புதன் 190918 :: ஆர்ம்ஸ்ட்ராங்கை சந்தித்தால் என்ன கேள்வி கேட்பீர்கள் ?

சென்ற வாரப் பதிவில் கருத்துப் பதிந்தவர்களுக்கும், பாராட்டியவர்களுக்கும், கேள்வி கேட்டவர்களுக்கும் எங்கள் நன்றி. 




ஜீவி :

நாட்டில் மோட்டார் வாகன உற்பத்தி சுணக்கத்திற்கான உண்மையான காரணம் என்ன?   

 # தேவை - இருப்பு பொருத்தமின்மைதான்.
ஒரு கார் வாங்கினால் குறைந்தது இரண்டு மூன்று ஆண்டுகள் கழித்து தான் அடுத்த கார் வேண்டி வரும். இரண்டு கார்கள் உள்ள குடும்பங்கள் கூடப் பெருகி விட்டன. பழைய வண்டிகள் விற்பனைக்கு ஏராளமாக சந்தைக்கு வருகின்றன . அது போக பலப்பல மாடல்கள் போட்டி போட்டுக்கொண்டு படையெடுக்கின்றன. எலக்ட்ரிக் கார் சோலார் கார் என்று வரப்போவதாக ஆவல்-பயம் வேறு. சுணக்கத்துக்கு இன்னும் என்ன வேண்டும் ?

& என்னுடைய விரிவான பதில், நான்கு வாரங்களுக்குப் பிறகு எழுதுகிறேன். (நான் காடராக்ட் ஆப்பரேஷன் இந்த மாத இறுதியில் செய்துகொள்ளவேண்டும். ஓய்வுக்குப் பிறகு என்னுடைய விரிவான பதிலை பதிவு செய்கிறேன். ) 

சுருக்கமாக, I feel it is a recession period.

 1972 to 2006 காலகட்டத்தில், ஏழு அல்லது எட்டு ஆண்டுகளுக்கு ஒருமுறை இந்த நிலையை நான் வேலை பார்த்த கனரக வாகன உற்பத்தித் தொழிற்சாலை சந்தித்தது உண்டு. அந்த கால கட்டங்களில் Maintenance closure, layoff, உற்பத்திக் குறைப்பு என்று பல நிலைகளைப் பார்த்ததுண்டு. அந்த வகை தேக்க நிலை வரும் என்று முன்கூட்டியே யோசித்து, நாங்கள், வடிவமைப்பில் பல பெரிய மாற்றங்களை செய்து, வண்டிகளை  புது மாற்றங்களோடு  கொண்டு வருவோம். கடுமையான Bharath Stage Pollution restrictions மேலும் ஒரு காரணம். 

ச க பு அ அதிரா : 

1) காலையில படுக்கையை விட்டு எழும்போது என்ன நினைப்பீங்க?.. அதாவது கண் முழிச்சவுடன் அல்ல.. படுக்கையை விட்டு எழும்பும்போது:)).. ஏனெனில் நான் டெய்ய்ய்ய்லி ஒரு விசயம் நினைப்பேன்ன் :)) அதை அடுத்த புதன் சொல்கிறேன்.

# எல்லாம் நல்லபடியாக, எல்லாரும் மகிழ்ச்சியாக இருப்பதாக .. அனைத்தும் ஆதிமுதலுக்கு அர்ப்பணம் என எண்ணிக்கொண்டு விழிப்பது வழக்கம். அண்மையில் "கராக்ரே வசதே லக்ஷ்மி கரமத்யே சரஸ்வதி .. " சுலோகம் ரேடியோ ஸிடியில் கேட்டுக் கேட்டு மனதில் ஓடுகிறது.

& 'சரி, எந்திரிச்சி வேலையைப் பார்ப்போம்' என்று சொல்லிக்கொண்டேதான் எழுந்திருப்பேன். 

2. உங்கள் வாழ்க்கை அனுபவத்தை வச்சு, எனக்கும் அஞ்சுவுக்கும் சொல்ல விரும்பும் அல்லது சொல்ல நினைக்கும் ஒரு அறிவுரை/புத்திமதி?

# பொறுமை இன்மொழி இரண்டும் வெற்றிக்கு நல்வழி.

& நான் அனுபவப்பட்ட வரையில், பெரும்பாலான மக்களிடம் காணப்படும் விரும்பத்தகாத குணங்கள்:
 
- Expecting something for nothing. இலவசங்கள், ஓட்டுக்கு நோட்டு போன்ற தீயகுணம். 

- Revenge attitude. பழிக்குப்பழி வாங்குகின்ற எண்ணம். 

இந்த இரண்டு தீயவைகளையும் ஒதுக்கி, giving out something for nothing and never take revenge on anyone  என்னும் நிலையை நாம் பின்பற்றத் தொடங்கினால், எல்லாமே நன்மையே! 
3. உண்மையை மட்டும்தான் சொல்லோணும், உங்களுக்கு திருமணமாகும்போது, கூட்டுக் குடும்பத்தில் இருக்க விருப்பமாக இருந்ததோ? இல்லை தனிக்குடும்பம் போகும் விருப்பம் இருந்ததோ?.

# திருமணம் ஆகுமுன் கண்காணா ஊரில் தனிக்கட்டை. தனிக்குடித்தனம் தவிர்க்க இயலாததாகி விட்டது. அந்த சமயம் கூ.கு ரொம்ப வசதியாக இருந்திருக்கும்.

& கூட்டுக்குடும்பம்தான். 
4.மனிதர்கள் கூட்டுக்குடும்பமாக வாழோணும் என வலியுறுத்துவோரே, பூனைக்குட்டிகள், நாய்க்குட்டிகளை தம் பிள்ளைகளின் ஆசைக்கு இணங்கி, பிரித்து எடுத்துக் குடுக்கின்றனர்.. இது எந்த வகையில் நியாயம்?

# வாழ்க்கை இம்மாதிரியான நியாய நியமங்களுக்கு உட்பட்டதல்ல. அது விருப்பு வெறுப்பு அடிப்படையில் நடத்திச் செல்லப் படுகிறது.

& எனக்குத் தெரிஞ்சி பன்னிங்கதான் கூட்டமா வாழ்கின்றன. பூனைக்கூட்டம் பார்த்ததில்லை. நாய்கள் கூட்டமாக இருந்தால் ஒன்றுக்கொன்று சண்டைகள்தான் போடுகின்றன. ஆக, பூனைக்குட்டிகளை / நாய்க்குட்டிகளை பிரித்து எடுத்து வளர்ப்பதில் தவறு எதுவும் இருப்பதாக நான் நினைக்கவில்லை.

ஏஞ்சல் : 

1, மண் இட்லி ,கூட்டாஞ்சோறு ,அஞ்சாங்கல் ,பாண்டி கண்ணாமூச்சி ...இவற்றை இன்னமும் நம் நாட்டு பிள்ளைகள் விளையாடுகிறார்களா ?

# இல்லை என்பதே சோகமான உண்மை.

& எல்லாமே பொம்பளைங்க சமாச்சாரம் என்று வளர்ந்த பையன்கள் சொன்னாலும், ஒற்றைப்படை எண் வயதில், எல்லாமே நான் ஆடியது உண்டு. நான் இப்போது இருக்கும் அபார்ட்மெண்டில் ஏரோப்ளேன் பாண்டி கோடுகளை தரையில் அவ்வப்போது பார்ப்பது உண்டு. ஏதோ சில சிறுமிகள் இன்னும் அதை ஆடுகிறார்கள் என்றே நினைக்கிறேன். 

கிராமப்புறங்களில் இவைகள் இன்றும் விளையாடப்பட்டுக் கொண்டிருக்கும் என்று நினைக்கிறேன். 

2, ஒருவர் புனிதராக மாறுவது எப்படி ? 

# இறந்து பட்டால் எல்லாரும் புனிதரே.

& மனத்துக்கண் மாசில்லாத மனிதர்கள் அனைவரும் புனிதரே, 

            

3, மனதுக்கு வலியூட்டும் தலையங்க செய்திகள் தீய விஷயங்களை முதல் பக்கத்தில் பத்திரிகைகள் மற்றும் ஆன்லைன் தளங்கள் வெளியிடுவது அவசியமா ?

# அவர்கள் வியாபாரத்துக்கு மூலப்பொருள் வாசகரின் ஆர்வம். அது மட்டுமே.

& அவசியமில்லைதான். ஆனால், நாம் சொல்லி அவர்கள் கேட்கப்போவதில்லை. 

4, உங்கள் மனங்கவர்ந்த ஓவியர் ,ஓவியம் எது ?

# நிறைய இருக்கிறது. நார்மன் ராக்வெல் ரென்வார் முதல் லிம் வரை . . 

& அந்தக் காலத்தில், மாயா, ஜெயராஜ் மற்றும் மாருதி வரைந்த படங்களை அதிகம் ரசித்தது உண்டு. மனதில் நிற்பவை, அப்புசாமி சீதாப்பாட்டி படங்கள். 

5, உங்கள் மகன் /மகள் குழந்தையாய் இருந்தபோது சுவற்றில் படம் அ ஆ இ ஈ என்று வரைந்து சுவற்றை அழகுபடுத்தி :))) வைத்த தருணத்தை இப்பவும் நினைவு கூர்வதுண்டா ? 

# மகன் மகள்கள் - கிறுக்கியது இல்லை.

& மகன், மகள் சுவற்றில் கிறுக்கியது இல்லை என்றுதான் ஞாபகம். ஆனால் நோட்டுப் புத்தகங்களில் அவர்கள் போடும் படங்களை, எழுதிய எழுத்துக்களை பெரிதும் ரசித்து இப்பவும் நினைவுகூர்வது உண்டு. சிலவற்றை பத்திரப்படுத்தியும் வைத்துள்ளேன். ஆனால், பேரன்கள் சுவற்றில் நிறைய கிறுக்கினார்கள்! 

6, இரவு உறங்கப்போகுமுன் என்ன செய்வீங்க ?

# விசேஷமாக ஏதுமில்லை.

& லைட் எல்லாம் off செய்தாச்சா (முக்கியமாக கதவு மூடியிருக்கும் பாத்ரூம் லைட்கள்) கதவுகள் தாழ்ப்பாள் இடப்பட்டுள்ளனவா, ஃபிரிட்ஜ் க்குள் வைக்கப்படவேண்டியவை வைத்தாயிற்றா என்று செக் செய்துவிட்டு, 'இத்துடன் இந்த அலைவரிசையில் இன்றைய ஒளிபரப்பு முடிவடைந்து, மீண்டும் நாளைக்காலை நாலரை மணிக்கு ஆரம்பமாகும்' என்று சொல்லி, உறங்கப்போவேன். 

7, தீயவை அதாவது தீய எண்ணம் சொல் செயல் எல்லாம் நம்மில் நம்முள் இருந்து வெளிவருது அப்படியென்றால் அவை நமக்குள் ஸ்லீப்பர் செல்ஸ் போலெ இருக்கா ??

# நம்முள் நினைவுகளும் கற்பனை செய்யும் திறனும் விருப்பு வெறுப்புகளும் உள்ளன. இவற்றின் கலவைதரும் வெளிப்பாடு தான் எல்லாமும். 

& தீய எண்ணங்கள், செயல்கள், நல்ல எண்ணங்கள், நற்செயல் எல்லாமே விதிக்கப்பட்டுள்ளவை என்று தோன்றுகிறது. 'நீங்கள் பிறக்கும் முன்னரே பெயரிடப் பட்டுள்ளீர்கள்' என்னும் பைபிள் வாசகம் ஞாபகத்திற்கு வருகிறது. 

8, எதையும் செய்யாம சாதிக்காம ஒரு மனிதனால் சந்தோஷமா இருக்க முடியுமா ?

# முடியும். சந்தோஷம் சாதனை வெவ்வேறு. 

& ஓ! முடியுமே. நான் அப்படித்தானே இருக்கிறேன்! 

9, விருப்பமற்ற ஒன்றை செய்ய வேண்டிய சூழல் வந்ததுண்டா ? அப்போ உங்க மனநிலை எப்படி இருந்தது ?

# வேண்டா வெறுப்பாகத் தான் இருக்கும். சில சமயம் வந்ததுண்டு.

& சூழல் வந்தது உண்டு. மனசு கஷ்டமாகத்தான் இருக்கும். என்ன செய்வது? 'இதுவும் கடந்துபோகும்' என்னும் நம்பிக்கையோடு செய்யவேண்டியதுதான். 

10, நீங்கள் நீல் ஆர்ம்ஸ்ட்ராங்கை சந்தித்தால் என்ன கேள்வி கேட்பீர்கள் ?

# தனிமையும் ஏதேனும் பழுதாகும் என்ற அச்சமும் இல்லவே இல்லையா ?


& 
1) ஆர்ம்ஸ்டிராங் அண்ணே - அங்கே எல்லாம் ஒரு கிரவுண்ட் என்ன விலை?

2) ஆர்ம்ஸ்டிராங் அண்ணே - இங்கே ஒருத்தர் " சந்திரனை தொட்டது யார் ஆம்ஸ்ட்ராங்கா அடி ஆம்ஸ்ட்ராங்கா சத்தியமாய் தொட்டது யார் நான்தானே அடி நான்தானே கனவு தேவதையே ..." என்று பாடிக்கொண்டிருக்கிறார் - அவர் மீது நீங்க வழக்கு தொடர்வீர்களா?


=============================

மீண்டும் சந்திப்போம். 

=============================