"திங்கக்கிழமை 180702 : கேப்ஸிகம் மசாலா

சென்ற வாரம் பிரபல சமையல் நிபுணர் புஷ்பா ஸ்ரீதருடன் பேசிக்கொண்டிருந்தார் என் பாஸ். ஏதேதோ பேசிக் கொண்டிருந்தார்கள்.  பேசிக்கொண்டிருந்தபோது அந்த வரலாற்று முக்கியத்துவம் வாய்ந்த கேள்வியைக் கேட்டார் பாஸ்.

"இன்று இரவுக்கு என்ன டிஃபன்?"

"சப்பாத்தி"

"தொட்டுக்கொள்ள?"

"கேப்ஸிகம் மசாலா"

(தலைப்பு இங்கே வந்து விட்டது, கட்டுரை முடிந்து விட்டது என்று நினைத்துக் கொள்பவர்களை பசிக்காத புலி பார்க்கட்டும்)

"கேப்ஸிகம் மசாலாவா?  என்ன செய்வே?  எப்படின்னு சொல்லு..."

பிரபல நிபுணரை ஒருமையில் பேசுகிறாரே பாஸ் என்று உங்களுக்கு சந்தேகம் கலந்த ஆச்சர்யம்  வரலாம்.  நிபுணர் பாஸின் அக்கா ஆச்சே!  அப்புறம் இன்னொரு விஷயம்.  பாஸும் ஒரு நிபுணரே!

அக்கா சொன்ன ரெஸிப்பியை கடந்த 26 ஆம் தேதி செய்து சுவைத்து ரசித்தோம்.  அதை உங்களுடன் பகிர்ந்து கொள்ளலாம் என்று எண்ணுகிறேன்.

இதை நீங்கள் அறிந்திருக்கக் கூடும்.  நான் அறிந்திருக்கவில்லை.  

இதை நீங்கள் செய்து சுவைத்திருக்கக் கூடும்.  நான் சுவைத்ததில்லை.  இதைச் சொல்லவேண்டியது என் கடமை!

எனவே புதுசு போலவே பகிர்ந்து கொள்கிறேன்.  நீங்களும் புதுசு போலவே படியுங்கள்.  ஏதோ ஒன்றிரண்டு பேராவது "இது நான் செய்ததில்லை, நன்றி" என்று சொன்னால் சந்தோஷம்.  (நிச்சயம் இந்த வார்த்தையை கீதா ரெங்கன் சொல்ல மாட்டார்) சொல்லா விட்டாலும் சந்தோஷம்!  ஹி.. ஹி..  ஹி...

ஆறு பேர்களுக்கான அளவில் செய்முறை சொல்கிறேன்.

மூன்று கேப்ஸிகம் எடுத்துக் கொள்ளுங்கள்.  மூன்று பெரிய வெங்காயம்,  இரண்டு தக்காளி (நாங்கள் காவிரி நகரத் தக்காளி எடுத்துக் கொண்டோம்)

தக்காளி, ஒரு பத்து பல் பூண்டு, கொஞ்சம் இஞ்சி, எட்டு பச்சை மிளகாய் நாலு முந்திரிப்பருப்பு ஆகியவற்றை அப்படியே வதக்காமல் மிக்சியில் இட்டு அரைத்துக் கொண்டோம்.

கேப்ஸிகத்தை மீடியமாக, சிறு துண்டுகளாக நறுக்கிக்கொண்டு. வெங்காயத்தையும் நறுக்கிக் கொண்டோம்.

வாணலியில் எண்ணெயிட்டு (நாங்கள் தேங்காய் எண்ணெய் உபயோகித்தோம்) வெங்காயத்தை முதலில் போட்டு வதக்கிக்கொண்டு, அப்புறம் கேப்ஸிகத்தையும் சேர்த்து வதக்கவேண்டும்.  மஞ்சள்பொடி சேர்க்கச் சொன்னார் அக்கா.  ஆனால் நாங்கள் சேர்க்கவில்லை.  காரணம்...  அது எதற்கு?  சேர்க்கவில்லை, அவ்வளவுதான்!

அரைத்த விழுதைச் சேர்த்து, தேவையான அளவு  உப்பு சேர்த்து, போதுமான அளவு தண்ணீர் ஊற்றி, தேவையான அளவு காரப்பொடி, கரம் மசாலா சேர்த்து கொதி வந்ததும் இறக்கிவிடவேண்டியதுதான்.

அக்கா தேங்காய் அரைத்துவிடச் சொல்லவில்லை என்றாலும் நாங்கள் சேர்த்தோம்.

இதுவரை நாங்கள் சுவைத்திராத சுவை.  ரசித்தோம்.

[ இதைச் செய்த பாஸுக்கு படங்கள் எடுக்கும் பழக்கம் இல்லாததால் கடைசியாக தயாரான மசாலாவை மட்டுமே இப்போதைய படமாகச் சேர்க்கிறேன்.  குடைமிளகாய், வெங்காயம் போன்றவை ஏற்கெனவே குடைமிளகாய் - உருளை -வெங்காயத்தாள் மசாலாவுக்காக எடுக்கப்பட்டவை.  அதை முன்பு வெளியிட்டேன் என்று நினைவு! ]