நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 02: நெல்லைத்தமிழன்

 

பஞ்சத் துவாரகா யாத்திரையின் முகவுரை இந்த வாரமும் தொடர்கிறது.

8 நாட்களுக்கு மேற்பட்ட யாத்திரை என்று வந்துவிட்டாலே, யாத்திரைக்கு முன்னால் ஒரு மீட்டிங் இருக்கும். கலந்துகொள்ள இயலாதவர்களுக்கு குறிப்புகளும் வந்துவிடும். எவ்வளவு செட் டிரெஸ் தேவையாயிருக்கும்,, எந்த இடங்களில் தோய்க்கவும், சலவை செய்பவர் மூலமாக அயர்ன் செய்துகொள்ளமுடியும், என்ன என்ன எடுத்துவரவேண்டும் என்பதையெல்லாம்  யாத்திரை நடத்துபவர் சொல்லிவிடுவார். அப்போது நமக்குக் கேட்கவேண்டிய கேள்விகள் நிறைய இருக்காது.

அதுபோல வட இந்திய பேருந்துப் பயணங்களில் (அவருடைய எல்லா யாத்திரைகளிலும், 4 நாட்களுக்கு மேற்பட்டு இருந்து, பேருந்துப் பயணமாக இருந்தால்), ஒவ்வொரு 100-200 கிமீக்கு ஒரு முறை அவரவர் சீட்டிலிருந்து பின்புற சீட்டிற்கு இடம் மாறவேண்டும். பயணம் ஆரம்பிக்கும்போது, பணம் கட்டிய வரிசையின்படி இடத்தை ஒதுக்கிவிடுவார். அதன் பிறகு அவர் சொல்லும் நேரத்தில் நாம் அமர்ந்திருக்கும் சீட்டிற்குப் பின் உள்ள சீட்டிற்கு இடம் மாற வேண்டும்.  பொதுவா லக்கேஜுகள் பஸ்ஸின் உட்புறம் வைத்துக்கொள்ள மாட்டோம். பேருந்தின் உட்புறம், தட்டு/டம்ளர் மற்றும் அவசியமான மருந்துகள், தண்ணீர் பாட்டில் மாத்திரம்தான் வைத்துக்கொள்வோம். சட் என்று ஏதாவது இடத்தில் நிறுத்தில் காபி/டீ தந்தாலோ இல்லை உணவு கொடுத்தாலோ, தட்டு டம்ளர் வேண்டும் என்பதால்.

ஒவ்வொரு நாளும் பயண ஆரம்பத்தில் பேருந்தில் அமர்ந்த பிறகு செல்லும் இடத்தைப் பற்றியும், அன்றைய திட்டத்தைப் பற்றியும் சொல்லிவிடுவார். இரவிலும் மறுநாள் திட்டத்தைப் பற்றியும் என்ன என்ன செய்யவேண்டும் என்று விளக்கமாகச் சொல்லிவிடுவதால் நமக்குப் பிரச்சனை இருக்காது.

பஞ்சத் துவாரகா என்பது கங்க்ரோலி துவாரகையுடன் முடிந்துவிடுகிறது. ஆனால் யாத்திரை, அதற்குப் பிறகு, புஷ்கர் மற்றும் பகவான் கிருஷ்ணர் தொடர்புடைய இடங்களுக்குச் செல்கிறது. அதன்படி, கண்ணன் வளர்ந்த கோகுலம்,  கோவர்த்தனம், விருந்தாவனம் ஆகிய இடங்களைப் பார்த்த பிறகு, குருக்ஷேத்திரம் செல்கிறோம்.

அதற்குப் பிறகு தில்லியில் யாத்திரை நிறைவுபெற்றுவிடுகிறது.

பிருந்தாவனத்தில் யமுனையாற்றில் படகுப் பயணம். 

பீஷ்மர் குண்டம். பீஷ்மர் அம்புப் படுக்கையில் இருந்தபோது அர்ஜுனனால் அவர் தாகத்திற்கு நீர் வரச் செய்த இடம்.

பீஷ்மகுண்டத்தின் கரையில் வைக்கப்பட்டிருக்கும் சிற்பம். 

அதன் அருகிலேயே பீஷ்மருக்கான கோவில்.

யாத்திரையின் கடைசி நாளில் (தில்லியில்) எங்களுக்குக் கொடுக்கப்பட்ட பெரிய லட்டு. (ஆனால் நம் தில்லி பதிவர் வெங்கட் நாகராஜ் அவர்கள் பதிவுகளே எழுதாமல் நமக்கு அல்வா கொடுக்கிறாரே…… புது வருடத்திலாவது ஆரம்பிப்பார் என்று நினைத்தேன்).

இவற்றை விரிவாக வரும் வாரங்களில் பார்க்கலாம்.

(தொடரும்)