நான் தரிசனம் செய்த கோவில்கள் :: நெல்லைத்தமிழன்

 

                               அஹோபில நவ நரசிம்ஹர் யாத்திரை– பகுதி 6

யாத்திரைப் பகுதியைத் தொடர்வதற்கு முன்பு இந்த அஹோபிலத்தையும் அங்கு உள்ள நவ நரசிம்ஹர் கோயில்களைப் பற்றியும் அறிவோம்.

இந்தப் பகுதியில் அஹோபில க்ஷேத்திரத்தில் எந்த எந்தக் கோயில்கள் உள்ளன, எங்கு உள்ளன, அந்தத் தலங்களின் விக்கிரஹங்கள் எப்படி இருக்கின்றன என்பதைச் சுருக்கமாகப் பார்க்கலாம். வெறும்ன, இந்தக் கோவிலுக்குச் சென்றேன், அடுத்தது அந்தச் சன்னிதிக்குச் சென்றேன் என்றால் அவற்றின் முக்கியத்துவம் தெரியாமல் போகலாம். அதனால் theory portionக்குத் தயாராகுங்கள்.  இணையத்தில் https://sivatemple.wordpress.com/ என்ற தளத்தில் பழைய புகைப்படங்களைப் பார்த்தேன். அவற்றில் சிலவற்றையும் உபயோகித்திருக்கிறேன். (நான் பெரும்பாலும் மூலவர் புகைப்படங்களை எடுப்பதில்லை. ஆனால் படங்களைப் பார்த்தால்தான் நாம் சேவித்த திருத்தலங்கள் நினைவுக்கு வரும். அதிலும் நவ நரசிம்ம க்ஷேத்திரங்களையும் இரு நாட்களில் தரிசித்துவிட்டு, எந்தக் கோவிலில் நரசிம்மர் எந்த வடிவத்தில் இருந்தார் என்பதே நினைவில் இருக்காது. அந்த ஒரு காரணத்துக்காகவே இணையத்தில் கிடைத்த படங்களை இங்கு பகிர்கிறேன்). மேல் குறிப்பிட்ட தளத்தில் எழுதியிருப்பதைப் படித்த எனக்கு தற்போதைய அஹோபிலத்தையும் அதன் வளர்ச்சியையும், புராதானத்தையும் இன்னும் தெளிவாகப் புரிந்துகொள்ள முடிந்தது. யாம் பெற்ற இன்பம் மற்றவர்களும் பெறட்டுமே.

கருடாத்ரி மலையில், ஒன்பது நரசிம்ஹர் கோவில்களும் எங்கெங்கு இருக்கின்றன என்பதைக் காட்டும் படம் இது. இதனை நல்லமல்ல மலைத்தொடர் என்றும் சொல்கின்றனர். ஜ்வால நரசிம்ஹர், அஹோபில, மாலோல, க்ரோத, காரஞ்ச, பார்கவ, யோகாநந்த, சத்ரவட மற்றும் பாவன நரசிம்ஹர் கோவில்கள் என ஒன்பது கோவில்கள் இந்த மலைத்தொடரில் இருக்கின்றன.

நாராயணனை நரசிம்ம ரூபமாகத் தரிசிக்கும் ஆர்வத்துடன் கருட பகவான் இத்தலத்தில் அமர்ந்து கடுந்தவம் செய்ய, அவருக்கு நெருப்பின் உக்கிரத்தோடு, அம்மலைத்தொடரில் ஒரு உயரமான குகையில் காட்சியளித்தார். பெரிய குகையில் காட்சி தந்ததால், இடத்தின் பெயர் அஹோபிலம் என்றானது. அஹோபிலம், மேல் அஹோபிலம், கீழ் அஹோபிலம் என்று இரண்டு தளங்களாக அமைந்துள்ளது. உக்ர ரூபமாக அறியப்பட்ட நரசிம்மர் தன் மற்றத் தோற்றங்களையும் சேர்த்து ஒன்பது நரசிம்மர்களாக எழுந்தருளியிருக்கிறார்.

கீழ் அஹோபிலத்தில்தான் நாம் இதுவரை கண்ட, பிரஹலாத வரதனின் ஆலயம் அமைந்துள்ளது. மேல் அஹோபிலத்தில் மலைச்சாரலின் மடிப்புகளில், மறைவான குகைப்பகுதிகளில் நரசிம்மர் அருள்பாலிக்கிறார். இந்த அஹோபிலம், இருள் அடந்து கருங்கானகமாக இருக்கும் நல்லமலைப்பகுதியில் அமைந்துள்ளது (நல்ல-கருமை. தெலுங்கு). இந்த மலைப்பகுதியில்தான் கிருத யுகத்தில் ஹிரண்யனின் அரண்மனை அமைந்திருந்தது.  ஆயிரம் தூண்கள் கொண்ட அவனது அரண்மனை மண்டபத்தில் ஒரு தூணைப் பிளந்து நரசிம்மர் வெளிப்பட்டார்.

ஜ்வாலா நரசிம்ஹர் (1)

நரசிம்மர் வெளிப்பட்ட இடம், உக்ரஸ்தம்பம் என்று அழைக்கப்படும் பகுதி. இங்கு செல்வது மிகக் கடினம். யாத்திரையிலும் இந்த இடத்திற்குக் கூட்டிச் செல்வதில்லை. வயது அதிகமானவர்கள் இந்த இடத்திற்குச் செல்லமுடியாது. கவனக் குறைவாக சில அடிகள் எடுத்துவைத்தாலும் அதலபாதாளத்துகுச் செல்லவேண்டியதுதான். நரசிம்மர், ஹிரண்யனை சம்ஹாரம் செய்த இடத்தில்தான் ஜ்வாலா நரசிம்மர் சன்னிதி அமைந்துள்ளது. இந்தச் சன்னிதிக்குப் போகும் வழியில் மழைக்காலத்தில் பாறையின் மீதிருந்து நீர்வீழ்ச்சி சீறிப் பொழியும். அதனால்தான் அந்த இடத்தைக் கடந்து சன்னிதியை அடைவதற்கு தடிமனான இரும்புச் சங்கிலி பதிக்கப்பட்டிருக்கிறது. இந்த குகை ஆலயம், கருடாசலம், வேதாசலம் மலைகளுக்கு இடையே அமைந்திருக்கும் ‘அச்சலச்சாயா மேரு’ என்றழைக்கப்படும் மலைக்குன்றில் உள்ளது.

குகை ஆலயத்திற்குச் சற்றுத் தள்ளி, பாறைகளின் இடுக்கில் அமைந்திருக்கிறது ரத்தகுண்டம். இதில்தான் நரசிம்மர் தன் குருதிக் கரங்களைக் கழுவிக்கொண்டார். இந்தச் சுனையில் நீரின் ப்ரதிபலிப்பு சிவப்பாக இருக்கிறது.

அஹோபில நரசிம்ஹர் (2)

கருடாத்ரி, வேதாத்ரி மலைகளுக்கு நடுவே அமைந்துள்ள பள்ளத்தாக்கில் பவநாசினி நதிக்கரையில் அமைந்துள்ளது அஹோபில நரசிம்மர் ஆலயம். இதுதான் மேல் அஹோபிலத்தின் பிரதான ஆலயமாகக் கருதப்படுகிறது.  கீழ் அஹோபிலத்திலிருந்து சுமார் 8 கிமீ தூரத்தில் மலைப்பகுதியில் அமைந்துள்ள ஆலயம் இது. ஆலயம் ஒரே தளமாக இல்லாமல், குன்றத்தின் அமைப்புக்கேற்றவாறு ஏற்ற இறக்கத்தோடு அமைந்திருக்கிறது. உருவத்தில் சிறியவராக இருந்தாலும் உக்கிரம் அதிகம். மூலவருக்கு அருகிலேயே லக்ஷ்மி சமேதராக உற்சவர்.  இந்தக் குகையின் இன்னொரு புறத்தில், ஒரு சிவலிங்கமும், அதன் அருகிலேயே ராமரின் திருக்கோலமும் அமைந்துள்ளது. ஆதிசங்கரர், காபாலிகர்களிடம் தன் கரத்தை இழந்தபோது இங்கு வந்து லக்ஷ்மி நரசிம்ம கராவலம்ப ஸ்தோத்திரத்தை இயற்றி இழந்த கரத்தைப் பெற்றாராம். அவர் ஸ்தாபித்த சிவலிங்கம் இதுவாம். அவரே நரசிம்ம சுதர்சன சக்கரத்தையும் பிரதிஷ்டை செய்தாராம். இதை அடுத்து, மஹாலக்ஷ்மியின் அம்சமான செஞ்சுலக்ஷ்மித் தாயார் பத்மாசனத்தில் வீற்றிருக்கும் சந்நிதி அமைந்துள்ளது.

இந்த நரசிம்மரைத்தான் திருமங்கையாழ்வார் பாடியிருக்கிறார். அதனால் இந்தக் கோவில்தான் அஹோபில திவ்யதேசமாக க் கொள்ளப்படுகிறது. திருமங்கையாழ்வார்,

அம் கண் ஞாலம் அஞ்ச*  அங்கு ஓர் ஆள் அரி ஆய்*

அவுணன் பொங்க ஆகம் வள் உகிரால்*  போழ்ந்த புனிதன் இடம்*

பைங் கண் ஆனைக் கொம்பு கொண்டு*  பத்திமையால்*  

அடிக்கீழ் செங் கண் ஆளி இட்டு இறைஞ்சும்*  சிங்கவேழ்குன்றமே

தெய்வம் அல்லால் செல்ல ஒண்ணா,  திரிந்த ஆனைச் சுவடு பார்க்கும், தினைத்தனையும் செல்ல ஒண்ணா, சென்று காண்டற்கரிய கோயில் என்றெல்லாம் ஆழ்வார் இந்தத் தலத்தைப் பற்றிப் பாடுகிறார். அஹோபிலம் என்னும் பெயரை, சிங்க வேள் குன்றம் என்று ஆழ்வார் அழைக்கிறார். ஆனால் தற்காலத்தில் ஓரளவு பேருந்து வசதியில் கொஞ்சம் சுலபமாக இந்தத் தலத்தை தரிசனம் செய்துவிட முடிகிறது.

இந்த ஆலயத்தின் முன்புறம் சிறிது தூரத்தில் பைரவ குண்டம் எனப்படும் திருக்குளம் உள்ளது.

மாலோல நரசிம்ஹர் (3)

அடுத்து வேதாத்ரி மலைக் குன்றங்களில் கனகபாயா ஆற்றின் கரையில் அமைந்திருக்கிறது மாலோல நரசிம்மரின் சிறிய குகை ஆலயம். நரசிம்மரின் கோபம் தணிந்து மகாலக்ஷ்மியுடன் எழுந்தருளிய தலம் இது. நவ நரசிம்மர்களில், எந்த மூர்த்தியை அடிப்படையாக வைத்து உற்சவ விக்ரஹம் அமைப்பது என்ற கேள்வி எழுந்தபோது, நாராயணனே, மாலோல நரசிம்மராக க் காட்சியளித்துச் சந்தேகத்தைத் தீர்த்துவைத்தாராம். இந்த உற்சவ விக்ரஹமே, அஹோபில மட ஜீயர் எங்கு சென்றாலும் தன்னுடன் எடுத்துச் சென்று ஆராதனை செய்வது.

க்ரோட நரசிம்ஹர் (4)

இந்த மாலோல நரசிம்மர் ஆலயத்திலிருந்து சிறிது தொலைவிலேயே மலைப்பகுதியில் க்ரோட நரசிம்மர் சன்னிதி இருக்கிறது. இரண்டு அவதாரங்களின் கலவையாக (வராக நரசிம்மர்) வித்தியாசமாகக் காட்சியளிக்கிறார் இந்தச் சந்நிதியில். இதன் அருகிலேயே, இராமானுஜர் தவம் செய்த சிறிய குகை இருக்கிறது.

இதுவும் குகைக்கோவிலாகும். மண்டபத்துடன் கூடிய இந்தக் கோவில் ஒரு காலத்தில் புதர் மண்டிக் கிடந்த து. இந்த குகைக்கோவிலில் இரண்டு விக்கிரஹங்கள் உள்ளன. ஒன்று லக்ஷ்மி நரசிம்ம ஸ்வாமி, மற்றது வராஹ நரசிம்ஹ ஸ்வாமி. வராஹரின் இட து கையில் பூதேவி அமர்ந்த கோலத்தில் இருக்கிறார்.  இந்தக் கோவிலின் அருகில் உள்ள தீர்த்தம் வராஹ தீர்த்தம் என்று அழைக்கப்படுகிறது. மழைக்காலத்தில், மேலேயிருந்து நீர்வீழ்ச்சியாக வரும் நீர், படிகள் வரை நிரம்பி ஓடுமாம்.

காரஞ்ச நரசிம்ஹர் (5)

கருடாத்ரி மலைத்தொடரின் மேற்குப்புறம் அமைந்திருக்கிறது காரஞ்ச நரசிம்மர் ஆலயம். மேல் அஹோபிலத்துக்கு வரும் சாலையில், மேல் அஹோபிலத்துக்கு ஒரு கிமீ முன்பு, மரங்களின் நிழலில் ரம்யமாகக் காட்சியளிக்கிறது இந்த ஆலயம். இங்கு இடதுபுறம் ஆஞ்சநேயர் சன்னிதி உள்ளது. ஆஞ்சநேயர், நரசிம்மரின் சந்நிதி நோக்கி முகத்தைத் திருப்பி வணங்கியபடி உள்ளார். ஆஞ்சநேயர், நரசிம்மரை, இராமராகத் தரிசிக்க விரும்பியதால், வில்லுடன் கூடியதாக இந்த நரசிம்மர் எழுந்தருளியிருக்கிறார். (ஆஞ்சநேயர், கரஞ்ச விருக்ஷம்-கருங்காலி மரத்தின் கீழே தவம் இருந்ததால், காரஞ்ச நரசிம்மர்)

மிகுதியை அடுத்த பகுதியில் வரும் வாரத்தில் பார்ப்போம்.

(தொடரும்)