வெள்ளி வீடியோ : நடுவீதியில் நடப்பேன் மனம் வாடிப்போய் இசை படிப்பேன்

இன்றைய தனிப்பாடல் சூலமங்கலம் சகோதரிகள்  பாடிய பாடல் ஒன்று.

கலைவாணன் எழுதிய பாடலுக்கு குன்னக்குடி வைத்தியநாதன் இசை.

இந்தப் பாடல்தான் பழனி அருள்மிகு பழனி ஆண்டவர் கல்லூரி பிரேயர் பாடலாம்.

இறைவனுக்கே நீ இறைவனப்பா 

எனக்கருள வேண்டும் பழனியப்பா - அப்பா. (இறைவனுக்கே ).   

குறைவில்லா வாழ்வு தரும் குமரனப்பா 

ஈசனுக்கு நீ தகப்பன் சாமியப்பா  

அம்மையப்பா பழனியப்பா. (இறைவனுக்கே).   

வா என்று அழைக்குமுன்னே வருகை தரும் வரதனப்பா   

தா என்று கேட்குமுன்னே வரம் தரும் குமரனப்பா  

கூவுகின்ற சேவல் கொடி தாங்கி நிற்கும் கந்தனப்பா  

குன்றுதோறும் ஆடுகின்ற சிங்கார வேலனப்பா 

அம்மையப்பா பழனியப்பா. 

========================================================================

யூகி சேதுவை அறிந்திருப்பீர்கள்.  நடிகராக, நையாண்டி தர்பார் நடத்திய விஜய் டீவி நிகழ்ச்சிக்காரராக அறிந்திருப்பீர்கள்.  எனக்கு அவர் முதலில் அறிமுகமானது அவர் கதாநாயகனாக நடித்து வெளியான படமொன்றின் பாடல் கேஸட்டின் மூலம்!

1993ல் வெளியான படம்.  இயக்கமும் யூகி சேதுதான்.  ஜோடியாக ரம்யா கிருஷ்ணன்.    அதில் டாப் ஸாங் தலைவர் பாடியது.  "மணித்தூறல் போடும்" பாடல்.  யூகி சேது இயக்கிய இரண்டாவது படம் இது.  முதல் படம் 'கவிதை பாட நேரம் இல்லை'.

வாலியின் பாடல்களுக்கு இசை வித்யாசாகர்.

இந்தப் படம் பற்றியே நிறைய பேர் அறிந்திருக்க மாட்டீர்கள்.  எனவே அநேகமாக பாடலும் இந்தப் பாடலும் கேட்டிருக்க மாட்டீர்கள்.  தயவு செய்து கேளுங்கள்.  குறிப்பாக சரணங்களில் பாலு இழைந்து, இழைத்திருப்பார்.

சில வருடங்களுக்கு முன்னால் கேட்டு ரசிக்க தேடியபோது ஒழுங்கான பாடல் கிடைக்கவில்லை.  இப்போது நல்ல தரத்தில் அப்லோட் செய்திருக்கிறார்கள்.  அந்த ஆரம்ப இசையையும் ரசித்துக் கேளுங்கள்.

நாயகன் அனாதை என்று தெரிகிறது.  அனாதை என்று யார்யாரோ அழைக்கும்போது குமுறும் மனம் தன் சோகத்தை பாடலைப் பாடியபடி நடக்கிறது.  இயற்கையிடம் முறையிடுகிறார், உரையாடுகிறார் பாடல் மூலம்.

SPB யின் மிகச் சிறந்த பாடல்களில் ஒன்று.  நான் மிக விரும்பிக் கேட்கும் பாடல்களில் ஒன்று.

மணி தூறல் போடும் மழைக்கால மேகக் கூட்டம் 

பனிக்காற்றில் ஆடும் பல ஜாதி பூக்கள் தோட்டம் 

மழையின் தந்தை யாரு மலரின் தந்தை யாரு 

மழையின் தந்தை யாரு மலரின் தந்தை யாரு 

மண்மீது யாரும் கேட்டதில்லையே [மணித்தூறல்]

யாரெதற்கு மூலம் என்று யாரும் சொல்லத்தான் சாத்தியமோ 

தேனிருக்கும் விருட்சமெல்லாம் தேனைக் கண்களால் பார்த்திடுமோ 

ஆயிரம் எழில் மொழி நாளும் காட்டிடும் 

யார் நடும் விதை இதை யாரைக் கேட்பது 

ஒரு தாய் என்னை சுமந்தாள் அவள் 

தந்தை பேர் சொல்ல மறந்தாள் 

இது என் தவறா குளிர் காற்றே கூறு  [மணித்தூறல்]

மாளிகையோ மண்குடிலோ ரெண்டும் சொந்தம்தான் திங்களுக்கு

பூக்கடையோ சாக்கடையோ பேதமில்லையே தென்றலுக்கு 

நானதன் இனம் என நாளும் வாழ்கிறேன் 

காற்றென தினம் தினம் கானம் சொல்கிறேன் 

நடுவீதியில் நடப்பேன் மனம் 

வாடிப்போய் இசை படிப்பேன் 

மனம்போல் பிழைக்கும் ஒரு ஜீவன் நான்தான்