பதன் 190213: பேசுவது கிளியா ?

சென்ற வாரம், நான் கேட்டிருந்த கேள்வி, 

" இந்தக் கேள்வியை யாராவது என்னைக் கேட்கமாட்டார்களா ..... என்று நீங்கள் ஏங்குகின்ற கேள்வி, எந்தக் கேள்வி?" 

இந்தக் கேள்வியை நான் கேட்டதற்கு முக்கிய காரணம், உங்களில் எவ்வளவு பேர், சந்தர்ப்பத்தைப் பயன்படுத்தி, உங்களின் அறியப்படாத திறமைகளை, வெளியுலகின் பார்வைக்குக் கொண்டுவர முயற்சி செய்கிறீர்கள் என்று பார்க்கத்தான். பானுமதி வெங்கடேஸ்வரன் கொஞ்சம் முயற்சி செய்துள்ளார். மற்றவர்கள்? ஹூம்! ஒன்றும் தேறவில்லை. 

பதிவில் வந்த கேள்வி :

கீதா சாம்பசிவம்: 

     

என்னிடம் நீங்கள் கேட்க விரும்பும் முக்கியக் கேள்வி என்ன?

& புத்தகங்கள் பல எழுதுகிறீர்கள்; சமையல், ஆன்மிகம், பதிவுகள் என்று எல்லா வகையிலும் கலக்குகிறீர்கள். வீட்டு நிர்வாகத்தையும் திறம்பட செய்கிறீர்கள். எப்படி எல்லாவற்றுக்கும் நேரம் கிடைக்கிறது?

              

படைப்பாற்றல் என்பது வேறு, இலக்கை அடைதல் என்பது முற்றிலும் வேறு இல்லையோ?

             

& இல்லை என்பதை சென்ற பதிவின் பின்னூட்டத்திலேயே தெளிவுபடுத்தி உள்ளேன். படைப்பு (creation) என்பது வேறு, படைப்பாற்றல் (Creativity) என்பது வேறு. 

        

நான் படம் வரைகிறேன் - என்றால் அந்தப் படம் ஒரு படைப்பு. ஒரு நோக்கத்திற்காக (உதாரணம் : 'சிக்கனம் வாழ்வில் முக்கியம்' என்பதை வலியுறுத்த) ஒரு படம் வரையவேண்டும் என்று நான் முனைந்தால், படைப்பாற்றலுக்கு அது ஆரம்பம். என்ன படம், எப்படி வரைவேன், எதைப் பயன்படுத்தி வரைவேன், அது வெற்றிகரமாக அடைய வேண்டிய ஆட்களிடம் எப்படி எடுத்துச் செல்வேன் ----- இன்ன பிற கேள்விகளைக் கேட்டு, அவைகள் எல்லாவற்றையும் சிறந்த வகையில் நிறைவேற்றினால், நான் ஒரு படைப்பாற்றல் மிக்கவன். (மீண்டும் சொல்கிறேன், இதுவும் குருடன் கண்ட யானை விளக்கம்தான்!) 

   

மனிதர்கள் மட்டும் அல்ல, எல்லா உயிரினங்களும் படைப்பாற்றல் கொண்டவைகள்தாம். எப்படி? யோசியுங்கள். 

     
ஏஞ்சல் : 

இது உனக்குத் தேவையா? 

& எது? 

வாட்ஸ் அப் கேள்விகள் :

பானுமதி வெங்கடேஸ்வரன் :

             

ஏதாவது ஒரு 20/20 மேட்சில் ஒரு டீமுக்கான விளையாட்டு வீரர்களை தேர்ந்தெடுக்கும் வாய்ப்பு உங்களுக்கு கிடைத்தால் யார் யாரை தேர்ந்தெடுப்பீர்கள்? ஏன்? அதில் யாரை கேப்டன் ஆக்குவீர்கள்?

#எனக்கு கிரிக்கெட் அவ்வளவு தெரியாது. தோனியை இதர ஆட்டக்காரர்களை செலக்ட் செய்யச் சொல்லி விடுவேன். தோனிதான் காப்டன்.

& 

1 பிராட்மன் (காப்டன்) 

2 சோபர்ஸ் 

3 ரிச்சார்ட்ஸ்

4 டென்னிஸ் லிலீ 

5 ஷேன் வார்ன் 

6  அக்ரம் 

7  லாரா 

8  ஜெயசூர்யா 

9  மெக்ராத் 

10  ஸ்டீவ் வா 

11  க்ரிஸ் கெயில் 

12th Man : கௌதமன் 

அம்பயர் 1: ஸ்ரீராம்.

அம்பயர் 2: கே ஜி (சுப்ரமணியன்) 

தே(ர்)டு அம்பயர் : அனுஷ்கா. (கூட்டத்துல ஒருவராவது இளமையாக இருக்கவேண்டுமே!) 

என்னுடைய பதிவில் ஒரு கணக்கு புதிர் போட்டிருந்தேன். அதற்கு சரியான விடை யாரும் தரவில்லை, எனவே உங்களுக்கு திருப்புகிறேன்.

ஒற்றை இலக்க எண் ஒன்றை இரண்டு முறை மட்டுமே பயன்படுத்தி அதிகபட்ச மதிப்புள்ள எண்ணை பெற வேண்டும். அந்த எண்களுக்கு இடையே +,-,×,÷ போன்ற குறிகளை பயன்படுத்த கூடாது.

# 9 power 9 அதாவது - முதல் 9 பெரிசு அதன் பின் சின்ன 9 சற்றே உயரத்தில்.

  

நிஜமாகவே கிளிகள் பேசுமா? அப்படிப்பட்ட கிளியை பார்த்திருக்கிறீர்களா?


# பேசாதுதான்.  ஆனால் அந்த "கீ கிக்கீ " ஒலியிலேயே சில வார்த்தைகளை பேசுவது போன்ற பிரமை உண்டாகும்.  மதுரை மீனாட்சி கோயில் கூண்டுகளில் இருந்த கிளிகள் "மீ. . . னா..ட்சி" எனக் கூவுவது மாதிரி எஃபெக்ட் தருவதைக் கேட்டிருக்கிறேன்.

& அது என்னவோ நான் பார்த்த கிளிகள் எதுவும் இதுவரை என் முன்னால் பேசியது இல்லை. கன்னடத்துப் பைங்கிளி (பேசுவது கிளியா, இல்லை .... பெண்ணரசி மொழியா!) உட்பட! 

ஆனால் கிளி பேசுவது குறித்து நிறைய ஜோக்குகள் கேள்விப்பட்டிருக்கின்றேன். பச்சை(க்கிளி) ஜோக்குகள் தவிர்த்துப் பார்த்தால், தேறிய ஒரு ஜோக்:

கடைக்காரர் : " சார் - இந்த கிளியை வாங்கிக்குங்க சார் . இது பேசும் கிளி சார்!"

பெட் வாங்க வந்தவர்: " அப்படி என்னதான் பேசும் இந்தக் கிளி?"

கடைக்காரர் : " இதனுடைய இடது காலைப் பிடித்து இழுத்தீர்கள் என்றால், ஏதேனும் ஒரு திருக்குறள் சொல்லும். வலது காலைப்  பிடித்து இழுத்தீர்கள் என்றால் ஏதேனும் ஒரு பழமொழி சொல்லும்."

பெ வா வ : " இரண்டு காலையும் சேர்த்துப் பிடித்து இழுத்தால் .......?"

கிளி : " நான் தலைகுப்புற விழுந்துடுவேண்டா மூதேவி!"

=================================================

எங்கள் கேள்வி:  

உங்கள் வீட்டுத் தோட்டத்தில் ஒரு உயரமான மாமரம். முப்பது+ அடி உயரம் என்று வைத்துக்கொள்ளுங்கள். அதன் உச்சாணிக் கிளையில் ஒரு மாம்பழம். வீட்டில் அலகு கிடையாது. யாருக்கும் மரம் ஏறத் தெரியாது. அந்த மாம்பழத்தை சேதப்படாமல் பறித்து உங்கள் கைக்கு முழு மாம்பழமாக கொண்டுவரவேண்டும். இது இலக்கு. இந்த இலக்கை அடைய நீங்கள் எந்தெந்த வழிகளில் முயற்சி மேற்கொள்வீர்கள்? 

குறிப்பு : வழக்கம்போல் - இந்தக் கேள்விக்கு(ம்) ஒன்றுதான் சரியான பதில் என்று கிடையாது. நிறைய பதில்கள் இருக்கு. நீங்கள் இலக்கை அடைய என்னென்ன யோசனைகள் செய்கிறீர்களோ அந்த அளவுக்கு படைப்பாற்றல் உங்களுக்கு இருக்கு. தயங்காமல் Brain storming தொடங்குங்க. 

=================================================

மீண்டும் சந்திப்போம்!