உணவு உடை இருப்பிடம் - எது மிக முக்கியம்?

 

நெல்லைத்தமிழன் : 

1. இறப்பு என்பது என்ன? ஆன்மாவை நாம் காண முடிவதில்லை, உடலைத்தான் காண்கிறோம். அப்படியென்றால் ஆன்மா எங்கு சென்றிருக்கும்?    

# இந்தக் கேள்விக்கு பதில் சொல்ல எனக்குத் தகுதியில்லை.  நானும் கேட்டுக் கொண்டிருக்கும் கேள்விதான்.

& கண்டவர் விண்டிலர். விண்டவர் கண்டிலர். 

2.  இப்படி கஷ்டப்படுவதைக் காட்டிலும் செத்துப்போகலாம் என்று சொல்பவர்கள் எல்லோரும், இறப்பதற்குத் தயாராக இருப்பார்களா?  

# சலித்துக்கொள்பவர்களுக்கு அந்தத் துணிவு இராது என்பது என் கருத்து.

3.  சிலருக்கு மாத்திரம் அளவாக உண்ணத் தெரியும், அந்த ஒழுங்கு இருப்பதன் ரகசியம் என்ன? எனக்குத் தெரிந்த சிலர், ஒரு இனிப்பு அல்லது பாதி அளவு மாத்திரம் எடுத்துக்கொள்வார்கள். இரவு உணவாக இரண்டு பூரி அல்லது தோசை மாத்திரம் எடுத்துக்கொண்டு இடத்தைவிட்டு நகர்ந்துவிடுவார்கள். (எனக்கு அந்த மாதிரி ஒழுங்கு வருவதில்லை)

#    எனக்கும் தீனிகள் கட்டுப்பாடு இல்லைதான்.

& எனக்கு உணவு விஷயத்தில் கட்டுப்பாடு எப்போதும் உண்டு. 

4.  உணவு உடை இருப்பிடம் இந்த மூன்றும் மனிதனுக்கு மிக மிக அவசியம் என்பார்கள். இதில் எது மிக முக்கியம்?    

# அதே வரிசை சரியாகவே இருக்கிறது.‌

& உணவு முக்கியம். அடுத்தது ஆரோக்கியம். அது இருந்தால் சந்தோஷம். சந்தோஷம் இருந்தால் உடை & இருப்பிடம் 

5.  நடிகைகளின் படத்தைத் தேர்ந்தெடுத்துப் போடும்படியாக ஒருவரும் கேள்வி கேட்பதில்லையே என்று நொந்துகொண்டிருக்கிறீர்களா?

# எனக்கு அந்த ஆர்வம் இல்லை.‌

& ஆமாம் தலைவரே! ஹூம் நம்ம ரெண்டு பேரையும் புரிஞ்சிக்க ஆள் இல்லாம போச்சு!! ( 'னா' ரசிகர்   மன்றம் - 'கா' ரசிகர் நிலை என்ன ?? ) 

6. எல்லை மாநிலங்களில், அதிலும் குறிப்பாக கிராமங்களில் வாழும் மக்கள் எப்போதும் பயத்தில்தானே இருப்பார்கள்?  எந்த போரோ இல்லை பிரச்சனைகளோ வந்தால் அவர்கள் வாழ்வாதாரம்தானே முதலில் பாதிக்கப்படும். அதற்காக அவர்களுக்கு அரசு என்ன செய்யவேண்டும் என்று நினைக்கிறீர்கள்?

# இந்த ஆபத்து அவர்களுக்குப் பழகிப் போயிருக்கும். அரசுகள் முறையான முன்னெச்சரிக்கைகளை இயன்றவரை செய்து கொண்டுதான் இருக்கின்றன.

7. ஊரில் ஒரு பெண்ணுக்கு அல்லது ஒரு பையனுக்குத் திருமணம் நடக்கணும் என்று பாடுபட்ட நலம் விரும்பிகளுக்கு (நான் சொல்வது 50 வருடங்களுக்கு முன்பு), ஒரு கைகுலுக்கலும் தேங்காய் பழம் வெற்றிலை கொடுத்து அவங்க முக்கியத்துவம் புரியாமல் நம் முன்னோர்கள் நடந்த விதத்துக்கான பழிவாங்கலா தற்கால திருமண தகவல் மையங்கள், இணையங்கள்?  ரெஜிஸ்டர் செய்வதற்கே இத்தனை ஆயிரம், அதுவும் ஆறு மாதங்களுக்குள், நீங்களே தேர்ந்தெடுத்து அடுத்த வேலையைப் பார்த்துக்கொள்ளுங்கள், நாங்கள் பொறுப்பல்ல என்று கம்பெனி போல நடத்தும் திருமண தகவல் இணைய தளங்கள் மிகவும் பெருகிவிட்டிருக்கின்றனவே, அதனால் எழும் கேள்வி இது.

# இன்றைய திருமண மையங்கள் காலத்தின் கட்டாயம். அந்த காலத்தில் ஒரு சிறு வட்டத்துக்குள் பெண் கொடுக்கல் வாங்கல் நடைபெற்று வந்தது. உலகளாவிய பொருளாதாரம் வந்தபின் மாப்பிள்ளை பையன்களும் மணமகள்களும் உலகின் பல மூலைகளுக்கும் பணியாற்றப் போய்விட்டார்கள்.  டிமாண்ட்  - சப்ளை பொருத்தம் பார்த்து இந்த தொழில் பல்கிப் பெருகிப் போய் இருக்கிறது.

8. ஒரு ஸ்லோகம் சொல்வது,  அதன் அர்த்தத்தைச் சொல்வது  இரண்டில் எது சிறந்தது? அதாவது பலனைக் கொடுக்கக்கூடியது எது?

# அர்த்தம் தெரிந்து ரசனையாகச் சொல்வது அளவற்ற மன அமைதி தரும்.  "  பலன் " என்பது அவரவர் நம்பிக்கை சார்ந்தது.  " நம்பினவர்க்கு நடராஜா " என்பார்கள்.‌

பானுமதி வெங்கடேஸ்வரன்: 

நம் ஊரில் ஒரு காலத்தில் ஆங்கிலோ இந்தியர்கள் என்று ஒரு இனம் இருந்ததே? அவர்கள் என்ன ஆனார்கள்?

# பாலில் இட்ட சர்க்கரையாக ஒன்றிப் போனார்கள்.

சென்னையில் இன்றும் மெட்ராஸ் பாஷை பேசுகிறவர்கள் இருக்கிறார்களா?

# இருக்கிறார்கள்.  ஆனால் டிக்காஷன் கம்மி.

உங்கள் அபிமான எழுத்தாளர் எழுதிய, நீங்கள் படிக்க விரும்பிய நாவல் அச்சு புத்தகமாகவும், ஒலிப் புத்தகமாகவும் உங்கள் முன் இருக்கிறது, நீங்கள் எதை தேர்ந்தெடுப்பீர்கள்?

# அச்சுதான். 

நம் அபிமான கதாபாத்திரங்களின் குரல்கள் நம் மனதில் ஏற்றி வைத்திருப்பதை ஒத்திருந்தால்தான் திருப்தி.‌

சினிமாவில் வஸந்த் ஆக நடித்தவரை திரையில் பார்த்த போது உண்டான ஏமாற்றம் மறந்துவிட்டதா ?

எங்கள் ப்ளாகில் சனிக்கிழமை பதிவுக்கு பின்னூட்டங்கள் குறைவாக இருக்க காரணம் என்ன? E.B followers are not positive or what?

# இதற்கு வழக்கமாக இதர பதிவுகளுக்குப்  பின்னூட்டம் தருபவர்கள் தான் பதில் சொல்ல வேண்டும்.

= = = = = = = = =

படமும் பதமும் : 

பானுமதி வெங்கடேஸ்வரன்: 

இப்படி இரண்டு மரங்களை பார்த்ததும், யசோதா கட்டிப் போட்ட உரலை இழுத்துக் கொண்டு இப்படிப்பட்ட மரங்களுக்கு இடையேதான் கிருஷ்ணன் புகுந்து புறப்பட்டானோ? என்று தோன்றியது. என் பேத்தியும் இதையே சொன்னாள்! 

ஸ்ரீராம் : 

அவைகள் 

எருக்கையிலே, வசிக்கையிலே, இருக்கையிலே, நடக்கையிலே...எடுத்த படம். 

இலையின் ஓரமாய் நடக்கிறேன்.  

பக்கப் 

பார்வையால் உன்னை கடக்கிறேன்.

பாதாளத்தை பார்க்காமல் 

பாலம் கடக்கிறேன். 

கவனம் கலைக்காதே.

விழுந்தாலும் 

இன்னொரு 

இலையில் தான் 

விழுவேன். 

இல்லை என்று 

ஆக மாட்டேன்!

நெல்லைத்தமிழன்: 

நம் தமிழக கோயில் கலாச்சாரத்தைப் பெருமிதப்படும் விதமாகவும், சோழ தேசத்தின் மஹோன்னதனமான அரசன் இராஜேந்திர சோழன் கட்டிய கங்கைகொண்ட சோழபுரத்துக்கு பாரதப் பிரதமர் வருகை தந்தது என்பதே நம் எல்லோருக்கும் பெருமை தரும் விஷயம். நான் மோடியிடம் காணும் தனிப்பட்ட குணம், கோயில்களுக்கு உரிய மரியாதை தருவதும், அந்த அந்த மாநிலங்களுக்குச் செல்லும்போது, மாநில கலாச்சாரத்தைப் பின்பற்றும் விதமாக உடையணிவதும்தான். இந்த கங்கைகொண்ட சோழபுரம் கோயிலுக்கு நான் சென்றிருக்கிறேன், ஞாயிறு பகுதிக்கு தயார் செய்துகொண்டிருக்கிறேன் என்பதையும் இங்கே சொல்லிக்கொள்கிறேன்

= = = = = = = = = =

KGG பக்கம் : 

நடைப் பயிற்சியின்போது தரையில் காணப்பட்ட ஏதோ ஒரு நீர் கழுவல். அதில் தெரிந்தது விநாயகர் உருவம். அதன் மீது உதிர்ந்திருந்த சில பூ இதழ்கள். அரிய காட்சி!

= = = = = 

என்னதான் அவர்கள் ஸ்வீட் வாட்டர், ஸ்பிரிங் வாட்டர் என்று போட்டுக் கொண்டாலும் - ( எங்கள் அடுக்ககத்திற்கு தண்ணீர் சப்ளை செய்பவர்கள்) .. 

வருகின்ற தண்ணீரில் பெரும்பாலும் பாசி நாற்றம் & மீன் நாற்றம் வருகிறது. 

தேவுடா தேவுடா !

இல்லையேல் பயங்கர குளோரின் வாடை வரும். 

= = = = = = = = = =