ரூபாய் நோட்டுகளைக் கொடுக்கும்போது பழைய நோட்டாகப் பார்த்து ஏன் கொடுக்கிறோம்?

 

நெல்லைத்தமிழன் : 

நிறைய கிரிகெட் மேட்சுகளை நான் பார்க்க ஆரம்பிக்கும்போது, இடது கண் துடித்தால் தோல்வி உறுதி என்று பார்ப்பதை நிறுத்திவிடுவேன். ஸ்கோர் நிலை சரியில்லாதபோதும் வலதுகண் துடித்தால் வெற்றிபெறும். இது எப்படி நிகழ்கிறது? (3ம் ஒன்டேயில் 125 for 2 என்ற நிலையில் பார்க்க ஆரம்பித்தேன். நன்றாகச் சென்றுகொண்டிருந்த போதும் இடது கண் துடித்ததால் பார்ப்பதை நிறுத்திவிட்டேன். பிறகு அணி தோல்வியடைந்தது எனத் தெரிந்துகொண்டேன்)

# கண் துடிக்கவில்லை என்றால் டிரா ஆனதா? இதெல்லாம் தற்செயல் இல்லை என்றால் உங்களுக்கு ஞானதிருஷ்டி/தீர்க்கதரிசனம் உண்டு என்றுதான் சொல்லவேண்டும். இது அநியாயமாக கிரிக்கெட் ரிசல்டில் வீணாகிறதே என்ற வருத்தம் எழுகிறது.

& ஆஹா - நெ த என்று ஒரு தங்கச்சுரங்கம் இருப்பது இதுவரை தெரியாமல் போயிற்றே! நெ த - நமக்குள்ளே ஒரு டீல் போட்டுக்குவோம். மாட்ச் நடக்கும்போது எந்தக் கண் துடிக்கிறது + எந்த அணி வெற்றி என்று எனக்கு வாட்ஸ்அப் செய்தி அனுப்புங்க - அந்தத் தகவலை வைத்து நான் betting செய்து நிறைய பணம் சம்பாதித்துவிடுவேன். 

நம்மிடம் இருக்கும் ரூபாய் நோட்டுகளைக் கொடுக்கும்போது பழைய நோட்டாகப் பார்த்து ஏன் கொடுக்கிறோம்?

# பழையன கழிதல் நம் பண்பாடு.

& நான் அப்படி இல்லை. தேவை இல்லாத தண்ட செலவு ( காஸ் சிலிண்டர் கொண்டு வருபவருக்கு தருகின்ற டிப்ஸ் போன்றவை ) செய்கின்ற இடங்களில் மட்டும் (கையில் இருந்தால்) பழைய + கிழிந்த ரூபாய் நோட்டுகள் கொடுப்பது உண்டு. மற்ற இடங்களில் கைக்கு எது கிடைக்குதோ அந்த நோட்டு. 

ஏன் பெண் பேய்கள் மாத்திரமே உண்டு. ஆண் பிசாசு, கொள்ளிவாய், என்று எதுவுமே இல்லையே?

# Contrast காரணமாக இருக்கும். பெண் என்றால் அன்பு - அடக்கம் அல்லவா?பிசாசுகளில் ஆண் உண்டு. கொள்ளிவாய் Neuter.

& பெண் என்றால் பேயும் இரங்கும் என்று சொல்கிறார்களே - அப்போ ஆண் பேய்களும் (ஜொள்ளு பேய் ?) உண்டு என்றுதானே பொருள்? ( பெண்ணுக்கு பெண் பேய் இரங்காது !!) 

கலர் பேய்கள் ஏன் இல்லை? கலர் இருந்தாலே அங்கு கவர்ச்சி வந்துவிடும் என்பதாலா?

# பேய் க. வெ மட்டும் என்பது புதுச்செய்தி.

& ஹலோ நெ த எங்களை எல்லாம் பார்த்தால் உங்களுக்கு மனுஷங்களா பேய்களா தெரியலையா ? 

நடிகை நடிகர்கள் கதாபாத்திரத்தில் காயமோ ஆக்சிடன்டோ ஆனாலும் அழகு குறையாமல் மேக்கப் போடுவதன் காரணம் என்ன? மூஞ்சில அடிபட்டாலும் கண் வாய் முகம் உதடுலாம் பாதிப்படைந்த இல்லையே,. காரணம் என்ன? (இதைச் சாக்கிட்டாவது பாலைவனமாக இருக்கும் புதன் எபி பக்கத்தைச் சோலைவனமாக ஆக்குங்கள்)

# திரைப்படம் செலாவணி ஆக அழகுணர்வு முக்கியம்.

& எவ்வளவோ தேடிப் பார்த்தும் கூகிள் தளத்தில் முகத்தில் பிளாஸ்திரி போட்ட நடிகைகளின் படங்கள் கிடைக்கவில்லை. 

நீதி என்பதை எப்படி அறுதியிடுவது? அயோக்கியனும் கோர்ட்டில் நீதி கிடைக்கலைன்றான் (மோடி பெயருடையவர்கள் எல்லோரும் திருடர்கள் என்று ராகுல் ஃபெரோஸ் சொன்னதற்கு சூரத் நீதிமன்றம் 2 வருட தண்டனை கொடுத்ததை கமலஹாசன் நீதி சரியில்லைன்றான்)

# கருத்து என்ற பெயரில் யார் எது வேண்டுமானாலும் சொல்ல உரிமை அவர்களுக்கு உண்டு. அதை லட்சியம் செய்யாது புறந்தள்ளும் உரிமை நமக்கு உண்டு.

ஜெயக்குமார் சந்திரசேகரன் : 

வைணவத்தில் மாத்திரம் வடகலை தென்கலை என்ற பிரிவுகள் ஏன் எப்படி உண்டாயின? சைவத்தில் அது போன்று இருப்பதாகத் தெரியவில்லை. 

வடகலைக்கும் தென்கலைக்கும் நாமத்தைத் தவிர வேறு வித்தியாசங்கள் என்ன உள்ளன?

# நானும் இதுகுறித்து யோசித்ததுண்டு. வைணவ நண்பர் யாரேனும் விளக்கலாம். நான் கேட்டறிந்தது சரியா  என்ற சந்தேகம் இருப்பதால் அதைச் சொல்லத் தயக்கமாக இருக்கிறது.

& இந்தக் கேள்வியை நெல்லைத்தமிழன் அவர்களுக்கு அனுப்பினோம். அவர் எழுதியுள்ள பதில் இங்கே : 

நெ த : 

ஒரு கான்செப்டை விவரிக்கும்போது இரண்டு வித school of thought உருவாகிவிட்டது. இது உருவாகியது பொது ஆண்டு 1300களில் என்று சொல்கிறார்கள். காஞ்சீபுரத்தைத் தலைமையிடமாகக் கொண்ட வைணவ ஆச்சார்யர் வேதாந்த தேசிகன்,  ஸ்ரீரங்கத்தின் ஆச்சார்யரான பிள்ளைலோகாச்சார்யாரின் interpretationலிருந்து வேறுபட்டிருக்கிறார். பொழுது போகாதவர்கள், இதனை திமுக அதிமுக கட்சி மாதிரி ஆக்கிவிட்டார்கள்.  வைணவம், தென்னாச்சார்யார் சம்ப்ரதாயம், வடகலை சம்ப்ரதாயம்/தேசிக சம்ப்ரதாயம் என்று இரண்டாக ஆகிவிட்டது. மற்றபடி நூல்கள் எல்லாம் (இராமானுசர் காலத்தில் இருந்த) இருவருக்கும் பொதுவானவை (பிற்கால அந்த அந்தப் பிரிவு ஆச்சார்யர்கள் எழுதியதைத் தவிர).  சுருக்கமாகப் புரிந்துகொள்ள, தென்கலை பிரிவினர், தாய் பூனை குட்டியைக் கவ்விச் செல்வதைப் போல, ஸ்ரீமந் நாராயணன், தன் அடியவர்களைத் தானே கைப்பிடித்து வழிகாட்டுவார் என்கிறார்கள். வடகலை சம்ப்ரதாயத்தைச் சேர்ந்தவர்கள், குரங்குக் குட்டி, தன் தாயைப் பிடித்துக்கொள்வதைப் போல, நம்முடைய முயற்சியும் ஸ்ரீமந் நாராயணனை அடைய மிகவும் அவசியம் என்று சொல்கிறார்கள்.  (ஒரு தடவை நமஸ்கரித்தாலே பகவான், ஐயையோ நம் குழந்தை கஷ்டப்படுகிறதே போதும் போதும் என்று நினைப்பாராம், அதனால் தென்கலையினர் ஒரு தடவைதான் நமஸ்கரிப்பர். வடகலையினர் 3-4 முறை நமஸ்கரிப்பர். இதுபோன்று சில பல வேறுபாடுகள்தாம். Conceptsல் என்ன மாதிரியான வித்தியாசங்கள் என்று விவரிக்கப்போனால் அது மொத்தத்தில் பெரிய விஷயமாகத் தெரியாது, சாதாரண புரிதலுள்ளவர்களுக்கு.

திவ்யதேசக் கோவில்களில் பெரும்பாலானவை, தென்னாச்சார்ய சம்ப்ரதாயத்தைச் சேர்ந்தவர்களால் நிர்வகிக்கப்படுகிறது. இரு கலையினரும் அர்ச்சகர்களாக இருக்கும் கோவில்களும் உண்டு. தங்கள் கோவில்களில் மற்ற சம்ப்ரதாயத்தினர் ப்ரபந்தங்கள் சேவிக்கக்கூடாது, தங்கள் கோவிலைச் சேர்ந்த யானை, பல்லக்கு முதல் எல்லாவற்றிர்க்கும் தம் சம்ப்ரதாய நாமம் தான் போடவேண்டும் என்றெல்லாம் இரண்டு மூன்று நூற்றாண்டுகளுக்கு மேல் கட்சி கட்டியிருப்பதால், அதன் எச்சங்கள் இன்றும் அதிக அளவில் உண்டு.

சைவத்தில், மாத்வா, ஐயர், வடமா என்று பல்வேறு பிரிவுகள் உண்டு. அவர்களிலும் ஆச்சார்ய வேறுபாடுகள் உண்டு. உதாரணமாக காஞ்சீபுரம் மடம்,  ச்ருங்கேரி சாரதா பீடம் என்று பல்வேறு ஆச்சார்யர்கள் உண்டு. ஒரு ஆச்சாரியரைத் தொடருபவர்கள் மற்றவரைத் தொடரமாட்டார்கள். (காஞ்சி மஹாப்பெரியவாளின் சிஷ்யர்கள், பக்தர்கள், ச்ருங்கேரி சாரதா பீடம் பக்கம் செல்லமாட்டார்கள்). திருமண உறவுகளிலும் இதனைக் கவனிப்பார்கள்.  தற்காலத்தில், இத்தகைய போக்கு மிகவும் குறைந்துவருகிறது. 

பானுமதி வெங்கடேஸ்வரன்: 

இப்போதெல்லாம் திருமண விருந்துகளில் சைவ முட்டை, சைவ மீன் வறுவல் என்றெல்லாம் ஐட்டம் கள். இவற்றை சைவம் சாப்பிடுபவர்களால் என்ஜாய் பண்ண முடியுமா?

# மீன்முட்டை ருசி எப்படி இருக்கும் என்ற ஆர்வம் உள்ளவர்கள் அவற்றை ரசிக்கக் கூடும். 

என் அந்தக் கால நண்பர் சொன்னது : " மட்டன் சாப்பிட்டுப் பாருங்க , ரோஜாப்பூ மாதிரி குக் பண்ணியிருக்கோம். "

மாமிசம் ரோஜாப்பூ போல இருப்பதும் கத்தரிக்காய் கருவாடு மாதிரி இருப்பதும் விரும்பப்படுகிறது என்றுதான் ஆகிறது.

சூப்பர் மார்க்கெட் செல்கிறீர்கள், நீங்கள் வழக்கமாக வாங்கும் பருப்பு, எண்ணெய் போன்ற ப்ராண்டுகளோடு  டி.வி.யில் விளம்பரப்படுத்தப்படும் வேறு ஒரு ப்ராண்ட், விலையும் குறைவாக இருக்கிறது, எதை வாங்குவீர்கள்?

# புதுச் சரக்குகளை வாங்கி எப்படி இருக்கிறது என்று பார்ப்பது என் இயல்பு.

& விளம்பரம் இல்லாத வகை பொருட்கள் - விலை குறைவாக இருந்தால் வாங்கி உபயோகித்துப் பார்ப்பேன். நன்றாக இருந்தால் அதையே தொடர்ந்து வாங்குவேன். நான் வாங்கும் பொருட்கள் யாவும் நானே உபயோகப்படுத்திக்கொள்ளும் நிலையில் இருப்பதால், விலை குறைவான பொருட்களையே தேர்ந்தெடுப்பேன். 

இப்போதும் தள்ளு வண்டிகளில் காய்கறிகள், பழங்கள் விற்பனை செய்யப் படுகின்றன. பெரிய சூப்பர் மார்க்கெட்டுகள், சிறு வியாபாரிகளை விழுங்கி விடும் என்பது சரியில்லைதானே?

# பெரிய கடைகள் யாரோ சிறு வியாபாரியை பாதித்திருக்கும் என்பது சரியாக இருக்கக் கூடும். 

நாம் பார்த்த தள்ளு வண்டி நபர் ஒரு கடை வைத்திருக்கும் வாய்ப்பை இழந்தவராகவும் இருக்கலாம். 

மாறிவரும் வாழ்க்கைக் கிரமத்தில் இது தவிர்க்க இயலாத விஷயம்.

& அவர்கள் சொல்லும் சிறு வியாபாரிகள் தள்ளுவண்டிக்காரர்கள் அல்ல; நடைபாதை வியாபாரிகளும் அல்ல. இடமாற்றம் செய்ய இயலாத சிறு கடைகள் வைத்திருப்பவர்கள். 

= = = =  

அப்பாதுரை பக்கம் : 

கவனம்! 

டிவி பாக்குறோம்.. டிவி பாக்குறப்பவே செல் போன்ல ஏதோ தட்டி கருத்தா தேடிப் பாக்குறோம்.. பக்கத்துல யாரு இருக்காங்கனு கூட தெரியாது.

ஜேம்ஸுனு ஒரு ஆசாமி (பின்னே ரெண்டு பேரா) இந்தக்காலத்து இளைஞர். மதிய நேரம். கம்ப்யூடர் கையும் செல்போன் கண்ணும் ஏர்பாட் காதுமாக வீட்டுலருந்தபடி வேலை.  டேபிள்ல டோர்டேஷ்லந்து வந்த சைனீஸ் பரைட் ரைஸ். 

இப்படி வாழ்வாங்கு வாழ்ந்துட்டிருந்தவர் வீட்டுக் கதவை யாரோ பலமாகத் தட்டுவது இவருக்கு காதில் விழவில்லை. தட்டுவது ஏறக்குறைய இடிப்பது போல ஆனதும், கை கண் காது கவனம் மாறாமல் அமெசான் டெலிவரியை சபித்தபடி எழுந்து அப்படியே நடந்து கதவைத் திறந்தார். 

கதவைத் திறந்த சில நொடிகள் தாமதித்து கை கண் காது கவனம் மாறி அலறல் கவனமானார்.  தாமதத்தின் காரணம் நாலு வரி தள்ளி வருகிறது.

கதவைத் தட்டி இடித்தது அமெசான் டெலிவரி அல்ல. 

நாலடி நீள முதலை.

ஜேம்ஸு அலறியதன் காரணம் முதலை தரிசனம் அல்ல. ஏனெனில் அவர் கதவைத் திறந்த உடனே கை கண் காது சகிதம் கவனம் மாறாது திரும்பினார். ஆனால் முதலை திரும்பவில்லை. அவர் பின்னாலயே தொடர்ந்து உள்ளே வந்து ஜேம்ஸின் காலை லேசாக இழுத்தது. அதற்குப் பின் என்ன? அலறல் தான். 

தாமதித்தாலும் ஜேம்சை சும்மா சொல்லக்கூடாது. போர்க்கால சங்கு கெட அலறினார்.

முதலையே கவனமான ஜேம்ஸ் அருகிலிருந்த பேஸ்பால் மட்டையால் அதன் மண்டையில் ஒரு போடு போட்டார். அவர் அதிர்ஷ்டம் ஒரு கணம் முதலை வாய் திறக்க அடித்துப் புரண்டு எழுந்து ஓடினார். 

அடுத்த சில நிமிடங்கள் அங்கே நாம் இருந்திருந்தோமானால் மனித-முதலை ஓட்டப் பந்தயம் பார்த்திருப்போம். பார்க்க முடியாதது எனக்கும் வருத்தமே.

அலறிக்கொண்டே ஓடிய ஜேம்ஸு மாடியில் தன் அறைக்குள் புகுந்து தாளிட்டு (வெளியே ஓடக் கூடாதோ?) போலீஸை அழைத்தார். வனத்துறை அதிகாரிகளுடன் வந்த போலீஸார் முதலையை சமாதானப்படுத்தி அழைத்துச் சென்றனர்.

இது குறித்து வனத்துறை அதிகாரி மேலும் சொன்னது ஜேம்ஸை நடுங்கச் செயதது. "ஜேம்சு தம்பி.. இதெல்லாம் நாலடி முதலை.. பேபிமா. ஒண்ணும் செய்யாது.. ஒம்பதடி முதலைனா அப்ப கவனமா இருக்கணும் தெரியுதா?"

வெளியே போன முதலை தன்னைத் திரும்பிப் பார்த்தது போலிருந்தது ஜேம்சுக்கு.

மார்ச் 18 CNN செய்தி.

வால்:

"கம்ப்யூடர் செல்போன் ஹெட்போன் சகிதம் உலக கவனமே இல்லாமல் கதவைத் திறந்தா முதலை என்ன கரடி சிங்கம் கூட வரும். கவனமா இரு"னு உறைக்கும்படி போலீஸ் சொல்லக்கூடாதோ? 'நாலடி முதலை பேபி.. கைல எடுத்துக் கொஞ்சு'னு சொல்லிட்டுப் போறாரே போலீஸ்காரர்?  என்னங்க இது? முதலையைப் பாத்ததும் ஸ்கேல் வச்சு அளந்து பாத்துட்டா அலற முடியும்?

= = = =