாலும் ஒரு தாத்தா மட்டும் குறுக்கே புகுந்து 'எனக்கும் அவசரம், வேலைக்குப் போகணும்' என்று சொல்லி அமர, அங்கிருந்த ஊழியர் என் சிபாரிசின் வலிமையால் என்னையே கவனிக்க, நான் அவரை முன்னே செல்ல விட்டு பின்னர் நான் அமர்ந்தேன்!    நியாயங்களை மீறாமல், ஆனால் தெரிந்த இடம் என்று நம்பிக்கையுடன் போட்டுக்கொண்டேன்.

போகப்போக ஆதார் கார்ட் போல வாக்சின் போட்டுக்கொண்டாயிற்றா என்று கேட்டே அரசாங்க சம்பந்தப் பட்ட ஒவ்வொரு செயலும் நடக்கும் என்கிற வதந்தி இருக்கிறது.  எனவே தயக்கங்களை உதறி போட்டுக் கொண்டோம்.

பிளாஸ்க்கில் வெந்நீரும், தேநீரும் கொண்டு போயிருந்தோம்.  முடிந்து காத்திருக்கையில் அதைக் குடித்து மகிழ்ந்தோம்!!!

கையில் வலி அரைமணியிலேயே தெரிய ஆரம்பித்தது.  மதியம் வரை லேசாக தலைசுற்றல் இருந்தது.

மறுநாள் தலைசுற்றல் தலைவலியும்.  நான் வைத்திருந்த பிபி மெஷின் எனக்கு 155/100 என்றது.  பக்கத்து வீட்டில் வாங்கிப் பார்த்தபோது 142/110 என்றது.  கீழ் வீட்டில் வாங்கிப் பார்த்தபோது 132/90 என்றது..  அந்த மெஷின்களுக்குள் ஒரு ஒற்றுமையே இல்லை.  அருகிலிருந்த கிளினிக்கில் சென்று பழைய மாடல் பிபி மெஷினில் 'புஸ்கு புஸ்கு' என்று அடித்துப் பார்த்தபோது 110/70 என்று குழப்பியது!  அன்று முழுவதும் தலைவலி, அசதி, கால்வலி இருந்தது.  நூறைத் தொடாவிட்டாலும் நெருங்கி ஜுரம் இருந்தது.  அதற்கும் மறுநாள் எல்லாம் ஓகே.

மருத்துவ நண்பர் ஒருவர் சொல்லும்போது 28 நாட்கள், அதாவது நாலு வாரங்கள் கழித்து போட்டுக் கொள்வதை விட ஆறு வாரங்கள் கழித்துப் போட்டுக் கொள்வது சிறந்தது என்றார்.  தான் முதல் செட்டிலேயே போட்டுக் கொண்டதால் தெரியாமல் சரியாக 28 வது நாள் போட்டுக்கொண்டு விட்டதாகவும், என்னை ஆறு வாரங்கள் கழித்து போட்டுக் கொள்ளும்படியும்  சொன்னார்.  மருந்து இருப்பு இருக்க வேண்டுமே...   இதோ இப்போதே தடுப்பூசி பத்து நாட்களுக்குத்தான் கையிருப்பு இருக்கிறது என்கிறார்கள்.  அது வேறு கவலை!   அதற்குள் மத்திய அரசு தந்து விடும் என்று நம்புவதாகச் சொல்கிறார்கள்.  மேலும், 25 நாட்களில் இரண்டாவது டோஸ் என்று இல்லாமல், ஆறு வாரங்கள் கழித்து போடவேண்டியது கோவிஷீல்ட் மட்டுமே...   கோவாக்சின் அல்ல என்றும் நேற்றைய செய்தி சொல்கிறது.   "நீங்கள் ஏற்கெனவே கொரோனா வந்தவர் என்றால் உங்களுக்கு முதல் டோஸே பூஸ்டர் டோஸ் மாதிரி" என்றார் அவர் மேலும்!

புதிய அட்டவணை :  இதன்படி கோவாக்சின் கூட ஆறு வாரங்கள் கழித்துப் போட்டுக் கொள்ளலாம்.

​

இப்போதும் இருக்கும் சில பேச்சுகள்...

"தடுப்பூசி போட்டுக் கொண்டால் மட்டும் மாஸ்க் போடவேண்டாம் என்றா சொல்லப் போகிறார்கள்!  எப்படியும் மாஸ்க் போடவேண்டுமாம்..   சமூக இடைவெளி வேண்டுமாம்...  ரொம்பப் படுத்தறாங்க..."  காசிக்குப் போயிட்டு வந்தவங்க சிலபேர் கேட்கும் கேள்வி போல இருக்கிறது இது!

"எங்கள் ஆண்டவர் எங்களை இதிலிருந்தெல்லாம் காப்பாற்றுவார்.  பாவம் செய்தவர்களுக்கு மட்டும்தான் தண்டனை"  இதற்கு என்ன பதில் சொன்னாலும் சண்டை வரும்!

"கொரோனாவா?  உதார் விடறாங்க...  அப்படி ஒண்ணு இருக்குன்னு நம்பறீங்களா?"  நானே அனுபவிச்சேனே...

"முதலிலிருந்தே பொய்தான் சொல்றாங்க...  இப்போ தேர்தல் வேற...  வோட்டு வாங்க கதை விடறாங்க..."  - இதில் என்ன வோட்டு வாங்க முடியும் என்று தெரியவில்லை!

"மோடி வந்ததிலிருந்து இப்படியேதான் படுத்திக்கிட்டிருக்கான்..."  இதில் அவர் என்ன செய்தார் என்று தெரியவில்லை!

"தடுப்பூசி நிறைய வாங்கி வச்சுட்டாங்க ..  அதனாலதான் தடுப்பூசி போட்டுக்கொள்ளச் சொல்லி பயமுறுத்தறாங்க...  கொரோனாவும் திரும்ப அதிகமாகுதுன்னு கதை விடறாங்க..."  

இதையே போன வருடம் "கொரோனா 'டெஸ்ட்-கிட்' நிறைய வாங்கி வச்சுட்டாங்க...  ஊழல்..  அதனால்தான் நிறைய டெஸ்ட் செய்து கூப்பிடறாங்க" என்றனர்!  வாழ்ந்தாலும் ஏசும், தாழ்ந்தாலும் ஏசும் பாடல் நினைவுக்கு வருகிறது!

"ஜலதோஷம், ஜுரம், உடம்பு வலி எல்லாம் முன்பே இல்லையா?  மனசைத் தொட்டுச் சொல்லுங்க...   உங்களுக்கே இதெல்லாம் முன்னர் வந்ததது இல்லையா?  இப்போ அதுக்கு புது அர்த்தம் கண்டு பிடிக்கறாங்க..   டைஃபாய்ட் காய்ச்சல் எல்லாம் வந்தால் உடம்பு அடித்துப் போட்ட மாதிரிதான் இருக்கும்...  கொரோனா எல்லாம் சும்மா"

"சிகரெட் பிடிச்சு  அதனால் வரும் மரணம் இதைவிட அதிகம்...   புற்று நோயால் மரணமடைபவர்கள் எண்ணிக்கை இதைவிட அதிகம்...  இதற்கு மட்டும் ஏன் இவ்வளவு ஹைப்?"   சிகரெட் பிடிக்காமல் இருந்தால் பிழைக்க வழி இருக்கிறது.  புற்றுநோய் ஆரம்பத்திலேயே கண்டுபிடிக்கப் பட்டால் அதற்கும் வைத்தியம் இருக்கிறது....!

இப்படி இன்னும் எத்தனை எத்தனையோ....

என்னவோ சொல்லிட்டுப் போங்க...  நான் தடுப்பூசி போட்டுக்கொண்டாயிற்று..   அவ்வளவுதான்!  ஆனால் இப்படிச் சொன்ன நிறையபேர்கள் எனக்கு முன்னாலேயே போட்டுக்கொண்டு விட்டார்கள்!

சாலைகளில் போலீஸைக் கண்டால் மட்டும் மாஸ்க் போட்டுக்கொண்டிருந்தார்கள்.  இப்போது அதுவும் இல்லை!  நிறைய இடங்களில் போலீஸே மாஸ்க் போடவில்லை.  மால், சூப்பர்மார்க்கெட்டுகளிலும் கேட்பதை நிறுத்தி விட்டார்கள்.

மாஸ்க் என்கிற பெயரில் கைக்குட்டை, துப்பட்டாவெல்லாம் முகத்தில் சுற்றிக் கொண்டு வருகிறார்கள்.  துக்கத்துக்கு வந்திருப்பது போல புடைவை நுனியை முகத்துக்கு நேரே பிடித்தபடி ஒரு பெண்மணி!  ஏதோ மைக் வைத்து பாடப்போவது போல... 

நிறைய பேர்கள் கொடியில் காய்ந்து கொண்டிருக்கும் ஏதாவது ஒரு துணியை எடுத்து முகத்தில் மூடிக்கொண்டு வந்து விடுகிறார்கள்.  ஒருவர் மஞ்சள் பையை எடுத்து காதில் மாட்டிக் கொண்டார்.

இவர்கள் எல்லாம் தேவலாம் என்பதுபோல ஒருவர் கையால் வாயை மூடிக்கொண்டார்!  

இதெல்லாம் அலட்சிய நிலையா, அறியாமை நிலையா?

சிலர் லூஸாக விழுந்து கொண்டே இருக்கும் மாஸ்க்...   என்னவென்று கேட்டால் போன வருஷம் வாங்கியதாம்!

"ஏம்ப்பா...  மாஸ்க் எங்கேப்பா...?"

"இதோ இருக்கே..."  பேண்ட் பாக்கெட்டிலிருந்து எடுக்கிறார்.  இது ஒரு வகை.  இன்னொரு வகை மாஸ்க்கை கழட்டி இடது கையில் மணிக்கட்டில் அல்லது விரல்களில் சுழற்றியபடியே வளையவரும்.  ஒரு பழைய படிக்கக் கூடாத ஜோக் நினைவுக்கு வருகிறது!

சில பொதுக்குறிப்புகள் :

அசிட்ரோம், வார்ஃபரின்  போன்ற ரத்தம் உறைதலைத் தடுக்கும் மருந்துகளை தடுப்பூசி போட்டுக்கொள்ளும் நாட்களில் - அதாவது ஊசி போடுவதற்கு முதல் நாள், போடும் நாள் எடுத்துக் கொள்ளக் கூடாது என்று சொல்வார்கள்.  ஆஸ்பிரின், க்ளோபிலெட் மாத்திரைகளுக்கு பாதகமில்லை.  இது மாதிரி மாத்திரை எடுத்துக் கொள்பவர்கள் அவரவர் மருத்துவரை ஒருமுறை கேட்டுக்கொண்டு பின்னர் தடுப்பூசி போட்டுக்கொள்வது நல்லது.  சர்க்கரை, ரத்தக்கொதிப்பு, கொலஸ்ட்ரால் மாத்திரைகளை நிறுத்தத் தேவை இல்லை.

ஏனென்றால் தடுப்பூசி போடும் இடங்களில் விரிவான கேள்வி பதில் எல்லாம் இருக்காது.  ஆதார் கார்ட் எடுத்து வரவேண்டும் என்று கூடத் தெரியாமல் ஒரு பெண் போலீஸ்  தடுப்பூசி போட்டுக் கொள்ள வந்து விட்டு ரவுசு செய்து சென்றார்!  "எல்லோரும் கொண்டு வந்திருக்காங்க பாருங்க...  நாங்க சொல்லியா எடுத்து வந்திருக்காங்க?" என்பதுதான் அங்கிருந்தோரின் பதில்.  "ஊசியைப் போடு..   அப்புறம் கொண்டுவ் அரேன்" என்கிற அவரின் நிலை அங்கு செல்லுபடியாகவில்லை.  கணினியில் கையேடு ஏற்றி, இணையத்தில் சேர்க்க வேண்டிய கட்டாயம் அவர்களுக்கு.

ஆனாலும் எனக்கு ஊசி செலுத்தப்பட்ட நேரம் என்று அன்று இரவைக் காட்டியது எனக்கு வந்த எஸ் எம் எஸ் செய்தி.  அவர்கள் இணையத்தில் ஏற்றிய லட்சணம் போலும்.

அரசாங்க நிலையங்களில் செய்யப்படும் இரத்த அழுத்த சோதனை, ஆக்சிஜன் சாச்சுரேஷன் லெவல், டெம்பெரேச்சர் கூட தனியார் நிலையங்களில் பார்க்கப்படுவது இல்லை.  எனவே சிறப்பு சிகிச்சையில் இருப்பவர்கள் ஊசி போட்டுக்கொள்ளும் முன் அவரவர் மருத்துவரை  ஒருமுறை கலந்தாலோசித்து விட்டுச் செல்வது நல்லது.  மற்றபடி, சர்க்கரை நோய் உள்ளவர்கள், இதய நோய் உள்ளவர்கள், ரத்தக்கொதிப்பு நோய் உள்ளவர்கள், கிட்னி செயலிழப்பு போன்றவை உள்ளவர்கள் எல்லோருமே முன்னுரிமையில் ஊசி போட்டுக்கொள்ள வேண்டியவர்களே.  குறிப்பிட்ட சில மருந்துகள் எடுத்துக் கொள்வதில்தான் கட்டுப்பாடு, விதிமுறைகள், வழிமுறைகள்...  அந்த வழிமுறைகளுடன் அவர்களும் தடுப்பூசி அவசியம் போட்டுக் கொள்ளவேண்டும்.

ரெகுலராக மது அருந்துபவர்கள் தடுப்பூசி போட்டுக்கொள்ளும் சமயத்தில் பதினாலு நாட்களுக்கு மது அருந்தக கூடாது என்று சொல்கிறார்கள்.  எப்போதாவது மது அருந்துபவர்கள் ஊசி போடும் நாளுக்கு முதல் நாள், ஊசி போடும் நாள், மறுநாள் மட்டும் மது அருந்தக் கூடாது என்றும் சொன்னார்கள்.  என்ன கணக்கோ!

என்னைக் கேட்டால் மது அருந்தவே வேண்டாம்.  அல்லது தடுப்பூசி போடும் நாட்களில் அந்த ஒன்றரை மாதங்களுக்காவது மது வேண்டாம்.

தடுப்பூசி போட்டுக்கொண்ட பின் உடம்பு வலியோ, ஊசி போட்ட இடத்திலோ வலிக்கிறது என்றால் வலி மாத்திரை என்று வேறு எதுவும் எடுக்காமல் வெறும் பாராசிட்டமால் அல்லது டோலோ 650 மட்டும் எடுக்கலாம் - அதுவும் தேவைக்கு மட்டும்.   குறிப்பாக டைக்லோஃபினாக் வேண்டாம் என்கிறார்கள்.

தடுப்பூசி போட்டுக்கொள்ளச் செல்லும்போது சாப்பிட்டு விட்டுச் செல்லுங்கள்.  உங்கள் ஆதார் கார்ட் எடுத்துக் கொள்ளுங்கள்.  சில இடங்களில் அதன் ஜெராக்ஸ் நகல் ஒன்று கேட்பார்கள்.  எதற்கும் கையில் வைத்துக் கொள்ளுங்கள்.  உங்கள் வயது, டெலிபோன் நம்பர், முகவரி,   கேட்பார்கள்.  தயாராகக் குறித்து வைத்துக் கொண்டு சென்றால் தடுமாறி, யோசனை செய்து நேரம் செலவழிக்காமல் சட்டுபுட்டென வேலையை முடிக்கலாம்.  

ஆல் தி பெஸ்ட்.

====================================================================================

பேஸ்புக்கில் அவ்வப்போது என் சுவரில் இது போன்ற சில தகவல்கள் பகிரப்படும்.  அவற்றில் ஒன்று.

​வேர்களைத் தேடி

tMaSplrgcohl nsSm1orce6ism,i r20rdusu13  · 

விமானத்தை கண்டுபிடித்தது அமெரிக்கன் இல்லை ஒரு இந்தியன்.

விமானத்தைக் கண்டுபிடித்தது திரு.தால் படயே,புனே,இந்தியா.

அமெரிக்காவின் ரைட் சகோதரர்கள் அல்ல.

உலகிலேயே விமானத்தைக் கண்டுபிடித்தது 1903 டிசம்பர் 17ல் அமெரிக்காவில் உள்ள ரைட் சகோதரர்கள் என்று உலக வரலாறு சொல்கிறது.ஆனால்,அது தவறு.

1895 ஆம் வருடத்தில் புனே அருகில் தால் படயே என்பவர் கண்டுபிடித்த விமானம் 1500 அடிகள் உயரத்தில் பறந்தது. சுமார் 2 கி.மீ.தூரம் வரை பறந்தது.(ஆனால் ரைட் சகோதரர்கள் கண்டுபிடித்த விமானம் தரையிலிருந்து சில அடிகள் உயரத்தில்-14அடிதூரம் வரைதான் பறந்தது)

அடிமை இந்தியா என்பதால்,அன்றைய தினசரிபத்திரிகைகளில் கூட வராமல் பிரிட்டிஷ் அரசு பார்த்துக் கொண்டது.அதன் பிறகு,தால் படயே பிரிட்டிஷ் அரசால் அவரது கண்டுபிடிப்புடன் வெளிநாட்டிற்குக் கடத்தப்பட்டார்.அவரது நிலை என்ன ஆனது என்று தெரியவில்லை?

ஆதாரம் : vedic world heritage,volume VII

அதே சமயம்,போஜராஜா என்ற மகாராஜா சுமார் 20,000ஆண்டுக்கு முன்பு ‘வைமானிகா சாஸ்திரம்’ என்ற நூலை இயற்றியுள்ளார்.இதில்,தரையில் செல்லும் 339 விதமான வாகனங்களை கட்டமைப்பது பற்றியும்,நீரில் செல்லும் 445விதமான வாகனங்களைக் கட்டமைப்பது பற்றியும்,விண்ணில் பறக்கும் 223 விதமான வாகனங்களை கட்டமைப்பது-உருவாக்குவது பற்றியும் பாடல்களாக எழுதப்பட்டுள்ளன.

இன்றும் வைமானிகா சாஸ்திரம் இந்தியா முழுக்கக் கிடைக்கிறது.அவை சமஸ்கிருதப் பாடல்களின் தொகுப்புகளாக கிடைக்கின்றன.யார் எம்.டெக்கில் ஏரோநாட்டிக் என்சியரிங்கும்,சமஸ்கிருதத்தில் எம்.ஏ.,வும் முடிக்கிறார்களோ,அவர் வைமானிகா சாஸ்திரத்தைக் கொண்டு பல புதிய ராக்கெட்டுகள்,விமான தொழில்நுட்பங்கள் கண்டறிந்து கோடீஸ்வரர் ஆவது நிச்சயம்.

வைமானிகா சாஸ்திரத்தில் உள்ள விமானத் தொழில்நுட்பத்திங்களில் ஒரே ஒரு விமானத்தொழில்நுட்பம் மட்டுமே இன்று புழக்கத்தில் உள்ளது.அதுவும் அமெரிக்காவிடம் மட்டுமே உள்ளது.அது ரேடாரில் சிக்காத விமானம்!!!

குறிப்பு : ஆதாரங்கள் இங்கே http://www.gaudiya-repercussions.com/index.php...

========================================================================================

நாம் எல்லோரும்... 

சொல்வது ஒன்று...  செய்வது ஒன்று!

முன்னர் நான் தஞ்சையில் இருந்த (பள்ளிக்) காலங்களில் அதிகாலையில் வீட்டு வாசலில் ஓரு குரல் கேட்கும்.  "நரிநாராயணர் வந்திருக்கார்...   நரிநாராயணர் வந்திருக்கார்..."  வாசலில் சென்று பார்த்தால் பாடம் செய்யப்ட்பட ஒரு நரியை வாசலில் நிறுத்தி வைத்துக் கொண்டு ஒருவர் நின்றிருப்பார்.  காசு வாங்கி கொள்வார்.  அதிகாலையில் நரியைப் பார்த்தால் அதிருஷ்டமாம்!  அப்புறம் அப்புறம் அப்பா அந்தக் குரல் கேட்டாலே எங்களை வாசல் பக்கமே போகவிடாமல் தடுத்து விடுவார்!  கீழே உள்ள தகவலைப் படித்ததும் எனக்கு இதுதான் நினைவுக்கு வந்தது!

  "பூனை குறுக்க வந்தா கெட்ட சகுனம்பாங்க...   நரி குறுக்க வந்தா நல்ல சகுனம்பாங்க.  ஆனா வீட்டுல பூனை வளர்ப்பாங்களே தவிர, நரி வளர்க்க மாட்டாங்க"  - இயக்குனர் மற்றும் நடிகர் ரமேஷ் கண்ணா,  விக்ரமன் சொன்னதாக..   

=====================================================================================

பேஸ்புக்கிலிருந்து முன்பு நான் பகிர்ந்ததிலிருந்து இன்னொன்று...

தடுக்க முடியாது; தள்ளி போடலாம்!

'அல்சீமர்' என்னும் மறதி நோய் குறித்து கூறும், நியூராலஜிஸ்ட் டாக்டர் மாணிக்கவாசகம்:

"எல்லா மறதியும், அல்சீமர் என்று சொல்ல முடியாது. ஞாபக மறதி பல்வேறு காரணங்களால் ஏற்படலாம். வைட்டமின், 'பி12' குறைபாடு, முக்கிய காரணம்.

எனவே, இந்த வைட்டமின் குறைபாட்டால் ஞாபக மறதி ஏற்படலாம். தொடர்ந்து இந்தக் குறைபாடு இருக்கும்போது, 30, 40 வயதிலேயே ஞாபக மறதி வந்துவிடும். வைட்டமின், 'பி12' டெஸ்ட் எடுத்துப் பார்த்துக் கொள்ளலாம்.

அடுத்தது, தைராய்டு பிரச்னை காரணமாக ஒருவருக்கு ஞாபக மறதி ஏற்படலாம். அதனால், தைராய்டு பரிசோதனையும் நல்லது. அல்சீமர்ஸ் என்பது பரம்பரை நோய். அப்பா, அம்மா, தாத்தா, பாட்டி யாருக்கேனும் அல்சீமர்ஸ் இருந்தால், அவர்களுக்கு அல்சீமர் வரலாம்.

அல்சீமர் நோய் உள்ளோர், அன்றாட வேலைகளை செய்து முடிக்க சிரமப்படுவர், கடினமாக உணர்வர்.

அதாவது, பழக்கப்பட்ட இடத்திற்கு வாகனம் ஓட்டிச் செல்வதில் சிரமம்; நிதி நிலைகளை சமாளிப்பதில் சிரமம்; விருப்பமான விளையாட்டின் விதிமுறைகளை நினைவுபடுத்திக் கொள்ள இயலாமை போன்றவை.

தேதி மற்றும் பருவ காலங்கள் குறித்த நினைவுகளை இழந்துவிடலாம். சில சமயங்களில் எங்கே இருக்கிறோம் அல்லது எவ்வாறு சென்றோம் என்பதையும் மறந்து போகலாம்.

அதேபோல், உரையாடலின் போது அவர்கள், இடையில் நிறுத்திவிடுவர் மற்றும் மேற்கொண்டு எவ்வாறு தொடர்வது என்று அறியாமல் இருப்பர் அல்லது சொன்னதையே திரும்பச் சொல்லிக் கொண்டிருப்பர். சரியான வார்த்தையைக் கண்டறிய சிரமப்படுவதுடன், பொருட்களை தவறான பெயர் சொல்லி அழைப்பர்.

ஆரம்ப அறிகுறியால் அல்சீமரை கண்டறிந்தாலும், மருந்து, மாத்திரையால் தள்ளிப் போடலாமே தவிர, முழுமையாகக் குணப்படுத்த முடியாது. எனவே, திட்டமிட்டே சில விஷயங்களை பின்பற்றினால், அல்சீமர்ஸ் வராமல் தடுக்க முடியும்.

புதிய மொழிகளை கற்றால், மூளையின் செயல்திறன் மேம்படும். எப்போதும் வலது கையால் செய்வதை, இடது கையால் செய்ய முயற்சிக்கலாம். உதாரணமாக, வலது கையில் எழுதினால், இடது கையால் எழுத முயற்சி செய்யலாம். தினமும் ஒரே பாதையில் அலுவலகத்தில் இருந்து வீட்டிற்கு செல்பவராக இருந்தால், மாற்றுப் பாதையில் சென்று வரலாம்.

சுடோகு, குறுக்கெழுத்துப் போட்டிகளில் கவனத்தை செலுத்தலாம். அதிகமான புத்தகங்கள் வாசிப்பதால், மூளையின் செயல்பாட்டை அதிகரிக்கலாம். இதனால், ஞாபக மறதி வருவது தடுக்கப்படும்.

மேலும், அதிகமாக பழங்கள் மற்றும் வால்நட்ஸ் உள்ளிட்டவற்றை எடுத்துக் கொள்ளலாம். இப்படி தொடர்ந்து மூளைக்கு வேலை கொடுப்பதால், மூளையின் செயல்திறனை மேம்படுத்தி, ஞாபக மறதியை தள்ளிப் போடலாம்.

தினமலரிலிருந்து...

=========================================================================

மலேசிய விமானம் காணாமல் போனபோது எல்லோரும் அதை வலைவீசித் தேடிக்கொண்டிருந்த காலையில்....

=================================================================================

அப்படியா?!

=============================================================================================

இந்த வாரமும் ஒரு கணையாழிக் கவிதை.

===================================================================================================

பல்பொடியிலும் மொழிப் பற்று! ஒரு டின் 0.50 பைசா!

படிக்க முடிகிறதோ....

கொள்ளையரைப் பிடிக்க நூதன வழி... 1963 ஸ்டைல்..

=================================================================================================