எல்லோரும் இனிப்புகளை மிகவும் விரும்புவது ஏன்?

 

நெல்லைத்தமிழன் : 

ஒரு விளையாட்டில் சியர் லீடர்ஸ் எதற்கு? அதிலும் கிரிக்கெட் போன்ற விளையாட்டில்?

# T20 கிரிக்கெட் என்பது ஒரு கேளிக்கையே தவிர, முழுவதுமான விளையாட்டுப் போட்டி அல்ல. அரைகுறை ஆடை நடனம் என்பது கேளிக்கையின் உச்சகட்டம் என்று வேண்டுமானால் வைத்துக் கொள்ளுங்கள்.‌ அதை ஏன் பெண்கள் மட்டுமே ஆடுகிறார்கள் என்பது பதில் தெரிந்து கேட்கப்படும் கேள்வி என்பதால் தனியாக பதில் தரவில்லை.

& சியர் லீடர்ஸ்  - கூட்டத்தின் ஆரவாரத்தை ஒருங்கிணைத்து ஒருமுகமாக்க சில அழகிய முகங்களும், ஆட்டமும்! 

சியர் லீடர்ஸாக குறைந்த உடையில் ஆட ஏன் பெண்கள் மாத்திரமே செலெக்ட் செய்யறாங்க? மைதானத்தில் உள்ள பெண்கள் என்ன பாவம் செய்தார்கள்?

# பெண்களை கவர்ந்திழுக்க ஏன் ஆண்கள் அரைகுறை ஆடை நடனம் ஆடக்கூடாது என்ற கேள்விக்கு சரியான விடை ஒரு பெண் தரக்கூடும்.‌ சாதாரணமாக ஆண்களுக்கு மிடுக்கும்,  பெண்களுக்கு நளினம் - அழகு - கவர்ச்சி என்றும் வைத்துப் பார்ப்பது நமது பாரம்பரியம் ‌. கண் கவர் காட்சிகளை தேடி தேடி பார்ப்பது என்பது இதுவரை ஆண்களின் ஏகாதிபத்தியமாக மட்டுமே இருந்திருக்கிறது. சம உரிமை வாதம் பேசும் பெண்கள் ஒருவேளை இதிலும் ஆண்களுக்கு சரி நிகர் சமானமாக போட்டிக்கு வரலாம் - என் அபிப்பிராயத்தில்  அது விரும்பத்தக்கதல்ல.

& இங்கே பாருங்க - 

இந்த சீன் படத்தில் வந்த சில நொடிகளையே நம்மால் சகிக்க முடியவில்லை. ஒவ்வொரு ஐபிஎல் ஆட்டத்திலும் இப்படி ஆண்கள் ஆட வந்தால் வாழ்க்கையே வெறுத்துப் போயிடும்! 

நீங்கள் தென்னை மரத்திலிருந்து தயாரிக்கப்படும் வெல்லத்தைச் சுவைத்திருக்கிறீர்களா? இலங்கையின் தயாரிப்பு சாப்பிட்டிருக்கிறேன். சமீபத்தில் கேரளாவிலும் தயாரிக்கப்படுவதைக் கண்டேன்.

# பல நாட்களுக்கு முன் தென்னை வெல்லம் சுவைத்துப் பார்த்திருக்கிறேன்.

& கிடைக்கவில்லை - என் வீட்டிற்கு நீங்க வரும்போது கொண்டுவரவும். 

ஒருவர் இன்னொருவருக்கு தானம் செய்ய எது முக்கியத் தேவை?

# ஈகைப் பண்பு.‌

& பொருளும், மனமும், நல்ல குணமும் போதும். 

ஏஐ டூல்களைப் பயன்படுத்துபவர்கள் ஏன் எபியில் தாங்கள் அறிந்துகொண்டதை எழுதக்கூடாது?-எபியில்.

# ஏ ஐ அறிந்தோர் முன் வரலாம்.‌

& டெக்னிகல் சமாச்சாரங்கள் பிளாக் பதிவுகளில் எடுபடாது. பிளாக் படிப்பவர்கள் பெரும்பாலோர் டைம் பாஸ் செய்ய மட்டுமே பிளாக் பக்கம் வருபவர்கள். இங்கே வகுப்பு நடத்தினால் எல்லோரும் கட் அடித்துவிட்டு ஓடிவிடுவார்கள்! 

அனேகமா எல்லோரும் இனிப்புகளை மிகவும் விரும்புவது ஏன்? -உடல்நிலைக்கு பயந்துகிட்டு ஒதுக்கிவைப்பவர்களை விட்டுடலாம்

# பிறந்த குழந்தைக்கு நாவில் தேன் அல்லது சர்க்கரை தடவி அதன் வாழ்க்கையைத் துவக்கி வைக்கிறோம். இனிப்புதான் குழந்தை முதலில் சுவைப்பது. எனவே இனிப்பில் மனம் செல்வது இயல்பாக நிகழ்கிறது.

@CGSenu : 

மூளையில் டோப்பமின் சுரப்பு (Dopamine release)

இனிப்புகள் சாப்பிடும் போது, மூளையில் "பரிசுக்கான ரசம்" என்று சொல்லப்படும் டோப்பமின் சுரக்கிறது.

இது மகிழ்ச்சி உணர்வை ஏற்படுத்துகிறது.

அதனால், மீண்டும் மீண்டும் இனிப்பை நாடுகிறோம்.

மன அழுத்தம், துக்கம் போன்ற சமயங்களில் "comfort food" போல இனிப்புகள் வேலை செய்கின்றன.

இனிப்பு சாப்பிடுவது உணர்ச்சி தேவையால்  உருவாகலாம்.

"இனிப்பு என்பது மனதுக்கும் உடலுக்கும் ஒரே நேரத்தில் தேவை போல உணரப்படும் இயற்கை ஈர்ப்பு!"

நாம் வாழும் இடமே காட்டை அழித்து உருவானதுதான் எனும்போது இயற்கையை பாதுகாக்கணும் Global Warming என்று புலம்புவது போலித்தனமில்லையா?

# தேவைக்கு மேல் எடுத்துக் கொள்வது அபரிக்ருஹம்   என்கிற பாவம் என்று நம் சாத்திரங்கள் சொல்கின்றன. தேவையான அளவுக்கு மட்டும் காடுகளை அழித்து அதில் மனிதன் குடியேறுவது தவறல்ல. ஆதிமனிதர்களுக்கு வேண்டுமானால் நவீன சவுகரியங்கள் தேவையில்லாமல் இருக்கலாம். தற்காலத்தில் மனித ஜாதி பல வசதிகளை எதிர்நோக்கி வாழ்கிறது என்பதால் ஓரளவுக்கு இயற்கை வளங்களை ஆக்கிரமித்து வாழ வேண்டிய தேவையும் தவிர்க்க இயலாததாகிறது.

ஒருத்தர் ஹோட்டல் வைத்து 10 ரூபாய்க்கு (அல்லது அடக்கவிலைக்கு) சாப்பாடு போடுகிறார். பலர் வந்து சாப்பிடறாங்க. அது அவருக்கு புண்ணியம் என்று வைத்துக்கொண்டால், அந்த ஹோட்டலினால் சுற்றியிருக்கும் பல ஹோட்டல்கள் பாதிக்கப்பட்டு, அந்த ஹோட்டல் ஓனர்களுக்கு, அதனால் அங்க வேலை செய்பவர்களுக்கு ஏற்படும் நஷ்டம், அவருக்கு பாவமாக வந்து சேராதா?  (எவரேனும் நல்லது செய்தால் அதைக் கெடுப்பதற்காக கேள்விகேட்டால், அது பாவக்கணக்காகாதா என்று என் மனசாட்சி கேட்குது)

# பலனை எதிர்பார்த்துச் செய்யப்படும் எந்தக் காரியம் ஆனாலும் அதில் நல்லதும் கெட்டதும் கலந்தே இருக்கும் . அதாவது ஒருவருக்கு நல்லது வேறு ஒருவருக்கு (பலருக்கு ?)  நல்லது அல்லாதது என்கிற வகையில்தான் இருக்கும். இதை சீர்தூக்கிப் பார்த்து நல்லது அதிகம் இருக்கிற காரியத்தில் ஈடுபடுவது உத்தமம்.  இது நமது சாஸ்திரங்கள் சொல்லுகிற நீதி.  

அடக்க விலைக்கு மேல் மிகக் குறைந்த லாபம் வைத்து ஒருவர் விற்பதால் பலருக்கு நன்மை விளையும்.  அதே சமயம் தொழிலில் போட்டியாக இருப்பவருக்கு அது நடஷ்டத்தை ஏற்படுத்தவும்  வாய்ப்பு உண்டு.  சீர் தூக்கிப் பார்க்கும் போது , நன்மை அதிகம் இருப்பதால் அடக்க விலைக்கு விற்பவருக்குப் பாவம் சேராது.  

அதிக லாபம் வேண்டும் என்று அதிக விலை வைத்து விற்பவருக்கு ஏற்கனவே பாவக்கணக்கு அதிகம் ஆகிக்கொண்டே இருக்கிறது அல்லவா ?

சங்கராச்சாரியார் போன்ற குருமார் விளக்கம் சொல்ல வேண்டிய கேள்விகளை எல்லாம் எங்களிடம் கேட்பது நியாயமா ?

ஜெயகுமார் சந்திரசேகரன் : 

சரவணபவன் சாம்ராஜ்யத்தையே வீழ்த்திய ஜீவஜோதி தற்போது என்ன செய்கிறார்?

# இந்த முக்கியமான கேள்விக்கு எனக்கு விடை தெரியவில்லை.

& 'ராஜகோபால் சிறை தண்டனை அனுபவிக்காமல் இறந்துபோய்விட்டாரே'  என்ற ஆதங்கத்தில் அவர் இருந்ததாக 2019 செய்திகள். நக்கீரன் கோபால், 'ஜீவஜோதி பா ஜ க வில் சேர்ந்தார்' என்று ஐந்து வருடங்களுக்கு முன்பு ஒரு டுபாக்கூர் செய்தி வெளியிட்டிருந்தார் ! 

பின் குறிப்பு 1: ' சரவணபவன் சாம்ராஜ்யத்தையே வீழ்த்திய ஜீவஜோதி' என்பது தவறு. சரவண பவனை வீழ்த்தியது அந்த அதிபரின் பெண்ணாசை. 

பின் குறிப்பு 2: பொறுமை இருந்தால், ஆறு வருடங்களுக்கு முன்பு வெளியிடப்பட்ட இந்த காண்கேள் (link) தகவலைப் பாருங்கள். 

கே சக்ரபாணி, சென்னை: 

முன்பெல்லாம் உலக அழகி என்றால்  கிளியோபாட்ரா  என்றும் அதன் பின் ஐஸ்வர்யா ராய் என்று பேசப்படுகிறது. அதற்கு பின் யார் பெயரும் பேசப்படவில்லை. சரிதானே? ( உடனே நம் engalblog life member அனுஷ்கா  தமன்னா  என்று சொல்லாதீர்கள்) 

# குறிப்பிடப்பட்டுள்ள இரண்டு பேரும் அவ்வளவு அழகில்லை என்பது என் எண்ணம்.  அழகு காண்பவர் கருத்து.

& 

இது 'கிளி'யின் ஓவியம். 

இவருக்கு எந்த ஏஜென்ஸியும் உலக அழகி பட்டம் கொடுக்கவில்லை. 

இவரைவிட நம்ம கனகா கூட அழகாக இருப்பார்! 

உலக அழகிகள் ஒவ்வொரு ஆண்டும் தேர்ந்தெடுக்கப்படுகிறார்கள். ஐஸ்வர்யா ராய் உலக அழகி பட்டம் பெற்றதோடு நில்லாமல், திரைப்படங்களிலும் நடித்து, பிரபல நடிகர் குடும்பத்தில் மருமகள் ஆனதால், பல வருடங்கள் பேசப்படுகிறார். 

உலக அழகிகள் வரிசையில் சுஷ்மிதா சென், லாரா தத்தா பெயர்கள் கூட சில வருடங்கள் அடிபட்டன. 

2. முன்பெல்லாம் கல்யாணத்துக்கு பொண்ணுபாக்க வரும்போது  பெண் வீட்டில்  பஜ்ஜி  சொஜ்ஜி  செய்வார்கள்.  இப்போதும் இந்த வழக்கம்  தொடர்கிறதா? ஆனால் இதுவரை யாரும் அல்வா குடுத்ததாக  கேள்விப்படவில்லை! 

# விருந்து வந்தால்,  இப்போதும் எப்போதும் சிற்றுண்டி உபசாரம் இல்லாமல் போகாது. அதுவும் கல்யாண விஷயமாக வந்தால் கட்டாயம் இருந்தாக வேண்டும். சொஜ்ஜி பஜ்ஜி என்பது சும்மா எதுகை மோனை.‌

& இப்போ எல்லாம் கல்யாணத்துக்கு பெண் கிடைப்பதே அரிதாக உள்ளது. அப்படி இருக்கையில் பொண்ணு பார்ப்பதாவது, சொஜ்ஜி பஜ்ஜியாவது! வாய்ப்பே இல்லை! 

= = = = = = = 

KGG பக்கம்: 

1) ஞாபகம் இருக்கட்டும் - மே மாதத்து படப்போட்டிக்கான தலைப்பு : ' கோடை காலம்' 

படங்கள் வந்து சேர வேண்டிய இறுதி தேதி : மே 19, மாலை ஆறுமணி. 

இதுவரை 6 படங்கள் வந்து சேர்ந்துள்ளன. 

அனுப்பியவர்களுக்கு நன்றி. 

- - - - - - - -

2) பாண்டிச்சேரி பயணப் படங்கள் (செவிக்கு உணவு இல்லாதபோது, வயிற்றுக்கும் சிறிது ஈயப்படும் - போட்டிப் படங்கள் இல்லாதபோது, பாண்டிச்சேரி படங்கள் தலை காட்டும்!) 

மேக உருவில், சூரியனை மறைத்து செல்பவர் யார்? இலங்கை நோக்கி செல்லும் அனுமனோ ? 

நன்றாகப் பாருங்கள்!  

ஆரவாரமாக வந்து, கால் நனைத்து கடல் திரும்பும் அலை 

கரையில் விட்டுச் செல்லும் நுரைகள் ஆவலோடு காத்திருக்கும் 

அடுத்த அலை தங்களை கடலூருக்குத் திரும்ப அழைத்துச் செல்லும் என்று! 

அலைகடலும் ஓய்ந்து உள்ளது; அகக் கடலும் அப்படியே!  

அலைகளின் மேலே தலைகள். 

அகக்கடல் அமைதி - ஆனால் அலைகடல் பொங்குகிறது! 

அலையே வா, 

அருகே வா! 

பாதங்கள் நனைத்து, 

பரவசப்படுத்து !  

மீதி படங்கள், பிறகு! 

= = = = = = = = = =