ஞாயிறு பட உலா – நெல்லைத் தமிழன் நான் சென்ற இடங்கள் – மெக்சிகோ - படங்களுடன் - 08

 

 சிச்சன் இட்ஸா மற்றும் பிற இடங்கள்

நாம் சிச்சன் இட்ஸா என்ற மாயன் வரலாற்றை ஒட்டிய இடத்தை நோக்கிச் சென்றுகொண்டிருக்கிறோம். வழியில் கலைப்பொருட்கள் விற்கும் கடையில் பேருந்து நின்றது. அங்கிருந்த பொருட்களின் படங்களைப் பார்த்துக்கொண்டு வருகிறோம்.

நீங்கள் எல்லோரும் ‘மாயன்’ என்பதைப் பற்றி நிச்சயம் கேள்விப்பட்டிருப்பீர்கள். மாயன் காலண்டர் 2012ல் உலகம் அழியும் என்று சொல்லுது எனப் பலர் ஜல்லியடிச்சிருப்பாங்க. அதனை நம்பி இருக்கும் சொத்தையெல்லாம் நன்கு செலவழித்து ஓட்டாண்டியாகியிருக்கமாட்டாங்க. ஆனால் மாயன் காலண்டர் என்ற வார்த்தைகள் அந்த வருடத்தில் பல இடங்களிலும் ஒலித்தது.

மாயா என்பது இனத்தின் பெயர். உலகத்தில் ஐந்து நாகரிகங்கள்தாம் நன்றாக முன்னேறிய எழுத்துக்கள், எழுதும் சிஸ்டம் கொண்ட இனங்கள்.  அவற்றில் மாயா இனமும் ஒன்று. அமெரிக்காவிலேயே அப்படிப்பட்ட ஒரே ஒரு இனம் மாயா.

வானியலில் மிகவும் முன்னேறியவர்கள் மாயா இனம். கிரகங்கள், நட்சத்திரங்கள், அவைகள் எப்படி நகர்கின்றன, அதிலும் குறிப்பாக வீனஸ் கிரகத்தைப் பற்றி நன்கு அறிந்திருந்தனர். வானியல் அறிவு மற்றும் கணக்கில் அவர்கள் கொண்டிருந்த திறமையால் கிரகணம் எப்போது ஏற்படும் மற்றும் பலதரப்பட்ட வானியல் நிகழ்வுகளையும் அறியும் திறமை பெற்றிருந்தனர்.

மாயா மக்கள், நிறைய நகரங்களையும் உருவாக்கியிருந்தனர்  (நம்ம மயன் தானப்பா அங்க போயிருக்கான். அவன் நகரை உருவாக்குவதற்குக் கேட்கவா வேணும்… என்ன சொல்றீங்க?)

அவர்கள் கோயில்களையும் உருவாக்கியிருந்தனர். அதில் பல்வேறுபட்ட வழிபாட்டு முறைகளை மேற்கொண்டிருந்தனர். அதிலும் குறிப்பாக நரபலி. இதன் மூலம் தேவதைகளைத் திருப்திப்படுத்தி, அவர்கள் தங்களுக்கு நல்லது செய்யவைக்க முடியும் என்று நம்பியிருந்தனர்.

நம்மைப் போலவே, மழைக்கு, சந்திரனுக்கு, சுவர்கத்துக்கு எல்லாம் தனித் தனி கடவுள் என்று நம்பினர். 

கோகோ விதைகளை வைத்து ஒரு பானம் (அதில் பால் சேர்த்தால்தான்பா ஹாட் சாக்லேட் செய்யமுடியும்) தயாரித்தனர். கோகோ, செல்வச் செழிப்புள்ளவர்கள் உபயோகிக்கும் பொருளானது. நாணயத்துக்கு ஒப்பாக அது செல்வாக்கு பெற்றிருந்தது. 

அறிவியலாளர்கள், மாயா மக்கள், ஒருவகை சிமெண்ட் செய்யும் திறமை பெற்றிருந்தனர். அதனை உபயோகப்படுத்தி வளைவுகள், கட்டுமானங்கள் அமைத்தனர் என்று சொல்கிறார்கள். 

இவங்க கலாச்சாரத்திலும், அரசன், தலைமைப் பூசாரி, மற்ற பூசாரிகள் என்றெல்லாம் வகுப்பினர்கள் இருந்தனராம். (மதம், கடவுள், பூசாரி என்பதே ஒரு கூட்டத்தை அடங்கியிருக்கச் செய்வதற்கும், ஒரு மாரல் பயத்தை வரச்செய்வதற்கும், அட்டூழியங்கள் செய்தாலோ/தண்டனைகள் கொடுத்தாலோ அதனை நியாயப்படுத்துவதற்காக இருக்குமோ?   (இப்படித்தான் இங்கிலாந்து அரசன்  7ம் ஹென்றி, அரசுக்கு ஆண் வாரிசு வேண்டுமே என்று தன் மனைவியை விவாகரத்து செய்துவிட்டு இன்னொரு பெண்ணைத் திருமணம் செய்துகொள்ள முயன்றான். போப் ஒத்துக்கொள்ளவில்லை என்பதால், நீ என்ன சொல்வது, நானே எங்கள் நாட்டிற்கு ஒரு மதத்தையும் சர்ச்சையும் உருவாக்கிக்கொள்கிறேன் என்று church of England வந்ததென்று சொல்வார்கள்)  

இதுதான் மாயன் எழுத்துகள். கடத்தி வைத்தால், இருக்கும் இடமோ இல்லை ஆபத்து என்று எழுதுவதற்கோ ரொம்பவே மெனெக்கிடணும் போலிருக்கு

மலை என்பதை இப்படி வெவ்வேறு வகையாக எழுத (வரைய)லாமாம். தொல்லியல் துறை அகழ்வாய்ந்து நிறைய எழுத்துக்களைக் கண்டுபிடிச்சிருக்காங்க. அவற்றிலிருந்து, மாயா மொழியில் 500-800 எழுத்துகள்/வார்த்தைகள் இருந்திருக்கலாம் என்று சொல்கின்றனர்.

இதை எழுதும்போது, நான் ஒரு இன்ஷ்யூரன்ஸ் கம்பெனிக்கு கணிணி மென்பொருள் அப்ளிகேஷனுக்கு கன்சல்டண்ட் ஆக இருந்த போது, அந்தக் கம்பெனி I.T. Dept Managerஉடன் பழகினேன். அவர் சீனாவைச் சேர்ந்தவர் (ஆஸ்திரேலியா நாட்டுக்குக் குடிபோனவர்). அவர் சீன எழுத்துகளை எப்படி படம் போன்று எழுதுவார்கள் என்றெல்லாம் சொன்னார். எனக்கும் எழுதிக் காண்பித்து கற்றுக்கொள்ளலாமே என்று மனதில் தோன்ற வைத்தார்.  நம்ம தமிழ் எழுத்துக்களே 200க்கு மேல் இருப்பதால் கற்றுக்கொள்வது கடினமா இருக்குன்னு சொல்றாங்க. இதுல படம் போடும் எழுத்துக்களை எப்படிக் கற்றுக்கொள்வது?

மொத்தத்தில் மாயா நாகரிகம் வான்வெளி இயலில் மிகவும் சிறந்து விளங்கிற்று. இந்திய கலாச்சாரத்தைப் போலவே கோயில், பலி, தேவதைகள் போன்றவற்றில் மிகுந்த நம்பிக்கை பெற்று விளங்கினார்கள்.

இப்போ நாம அந்த சுற்றுலாப் பயணிகளுக்கான மெக்சிகன் கலைப்பொருட்கள் விற்கும் கடையில் இருந்த மற்றவற்றைப் பார்ப்போம். (எங்கப்பா ஒரு பெண்ணையும் காணோமே என்று கவலைப்படுகிறீர்களா? அன்று அவர்களையும் சேர்த்துப் படங்கள் எடுக்க ரொம்பவே தயங்கினேன். இந்தத் தயக்கம் எனக்கு தாய்வானிலோ இல்லை பிலிப்பைன்ஸிலோ இல்லை. அவங்க ரொம்பவே friendly என்று நான் நினைத்தது/நம்பியதுதான் காரணம்.

மெக்சிகன் கலைப்பொருட்கள்தான் பயமுறுத்துதா? கன்னிமேரியையாவது வாங்கிட்டுப் போங்கப்பா என்கிறார்களோ?

அவர்களின் போர் வீரன்.

யானைக்கு மேல் யானைகளா? எங்கிருந்தாவது காப்பியடித்திருப்பாங்களா? அந்த ஊர்ல எங்கே யானைகள்?

இவங்க உடையே சூனியப் பூசாரிகள் மாதிரி இருக்கே!

'ஒண்ணும் வாங்கலையா? பரவாயில்லை… ஒரு மெக்சிகன் தொப்பியாவது வாங்கிட்டுப் போப்பா!'

சுவரில் பொருத்திவைக்கலாம். அழகான கலைப்பொருட்கள். நம்ம ஊர்ல ஒவ்வொரு வீட்டிலும் பெரிய பெரிய காலண்டர்களைத் தொங்கவிட்டு அசிங்கமாக வைத்துக்கொள்வதற்குப் பதிலா இது பரவாயில்லை என்று சொன்னால் என்ன சொல்வீங்களோ?

இதை எழுதும்போது சேலம் அருகே வேலையில் நான் இருந்தபோது என்ன செய்தேன் என்பது நினைவுக்கு வருது. வீட்டு அலவன்ஸுக்குப் பதிலா நான் பேச்சலர் என்பதால் எனக்கு ஒரு அறை கொடுத்திருந்தார்கள், கட்டில் மெத்தை, மேசை, சேருடன்.  அந்த வரிசையின் கடைசியில் குளிக்க நல்ல வெந்நீருடன் கூடிய பாத்ரூம்கள் மற்ற வசதிகளுடன். முன்பெல்லாம் என் Rankக்கிற்கு காலனியில் வீடுகள்தாம் கொடுப்பார்களாம். அப்புறம் எனக்கு முன்னர் இருந்த சில பல பேச்சலர்கள் அவர்கள் வேலையைக் காண்பித்ததால், குடும்பத்தோடு இருப்பவர்களின் பெண்களை லவட்டிடப் போறாங்களே என்று இந்த மாதிரி தள்ளி ஒரு பெரிய கட்டிடம் கட்டிவிட்டார்கள்.  

அப்போ நிறையப் பேர்கள் பேச்சலராக இல்லை. அதனால் முதல் நாளிலேயே இரண்டு மூன்று அறைகளுக்குச் சென்று இரண்டு மெத்தைகளை எடுத்துக்கொண்டு வந்து என் கட்டிலில் மூன்று மெத்தைகளை ஒன்றன்மேல் ஒன்றாகப் போட்டுக்கொண்டேன். அறைச் சுவரில் அப்போது ஸ்பெஷலாக வெளியாகும் மிகப் பெரிய கேலண்டருடன் (பெண் படம்தான்..பகிராமலா போகப்போகிறேன்) நான் வரைந்த பல ஓவியங்களையும் ஒட்டியிருந்தேன். பத்தாக்குறைக்கு அப்பா எனக்கு வாங்கிக்கொடுத்த டூ இன் ஒன், சில பல கேசட்டுகள். நானே வாங்கிக்கொண்ட அலறும் ஸ்பீக்கர்.  ஆனால் ரொம்ப நல்ல பையனாக இருந்தேன். எல்லோரும் அவரவர் வீட்டிற்கு என்னைக் கூப்பிடுவார்கள். அங்கேயே அதாவது அந்த நிறுவனத்திலேயே இருந்திருந்தால் நல்ல ஒரு மிடில் கிளாஸ் (Classபா… Glass இல்லை) குடும்பமாக இருந்திருப்பேன். அதைப்பற்றிப் பிறிதொரு சமயம்.

எல்லாத்தையும் போட்டோ எடுக்கிறானே… ஒன்றாவது வாங்குவானா?

இந்த மாதிரிப் பொருட்களை வாங்குவதில் எனக்கு மிகுந்த தயக்கம் உண்டு. Exorcist படத்தில் காண்பிப்பது போல ஏதாவது ஆவி, இந்தப் பொருட்களோடு வந்துவிடுமோ என்று நினைப்பேன். 

அதுவும் அவங்க அலங்காரம்லாம் கொஞ்சம் பயமுறுத்துவது போலவே இருக்கு.  அது சரி… நம்ம ராஜாக்கள் எல்லாம் அஜித், எம்ஜியார் மாதிரி அழகாக இருப்பாங்கன்னு வரையும் ஓவியர்கள் காண்பிக்கறாங்க. ஆனால் அவங்களோ அந்தக் கால உடைகள் அணிந்துகொண்டு, தொந்தியும் தொப்பையுமா சாதாரணமாக நம்ம கண்ணு முன்னால தென்பட்டாங்கன்னா, நாம அவங்க சக்ரவர்த்தி என்று நம்புவோமா?  (திருமலைநாயக்கர், சரிந்த தொந்தியும்… என்றெல்லாம் அவரைப் பற்றி வருணனை வரும்)

கழுத்தில் அடையாள அட்டை, எந்தச் சுற்றுலாக் குழுவினர் என்று உடனே அடையாளம் தெரிந்துகொள்ள. ஒருவேளை வழி தவறினாலும் அங்குள்ளவர்கள் உடனே சேர்த்துவிடுவார்களாம். (கடைகளில் பொருள் வாங்கினால் இதனை வைத்து கமிஷன் தரவும் உபயோகமாக இருக்குமோ?)

இதான் அலங்காரமான மெக்சிகன் தொப்பி. அணியும்போது கொஞ்சம் சிரம மாக இருந்தது. இதைப் போட்டுக்கொண்டால் குதிரைல பயணித்தால்தான் சரியா இருக்கும். பேருந்துக்கெல்லாம் இது சரிப்படாது.

விதவித முகமூடிகள் மற்றும் சுவர் அலங்காரப் பொருட்கள். இடது மேற்புறம் பாருங்கள்.. மாயா எழுத்து எப்படி இருக்கும் என்று சொல்லியிருக்கிறார்கள். இரண்டு கோட்டைக் குறுக்காகப்  போட்டு X என்று எழுதுவதை விட்டுவிட்டு படம் போட்டுக்கொண்டிருந்தால் விடிந்துவிடும்.  (தமிழ்ல எக்ஸ் எழுதறதுக்கே மூணு எழுத்து வேண்டியிருக்கேப்பா.. நீ என்ன பொசுக்குனு சொல்லிட்ட)

பொருளின் விலை அதிகமாக இருந்தாலும், அதன் கலைநயம் என்னைக் கவர்ந்தது. 

ஒவ்வொரு பொருளின் விலையும் மிக அதிகம் என்பது என் எண்ணம் (வாங்காம வந்ததற்கு ஒரு சாக்கா?)

எங்கள் குழுவினர் எல்லோரும் கடையிலிருந்து (சுமார் 12 பேர்கள் இருப்பார்கள்) பேருந்துக்குத் திரும்பினர். பேருந்து மாயா கலாச்சாரச் சின்னமான சிச்சன் இட்ஸா என்ற இடத்திற்குச் செல்ல ஆரம்பித்தது. அடுத்த பகுதியில் சிச்சன் இட்ஸா என்றால் என்ன என்பதைப் பார்க்கலாம். 

(தொடரும்)