உணவு நம் உள்ளத்தைத் தொடும் காரணம் என்ன? + சரோஜாதேவி கதை பகுதி 12.

 

கேள்வி பதில்கள் :

கீதா சாம்பசிவம் :

ம்ம்ம்ம்? கேட்கலாமா வேண்டாமானு தெரியலை. ஏனெனில் பொதுவாகவே தமிழ்நாட்டளவில் இதைப் பற்றிப் பெரிதாக யாரும் கண்டுக்கலை. பேசிக்கலை. அது கிடக்கு, நம்ம வேலையைப் பார்ப்போம் என்றே போகின்றனர்.  ஆனால் எனக்கு என்னமோ மனசு ஆறவே இல்லை.

1. கார்ப்பரேட் என்றால் அம்பானி/அதானிதானா? சொல்லப்போனால் எல்லா ஐடி கம்பெனிகள், டாடா குழுமம், பிர்லா குழுமம், சன் நெட்வொர்க் குழுமம், என்டிடிவி, ரிபப்ளிக் டிவி, இந்தியா டுடேனு ஆரம்பிச்சு மற்ற ஐடி கம்பெனிகள்னு எல்லாமும் கார்ப்பரேட்டில் வராதா?

# கார்பரேட் என்றால் டாடா, பிர்லா    என்றிருந்த காலம் இருந்தது. டாப்பில் இருப்பவர்களைத்தான் சொல்ல வேண்டும் அல்லவா ?

2. பிரதமரை இப்படி எல்லாம் கன்னாபின்னாவெனத் திட்டுவது சரியா? எனக்குத் தெரிந்து யாருமே அதை எதிர்க்கவில்லை, பிரதமர் உள்பட.

# நீங்கள் கேட்பதற்கான காரணங்கள் புரிகின்றன.  எல்லாக் கட்சிகளிலும் அரசியல் எதிர்ப்பு என்பது கொள்கைகளை ஆட்சேபிப்பதற்குப் பதிலாக தனி மனிதரை இழிவு செய்வதாக மாறியிருக்கிறது. இதை தனிமனிதர்கள் சரி செய்ய இயலாது என்பதும் கசப்பான உண்மை. தர்மம், நியாயம் ஆகிய உணர்வுகள் மங்கிப் போனதன் விளைவு.‌

அவரோட படிப்புச் சான்றிதழைக் கேட்பது எல்லாம் சரியானதா? ஏனெனில் நம் நாட்டில் ஒரு சில மத்திய, மாநில அமைச்சர்கள் படிக்காதவர்களே. நம் தமிழ்நாட்டில் திரு காமராஜர் அவரும் படிக்காதவரே. அது ஏன் இவரை மட்டும் இப்படி எல்லாம் கேள்வி கேட்கின்றனர்?

அடுத்தது அவரோட ஆங்கில உச்சரிப்பு இந்திய உச்சரிப்பாக இருப்பதையும் திரைப்பட நடிகர் ஒருத்தர் உள்படக் கேலி செய்துட்டாங்க. இந்தியாவில் பலருக்கும் இந்தக் குறை உண்டு. இன்னமும் இருக்கிறது. அப்படி இருக்கையில் ஏன் இவரை மட்டும்?. கேலி செய்தவர்கள் எல்லாம் அம்பேரிக்காவில் போய்ப் படிச்ச இந்தியர்கள். அவங்களும் அம்பேரிக்கா போகும் முன்னால் இப்படிப் பேசினவங்க தான். அங்கே போய்த் தான் மாத்திட்டிருப்பாங்க. அந்த உண்மை தெரிஞ்சும் ஒரு நாட்டின் பிரதமரை இப்படிப் பேசலாமா?

இதே வேறு கட்சியைச் சேர்ந்தவர் எனில் இப்படி எல்லாம் பேசி இருக்க முடியுமா?  இதை நினைச்சு நினைச்சு ஒரு எழுத்தாளர் பெண்மணி ரொம்பவே சந்தோஷம் அடைகிறார்  . அந்த அளவுக்கு அவங்களுக்குப் பிரதமரால் என்ன கஷ்டம், அல்லது நஷ்டம் ஏற்பட்டிருக்கும்?

# பிரதமர் மட்டும் அல்ல யாரையானாலும் தரக்குறைவாகப் பேசுவது தவறு.

முன்னேற்றங்கள் இருப்பதை ஏன் ஒத்துக்கொள்வதே இல்லை?

& ஏதாவது ஒன்று கிடைத்துக்கொண்டிருக்கும் வரை அதன் அருமை தெரியாது. கிடைப்பது கிடைக்காமல் போனால்தான் அதன் அருமை தெரியும். அது போலத்தான் முன்னேற்றங்களும். நிழலின் யாரும் வெயிலில்தான் தெரியும்! 

பி.கி. நான் இதை எல்லாம் கேட்பது சரியா/தப்பானு தெரியாது. ஆனல் மனசு ரொம்பவே நொந்து போய் விட்டது. இதை முக்கியமாய் இந்தக் கேள்விகளை வெளியிடலாம் எனில் வெளியிடுங்கள். பதில் சொல்லலாம் எனில் சொல்லுங்கள். இல்லைனா விட்டுடுங்க. இதனால் எங்கள் ப்ளாகின் பதிவுகளுக்குப் பிரச்னை ஏதும் வராமல் இருக்கணும்.  பொதுவில் வெளியிட முடியாது எனில் விட்டுவிடுங்கள்.

இந்த க்ரெடிட் ஸ்கோர்/சிபில் ஸ்கோர்(?) என்பது என்ன? ஏன் வங்கிகள் இவற்றைப் பற்றி அடிக்கடி குறிப்பிட்டு மெயில்கள் அனுப்புகின்றன?

இது முன்னரே ஒரு தரம் கௌதமன் அவர்கள் விளக்கினார். நினைவிலும் இல்லை. புரிஞ்சுக்கவும் இல்லை.

 # கடன் பெறுபவர்கள் திருப்ப செலுத்து வதில் முறையாக இருந்திருக்கிறார்களா இன்று கவனித்து அதற்காக ஒரு மதிப்பெண் கொடுக்கிறார்கள். இதில் நாம் தவறு செய்யும் பட்சத்தில் நமது தரம் மிகவும் கீழே இருக்கும். தேவையானபோது கடன் பெறுவதில் சிக்கல் வரும். இதுதான் கிரெடிட் ரேட்டிங்.

& நான் இதுபற்றி விளக்கம் எதுவும் கொடுத்த ஞாபகம் எனக்கு இல்லை. க்ரெடிட் ஸ்கோர்/சிபில் ஸ்கோர் எப்போதாவது கண்ணில் படும். Educational லோன், பையன் படிப்புக்காக நண்பர், உறவினர் லோன், அலுவலக லோன்கள் தவிர்த்து நான் வெளியில் வாங்கிய ஒரே கடன் வீடு கட்ட வாங்கிய HDFC லோன் மட்டுமே. எல்லா கடன்களையும் திருப்பி செலுத்தியாகிவிட்டது. கடந்த இருபது ஆண்டுகளாக கடன் வாங்கியதும் இல்லை, கடன் கொடுப்பதும் இல்லை. இந்தக் காலத்தில் என் ஒரே ஆர்வம் கிரிக்கெட் ஸ்கோர் மட்டுமே! 

இந்த யூபிஐ பணப்பரிமாற்றத்தில் ஈடுபட்டிருக்கும் பொதுமக்களுக்கு அதற்காக வரி விதிப்பதில்லை. என்பதை நிதி மந்திரி பல முறை தெளிவாக்கி விட்டார். ஆனாலும் வணிகர்கள் தங்கள் லாபத்தில் இருந்து அரசுக்கு வரி செலுத்துகையில் அதை வாடிக்கையாளர்களிடம்தானே வசூலிப்பார்கள்? இது நிச்சயம் நடக்கும் இல்லையா? அப்புறமா ஏன் வரி விதிக்கலைனு அரசு சொல்லணும்? வணிகர்களுக்கும் வரி இல்லைனு சொல்லிவிடலாம் இல்லையா?

# சேவைகள் எப்போதுமே நிரந்தரமாக இலவசமாக இருப்பது சாத்தியமல்ல. அதற்காக ஒரு சிறு கட்டணம் வசூலிப்பதில் தவறு ஏதுமில்லை. இதற்கான எதிர்ப்பெல்லாம் முற்றிலும் அரசியல் காரணங்களுக்காக ஏற்படுகிறது.

நெல்லைத்தமிழன்:

 1. ஏன் ஜீன்ஸ் பேண்டில் முட்டுப் பகுதியில் கிழிசலா இன்னும் பல பகுதிகளில் கிழிந்து என்று ஒரு ட்ரெண்ட் வந்தது?  இவர்களெல்லாம், இந்திரனால், நல்லவர்களின் குணத்தை மாற்றுவதற்காக அனுப்பப்பட்டவர்களா?   

# ' புதுமை என்று எதையாவது செய்தே ஆக வேண்டும் ' என்கிற வெறி வருகின்ற போது செய்வதற்கு வேறு எதுவும் கிடைக்கவில்லை என்றால் இப்படித்தான் தாறுமாறாக ஏதேனும் செய்யத் தூண்டும் நமது மனம்.

 இதில் ஏன் இந்திரனைக் கொண்டு வருகிறீர்கள் என்பது எனக்குப் புரியவில்லை !

& இந்திரனுக்கு ஆயிரம் கண்கள் இருக்கலாம். ஆனால் கி ஜீ பேண்டில் உள்ளவை கண்கள் அல்ல- மற்றவர் கண்களை ஈர்க்கும் துவாரங்கள்! 

2. நமக்கு வேலை வந்துவிடும் என்று கணவர் சில காய்களைத் தவிர்ப்பாரா? (வாழைப்பூ, தண்டு, அரைக்கீரை போன்று)  

# மாட்டார்.  (கணவராக நான் உணர்ந்தது). அவரவருக்குப் பிடிக்காதவை தவிர்க்கப்பட லாம்.

& அந்தக் காலத்தில் எல்லாம் காய்கறி வாங்குவது, சமைப்பது எல்லாமே மனைவியின் இலாக்கா என்பதால் எனக்கு இதில் அனுபவம் இல்லை. 

3.  உணவு நம் உள்ளத்தைத் தொடும் காரணம் என்ன?  உலகத்திலேயே ஜீவி சார் மாத்திரம்தான், உணவு பதிவுகளுக்கு முக்கியத்துவம் கொடுக்காதவரோ என்று தோன்றும் ஹாஹா.  

# உணவு மட்டுமே ஐம்புலன்களுக்கும் நிறைவு தருவது. அதுவும் சொற்ப நேரத்திலேயே முழு நிறைவும் தருவது. எனவே அது நமக்கு பிடித்திருப்பதற்கு வேறு காரணம் தேவையில்லையே !

& சமைக்கத் தெரிந்தவர்கள் யாராக இருந்தாலும் உணவு பதிவுகளில் ஆர்வம் காட்டுவார்கள். சமையல் வேலை தெரியாதவர்களுக்கு உணவு பற்றிய பதிவுகள் இரசிக்காது என்று நினைக்கிறேன். 

4.  ஒரு பதிவு எழுதினால், பலரும் படிக்கணும், கருத்து போடணும் என்று ஏன் பலர் நினைக்கிறார்கள்?  முன்பெல்லாம் ரொம்பவே ஆக்டிவ் ஆக இருந்த பதிவர்கள், வாசகர்கள் ஏன் இப்போது இணையம் பக்கமே வருவதில்லை?  

# நாம் எழுதுவதை பலர் படிக்கிறார்கள் ரசிக்கிறார்கள் என்று தெரியும்போது ஒரு திருப்தி இருக்கத்தானே செய்யும் ?

முன் போல் அதிகம் பேர் வராததற்குக் காரணம், எல்லாவற்றுக்கும் ஒரு சலிப்பு என்கிற எல்லைக்கோடு இருக்கும் என்பது மட்டுமேதான்.

5. உங்களுக்கு கற்றுக்கொடுத்த ஆசிரியர்களைச் சந்தித்திருக்கிறீர்களா? அவர்களுக்கு ஏதேனும் செய்திருக்கிறீர்களா?

# எனக்கு கற்றுக் கொடுத்த பல ஆசிரியர்களை சந்திக்கவில்லையே சந்திக்க முடியாமல் போயிற்றே என்கிற ஆதங்கம் எனக்கு நிறையவே உண்டு. அதிலும் ஓரிருவரை   பார்த்து, அவர்களை வணங்கி,  வாய் நிறைய நன்றி சொல்ல வேண்டும் -  முடிந்தால் ஒரு பெரிய பரிசு கொடுக்க வேண்டும் என்று கூட நான் நினைத்தது உண்டு,  நடக்கவில்லை.

& ஆசிரியர்கள் யாரையும் படிப்பு முடிந்தபின் சந்தித்ததில்லை; சந்திக்க நினைத்ததும் இல்லை. சில ஆசிரியர்களை அவ்வப்போது நினைவு கூர்ந்தது உண்டு. 

= = = = = = = =

படமும், பதமும் : 

பானுமதி வெங்கடேஸ்வரன் : 

கனடாவில் மிஸிஸாகா என்னும் இடத்தில் இருக்கும் absolute tower. இதை அதன் வடிவத்தைக் கொண்டு மர்லின் மன்றோ டவர் என்கிறார்கள்.

மிஸிஸாகாவில் இருக்கும் சென்ட்ரல் லைப்ரரி என்னும் பொது நூலகத்திற்கு சென்றிருந்தேன். மிகப்பெரிய நூலகமாம். இதைப் போல இன்னும் இரண்டு நூலகங்கள் உண்டாம். நம் கன்னிமாராவைவிட சிறியதாகத்தான் இருக்கும், ஆனால் அமைக்கப்பட்டிருக்கும் விதம் அழகாக இருக்கிறது. நல்ல விஸ்தீரணத்தில் ஆங்காங்கே உட்கார்ந்து படிக்க நடுவில் மேஜைகளோடு சோஃபாக்கள், கணிணிகள், குழந்தைகளுக்கு விளையாட பிளாக்குகள், சுத்தமான வாஷ்ரூம் என்று நான்கு தளங்களில் விரிந்திருக்கிறது. 4வது தளத்தில் எல்லா மொழி புத்தகங்களும் இருக்கின்றன. 

தமிழ்ப் பகுதியில் பெரும்பாலும் ஸ்ரீலங்காவைச் சேர்ந்த எழுத்தாளர்கள் எழுதிய புத்தகங்களைத் இருக்கின்றன. அவற்றிற்கு இடையில் அம்பையின் 'அம்மா ஒரு கொலை செய்தாள்' சிறுகதை தொகுப்பு எடுத்து வந்தேன். 

பத்திரிகைகளும் இருந்தன. என்ன ஆ.வி., கலைமகள் போன்றவை இவ்வளவு மெலிந்து விட்டன?

மிஸிஸாகா சென்ட்ரல் லைப்ரரி அருகில் புத்தகங்களை அடுக்கி வைத்திருப்பதைப் போன்ற டவர்.

நெல்லைத்தமிழன் :

சில படங்கள் எடுக்கும்போது மிக நன்றாக அமைந்துவிடும். இது பஹ்ரைன் கடற்கரையில் எடுத்தது. மாலை வேளை. சூரியன் மறையப்போகிறது. அங்குள்ள ஸ்பீட் போட்களில் எனக்கு பிரயாணம் செய்ய கொஞ்சம் பயம்தான். நான் பக்கத்தில் இருக்கும் தீவுகளுக்கெல்லாம் பயணித்திருக்கிறேன். ஒரு சில நேரங்களில் கடலில் ஆயிரக்கணக்கான (குறைத்துத்தான் சொல்கிறேன்) ஜெல்லி மீன்கள் இருக்கும். அதன் நடுவே போட் செல்லும்.  உங்களுக்குத் தெரியும்னு நினைக்கிறேன். ஜெல்லி மீன்கள் நம் கால்களில் பட்டால் அரிக்கும். 

அங்கெல்லாம் (பஹ்ரைனில்) கடற்கரைகளில் கும்பல் இருக்காது. பயம் கிடையாது. அமைதியாக உட்கார்ந்து கடலை ரசிக்கலாம். அலையும் அதிகமில்லை. ஏரிபோலத்தான் தோன்றும்.  பஹ்ரைன் தேசமே நிறைய தீவுகளால் ஆனது. கொஞ்சம் கொஞ்சமாக எல்லாவற்றையும் இணத்ததால் ஒரே நாடுபோலத் தோன்றினாலும், ஒரு சில இடங்களுக்குச் செல்ல கடல் மேல் போட்டிருக்கும் பாலத்தின் வழியாகச் செல்லவேண்டும்.

= = = = = = =

KGG பக்கம் : 

சரோஜாதேவி தொடர் கதை 

சென்ற வாரம் - சுட்டி : பகுதி 11 : " நாநாவின் திட்டம் : MCEL 01" 

இனி 

இந்த வாரப் பகுதி. 

பகுதி 12 : " நாநாவின் திட்டம் : MCEL 02 " 

அரோகரா பாங்க் பார்க்கிங் பகுதியில் காரை நிறுத்திய பாபாவிடம் நாநா சொன்னான்: " பாபா நீ மேனேஜரிடம் பேசி நமக்கு வேண்டிய விஷயங்களை தெரிந்து கொண்ட பின் முதலில் திரும்ப வந்தால் என்னைத் தேடாதே. நீ உருவமாக இருந்து உள்ளே பேசிக் கொண்டு இருக்கும்போது நான் உள்ளே அருவமாக இருந்து சில வேலைகள் செய்ய வேண்டும். நான் திரும்பி வந்த பிறகு நீ காரை எடுக்கலாம். அதுவரை நீ காரில் காத்திரு " என்று சொல்லி அருவமாகி காரிலிருந்து இறங்கிச் சென்றான். 

அதன்பின் பாபாவும் காரிலிருந்து இறங்கிச் சென்றான். 

மேனேஜர் அறைக்குள் நுழைய அவரிடம் அனுமதி பெற்று உள்ளே நுழைந்தான் பாபா. 

தன்னை ஒரு ப்ரைவேட் டிடெக்டிவ் என்று அறிமுகப் படுத்திக் கொண்டு, தன் க்ளையண்ட் சார்பாக ஒரு சில விவரங்கள் வேண்டும் என்று கேட்டான் பாபா. 

எந்த டிடெக்டிவ் ஏஜென்சி, என்ன வகை தகவல் என்று விவரங்கள் கேட்டுக் கொண்டார் மேனேஜர். 

பிறகு , " உங்களுக்கு எங்கள் வாடிக்கையாளர் பற்றி சில தகவல்கள் மட்டுமே அளிக்க முடியும். அதை கூட மறுக்கும் உரிமை எங்களுக்கு உண்டு. ஆனாலும் உங்களுக்காக சில அடிப்படை தகவல்கள் மட்டும் கொடுக்க முயற்சி செய்கிறேன். நீங்கள் அதோ அங்கே உட்கார்ந்து இருக்கின்ற சுபத்ரா கிட்ட போய் கேட்க நினைக்கிற தகவல்களைக் கேளுங்க" என்று சொல்லி அனுப்பினார். 

பாபா அவர் அறையிலிருந்து வெளியே வந்தவுடன் மேனேஜர் சுபத்ராவை தொலைபேசி மூலம் அழைத்து சில இன்ஸ்ட்ரக்ஷன்ஸ் கொடுத்தார். அவற்றை எல்லாம் அருவமாக அங்கே இருந்த நாநா கேட்டு உடனடியாக பாபாவின் எண்ணுக்கு சில தகவல்கள் அனுப்பினான். 

சுபத்ராவின் இருக்கைக்கு அருகில் சென்ற பாபா, சுபத்ரா ஃபோனில் பேசி முடிக்கும் வரை காத்திருந்தான். அதே நேரத்தில் நாநா அனுப்பிய செய்தியையும் படித்தான். சுபத்ரா விடம் என்ன தகவல்கள் கேட்க வேண்டும் என்று தெரிந்துகொண்டான். 

சுபத்ரா ஃபோனில் பேசி முடிந்தவுடன் தன்னை அறிமுகம் செய்து கொண்டு தகவல்களை ஒவ்வொன்றாகக் கேட்க ஆரம்பித்தான். 

சுபத்ரா கம்ப்யூட்டர் திரையில் பார்த்து, சில தகவல்கள் கொடுத்தார். 

நாநா சுபத்ரா இருக்கையின் பின்னால் அருவமாக இருந்தபடி கம்ப்யூட்டர் திரையில் ஓடிய தகவல்களை வீடியோ எடுத்துக் கொண்டான். 

பிறகு பாபா சுபத்ராவிற்கு நன்றி சொல்லி விடை பெற்றான். 

நேரே மேனேஜர் அறைக்குச் சென்று அவருக்கும் நன்றி தெரிவித்துவிட்டு புறப்பட்டான். 

மேனேஜர் ஃபோன் செய்து சுபத்ராவை தன் அறைக்கு அழைத்தார்.

தன் அறைக்கு வந்த சுபத்ராவிடம் பாபா என்ன தகவல்கள் கேட்டார் அதற்கு என்ன விவரங்கள் கொடுக்கப்பட்டன என்று கேட்டுத் தெரிந்து கொண்டார். இருவரும் மேலும் சில விஷயங்கள் குறித்து பேசிக் கொண்டு இருந்தனர். 

எல்லாவற்றையும் அருவமாக இருந்த நாநா தன் ஃபோனில் பதிவு செய்து கொண்டான். 

காருக்குத் திரும்பிய பாபா, நாநாவின் வரவுக்காகக் காத்திருந்தான். 

சற்று நேரம் கழித்து கார் கதவைத் திறந்து கொண்டு உள்ளே வந்த நாநா அருவத்திலிருந்து உருவத்திற்கு வந்தான். 

வீட்டிற்கு வந்த பிறகு நாநா சேகரித்த தகவல்களை பாபாவுடன் பகிர்ந்து கொண்டான். 

சில பழைய டெப்பாஸிட் கணக்குகளை சுபத்ராவின் உதவியுடன் முடித்து, சில இலட்சங்களை இருவரும் எடுத்துக் கொண்டு விட்டனர் என்பது தெரிந்தது பாபாவுக்கும் நாநாவுக்கும். 

" என்ன செய்யலாம்? போலீஸ் கம்ப்ளெய்ண்ட் கொடுக்கலாமா?" என்று கேட்டான் பாபா. 

" அதெல்லாம் நமக்கு சரிப்பட்டு வராது. போலீஸ் இந்த கேஸ் எல்லாம் எடுத்துக்க மாட்டார்கள். எஃப் ஐ ஆர் கூட பதிவு செய்யமாட்டார்கள். இதில் நமக்கு என்ன சம்பந்தம் என்று கேட்பார்கள். நாம் எந்த வகையிலும் பாதிக்கப்படவில்லை என்றால், ' பேசாம போங்க ஸார் நாட்டுல இந்த மாதிரி எவ்வளவோ நடக்குது. இதில் போய் அனாவசியமாக உங்க டயத்தையும் எங்க டயத்தையும் வேஸ்ட் செய்ய வேண்டுமா? என்று சொல்லி அனுப்பிவிடுவார்கள்" என்றான் நாநா. 

" அப்போ இந்த தகவல்களால் யாருக்கு என்ன லாபம்? " என்று கேட்டான் பாபா. 

" அங்கேதான் இருக்கு இந்த நாநாவின் சாதுரியம்.‌ நாளக்கி நம்ம முரளீஸ் கஃபே முரளியை அழைத்துக்கொண்டு போய், அவருக்கு வேண்டிய பாங்க் லோனை வாங்கிக் கொடுத்துவிடுவேன். அதற்கு இன்று எனக்குக் கிடைத்த சில தகவல்களைப் பயன்படுத்திக் கொள்வேன்" என்றான் நாநா. 

" சரிதான். யாருக்காவது பயன் இருந்தால் சரி" என்றான் பாபா.‌

(தொடரும்)