எக்ஸ்கியூஸ்மீ... எட்டுப்புள்ளி கோல நோட்டு இருக்கா?

 'எட்டு எட்டா மனுஷா வாழ்வை பிரிச்சுக்கோ' என்று ரஜினிக்கு பாட்டு எழுதினார்கள்.   இப்போ 'அஞ்சு அஞ்சா இங்கிலிஷ் வார்தையைப் பிடிச்சுக்கோ' என்று விளையாட்டாக கொடுத்திருக்கிறார்கள்.  அடிக்ஷன் ஆகும் அளவு அல்ல, ஆனால் அடிக்ஷன் எனும் அளவில் இருக்கும் விளையாட்டு!!  தினசரி தோற்கிறோமோ, ஜெயிக்கிறோமோ இதை விளையாடிவிட தோன்றும்.

ஜோஷ் வர்டில் என்பவர் கண்டுபிடித்த விளையாட்டு, கிட்டத்தட்ட அவர் பெயர் வருமாறே அழைக்கப்படுகிறது!  ஓரளவு இதன் ஒரிஜினல் வடிவம் 2013 லேயே தொடங்கப்பட்டுவிட, அதை மேம்படுத்தி, தானும் தன் நண்பரும் விளையாடும் வகையில் அமைத்துக்கொண்டார் ஜோஷ்.  அக்டோபர் 2021 ல் இதை பொதுவில் வைத்தார் ஜோஷ்.  அது சட்டென பிரபலமாகி ட்விட்டரிலும் மற்ற மீடியாக்களில் பரவலாக அதில் ஷேர் செய்யும் வசதிகளை அமைத்து, இன்னும் சில வசதிகளை அமைத்தார்.  நியூஜிலாந்தில் உள்ள ஒரு நண்பர் இதைக் கண்டுபிடித்து ஜோஷ் அமைத்திருந்த எமோஜிக்களுடன் இணையத்தில் இதை ஷேர் செய்ய, சட்டென ஜனவரிக்குள் மூன்று லட்சம் பேர் விளையாடுகிறார்கள் என்று தெரிந்தது.

ஜனவரியில் அதை நியூயார்க் டைம்ஸ் இதை வாங்கிவிட, பிப்ரவரியில் அதை அதன் பெயரிலேயே பொதுவில் விளையாட வைத்திருக்கிறது.  இப்போது அது Wordle- The New York Times என்றுதான் கூகுளில் காட்டுகிறது.  ஒவ்வொருநாளும் கூகுளிலிருந்துதான் அதைத் திறக்கவேண்டும்.  இதிலேயே அன்லிமிட்டட் ஆப்ஷனும் இருக்கிறது.  அதைத் திறப்பதில்லை.  அது போரடித்து விடும்.

கேஜிஜி விளையாடும் பகிரும் ரிஸல்ட்களில் ஒரு ஸ்டார் முத்திரை இருக்கும்.  அவர் செட்டிங்ஸில் சென்று hardmode போட்டு விளையாடுகிறார்.  நானெல்லாம் எளிமையான கேம்தான்!

முன்னால் எல்லாம் ஒரு விளையாட்டு நம்மூரில் உண்டு.  நான் ஒரு பொருளை நினைத்துக் கொள்கிறேன். மூன்று கேள்வியில் அதைக் கண்டுபிடிக்கவேண்டும் என்பது போல...  சுவாரஸ்யமாகவே இருக்கும்.  நினைவிருக்கிறதா?  அந்த கான்செப்ட்.  ஆனால் சற்றே வித்தியாசமாக.

அதுபோல இந்த விளையாட்டு.  முப்பது கட்டங்களில் மூளைக்கு வேலை!  மூளைக்கு வேலை என்று சொன்னாலும் தேவை அதிருஷ்டம்.  ஆயிரக்கணக்கில் இருக்கும் ஐந்தெழுத்து ஆங்கில வார்த்தைகளில் அன்று அவர்கள் தெரிவு செய்திருக்கும் வார்தையைக் கண்டு பிடிக்கும் விளையாட்டு.

கேஜிஜி காலை மூன்று மணிக்குள் அதைப் போட்டு விட்டால்தான் அவருக்கு நிம்மதி! அவரிடமிருந்து ரிசல்ட் காலை மூன்று மணிக்கு க்ரூப்பில் வெளியாகி விடும்!  இது பற்றி அவரிடம் கேட்டபோது அவர் சொன்னதாவது...

நான் மதியம் பனிரெண்டு மணிக்கு மேல்தான் விட்டத்தை வெறித்துக்கொண்டு முயற்சிப்பேன்.

பல நாட்களாக க்ரூப்பில் இது வந்துகொண்டிருக்க, ஒருநாள் அலுவலகத்தில் இதைப்பற்றி பேச்சு வந்தபோது 'அப்படியென்றால் என்ன' என்று கேட்டார்கள் இரண்டு சகாக்கள்.  சொன்னதும் அவர்கள் அன்றைய விடையை இரண்டு நிமிடங்களில் கண்டு பிடித்து அசத்தினார்கள்.  அன்றுதான் எனக்கும் இதை முயன்று பார்க்க ஆவல் தோன்றியது.  

விவேக் ஜோக் ஒன்று நினைவிருக்கிறதா?  வீடியோ தேடினால் கிடைக்கவில்லை.  விவேக் குரலில் டிக்டாக் வீடியோதான் இருக்கிறது.

View this post on Instagram

A post shared by Yuvaraj Krishnasamy (@yuvaraj_krishnasamy)

மிகவும் யோசித்து பயங்கரமாக முயற்சிப்போம்.  சட்டென 'எட்டு புள்ளி கோலநோட்டாக' முடிந்துவிடும்!  மாற்று அனுபவமும் அவ்வப்போது இருக்கும்.  

இரண்டு ஒரே எழுத்தைப் போட்டு வீண் செய்யாமல் வார்த்தை யோசித்து, அப்புறம் இரண்டு வவ்வால்.. சே...  வவல் மூன்று வவல் என்று வார்த்தைகளை பொறுக்கிச் சேர்த்து ஆரம்ப வார்த்தையை அமைப்பேன்.  முதலில் FRANK, CRANK, BLANK என்று மூன்று வார்த்தைகளில்தான் ஆரம்பிப்பேன்.  உதவியாய் இருந்தது.  அப்புறம்தான் இரண்டு வவல் முயற்சியைத் தொடங்கினேன்.  அது சற்று சிரமப்படுத்த, மறுபடி என் வழக்கத்துக்கு வந்து விட்டேன்!  

மஞ்சளை மாற்றிப்போட்டு, பச்சையை நிலைநிறுத்தி  இன்றைய வார்த்தை மிகக்கடினமான இருக்கும் என்று தேடினால் சாதாரண வார்த்தை சட்டென அமைந்துவிடும்.  இரண்டு நாள் அனுபவத்துக்குப் பின் மூன்றாவது நாள் 'இதோ வந்துவிடும், இதெல்லாம் தூசுப்பா' என்று ஆரம்பித்தால் ஒன்றுமில்லாத வார்த்தை நம் ஆறு சான்ஸையும் தட்டிப் பறிக்க காத்திருக்கும்.  

உதாரணமாக கடைசி மூன்று எழுத்துகள் NIC.  இதை மூன்றாவது வாய்ப்பில் கிடைக்கப் பெற்றேன்.  அடுத்த வாய்ப்பில் PANIC என்று வார்த்தை கோர்த்தேன்.  புஸ்.....

வாலன்டைன்ஸ் டே என்பதால் ஆரம்பித்த வார்த்தை  LOVER.  எல்லா எழுதும் கருப்பு என்றாலும் அதிலிருந்த எழுத்துகள் எலிமினேட் ஆகிவிட்டதா, எனவே மெதுவாய் யோசித்து அந்த எழுத்துகளை விடுத்து ஐந்தாவதில் சரியான வார்தையைக் கண்டுபிடித்தேன்.  

விளையாட்டு எப்படி என்பதைச் சொல்லவேண்டும் அல்லவா?  எல்லோரும் விளையாடிக் கொண்டுதான் இருப்பீர்கள்.  தப்பித்தவறி ஓரிருவர் இருந்தால் அவர்களுக்காக...!

நாம் ஆரம்பிக்கும் ஐந்தெழுத்து வார்த்தையில் அன்றைய வார்த்தைக்கான எழுத்து அதே இடத்தில இருந்தால் பச்சை நிறமாகக் காட்டும்.  அந்த எழுத்து இருக்கிறது, ஆனால் வேறிடத்தில் என்றால் மஞ்சளாகக் காட்டும்.  மாற்றிப்போட்டு முயற்சித்து விளையாட வேண்டும்.  கருப்பில் வந்த எழுத்துகளை விட்டுவிட வேண்டும்.  மிச்சமிருக்கும் எழுத்துகளை வைத்து வார்தையைக் கண்டுபிடிக்க வேண்டும்.  கீ போர்டிலும் நாம் உபயோகித்த எழுத்துகள், பச்சை எது, மஞ்சள் எது என்று காட்டும்.  பச்சையை அதன் இடத்திலேயே வைத்து, மஞ்சளை இடம் மாற்றிப்போட்டு யோசித்து, கருப்பு எழுத்துகளை கைவிட்டு மாற்றி மாற்றி யோசித்து  கண்டுபிடிக்கவேண்டும்.

முதல் முயற்சியிலோ, இரண்டாவது முயற்சியிலோ விடை வந்து விட்டால் பொதுவில் பகிர்ந்து விடாதீர்கள்.  உலகமே உங்களை சந்தேகப்படும்.  பார்ப்பவர்கள் சட்டென நம்ப மாட்டார்கள்!  ஆனால் அப்படிக் கேட்டு விளையாடுவதில் என்ன பயன்?  யாரும் அப்படி விளையாட மாட்டார்கள்.  ஒரு நாளைக்கு ஒரு வார்த்தைதான்.  முடிந்துவிட்டது என்றால் அடுத்த வார்த்தை மறுநாள்தான்.  அங்கேயே கவுண்ட் டவுன் வேறு வரும்!

முதல் முயற்சியிலேயே விடை வந்து விட்டால் ஜீனியஸ் என்று சொல்லும்.  இது ரொம்ப ரேர்.  நிறைய அதிர்ஷ்டமும், உடம்பு முழுக்க மச்சமும் வேண்டும்!!  இரண்டாவதில் விடை வந்தால் ஸ்ப்ளெண்டிட் என்று வரும்.  மூன்றாவது நான்காவதெற்கெல்லாம் என்ன வார்த்தை வரும் என்று பார்த்திருக்கிறேன்.  இப்போது நினைவில்லை.  இதை விளையாடும் மற்றவர்கள் இந்த விவரம் சொல்லலாம்!  பெரும்பாலும் நான்காவது அல்லது ஐந்தாவது முயற்சியில் எனக்கு அதிருஷ்டம் அடித்துக் கொண்டிருக்கிறது.  நேற்றைக்கு முதல்நாள் இரண்டாவது சான்ஸில் விடை கிடைத்தது.  Robin என்கிற வார்த்தையும் அதற்குமுன் ஒரு வார்த்தையும் மிகவும் படுத்தி விட்டது.  இரண்டு வார்த்தைகள் ஆறாவது வாய்ப்பில்தான் பெற்றேன்.  நேற்று அர்த்தம் தெரியாமலேயே விடையைக் கண்டுபிடித்தேன்!

இரண்டு முயற்சியில் மூன்று முயற்சியில் கண்டுபிடித்து விட்டார்கள் என்று வந்தால் அவர்கள் ஷேர் செய்யும் மஞ்சள் பச்சை கட்டங்களை வைத்து அவர்கள் ஆரம்ப வார்த்தையாக எதைப் போட்டிருப்பார்கள் என்று ஓரிருமுறை கெஸ் செய்து பார்த்திருக்கிறேன். சரியாகவே இருக்கும்.  இது நமக்கு விடை தெரிந்திருந்தால் மட்டும் சாத்தியம்.

=================================================================================================== 

பாலுமகேந்திரா மறைந்த சமயம் ஹிந்து(தமிழ்)வில் வந்த கட்டுரை ஒன்று.  

செயற்கை வசனங்கள், குழப்ப வார்த்தைகள் இன்றி கமலஹாசன் நன்றாக எழுதி இருக்கிறார். (ஆங்கிலத்திலிருந்து சங்கர் மொழி பெயர்த்திருக்கிறார்)

மனதிலிருந்து எழுதி இருக்கிறார் 'தி இந்து'வில் பாலு மகேந்திரா பற்றி...

கவலைப்படாதீர்கள் பாலு, உங்கள் படைப்புகள் வாழும்- கமல்ஹாசன்

நமது சினிமாவில் எது நல்ல அம்சம், எது அப்படியல்ல என்பதைத் தெரிந்து வைத்திருந்ததில்தான் பாலுமகேந்திராவின் மேதமை அடங்கியிருந்தது.

புத்திசாலிகள் நிறைந்த ஊரில், அறிவும் ஞானமும் பெற்ற மனிதர் அதிகப் பயனுள்ளவராக இருப்பார். பாலுமகேந்திரா படித்தவர். அதனாலேயே எங்களுக்குச் சினிமா அறிவு இருக்க வில்லை என்று சொல்லிவிட முடியாது. புதிய ஊடகமாக சினிமா வடிவம் இருந்ததால், நாடகம் மற்றும் இலக்கியத்திலிருந்து பெற்றிருந்த முன் அனுபவத்தை சினிமா என்ற முற்றிலுமான புதிய ஊடகத்தில் முயற்சித்துக் கொண்டிருந்த நேரம் அது. அந்தப் புதிய ஊடகத்துக்கு வேறு வகையான கவர்ச்சி இருந்தது.

சினிமாவின் இலக்கணத்தை ஒவ்வொருவரும் அவரவர் துணிகரத்தில், இழப்பில்தான் கற்றுக்கொண்டார்கள் - சில நேரங்களில் மற்றவரின் இழப்பிலும். தமிழ் சினிமாவில் சாதனையாளர்களாக அப்போது இருந்தவர்கள் அனைவரும், கடும் உழைப்பின் வழியாகவே தங் களை உருவாக்கிக்கொண்டவர்கள். அப்போது குருகுலம் போன்ற பயிற்சி முறை இருந்தது. நாங்களும் அதை பின்பற்றினோம்.

பாலுவும் அவரது நண்பர்களும் புனே பிலிம் அண்ட் டெலிவிஷன் இன்ஸ்டிடியூட் ஆப் இந்தியா பள்ளியில் படித்து வந்தவர்கள். இந்திய சினிமா புதிய காற்றைச் சுவாசித்தது மட்டுமின்றி, அந்தக் காற்று இந்தியச் சினிமாவையே மாற்றியது. அப்போ திருந்த சினிமா தொழில்துறை தங்களுக்குத் தகுதியானதல்ல என்று பாலுவின் தலைமுறை மாண வர்களில் சிலர் நினைத்தார்கள். ஏனெனில், அவர்கள் சர்வதேசத் தரத்திற்குப் பயிற்சிபெற்றவர்கள். அவர்கள் தங்களைத் தனிமைப் படுத்திக்கொண்டார்கள்.

அவர்களில் ஒருவர் அல்ல பாலுமகேந்திரா. அவருக்குத் தமிழராக இருப்பதில் பெருமை இருந்தது. தமிழ் சினிமாவைக் கேலி செய்யாமல், தனது நன்றியறிதலைச் செய்ய வேண்டும் என்று ஆசைப்பட்டார்.

நன்கு படித்த ஒரு மனிதன், கிராமத் துக்குத் திரும்புவதை போல அவர் திரும்பினார். அவருக்கு எந்த அம்சம் வலுவானது, எது தவறானது என்பது முழுமையாகத் தெரிந்திருந்தது. அவரது கணிப்பு சரியாகவும் இருந்தது. அப்படித் தான் நாங்கள் நண்பர்கள் ஆனோம்.

வித்தியாசமான பாணி

நாங்கள் பிரபலமாக ஆவதற்கு முன்பே, மிகுந்த தன்னம்பிக்கை உள்ள இளைஞனாக அவரைப் பார்த்து ஆச்சரியம் கொண்டது எனக்கு நினைவிருக்கிறது. "யார் இந்த ஆள்? இவரது எழுத்து நடையே வித்தியாசமாக உள்ளது" என்று கேட்டிருக்கிறேன். அவர் சம்பிரதாயமான முறையில் வேலை செய்யவில்லை.

ஷாட்களுக்கு அவர் ஒளியூட்டும் முறை எனக்கு மிகவும் பிடித்தமானது. புகழ்பெற்ற இயக்குநர் ராமு காரியத்துடன் பணியாற்றப் போகிறார் என்று என்னிடம் கூறப்பட்டது. அத்துடன் சேதுமாதவனோடு சேர்ந்து பணிபுரியலாம் என்றும் சொன்னார்கள்.

இயக்குனர் சுகதேவ் அலுவாலியா போன்றவர்கள், அவரது செட்டுக்கு வருவதைப் பார்த்து நான் ஆச்சரியமடைந் திருக்கிறேன். சுகதேவ் எனக்கு ஹீரோவைப் போன்றவர். அவரது விளம்பரப் படங்களை நான் நிறைய பார்த்திருக்கிறேன். தனிப் பாணி கொண்டவை அவை. பாலுவுக்கு எப்படியான சகாக்கள் இருக்கிறார்கள் என்பதைத் தெரிந்துகொண்டேன். நானும் அவரது நண்பனாக மாறிவிட்டேன்.

பாலு முதலில் ஒரு படத்தை இயக்க விரும்பியபோது, நான்தான் ஹீரோ என்று சொன்னார். வெறும் நட்பார்ந்த உறுதிமொழியாக அதைச் சொல்கிறார் என்று நினைத்தேன். ஆனால், கோகிலா படம் எடுத்தபோது அவர் வார்த்தையை நிரூபித்தார்.

நாங்கள் எல்லாம் பேசிக்கொண்டிருந்த கனவு நனவானது. நாங்கள் அணியாகச் சேர்ந்து வேலையும் செய்தோம். நான் நடித்த பல படங்களில் அவர் ஒளிப்பதிவாளராக இருந்திருக்கிறார்.

நாங்கள் தொடர்ந்து சந்தித்தோம். சினிமா பற்றிப் பேசினோம். கிசுகிசுவாகக்கூட ஒரு படம் ஏன் கிளாசிக்காக ஆகவில்லை என்பதைத்தான் பேசுவோம். தனிப்பட்ட நபர்களைப் பற்றிப் பேசியதே இல்லை.

நிறைய நினைவுகள்

அவருடன் சேர்ந்து பல நினைவுகள் எனக்கு உண்டு. ஒகேனக்கல் நீர்வீழ்ச்சி விழும் இடத்திலிருந்து 200 மீட்டர் தூரத்தில் நீந்திக் குளிப்போம். அருவியின் குறுக்காக யார் நீச்சலடித்துச் செல்ல முடியும் என்று பந்தயம் வைப்போம். நீரோட்டம் உங்களைக் கடுமையாக இழுக்கும். அந்த நூறு மீட்டரை வேகமாகக் கடக்க வேண்டும். நாங்கள் கடந்தோம்.

கேமராக்கள் குறித்தும் நாங்கள் நிறைய பேசியுள்ளோம். அவருக்கு எல்லாவற்றைப் பற்றியும் தெரியும். அப்போது தமிழகத்தில் ஒரே மாதிரியான திரையிடல் முறை இல்லாததால், ஒரு ஒளிப்பதிவாளரின் ப்ரேமிங் எந்த நேரத்திலும் மோசமாகிவிடும் வாய்ப்புண்டு. என்ன ப்ரேமை படத்தில் வைக்கிறோமோ அது தியேட்டரில் இருக்காது. ஒவ்வொரு திரையரங்கிலும் ஒவ்வொரு விதமான திரையிடல் இருந்தது.

உலகளாவிய அளவிலான தரநிலை அப் போது இல்லை. ஒரு அங்குல அளவுள்ள பொருள், திரையில் பெரிதாகத் தெரியும். நெருக்கமான ப்ரேமில், உதடுகளும், மூக்கின் முனையும் வைக்கப்பட்டிருந்தால், கிராமத்துத் திரையரங்கில் நம்மால் உதடுகளைப் பார்க்க முடியாது. அல்லது பாதி உதடுகள் தெரியும்.

பாலுமகேந்திரா அந்தத் திரையிடல் குறைபாடுகளைச் சின்ன ஒரு உத்தியைப் பயன்படுத்திச் சரிசெய்தார். அதை யாரும் செய்வதற்குத் துணியவில்லை. கேமராவின் செவ்வக ஆடியில் ஒரு தடுப்பை (மாஸ்க்கை) பொருத்தினார். கேமராவுக்கு வெளியே உள்ள உலகை அவர் சரிசெய்யாமல், தனது வேலைப் பரப்பைக் குறைத்துக்கொண்டார். அவர் ஏற்படுத்திக்கொண்ட முறையில் தவறே நிகழாது. நீங்கள் அதீதமாகக் குவித்தாலும், கருப்பு ப்ரேம்தான் வரும். அதை அதிகம் சுருக்கவும் முடியாது.

எல்லாரும் பேசிக்கொண்டிருந்தனர். அவர் அதைச் செய்தார். அதனால்தான் அவர் முன்னோடியாக இருந்தார். நாங்கள் சந்திக்கும்போது, உலகச் சினிமா மேதை கள் அனைவரின் படங்களையும் அவர் பார்த் திருந்தார். முக்கியமான திரைப்பட கர்த்தாக் கள் சிலரையும் நேரில் சந்தித்திருந்தார்.

விதிகளை உடைத்தவர்

பாக்ஸ் ஆபீசுக்கும் நல்ல சினிமாவுக்கும் இடையில் முதல் பாலத்தைக் கட்டியவர் பாலுமகேந்திராதான். அவர் எடுத்த மூன்றாம் பிறை வெள்ளி விழா கண்ட படம். தேசிய விருதும் பெற்றது. விருது வாங்கும் படங்கள் ஓடாது என்ற எழுதப்படாத விதியை அவர் உடைத்தார். ஒரு திரைப்பட இயக்குநராக எனது வளர்ச்சியில் பங்குபெற்றவர் அவர்.

ஒரு திரைக் கலைஞனாக எனது வளர்ச்சியில் பாலுமகேந்திராவின் பங்கு முக்கியமானது. எனது வளர்ச்சியில் கே. பாலச்சந்தரின் பங்கு முற்றிலும் மாறுபட்டது, அது தனிக்கதை. பாலுமகேந்திராவிடம் இருக்கும் பெரிய புகார் என்னவெனில் அவர் நிறைய படங்களைச் செய்திருக்கலாம். குறைந்த பட்சம் கூடுதலாக 20 படங்கள். நிறைய படங்களில் ஒளிப்பதிவாளராகவாவது பணியாற்றியிருக்கலாம்.

மூன்றாம் பிறை கதையை முதலில் அவர் என்னிடம் சொன்னபோது, 20 நிமிடம்தான் கேட்டேன். ஒப்புக்கொண்டேன். கிளைமாக்ஸை மட்டும் சரி செய்ய வேண்டும் என்று கூறினேன். மனம் உடைந்த மனிதன் என்னவெல்லாம் செய்வான் என்பதை அதிகபட்சமாக நிகழ்த்து வதற்கு முயற்சித்தோம். மண்ணில் புரண்டு, மழையில் உருளும் அந்தக் காட்சி மறக்க முடியாதது. மூன்றாம் பிறையின் இந்தி வடிவமான சத்மாவின் கிளைமாக்ஸில் மழைக்காகக் காத்திருந்தோம். சரியாக மழையும் பெய்தது. பாலு அதை மந்திரத் தருணம் என்று சொன்னார்.

பாலுவைக் கொண்டாடுவோம்

நாங்கள் தொடர்ந்து சந்தித்துக்கொண்டிருந் தோம். அவரது மரணத்தால் நான் நிலை குலைந்து போய்விடவில்லை. மரணம் நம் எல்லாருக்கும் வரும் என்று எனக்குத் தெரியும்.

அவர் நிறைய படங்களைச் செய்திருக்கலாம் என்பது மட்டுமே எனது ஒரே குறை. ஆனால், அவரது மாணவர்கள் அதைப் பூர்த்தி செய்துவிட்டார்கள். பாலுமகேந்திராவைப் போன்ற மனிதரை இழப்பதில் உள்ள சோகமான விஷயத்தை, அவருடன் எனக்கு ஏற்பட்ட மகத்தான தருணங்கள் பூர்த்தி செய்யும். அவரது மரணத்துக்காகத் துக்கிப்பதைவிட, அந்தத் தருணங்களைக் கொண்டாட வேண்டும்.

நான் அவரை மரணப் படுக்கையில் பார்த்தி ருந்தாலும், இதைத்தான் சொல்லியிருப்பேன். "கவலைப்படாதீர்கள் பாலு, உங்கள் படைப்புகள் வாழும்."

தி இந்து பிசினஸ் லைன்

தமிழில்: ஷங்கர்

பிப்ரவரி 15 2014

===========================================================================================

மேலே கட்டுரை நீண்டு விட்டதால் கவிதை சிறுத்து விட்டது!!!

மனக்கதவைப் பூட்டிவிட்டு 

வெளியேயே நிற்கிறேன் 

உள்ளே இருக்கும் கேள்விகளுக்கு 

விடை தெரியாமல் 

============================================================================================

ரசனையான புகைப்படம்...

"ஸைட்ல இடம் கிடைச்சா வரிசையை மதிக்காம சும்மா முந்திகிட்டு போயிட்டே இருப்பீர்களா? வயசுக்கு ஒரு மரியாதை வேணாம்? இப்போ போங்க பார்க்கலாம்... பிச்சுப்புடுவேன் பிச்சு..."

===========================================================================================

நேத்து வர்டில் கேம்ல விடையைக் கண்டு பிடிச்சுட்டேன்.. ஆனால் அதற்கு என்ன அர்த்தம்னே தெரியல....

சாம்பு எந்த வேலையைச் செய்தாலும் அதில் ஒரு அ(ன)ர்த்தம் இருக்கும்!

தொடர்கதை தெரியும்... சித்திரத்தொடர் தெரியும்....

இது தொடர் விளம்பரம் போல...!

'ஜோக் எங்கே ஜோக் எங்கே' என்று தேடுபவர்களுக்காக..

ஜெமினி : "மதன் ஜோக் எங்கே.. அது இல்லாமல் எதுவும் ரசிக்கவில்லை என்று ஜீவி ஸார் சொல்வார்... இந்த என் படத்தை அவரிடம் காட்டுங்கள் ரசித்து விட்டு சும்மா இருந்து விடுவார்!"

அவ்ளோதான் இந்த வாரம்...

==================================================================================

"என்னவாம் அந்தப் பெண்ணுக்கு...?"

"இந்த வாரம் அவ்ளோதான் என்றதும் மயங்கி விழுந்துட்டாளாம்.."