சிறுகதை : ஜோதிடம் - நெல்லைத்தமிழன்

 

ஜோதிடம்

(நெல்லைத்தமிழன்)

 

“நம்ம ஊர் திருவிழாக்கு வரவேண்டியதுதானே.. என்னை மாத்திரம் போகச் சொல்றீங்க”

 

“நீ என்ன தனியாவா போற? உன் கசின்ஸ்லாம் கூட வர்றாங்களே. அப்புறம் என்ன?”

 

“ஆறு நாள். நீங்க இங்க தனியா என்ன பண்ணுவீங்க? பேசாம கூட வந்தாலாவது உங்களுக்கும் பொழுது போகும். உங்களுக்குப் பிடிச்ச உணவை ஹோட்டல்ல சாப்பிடலாம். நீங்கதான் தமிழ்நாடு சாம்பார், தமிழ்நாடு ரவா தோசைனு ஆலாப் பறப்பீங்களே…. இந்தப் பெட்டி வேற மூட மாட்டேங்குது,”  துணிகளை அடுக்கிக்கொண்டே என்னைக் கேட்டாள்.

 

“அதுக்காக?… எனக்கு இன்னும் பத்து நாட்கள் நேரம் சரியில்லை. தனுசு ராசிக்கு ஒரு பெண்ணால் வாழ்க்கை மாறப் போகுதாம். வாழ்க்கையையே புரட்டிப் போட்டுடுமாம். அதனால எங்கயும் போறதா இல்லை.”

 

“எவனோ ஜோசியம் சொன்னான்னு இப்படி பயப்படறீங்களே.. உங்க ஜாதகத்தைப் பார்த்துச் சொன்னாலாவது கொஞ்சம் அர்த்தம் இருக்கும். இவங்க யூடியூப் ஜோசியர்கள். ஒவ்வொரு ராசிக்கும் பலன் சொல்றேன்னு கல்லா கட்டறாங்க. தனுசு ராசி இருக்கற கோடிக்கணக்கானவர்களுக்குமா வாழ்க்கை இந்த பத்து நாட்களுக்குள்ள, ஒரு பெண்ணால மாறும்?”  

 

“உனக்கென்ன தெரியும் இந்த ஜோசியர்களைப் பத்தி. எப்படி புட்டுப் புட்டுச் சொல்றாங்க தெரியுமா? இப்படித்தான் ஒரு ஜோசியர், அமெரிக்காவுல யாரு அதிபரா வருவாங்கன்னு, தேர்தலுக்கு முன்னாடியே கரெக்டா சொல்லிட்டான். எவ்வளவு திறமை பாரு.  இன்னொரு ஜோசியர், அதான் அந்தப் பத்திரிகையின் ஆஸ்தான ஜோசியர், அந்த வேலைக்கு வர்றதுக்கு முன்னால, செத்த ஒருத்தன் ஜாதகத்தைக் கொடுத்து எப்போ கல்யாணம் ஆகும் இந்தப் பையனுக்குனு கேட்டதுக்கு டக்குனு சொல்லிட்டாராம், அடுத்த ஜென்மத்துல அவன் பொறந்து அவன் ஜாதகம் என்கிடா வந்தாச் சொல்றேன்னு. கேட்டவங்க அசந்துபோய்ட்டாங்களாம். அவர்லாம் தனுசு ராசிக்காரங்களுக்கு எச்சரிக்கையாச் சொல்லியிருக்காரு. உனக்கு எதுலயும் நம்பிக்கை கிடையாது. திருவிழாவையாவது நல்லா எஞ்சாய் பண்ணிட்டுவா.”

 

“ஃபிரிட்ஜ்ல தோசை மாவும், அடை மாவும் வச்சிருக்கேன். புதுசா மிளகாய்ப்பொடி பண்ணி வச்சிருக்கேன். நைட்ல கூப்பன் போட்ட பையை வெளில தொங்க விட்டீங்கன்னா, காலைல, பாலோ தயிரோ போட்டுடுவான். அதை வாங்கல்லாம் எங்கயும் அலையாதீங்க. இங்க வர்ற காய்கறிக்காரன்டயே காய் வேணும்னா வாங்கிக்கோங்க.”

 

“நீ வேலைக்காரியை வர்றவேண்டாம்னு சொல்லிட்டயா இல்லையா?”

 

“ஒவ்வொரு மாசமும் காசு கொடுக்கறோமில்ல. எதுக்கு அவளை வர வேண்டாம்னு சொல்லணும்? வந்து வீட்டை க்ளீன் பண்ணிட்டுப் போட்டும்.”

“ஐயையோ.. அதெல்லாம் எதுவும் வேண்டாம். பெண்ணாலதான் பிரச்சனை வரும்னு சொல்லியிருக்காங்க. அதுனால நீ வந்த பிறகு வரச்சொல்லிடு.”

 

“அப்போ நீங்கதான் காய்கறிக் குப்பை, மீந்தது என்று எல்லாக் குப்பையையும் காலைல 8 மணிக்குள்ள வெளியில வைக்கணும். இல்லைனா வீட்டுலயே கிடந்து நாறிக்கிட்டிருக்கும்.”

“ஏதோ நான் தனியா இருந்ததே இல்லைங்கற மாதிரிச் சொல்ற.  உன்னைக் கல்யாணம் பண்ணிக்கறதுக்கு முன்னால நான் எப்படி வீட்டைப் பாத்துப்பேன் தெரியுமா? தரைல சாதத்தைப் போட்டால் அப்படியே உட்கார்ந்து சாப்பிடலாம் மாதிரி பளிச்சுனு வீட்ட வச்சுப்பேன். எல்லாம் நான் பாத்துக்கறேன்.”

 

“மார்க்கெட்டுக்குப் போறேன், மாலுக்குப் போறேன்னு வெளில எங்கயும் சுத்தாதீங்க.”

 

“திருவிழாவுக்கே வரமாட்டேங்கறேன். அப்புறம் எதுக்கு வெளில போகப்போறேன். இன்னும் பத்து நாளுக்கு வீட்டுக்குள்ளேயேதான் அடஞ்சு கிடப்பேன்.”

 

“பக்கத்துலதானே அக்கா வீடு இருக்கு. சாப்பாடு செய்ய போரடிச்சதுன்னா, அங்க போய்ச் சாப்பிடுங்க.”

 “ஏய்.. பொண்ணால வாழ்க்கையே மாறிடும்னு ஜோசியன் சொல்லிருக்கான்னு சொல்றேன். திரும்பத் திரும்ப மாட்டிவிடறதுலயே குறியா இருக்கயே. எங்கயும் வெளீல போகமாட்டேன். வீட்டுக்கும் யாரேனும் வந்தால், பொண்ணா இருந்தா கதவையே தொறக்கமாட்டேன். நீ விசாரப்படாம போய்ட்டுவா.”

….……….

….………

..…………

….……….

….……….

'அப்பாடா.. அஞ்சு நாள் ஓடிப்போயிடுச்சு. நாளைக்கு அவ வந்துடுவா.   அப்புறம் நாலு நாள்தானே'

………………..

“நான் சொல்லிட்டுத்தானே போனேன். தினமும் சமையல் குப்பையை வெளீல வைங்கன்னு. உள்ளவே வரமுடியலை. அப்படி நாறுது.”

 

“நான் என்னம்மா பண்ணட்டும். நீ இருந்தா எழுப்பிவிடுவ. காலைல எழுந்துக்க நேரமாயிடுது. அதுக்குள்ள குப்பையை எடுத்துட்டுப் போயிடறாங்க. அதுக்கு அப்புறம் நான் குப்பையை வெளீல வச்சா, எதுத்த வீட்டுக்காரன் கத்த மாட்டானா?”

 

“நாளைக்கு காலைல, இந்த பிரசாதங்களை உங்க அக்கா வீட்டுக்கு கொடுத்துட்டு வந்துடுங்க. நானும் வருவேன். ஆனா வீட்டுல ஏகப்பட்ட வேலை இருக்கு. வேலைக்காரி வேற முனகப்போறா.. வீடு இவ்வளவு குப்பையா இருக்கேன்னு.”  

 

“என்ன இது.. தோசை மாவ ஃப்ரிட்ஜுல வைக்காம வெளியில வச்சிருக்கீங்க. மிஞ்சின சாதத்தைத் தண்ணி ஊத்தி வைக்கவேண்டாமா? வீணாப் போயிடுச்சே.”

“ஜோசியக்காரன் பொண்ணால பிரச்சனைனு சொன்னது உன்னைத்தான் போலிருக்கு. வந்த உடனேயே வறுத்தெடுக்கறயே. இன்னும் நாலு நாளைத் தாண்டணுமே.”

 

“அப்பவே கேட்கணும்னு நினைச்சேன். எந்த ஜோசியன் சொன்னான்? லிங்க் கொடுங்க. எப்போப் பாத்தாலும் ஜோசியம் சொல்லியிருக்குன்னு இவ்வளவு பயப்படுறீங்களே.”

"இதோ..  இந்தா "

“கொடுங்க..    இருங்க பார்க்கறேன்.   அட அசடே.. நீங்க என்ன ராசி?”

 

“தனுசுதான்.”

 

“என்ன நட்சத்திரம்?”

“உத்திராடம் முதல் பாதம். அதான் எனக்கு மனப்பாடமாவே ஆயிடுச்சே. கோயிலுக்குப் போனா அர்ச்சனை பண்ண என்னைத்தானே சொல்லச் சொல்லுவ.”

“அடப்பாவி மனுசா.. ஜோசியர் சொல்றதையும் ஒழுங்காக் கேட்கறதில்லையா? அவரு பூராட நட்சத்திரத்துக்குத்தானே இப்படிச் சொல்லியிருக்கார்.”