புதன் 190911:: அதி பொறுமைசாலி யார் ?

சென்ற வாரப் பதிவில், அதிகம் கும்மியடித்த அதிரா, ஏஞ்சல் இருவருக்கும் எங்கள் நன்றி! 

இனி இந்த வார பதில்கள்.



ஏஞ்சல் :

1. (இது மேலே flex பற்றி பார்த்ததும் உதித்த கேள்வி)

இந்த வகை flex போர்டுகள் என்ன மெட்டிரியலில் ஆனவை ?மாநாடு அல்லது விழா முடிஞ்சதும் என்ன ஆகின்றன ? எங்கே கொண்டு வீசப்படுகின்றன ?

# ஃப்ளெக்ஸ் பிளாஸ்டிக் போர்டுகள் நீர்நிலைகளில் வீசப்பட்டு சூழலை நாசம் செய்கின்றனவோ ?

& பிளாஸ்டிக் தடை ஃப்ளக்ஸ் போர்டுகளுக்கும் பொருந்தும் என்றுதான் நினைக்கிறேன். சுற்றுச்சூழல் பாதுகாப்பு உணர்வு இன்னும் அதிகம் தேவை. 
2, நீங்க மரமா மாறுவதாக இருந்தா என்ன மரமாக மாற விரும்புகிறீர்கள் ? ஏன் ? 

# சபைநடுவே நீட்டோலை வாசியா நின்றான் குறிப்பறிய மாட்டாதவன் நன்மரம் என்றார்களே அந்த மரம்தான் - நடமாட்டம் பலகாரம் எல்லா வசதியும் இருக்குமே.

& வேப்ப மரம். அப்போதான் கல்லடியிலிருந்து தப்பிக்க முடியும்! பயனுள்ள மரம் என்றும் போற்றப்படுவேன்! 
3. வறுமையின் நிறம் சிவப்பு என்று ஏன் சொல்கிறார்கள் ? அப்போ செழுமையின்/செல்வத்தின் நிறம் பச்சையா ?

# ஆமாம். 

& (முறையற்ற வகையில் சேர்க்கப்பட்ட ) செல்வத்தின் நிறம் கறுப்பு(ப் பணம்) 

4, பெண்கள் கிட்டி ( kitty ) பார்ட்டி போன்ற கெட் டு கெதர்களுக்கு செல்வதுபோல் ஆண்களுக்கும் தனியா இப்படி கிட்டா பார்ட்டி அல்லது கிட்டு பார்ட்டி என்று எதாவது இருக்கா ? 

# தண்ணி பார்ட்டி கேள்விப் பட்டதில்லையா ? அடிக்கடி கிட்டா(த) பார்ட்டி !!

& பட்டு மாமி போகும் பார்ட்டிகளுக்கு, கிட்டு மாமா போனால்தான் சரி! 
5, தொலைக்காட்சி நிகழ்ச்சிகளின் போட்டிகளில் வெற்றி யாரால் நிர்ணயிக்கப்படுகிறது ?நிகழ்ச்சி தயாரிப்பாளர்கள் ?அல்லது பொதுமக்கள் ?

# எல்லா நிகழ்ச்சி களிலும் முன்கூட்டியே தீர்மானிக்கப்படுவது மட்டுமில்லை பலவற்றிலும் பரிசுகள் கொடுப்பதுபோல் நடிக்கிறார்கள் எனவும் பேசப்படுகிறது. 

& எல்லாம் மாட்ச் பிக்சிங் தான். 

6,நீங்கள் சமீபத்தில் சந்தித்த ஒரு அதி பொறுமைசாலி யார் ? ஒரு ஆண் ஒரு பெண் இருவரை குறிப்பிடலாம். 

# பலவற்றைப் பொறுத்துக் கொள்ளும் நானும் என்னைப் பொறுத்துக்கொள்ளும் வாழ்க்கைத்துணையும்.

& இதோ: 

7,உலகத்தில் எல்லாமே நேர்மறை ஆக இருந்தால் எப்படி இருக்கும்?

# மிகவும் அசுவாரசியமாக இருக்கலாம்.

& ஸ்ரீராம் சனிக்கிழமை பாசிடிவ் செய்திகள் என்று தேடி எடுத்துப் போடவேண்டியது இருக்காது. எல்லாமே நேர்மறை என்று இருப்பதால், சனிக்கிழமைக்கு அவர் வேற டாபிக் தேடவேண்டியதிருக்கும்! 
8, முதன் முதலா பாலர் பள்ளி /நர்சரி வகுப்புக்கு போனது நினைவிருக்கா ? நீங்கள் படித்த நர்சரி ஸ்கூல் பெயர் என்ன ? 

# அறந்தாங்கி என்ற சிற்றூரில் மட்டுமல்ல, எங்குமே 1943 சமயம் நர்சரி எல்லாம் கிடையாது. ஆரம்பப்பள்ளி ஒரு சிறு கட்டடத்தில். ஒரே ஆசிரியை. கட்டடத்தின் ஒரு பகுதியில் ஆசிரியை வசிப்பார். தூளியில் குழந்தை அடுப்பில் சோற்றுப்பானை. அவ்வப்போது ஆசிரியை உள்ளே போய் சமையல் வேலை பார்த்து வருவார். திடீரென மாணவர் ஒவ்வொருவர் முன்பும் ஆளுக்கொரு (சின்ன) வெங்காயம் போட்டுச் செல்வார். (அப்போது பெரிய வெங்காயம் பழக்கத்துக்கு வரவில்லை). ஏககாலத்தில் உரிக்கப் பட்டு எடுத்துச் செல்லப் படும். தூளிக்குழந்தை சிணுங்கினால் பெரிய சைஸ் மாணவன் (அல்லது வி) பாய்ந்து சென்று தொட்டிலை ஆட்ட வேண்டும். வகுப்பில் மசாலா சாம்பார் ரசம் மணம் கமழும்.

& முதலில் சேர்ந்தது ஒன்றாம் வகுப்பு. தேசிய ஆரம்ப பாடசாலை, நாகப்பட்டினம். 
9, ஆண்களிடம் சம்பாத்தியதையும் பெண்களிடம் வயதையும் கேட்கக்கூடாது என்கிறார்களே அது உண்மையா ? ஏன் ? ஒரு விண்ணப்பபடிவம் நிரப்பும்போது அதில் கட்டாயம் இந்த கேள்விகள் வருமே அப்போ என்ன செய்வாங்க :) ???

# இளமையை வனப்பை விரும்பும் பெண்கள் அழகுதான் நம் கையில் இல்லை "இளமை"யாவது மானேஜ் பண்ணலாமே என்று எண்ணலாம்.

ஆண்கள் ரம்மி, ரம் இதர பல செலவுக்கு பட்ஜெட்டில் நிதி ஒதுக்கியாகவேண்டும். அசல் கணக்கு ரகசியம் காத்தாகவேண்டும். கம்மி சம்பளமாக வெளியே சொன்னால் மதிப்பு கம்மி. 

"எருதின் நோக்காணா காக்கை போலுமே

அரிதின் பேணப் படும்"

விண்ணப்பங்களில் உண்மை விளம்பவேண்டி வந்தால் ரெகவரியில் சரி செய்யலாம்.

& கேட்டால் உண்மையான பதில் கிடைக்காது என்பதால்தான். 

அதிரா: 

உங்களுக்கு உங்கட... அம்மம்மா, அப்பம்மா, அப்பப்பா, அம்மப்பா சின்ன வயதில் கதைகள், பாட்டுக்கள் சொல்லித் தந்ததுண்டோ? அவற்றில் இன்ற்வரை மனதில் நிற்கும் குட்டிக்கதை? அல்லது பாடல்?

 & என் அப்பா, இரண்டாவது அக்கா இருவருமே எனக்குக் கதைகள் சொன்னது உண்டு. 

என் அப்பா சொன்ன பல கதைகள் இன்றும் ஞாபகத்தில் உள்ளன. பெரும்பாலும் தெனாலி ராமன் கதைகள், மரியாதை ராமன் கதைகள், நாரதர் + கிருஷ்ணர் கதைகள் என்று சொல்லியிருக்கிறார். வேடிக்கைக் கதைகள், புதிர்கள், எண் விளையாட்டுகள் நிறைய அவரிடம் கேட்டவை. 

அப்பா, 'ஜெ மு சாமி' என்னும் ஜவுளிக் கடையில் ஆடிட்டர் ஆகப் பணிபுரிந்துகொண்டிருந்தார். அந்த நாட்களில். அந்தக் கடைக்கு நாகை, உறையூர், மதுரை என்று பல ஊர்களிலும் கிளைகள் உண்டு. அப்பா ஆடிட்டுக்காக எல்லா ஊர்களுக்கும் அடிக்கடி டூர் செல்வார். அந்தந்த ஊர்களில் அவர் சினிமா பார்ப்பதும் உண்டு. அப்படி அவர் ஒருமுறை பார்த்து வந்த படம், 'களத்தூர் கண்ணம்மா". 

அந்தப் படத்தில் வருகின்ற  ஒரு சிறுவனைப் பற்றிய அந்தப் படக் கதையை, எனக்குப் புரிகின்ற வார்த்தைகளில் கதையாகக் கூறிவிட்டு, அவர் சொன்ன ஒரு விஷயம் இன்றும் எனக்கு பசுமையாக நினைவில் உள்ளது. 

" இந்தப் படத்தில், பார்ப்பதற்கு உன்னைப் போலவே இருக்கும் ஒரு சின்னப்பையன் பிரமாதமாக நடித்திருக்கிறான்." 

====================================
மீண்டும் சந்திப்போம்.

--------------------------------------------------------------