உடல் - மனநலத்தை ஒருங்கிணைத்து அவசர காலத்தில் உயிர்க் காக்க உதவிடும் தொழில்நுட்பமும், அதற்கான செயலியும் - மற்றும் நான் படிச்ச கதை

 

பயங்கரவாதிகளின் சதியை முறியடித்த ஐபிஎஸ் அதிகாரி: குவிகிறது பாராட்டு

புதுடில்லி: காஷ்மீரில் பாதுகாப்புப் படையினருக்கு மிரட்டல் விடுத்து ஒட்டப்பட்ட போஸ்டர் விவகாரத்தை துவக்கிய விசாரணை தான், வெடிமருந்து பறிமுதல் செய்து பயங்கரவாதிகளின் மிகப்பெரிய சதி முறியடிக்கப்பட்டதற்கு முக்கிய காரணமாக இருந்துள்ளது. இந்த விசாரணைக்கு முக்கிய காரணமாக இருந்த சந்தீப் சக்கரவர்த்தி என்ற ஐபிஎஸ் அதிகாரிக்கு பாராட்டு குவிந்து வருகிறது.  காஷ்மீரில் பாதுகாப்புப் படையினருக்கு மிரட்டல் விடுத்து பயங்கரவாதிகள் போஸ்டர் ஒட்டுவது வழக்கமானதாக இருந்தது. இருப்பினும், இந்த முறை இந்த விவகாரத்தை 2014ம் ஆண்டு பேட்சை சேர்ந்த ஐபிஎஸ் அதிகாரியான சந்தீப் சக்கரவர்த்தி சாதாரணமாக எடுத்துக் கொள்ளவில்லை. பஹல்காம் பயங்கரவாத தாக்குதலில் ஈடுபட்டவர்களை சுட்டுக் கொன்ற ஆப்பரேஷன் மகாதேவ் நடவடிக்கைக்கு தலைமை ஏற்ற இவர், போஸ்டர் பின்னணியில் உள்ளவர்களை கண்டுபிடிக்கும்படி உத்தரவிட்டார்.  இதில் போஸ்டரை ஒட்டிய 3 பேர் சிக்க அவர்கள் அளித்த வாக்குமூலம் தான் பயங்கரவாத நெட்வொர்க்கின் பின்னணியை அம்பலப்படுத்தியது. விசாரணை டில்லி, ஹரியானா, உ.பி., வரை நீண்டு 2900 கிலோ வெடிமருந்து பறிமுதல் செய்யப்பட்டதுடன், அதன் பின்னணியில் இருந்த டாக்டர்களை கைது செய்ய வைத்தது.   யார் இவர்?    சந்தீப் சக்கரவர்த்தி ஆந்திர மாநிலத்தை சேர்ந்தவர். இவரது தந்தை ராம கோபால் ராவ் ஆந்திர அரசு மருத்துவமனையில் மருத்துவ அதிகாரியாக பணியாற்றி ஓய்வு பெற்றவர். தாயார் ரங்கம்மாவும் சுகாதாரத்துறையில் பணியாற்றி ஓய்வு பெற்றவர்.    சந்தீப் சக்கரவர்த்தி கர்னூல் மாவட்டத்தில் உள்ள மான்டசரி பள்ளியில் ஆரம்ப கல்வியை முடித்தார். பிறகு 2010 ல் கர்னூல் மருத்துவ கல்லூரியில் டாக்டர் பெற்றார். 2010 - 2011 வரை பயிற்சி மருத்துவராக இருந்தார். பிறகு 2014 ல் ஐபிஎஸ் தேர்வு எழுதி வெற்றி பெற்றார்.   காஷ்மீரில் பணி:  காஷ்மீரில் சந்தீப் சக்கரவர்த்தி கேந்திர முக்கியம் வாய்ந்த இடங்களிலும், முக்கிய பொறுப்புகளிலும் பணியாற்றி உள்ளார்.  உரி மற்றும் சோபோரில் உள்ளிட்ட பதற்றம் நிறைந்த இடங்களில் பணியாற்றியுள்ளார். பயங்கரவாதிகள் ஆதிக்கம் செலுத்திய பாரமுல்லாவில் நடவடிக்கை குழு எஸ்பி ஆகவும் பாதுகாப்பு சவால்கள் நிறைந்த ஸ்ரீநகர் தெற்கு, ஹன்ட்வாரா, குப்வாரா, குல்காம், ஆனந்த்நாக் மாவட்ட எஸ்பி ஆகவும் பணியாற்றி உள்ள இவர், கடந்த ஏப்.,21 முதல் ஸ்ரீநகர் மூத்த எஸ்பி(SSP) ஆகவும் பணியாற்றி வருகிறார்.  ஆனந்த்நாக், குப்வாரா, குல்காமில் பதவி வகித்த போது பல முக்கிய பயங்கரவாத அச்சுறுத்தல்களை சமாளித்ததுடன், பயங்கரவாத நடவடிக்கைகளையும் முறியடித்தார். போலீஸ் மற்றும் அப்பாவி மக்கள் இடையே நல்லுறவை ஏற்படுத்த பல்வேறு நடவடிக்கைகளிலும் ஈடுபட்டு மக்களின் நன்மதிப்பை பெற்றார்.  ' ஆப்பரேஷன் ஸ்பெஷலிஸ்ட்' என்ற பெயர் சந்தீப் சக்கரவர்த்திக்கு உண்டு. திட்டமிடுதல், உடனடியாக, ஆக்கப்பூர்வ நடவடிக்கை எடுப்பது இவரது பாணி. இதற்கு உதாரணம் தான் போஸ்டர் விவகாரம் என்கின்றனர் போலீசார். சிறிய அச்சுறுத்தலாக பார்க்கப்பட்ட இந்த விவகாரம் விசாரணைக்கு பிறகு ஜெய்ஷ் இ முகம்மது பயங்கரவாதிகள் சதி, வெடிமருந்து பறிமுதல் வரை சென்றுள்ளது.  விருதுகள் :  பயங்கரவாதத்திற்கு எதிரான நடவடிக்கைக்காக வீரதீர செயல்களுக்கான ஜனாதிபதியின் போலீஸ் பதக்கத்தை ஆறு முறையும், ஜம்மு காஷ்மீரில் போலீசின் பதக்கம் நான்கு முறையும் இந்திய ராணுவத்தின் பதக்கத்தையும் பெற்றுள்ளார்.

=========================================================================================

அரசு துவக்கப் பள்ளிக்கு ரூ.2 லட்சத்தில் 'பெஞ்ச்' தலைமை ஆசிரியை சேவைக்கு குவியும் பாராட்டு

நல்ல மனம்; நல்ல செயல்.  ஆனால் அறிவுடைமையா என்று சொல்ல முடியவில்லை.  அரசாங்கம் செய்ய வேண்டிய வேலையை இவர் செய்ய வேண்டியதில்லை.  இதையே இவர் அரசாங்கத்துடன் போராடி இவற்றை வாங்கியிருந்தால் நூறு மார்க்!

விழுப்புரம் அடுத்த மரகதபுரம் துவக்கப் பள்ளியின் பொறுப்பு தலைமை ஆசிரியை, தான் பணிபுரியும் பள்ளிக்கு, 2 லட்சம் ரூபாய் மதிப்பிலான பெஞ்சுகளை வழங்கியுள்ளார்.  விழுப்புரம் அடுத்த மரகதபுரம் ஊராட்சி ஒன்றிய துவக்கப் பள்ளியில் கடந்த 25 ஆண்டுகளாக ஆசிரியையாக பணியாற்றி வருபவர் அரசி. தற்போது பொறுப்பு தலைமை ஆசிரியராக உள்ளார்.  இவர் வரும் மே மாதம் பணி ஓய்வு பெற உள்ள நிலையில், பள்ளிக்கு தேவையானதைச் செய்ய வேண்டும் என விரும்பினார்.  மழைக்காலங்களில் பள்ளி சிமென்ட் தரை அதிக ஈரப்பதம் ஏற்படுவதால், தரையில் அமர்ந்து பயிலும் மாணவர்களுக்கு உடல் நலக்குறைவு ஏற்படுவதை அவர் கவனித்துள்ளார்.  இதற்கு தீர்வாக இவரது பேத்தி ஷிவாணி மற்றும் நண்பர்களுடன் இணைந்து 1 லட்சம் ரூபாய் திரட்டியுள்ளார்.  தலைமை ஆசிரியை அரசி தனது பங்காக 1 லட்சம் ரூபாய் செலுத்தி மொத்தம் 2 லட்சம் ரூபாய் செலவில் 60 மாணவர்கள் அமரக்கூடிய 30 புதிய பெஞ்சுகளை வாங்கி, பள்ளிக்கு வழங்கியுள்ளார்.  தலைமை ஆசிரியரின் இந்தச் சீரிய முயற்சியால், அந்த பள்ளி மாணவர்கள், பெஞ்சுகளில் அமர்ந்து கல்வி பயின்று வருகின்றனர்.  தொடர்ந்து 25 ஆண்டுகள் பணியாற்றிய பள்ளிக்கு, தனது ஓய்வுக்கு முன்பாக, ஒரு முக்கிய பிரச்னைக்கு நிரந்தர தீர்வை ஏற்படுத்திய தலைமை ஆசிரியை அரசி மற்றும் உறுதுணையாக கை கொடுத்த அவரது பேத்தி ஷிவாணியின் சேவைக்கு, கிராம மக்கள், பெற்றோர்கள் மற்றும் சமூக ஆர்வலர்கள் பாராட்டு தெரிவித்துள்ளனர்.

=========================================================================================

குறைந்த நேரத்தில் 'கியூப்' சுழற்றி சென்னை மாணவர் உலக சாதனை

சென்னை: சென்னையைச் சேர்ந்த 15 வயது சிறுவன் சித்தார்த், மிகக்குறைந்த நேரத்தில், 'கியூப்' சுழற்றி, மூன்று உலக சாதனைகளை நிகழ்த்தியுள்ளார். சென்னை அண்ணா நகர் பப்ளிக் ஸ்கூலில், 10ம் வகுப்பு படிக்கும் சித்தார்த், அகில இந்திய விளையாட்டு மற்றும் பொழுதுபோக்கு செயல்பாட்டு கழக கியூபிங் பயிற்சியாளர் ஆனந்த் ராஜேந்திரனிடம், கடந்த மூன்றாண்டுகளாக பயிற்சி பெறுகிறார். இவர் கடந்த 2023ல், கண்களைக் கட்டியபடி, மரத்தால் ஆன 4 - 4 ஸ்னேக் கியூபை, 8.59 வினாடிகளில் சுழற்றி தீர்வு கண்டார். இந்த சாதனையை, இன்ஜினியஸ் சார்ம் வேல்டு ரெக்காட்ஸ், ஆசிய புக் ஆப்ரெக்கார்ட்ஸ், இந்திய புக் ஆப் ரெக்கார்ட்ஸ், இன்டர்நேஷனல் அச்சீவர்ஸ் ரெக்கார்ட்ஸ் ஆகியவற்றின் சார்பில், உலக சாதனையாக பதிவு செய்யப்பட்டது. இதற்காக, கிராண்ட் மாஸ்டர் பட்டத்தையும் வென்றார். கடந்தாண்டு நடந்த சாதனை நிகழ்வில், 3 - 3 எனும் அனகோண்டா கியூபை, 8.5 வினாடிகளில் சுழற்றி தீர்வு கண்டு, அடுத்த உலக சாதனையை படைத்தார். இந்தாண்டு, பல்வேறு உலக சாதனை நிறுவனங்களின் சார்பில் நடத்தப்பட்ட கியூபிக் போட்டியில் பங்கேற்றார். அப்போது, 13 திருக்குறள்களை சொல்லியபடி, வலது கையால் பட்டாம்பூச்சி சீப்பை சுழற்றியபடியே, இடது கையால் ஐந்து 2 - 2 கியூப்களை, 1 நிமிடம் 14 வினாடிகளில் சுழற்றி தீர்வு கண்டு, புதிய உலக சாதனை படைத்துள்ளார். அந்த வகையில், மூ ன்று உலக சாதனைகளை படைத்துள்ள சித்தார்த்தை, பல்வேறு விளையாட்டு அமைப்புகள் பாராட்டியுள்ளன. பள்ளிக்கல்வி துறை அமைச்சர் மகேஷ், தமிழக கவர்னர் ரவி உள்ளிட்டோரும் பாராட்டி உள்ளனர்.

=======================================================================================

உடல் - மனநலத்தை ஒருங்கிணைத்து உயிர் காப்பாற்றும் தொழில்நுட்பம்; கண்டுபிடித்தார் ராஜபாளையம் மாணவர் தயா விஷ்ணு குமரன்

ராஜபாளையம் மாணவர்தயா விஷ்ணு குமரன் 15 வயதிலே இளம் விஞ்ஞானியாக வலம் வருகிறார். இவர் மத்திய அரசின் அடல் இனோவேஷன் மிஷனில் இந்தியாவின் முதல் நுாறு மாணவர்களில் ஒருவராக தேர்ந்தெடுக்கப்பட்டவர்.தேசிய வணிக யோசனை போட்டியில் தேசிய அளவில் 2ம் இடம், தற்போது ஹரியானாவில் நடந்த சி.பி.எஸ்.இ., தேசிய அறிவியல் கண்காட்சியில் வெற்றி என எட்டுத்திக்கும் அறிவாற்றலால் சாதிக்கிறார். வயதானோர், கிராமப்புற மக்களின் உடல் - மனநலத்தை ஒருங்கிணைத்து அவசர காலத்தில் உயிர்க் காக்க உதவிடும் தொழில்நுட்பமும், அதற்கான செயலியையும் கண்டுபிடித்துள்ளார் என்பது இவரது சமீபத்திய சாதனை.  விருதுநகர் மாவட்டம் ராஜபாளையம்ஸ்ரீரமணா அகாடமி சி.பி.எஸ்.இ., பள்ளியில் படிக்கும் இவர் கூறியதாவது...  

தந்தை முத்துக்குமரன், தாய் வைதேகி. 10ம் வகுப்பு படிக்கிறேன். எனக்கு நாளிதழ்கள் வாசிக்கும் பழக்கம் உண்டு. அப்போது எல்லோருக்கும் தரமான, தேவையான நேரத்தில் கிடைக்கக் கூடிய மருத்துவ வசதி இல்லை என்பதை செய்திகள் மூலம் தெரிந்துக் கொண்டேன். அதனால் எல்லோருக்கும் மருத்துவ வசதி கிடைக்கும் வகையில் ஒரு கண்டுபிடிப்பு செய்ய விரும்பினேன்.  
கிராமப்புறங்கள், பொருளாதார ரீதியாக பின்தங்கிய சமூகங்களின் மருத்துவமனை துாரம், இணைய இணைப்பு பற்றாக்குறை, போக்குவரத்து வசதி இல்லாமை போன்ற காரணங்களால் பல உயிர்கள் இழக்கப்படுகின்றன. இதே நேரம், மன அழுத்தம், மனச்சோர்வு, தற்கொலை எண்ணங்கள் அதிகரித்து வரும் நிலையில், இரண்டிற்கும் ஒரே தீர்வாக 'ஸ்மார்ட் சிஸ்டம் பார் அட்வான்ஸ்ட் ஹெல்த்கேர்' எனும் புதுமையான சுகாதார அமைப்பை உருவாக்கினேன். இது ஒரு ஹார்டுவேர். இது செயல்பட, மக்கள் எளிதில் பயன்படுத்தசெயலியும் தேவை. இதன் நோக்கம் நேரடி உடல்நிலை கண்காணிப்பு, அவசரநிலை உதவி, மனநல பராமரிப்பு. இதனோடு உருவாக்கப்பட்ட செயலி தான் 'Varrummun Kaappom' என்ற செயலி.  இதயத் துடிப்பு சென்சார் மூலம் இதயத்துடிப்பு சரியான வரம்பில் உள்ளதா என கண்காணிக்கிறது. டி.எச்.டி., 11 வெப்பநிலை சென்சார் மூலம் உடல் வெப்பநிலையை அளந்து, காய்ச்சல் அல்லது வெப்ப அழுத்தத்தை கண்டறிகிறது.ஏ.டி.எக்ஸ்.எல்.,345 ஆக்சிலரோமீட்டர் மூலம் திடீரென தவறி விழுதல் போன்ற இயக்கத்தை உடனே கண்டறிகிறது. ஜி.எஸ்.ஆர்., சென்சார் மூலம் தோல் மின்தடிப்பு மாற்றங்கள் மூலம் மனஅழுத்தம், உணர்ச்சி நிலைகளை அளக்கிறது.  சென்சார்களிருந்து தரவு சாதாரண அளவை மீறினால், துல்லியமான இருப்பிடத்தை கண்டறிந்து, குடும்பத்தினர், அருகிலுள்ள மருத்துவமனை அல்லது ஆம்புலன்சுக்கு குறுந்தகவல், அழைப்பு விடுக்கிறது. இதன் கூடுதல் சிறப்பு என்னவென்றால்புளூடூத் அல்லது வைபை வசதி இல்லாத கிராமப்புறங்களிலும் இது தடையின்றி செயல்படும்.  இந்த அமைப்பின் சிறப்பம்சமாக அமைந்துள்ளது வரும்முன் காப்போம் என்ற மொபைல் செயலி. இதில் உடற்பயிற்சி கண்காணிப்பு, அவசர இரத்த தேவை எச்சரிக்கை, இரத்த தானம் செய்வோர் பட்டியல், ஆடியோ, வீடியோ மூலமாக மருத்துவ ஆலோசனை பெறும் வசதிகள் உள்ளன. இணைய இணைப்பு இல்லாத இடங்களிலும் அருகிலுள்ள மருத்துவரை கண்டுபிடிக்கக்கூடிய சிறப்பும் இதில் உள்ளது. இதனுடன், செயற்கை நுண்ணறிவு(AI) தொழில்நுட்பம் மூலம் உடல் தரவுகளை பகுப்பாய்வு செய்து, முன்கூட்டியே எச்சரிக்கை வழங்குவதோடு, மன அழுத்த அறிகுறிகளையும் கண்டறிந்து, தற்கொலை முயற்சிகளை தடுக்கும் விதமாகவும் இந்த அமைப்பு செயல்படுகிறது  
இதை பள்ளியில் மத்திய அரசின் நிடி அயோக் திட்டத்தின் கீழ் செயல்படும் அடல் டிங்கரிங் ஆய்வகத்தின் உதவியோடு உருவாக்கினேன். பெற்றோர், முதல்வர் கல்யாணி, ஆலோசகர் டாக்டர் கு.கணேசன், வழிகாட்டு அலுவலர் பிரசன்னா உறுதுணையாக இருந்தனர்.தற்போது பிரான்ஸ்சின் டெசால்ட் நிறுவனம் எனக்கு இன்டெர்ன்ஷிப் வழங்கியுள்ளது,என்றார்.

================================================================================================

 

நான் வாசித்த கதை - மீட்டாத வீணை - சாரதா ஸ்ரீநிவாசன்

என் பார்வை - கீதா ஆர்

நவம்பர் மாத 'லேடீஸ் ஸ்பெஷல்' இதழில் வெளிவந்திருக்கும் 'மீட்டாத வீணை' எனும் சிறுகதையை எழுதியிருக்கும் கதாசிரியர் சாரதா ஸ்ரீநிவாசன் அவர்களுக்கு எனது மனமார்ந்த பாராட்டுகளுடன் வாழ்த்துகளும்.

சென்ற வருடம் திரு ராய செல்லப்பா சார் நடத்திய ஸ்வர்ணாம்பாள் நினைவு சிறுகதைப் போட்டியில் பரிசு வென்ற அவரது கதை 'சிங்கிள் பேரன்ட்' அழகான உளவியல் ரீதியான கருவைக் கொண்ட கதை. நன்றாக எழுதியிருந்தார். எங்கள் தளத்தில் அதைப் பற்றிச் சொல்லியும் இருந்தேன். ஒரு சிறு பரிந்துரையும் கொடுத்திருந்தேன்.

ஆசிரியரைப் பற்றிச் சொல்ல வேண்டும் என்றால், சாரதா ஸ்ரீநிவாசன் அவர்கள் (62. சென்ற வருடம் 61 என்று இருந்ததால் இந்த வருடம் நானாகவே ஒரு வருடம் கூட்டிக் கொண்டுவிட்டேன்!!) பிறந்தது திருநெல்வேலியில். சாரா டக்கர் கல்லூரியில் படிப்பு. கல்லூரி நாட்களில் கையெழுத்துப் பத்திரிகையில் எழுதியிருக்கிறார். அந்த எழுத்தார்வத்தில், வங்கிப் பணியிலிருந்து ஓய்வு பெற்ற பின் கதைகள் எழுதத் தொடங்கி இது வரை நான்கு சிறுகதைத் தொகுப்புகள் வெளியிட்டிருக்கிறார்.

1. "மனதில் ஒரு மத்தாப்பு", 2. "என் கண்ணின் ஒளி நீங்கள் அன்றோ", 3. "ஒரு சத்தியவான் இரு சாவித்திரி" (தலைப்பே வித்தியாசமாக இருக்கிறதல்லவா!!! வாசிக்கும் ஆர்வமும் எழுகிறது) மற்றும் 4. "அன்னியோன்யம் அதுதான் தாம்பத்தியம்"

இவரது முதல் புத்தகம் 'பேக்கி டெர்ம்' பதிப்பகம் மூலமாகவும், மற்றவை புஸ்தகா மூலமாகவும் வெளியாகியுள்ளன.

------ மேற்கண்ட ஆசிரியர் குறிப்பு - சென்ற வருடம் போட்டியில் வென்ற கதைகளை திரு இராயசெல்லப்பா சார் வெளியிட்ட புத்தகத்தில் இருந்து.

கதைச் சுருக்கம்

சுமா வீணை விதுஷி. வயதில் சிறியவள் ஆனால் மிகவும் பிரபலமானவள். அவள் கணவன் ரங்கனின் மரணத்தில் தொடங்குகிறது கதை. ரங்கன் ஏன் 'டக்'கென்று மரணம் அடைகிறான்? கதை சொல்ல வருவது என்ன? அதைத் தெரிந்து கொள்ள நீங்கள் கதையை வாசிக்க வேண்டும்.

கதையை வாசித்த பின் என் பார்வையை வாசிக்கலாம் இல்லை, என் பார்வையை வாசித்த பிறகு கதையை வாசிக்கலாம். உங்கள் விருப்பம்!

கீழே நான் ட்ரைவ் லிங்குகள் கொடுத்துள்ளேன். அதில் சென்று கதையை வாசிக்கலாம். முதலில் டாக்குமென்ட் சுட்டிகள் இரண்டு. ஏதேனும் ஒன்றில் வாசிக்கலாம். அடுத்தாப்ல பிடிஃப் லிங்

========>மீட்டாத வீணை<========

========>மீட்டாத வீணை<========

பிடிஎஃப் லிங்           

  ========>மீட்டாத வீணை <=========

ஒரு சிறு முயற்சியாகக் கதையை ஸ்க்ரோலபிள் டாக்குமெண்டாகவும், ஸ்க்ரோலபிள் பிடிஎஃப் ஆகவும் ப்ளாகரில் கொடுக்க முயற்சித்து....இதோ முதலில் டாக்குமென்ட். 

ஸ்க்ரோலபிள் பிடிஎஃப்

கதை என் பார்வையில் 

"மீட்டாத வீணை" என்ற தலைப்பே பெண் சார்ந்த கதை என்று சொல்கிறது.  அக்காலம் தொட்டே வீணையை பெண்ணிற்கு ஒப்பிடுவதால் இருக்கலாம்.

'மீட்டாத வீணை' சற்று பெரிய சிறுகதைக்கான அழகான, ஆழமான, அற்புதமான கரு. அந்த ஆழத்திற்குள் அதிகம் செல்லாமல் உணர்வுகள் சார்ந்த சிறுகதையாக அமைத்திருக்கிறார், கதாசிரியர்.

ரங்கன், தன் காதலை தெய்வீகக் காதல், புனிதமான காதல் என்று நினைப்பது, குணா படத்தில் வரும் கமலின் கதாபாத்திரத்தையும், வசனம், 'இது மனிதக் காதல் அல்ல.. அதையும் தாண்டி புனிதமானது' என்பதையும் நினைவூட்டியது. 

//திருமணமான ஒரு வாரத்திலிருந்தே தனிமை கிடைக்கும் நேரங்களில் எல்லாம் அவன் அவளை வீணை வாசிக்கச் சொல்லி கேட்டுக் கொண்டே இருந்தான். திருமணத்திற்குப் பின் அவன் அவளையும் அவளது வீணை வாசிப்பபையும் பலமடங்கு காதலிக்க தொடங்கி இருந்தான். //

// அவன் ஒருமுறை நேயர் விருப்பத்தில் தமிழிசைப் பாடல்கள் கேட்க அவள் அந்த வகையில் மிகவும் கவனம் செலுத்தத் தொடங்கி அவைகளையும் தனது நிரவல்களில் சேர்த்துக் கொண்டாள்.//

தமிழிசைப் பாடல்களை அவளிடம் நேயர் விருப்பமாகக் கேட்கத் தெரிந்தவனுக்கு, "வீணையடி நீ எனக்கு" என்று காதலித்தவனுக்கு "மேவும் விரல் நானுனக்கு" என்று அவளை மீட்டாமல், அவள் மேன்மேலும் தன் திறமையை மெருகேற்ற மட்டுமே காரணமாக இருக்கிறான்.

அவளுக்கு, அவன் தன்னை மீட்டவில்லையே என்ற குறை இருந்து கொண்டிருக்க, மூன்றாவது வருடத்தில்தான் அவள் ஒரு ஸ்டேஜில் மனம் திறந்து சொல்கிறாள்.

கதையை இக்காலகட்டத்திற்கு - அதாவது சமீப காலங்களுக்குப் பொருத்திப் பார்த்தால், அவள் அதற்கு முன் ஏன் கேட்கவில்லை, எவ்வளவுதான் கச்சேரிகளில் பிசியாக இருந்திருந்தாலும் தனிமையில் அவன் அவளிடம் வாசிக்கக் கேட்கும் போதும் கூட ஏன் அவள் கேட்கவில்லை, ஒரு வருடத்திலேயே அவளுக்கு மனம் திறந்து சொல்ல ஏன் தோன்றாமல் போனது அவனை ஏன் தெரிந்து கொள்ள முடியாமல் போனது போன்ற கேள்விகள் எழுவதைத் தவிர்க்க முடியவில்லை.

அவள் மூன்றாவது வருடத்தில் கேட்கும் போது அதற்கு அவன், அவளை சரஸ்வதி தேவியாகவே பார்ப்பதாகவும், தன் காதல் புனிதமானது தெய்வீகக் காதல், தான் அதை முன்னரே சொல்லாமல் போனது தவறு என்று "நீங்கள்" என்று மரியாதையுடன் சொல்லும் போது அவளுக்கு அதிர்ச்சியாக இருக்கிறது. 

அதற்கு முன்னும் அவன் அவளை 'நீங்கள்' என்று மரியாதையுடன் பேசியிருந்தால் (பொதுவாக நம் சமூகத்தில்  இல்லாத ஒன்றாயிற்றே அதனால்!) ஏன் சுமாவுக்கு அப்போது தோன்றாமல் போனது என்பதும் கேள்வியாக மனதில் எழுகிறது. ஆனால், அதற்கு முன்னும் அவன் அப்படித்தான் பேசுவானா என்பதற்கான உரையாடல்கள், சம்பவங்கள் கதையில் இல்லாததால் யோசிக்க வைக்கிறது. 

ரங்கன் கதாபாத்திரம் பற்றி விவரங்கள் இன்னும் சற்று கூடுதலாக ஆசிரியர் சொல்லியிருக்கலாமோ? Flash Back பகுதியின் முதலில் உரையாடல்கள் சம்பவங்கள் என்று சொல்லியிருக்கலாமோ என்றும் இன்னும் அந்தக் கதாபாத்திரம் அழுத்தம் பெற்றிருக்கும் என்ற எண்ணமும் எழுந்தது. கூடவே சுமாவின் கதாபாத்திரமும் இன்னும் அழுத்தம் பெற்றிருக்கும்.

முடிவும் கொஞ்சம் ட்ரமாட்டிக்காக இருப்பது போல் தோன்றுகிறது..

அக்காலகட்டத்துப் பெண்கள்தான் பயப்படுவார்கள், தயங்குவார்கள் தங்களுக்குள்ளேயே போட்டு அழுத்திக் கொண்டு மருகுவார்கள்.

இப்போதைய காலகட்டத்திற்குப் பொருத்திப் பார்த்தால் கண்டிப்பாக முதல் 3 மாதங்களுக்குள்ளாகவே பிரிதலுக்குச் சென்றிருக்கக் கூடும் அல்லது அட்லீஸ்ட் ஃபேமிலி கவுன்சலிங்க் என்று வந்திருக்கக் கூடும் என்று தோன்றுவதையும் தவிர்க்க முடியவில்லை. (குழந்தை பெற்றுக் கொள்ளுதல் பற்றிய சிந்தனைக்கும் அப்பாற்பட்டு)

ஆசிரியர் கதையை ஒரு specific, complex narrative ஆகக் கொண்டு சென்றிருக்கிறாரோ என்று பட்டது. Platonic காதல்? அது அவனுக்கு. ஆனால், சுமாவிற்கு அவன் கணவனாக இருக்க வேண்டும் என்ற ஆசை இருந்ததே க்ளைமாக்ஸிற்கு முன் வரை.

ரங்கனின் பதிலை ஏற்க முடியாமல் தன் சோகத்திலிருந்து வெளிவர தன் அறைக்குச் சென்று வீணை வாசிக்க முற்படும் போது அவள், அவனது பதிலை யோசிக்கையில், ரங்கன் எனும் பக்தனால்தான், தன் திறமை இன்னும் மெருகேறி தனக்கு நிகர் யாருமில்லை என்ற இடத்திற்கு வந்திருக்கிறோம் என்பது அளுக்குப் புரிகிறது. ஆனாலும், அவளால் அவன் பதிலை ஏற்க முடியாமல் "துன்பம் நேர்கையில் யாழெடுத்து நீ இன்பம் சேர்க்க மாட்டாயா" என்று அவள் வாசிக்க வாசிக்க, அந்த இசை அவனை எங்கேயோ கொண்டு செல்கிறது. என்னவோ செய்கிறது.

"நல்லதோர் வீணை செய்தே அதை நலங்கெடப் புழுதியில் எறிவதுண்டோ" என்ற பாரதியின் பாடலில்" "சொல்லடி, சிவசக்தி - நிலச் சுமையென வாழ்ந்திட புரிகுவையோ?" என்ற வரி நினைவுக்கு வந்தது. தன்னால் சுமாவுக்கு அவள் எதிர்பார்ப்பதைக் கொடுக்கமுடியாமல் ஓர் சுமையாக ஆகிவிட்டோமோ என்ற எண்ணம் ரங்கனுக்குள் வந்திருக்குமோ? "அப்படிச் செயல்படக் கூடிய மனம் கேட்கிறேன்.  அதற்கு உயிரும் உடலும் வேண்டும்" என்றும் அவன் மனம் இரைஞ்சியிருக்குமோ? அதனால்தான் அவளின் வாசிப்பு அவனை என்னவோ செய்து, மூச்சை வெளியே தள்ளுகிறதோ? - இது என் யூகங்கள். தான் சுமாவிடம் இப்பொழுதேனும் அவள் எதிர்பார்ப்பது போல் இருக்க வேண்டும் என்று 'யாழெடுத்து மீட்க' முனைகையில் கடைசி மூச்சாகிவிடுகிறது. 

முடிவில் அவன் சுமாவிடம் வாங்கும் சத்தியத்தை அவள் காப்பாற்றுவது போலேனும் முடித்திருக்கலாமோ என்று மனம் விரும்புவதை தவிர்க்க முடியவில்லை.

ஒரு சில லாஜிக்கல் கேள்விகள், கொஞ்சம் ட்ரமாட்டிக்கான முடிவு இவற்றைத் தவிர்த்து, ஒரே வரியில் சொல்ல வேண்டுமென்றால் முழுவதுமாக, அக்காலகட்டத்துக்கான கதையை வாசித்த உணர்வைத் தந்தது.

(இக்கதையில் சங்கீதம் பற்றி வருவதால், பானுக்காவும், நானும் சேர்ந்து, யார் எழுதுகிறார்கள் என்று சொல்லாமல்,  சஸ்பென்சாக எழுதிய கதை எபியில் தொடர்கதையாக வந்தது நினைவுக்கு வந்தது)

https://engalblog.blogspot.com/2019/03/blog-post_28.html