தீமா தீமா என்றால் என்ன அர்த்தம்?

சுஜாதா எழுத்தில் மீண்டும் ஒரு வர்ணனை..  கதை : பெண் இயந்திரம் 

வெந்நீர் அவள் உடலைத் தொட்டது. ஜன்னல் கண்ணாடியை ஒரு கோணத்தில் திருப்பினாள். அப்படித் திருப்பினால் லேசாக அவள் பிம்பம் தெரியும்.. தெரியக்கூட வேண்டாம். அவள் உடலில் ஒவ்வொரு தோற்றமும் அவளுக்கு நெட்டுரு!'

வித்யா ஐந்தடி நாலு அங்குலம், 54.5 கேஜி. 'உங்கள் வாழ்வின் அடுத்து அமையும் கட்டம் மிகுந்த பொறுப்புடனும் புதிய சினேகிதர்களுடனும் ...'  நட்டநடுவே வகிடெடுத்து அதிகம் அடர்த்தியில்லாத ஆனால் சற்று நீளமான தலை மயிர் கறுப்பு என்று சொல்ல முடியாது. நெற்றி நிறைய பெரிதாகப் பொட்டிட்டால் ஏதோ ஒரு தாசித்தனம் வந்துவிடுவதாக நினைப்பு!   எப்போதும் சின்னதாகத்தான் பொட்டிடுவாள்.  நெற்றிப் புருவங்களை ஒரு காலத்தில் சின்ன ட்விஸர் வைத்துச்செப்பனிட்டுக் கொண்டிருந்தாள்.

இப்போது அதற்கெல்லாம் சமயமில்லை. மேலும், அதெல்லாம் எதற்கு என்று ஒரு சின்னக் கேள்வியும் அவளுள் புறப்பட்டுவிட்டது. அதே காரணத்திற்காக, அவள் மேலுதட்டில் மிக லேசாகத் தென்படும் ரோமங்களையும் ஆன்ஃப்ரெஞ்சால் மழிப்பதில்லை. கழுத்து சற்று நீளமானதுதான். பூசிவிட்டாற்போல புஷ்டி. சின்ன மார்பகங்கள். பதிந்த இலைபோல வயிறு. ஓர் ஓட்டக்காரியின் கை கால்கள்... மறுபடி தன் முகத்தை நோக்கினாள். மூக்கு கொஞ்சம் எகிப்தியத் தனத்துடன் நேராக, மிக நேராக... அந்தக் கீழுதட்டில் ஓர் அழுத்தம் பிறப்பதற்கு முன் யாரோ கடைசி நிமிஷத்தில் 'பச்' என்று ஓர் அழுத்து அழுத்தி அனுப்பி வைத்தாற்போல. அதே சமயம் இந்த இரண்டு அம்சங்களும் தன் முகத்திற்கு ஒரு பிரத்தியேக... பிரத்தியேக... என்ன சொல்லலாம்... கவர்ச்சியா? சே என்ன இது ? எப்பப் பார்த்தாலும் உடம்பைப் பற்றியே நினைப்பு.

குளித்துவிட்டுப் போர்த்துக்கொண்டு ஒரே எட்டில் எதிர் அறைக்கு வந்து கதவைச் சாத்திக்கொண்டாள். கொடியில் தொடர்ந்து ஏதோ ஒரு ஸாரியைத் தேர்ந்தெடுத்து - ஏதோ ரவிக்கையைத் தேடினாள்.

=======================================================================================

ஒரு புதிய பாடல் ஒன்று இந்த வாரம்.  எனக்குப் பிடிக்காத ஹீரோவின் படம்.  அதிகம் ரசிக்காத அனிருத் இசையில் பாடல்.  அவரே பாடி இருக்கிறார்.  ஆனால் பாடல் என்னை மிகவும் கவர்ந்து விட்டது.  கேட்டு விட்டுச் சொல்லுங்கள்.  பத்துப் பதினைந்து நாட்களுக்குள் ரிலீசாகி இருக்கும் படம்.  இவ்வளவு புதிய படத்திலிருந்து இதுவரை நான் பாடல் பகிர்ந்ததில்லை என்று நினைக்கிறேன்.  படம் பெயர் LIK.  பிரதீப் ரங்கநாதன் படம்.  அனிருத் இசை.  பாடலை எழுதியவர் விக்னேஷ் சிவன். இந்தப் படத்துக்காக அவர் எழுதிய பாடல் அல்ல.  அவர் தன் குழந்தைகளை பற்றி அவ்வப்போது எழுதி வைப்பாராம்.  அனிருத் அதை எடுத்து சேர்த்து வைத்து தான் போடும் டியூனுக்கு எதுவும் பொருந்துமா என்று பார்ப்பாராம்.  அப்படி பொருந்திய பாடல் இதுவும்.  என்னவோ ஒரு ஈர்ப்பு எனக்கு இந்தப் பாடலின்மேல் ஏற்பட்டது.

 தீமா தீமா என்றால் என்ன அர்த்தம்?  தெரியாது!  இருதய பலவீனமுள்ளவர்கள் காட்சியைப் பார்க்காமல் பாடலை மட்டும் கேளுங்கள்.  நெல்லைக்கு இவரைப் பிடிக்கும்.  ஆனால் பெரும்பாலும் அவர் பாடல்கள் கேட்பதில்லை என்பது வேறு விஷயம்.

=================================================================================

கொத்திக் கொத்தி 

காயப்படுத்தினாலும்

மரம்  

மரங்கொத்திக்கு மனமுவந்து 

அளிக்கிறது 

பொதிந்துகொள்ள 

தன் வயிற்றில் ஒரு இடம்.

குருமா ரசிகரா கூட்டு ரசிகரா

என்று கேட்டால் நான்

பாட்டுக்கு சொல்லி விடுவேன்

கூட்டு ரசிகன்தான் என்று

மசாலா மாசத்துக்கு ஒரு முறை

சேர்க்கலாம்

ஆசைக்கு எப்போதும் கூட்டு தான்

லேசில்

செய்து விடமாட்டார் பாஸ்

செய்து விட்டாலோ

சமையல் அன்று மாஸ்

======================================================================================

ஒவ்வொன்றும் ஒருரகம்!

போனவாரம் உங்களைப்பற்றி நீங்களே ஒரு கமெண்ட் கொடுத்துக் கொள்ள வேண்டுமென்றால் என்ன சொல்வீர்கள்?  ஒரு வரி விமர்சனமாக உங்களையே நீங்கள் என்ன சொல்லிக் கொள்வீர்கள்  என்று கேட்டிருந்தேன்.  யாரும் ஒன்றும் சொல்லவில்லை!

இந்த வாரம் ஒரு விஷயம்...

நீங்கள் யாருக்கோ போன் செய்கிறீர்கள்..  அல்லது உங்களுக்கு போன் வருகிறது.  என்ன செய்வீர்கள்?  அங்கேயே உட்கார்ந்து அட்டென்ட் செய்து பேசுவீர்களா இல்லை எழுந்து தனியாக போய்விடுவீர்களா?  வரும் போனைப் பொறுத்து சில தனியாக பேச வேண்டி இருக்கும்தான்.  ஆனால் எல்லாவற்றையுமா?!  சமயங்களில் அப்படி என்ன தனியாக பேசவேண்டிய விஷயம் இருக்கும் என்று மனதுக்குள் ஒரு கேள்வியும் பிறக்கும், சுவாரஸ்யம் வரும்!!

ஒவ்வொருவருக்கு இப்படியான சில தனி குணங்கள் இருக்கின்றன.  என் மருமகள் போன் வந்தாலே அதை எடுத்துக் கொண்டு  இங்கும் அங்கும் நடந்து கொண்டே பேசுவார்.  அலுக்காமல் நடப்பார்.  என்னுடன் பணிபுரிந்த ஹேமாவும் அப்படிதான்.  வேலைக்கு நடுவில் போன் வந்தால், கூட இருப்பவரை உட்கார்த்தி வைத்து விட்டு எழுந்து வெளியே செல்வார்.  ஜன்னல் வழியே பார்த்தால் இங்குமங்கும் நடந்து கொண்டே பேசிக்கொண்டிருப்பார்.  என் இளையவன் போனை எடுத்துக் கொண்டு எங்கு போனான் என்றே தெரியாமல் காணாமல்போய் பேசி விட்டு வருவான்.  பாஸ் போனுடன் தனியாக ஒதுங்கி விடுவார்.  ஏதோ வேலையாக அவர் பக்கம் சென்றால் அவர் குரல் தழைந்து விடும்.  சிறு இடைவெளி கூட விழும்.  நாம் மறுபடி நகர்ந்து இங்கு வந்தபின் பேச்சு தொடரும்!  

அப்போதுதான் எனக்கும் சந்தேகம் வரும், சுவாரஸ்யம் பிறக்கும்!  'அப்படி என்ன பேசுகிறார்?'

நானும் சரி, என் பெரிய மகனும் சரி இருக்கும் இடத்திலேயே போன் பேசுவோம்.  என் நண்பர் ஒருவர் இடம் பொருள் ஏவல் இல்லாமல், இருக்கும் இடத்திலேயே எல்லோரும் இருக்கையிலேயே ஸ்பீக்கர் போட்டு பேசுவார்.  எதிர்முனையில் பேசுபவருக்கு, தான் ஸ்பீக்கர் போட்டிருக்கிறோம் என்று கூட சொல்லி இருக்க மாட்டார்.  இது என்ன மாதிரி சங்கடங்களை எதிர்முனைக்காரருக்கு ஏற்படுத்தும் என்பதை யோசிக்க மாட்டார்!

அருகியேயே இருந்தாலும் சிலர் போனில் என்ன பேசுகிறார்கள் என்று காதிலேயே விழாது.  அவ்வளவு சின்னதாக பேசுவார்கள்.  இன்னும் சிலரோ நாம் எங்கிருந்தாலும் அவர்கள் பேசுவது கேட்கும்.  பஸ்ஸில், பொது இடங்களில் கூட இப்படிப்பட்டவர்களை சந்தித்திருக்கலாம்!

காதில் ஹெட்செட் வைத்துக் கொண்டு அதைத் தொட்டுக்கொண்டோ, தொடாமலோ பேசுவதே தெரியாமல் பேசுபவர்கள் இருக்கிறார்கள்.  அவர்கள் முகத்தை நீங்கள் பார்த்தால் ஒரு நொடி சந்தேகம் வரும், உங்களிடம் அவர்கள் ஏதாவது சொல்கிறார்களா என்று!

========================================================================================

அட்சய திருதியை அன்று நான் தங்கம் வாங்கியபோது...

=============================================================================================

சிவாஜியின் தம்பி வி.சி.சண்முகம் லண்டனில் படித்துவிட்டு வந்து அண்ணன் சிவாஜியின் பட விவகாரங்களைக் கவனிக்கத் தொடங்கியிருந்த நேரம். ராணுவ அதிகாரியைப் போல வெட்டு ஒன்று துண்டு இரண்டாகப் பேசுபவர். ஆனால் பழக பனித்துளி போல மென்மையான மனிதர்.

விடிவெள்ளி படம் படத்தின் வெளிப்புறக் காட்சிகள் அனைத்தும் பொள்ளாச்சி அருகே உள்ள வேட்டைக்காரன்புதூர் கிராமத்தில் படப்பிடிப்பு செய்யப்பட்டன. படப்பிடிப்பு நடந்த நாட்களில் அந்த கிராமம் சித்திரைத் திருவிழா கண்டது போல அல்லோலகல்லோலப்பட்டது.

அப்போது நடந்த ஒரு சம்பவத்தை கோபுவால் மறக்க முடியாது. வேட்டைக்காரன்புதூர் கிராமத்து நிலச்சுவான்தார்களில் ஒருவர் முத்துமாணிக்கம். சிவாஜியின் நெருங்கிய நண்பர். படக் குழுவினருக்காக அனைத்து வசதிகளையும் அவர்தான் செய்து கொடுத்திருந்தார். முத்துமாணிக்கத்திற்குச் சொந்தமான விவசாயப் பண்ணையில் தென்னை, மா, பலா, வாழை, பாக்கு, நெல்லி என்று பசுமைப் பாய் விரித்திருந்த பிரம்மாண்டமான தோப்பு இருந்தது.

சுமார் 20 கயிற்றுக் கட்டில்களைத் தருவித்த சண்முகம் அவற்றை அந்த தோப்பில் வரிசையாகப் போட்டு வைத்தார். படப்பிடிப்பு முடிந்ததும் இரவு சிவாஜி உள்பட அனைவரும் அந்த கயிற்றுக் கட்டிலில்தான் படுத்துத் தூங்குவார்கள். சிலுசிலுவென்ற தென்றல் காற்று விடிய விடிய உடலைத் தழுவிக்கொண்டே இருக்கும். மாசு மருவற்ற காற்றை அனுபவிக்க வேண்டும் என்பதற்காகவே யாரும் மேல்சட்டை அணியாமல் அந்தத் திறந்தவெளி ரிசார்ட் சூழ்நிலையை அனுபவித்தார்கள்.

காலையில் எழுந்து காலைக் கடன்களை முடித்தபின் பண்ணைத் தோப்பிலிருந்து சற்றுத் தூரத்தில் பக்கத்துத் தோட்டத்தில் இருந்த பெரிய மட்டைக் கிணற்றில் குளிக்கச் செல்ல வேண்டும். கிணற்றில் குளிப்பதில் எல்லோரையும் விட சிவாஜி முந்திக் கொள்வார். அவர் குளித்து முடித்து மேக்கப் போடச் சென்ற பிறகு டைரக்ஷன் டீம் குளியலுக்குக் கிளம்பும்.

ஸ்ரீதர், கோபு, சண்முகம், நானு ஆகிய நால்வரும் அன்று எடுக்கப் போகும் காட்சியைப் பற்றிப் பேசிக் கொண்டே கிணற்றை நோக்கி நடப்பார்கள். கிணற்றின் படிவழியே உள்ளே இறங்கிக் குளித்துவிட்டு மேலே வர வேண்டும். ஒரு நாள் கோபு கிணற்றின் பிரம்மாண்டத்தை எட்டிப் பார்த்து ரசித்துக் கொண்டிருந்தார்.

குறும்புத்தனத்திற்குப் பெயர் போன சண்முகம் நானுவைப் பார்த்து கண்ணசைத்தார். அவ்வளவுதான், கோபு சற்றும் எதிர்பாராத நேரத்தில் நானு அவரை அலகேக்காகத் தூக்கிக் கிணற்றுக்குள் எறிந்தார்.

''தொபீர்' என்ற சத்தத்துடன் தண்ணீருக்குள் தலைகுப்புற விழுந்த கோபு தண்ணீருக்கடியில் போய் சடாரென்று மேலே வந்ததும் மூச்சு முட்டியது. இரண்டு மூன்று மிடறு தண்ணீரையும் குடித்துவிட்ட கோபுவுக்கு யாரோ தன் கால்களைப் பிடித்துக் கிணற்றுக்குள் இழுப்பது போன்ற ஒரு பிரம்மை. அவ்வளவுதான், நம் கதை முடிந்தது என்று நினைத்து மீண்டும் உள்ளே மூழ்க வேண்டிய நேரத்தில், கோபுவின் பின்னாலேயே கிணற்றில் குதித்திருந்த சண்முகம் அவரது தலைமுடியைக் கொத்தாகப் பிடித்துக் கொண்டு, "பயப்படாதே கோபு, மூழ்கிட மாட்டே. கை கால்களை உதறிக்கிட்டே உடம்பை அசைச்சு எதிரே இருக்கிற படிக்கட்டு கல்லைப் போய் பிடி. நான் சப்போர்ட் கொடுக்கிறேன்" என்று கூறியபடியே 10 மீட்டர் விட்டம் கொண்ட அந்த மண்டைக் கிணற்றின் எதிர்ப்பக்கம் இழுத்துச் சென்று கோபுவைப் பாதுகாப்பாகப் படிக்கட்டைப் பிடிக்கச் செய்தார்.

மூச்சை நன்கு இழுத்துவிட்ட கோபு, "இதுக்கு பேர் தான் பாழுங்கிணத்துல தள்ளுறதா?" என்றார் கோபு. "இல்லை, இதுக்கு பேர் கடப்பாரை நீச்சல்" என்று சொல்லிவிட்டுச் சிரித்தார் வி.சி. சண்முகம்.

மறுநாள் யாரும் எதிர்பாராத நேரத்தில் கோபுவே கிணற்றில் 'தொபீர்' என்று குதிக்க ஸ்ரீதர், சண்முகம், நானு என எல்லோரும் வாயடைத்துப் போனார்கள். அதன் பிறகு சண்முகத்தின் பயிற்சியில் கடப்பாரை நீச்சலில் கைதேர்ந்தவர் ஆனார் கோபு. இந்தக் கடப்பாரை நீச்சல் சம்பவத்தை வைத்தே நடிகர் பாண்டியராஜன், ஊர்வசி தொடர்பான காட்சி ஒன்றை 'பாட்டி சொல்லைத் தட்டாதே' படத்தில் வைத்தார் கோபு.

கயிற்றுக் கட்டிலில் இரவு தூங்கும்போது கோபுவைத் தேட ஆரம்பித்து விடுவார் சிவாஜி. "ஆச்சாரி, நீதான் சிரிக்கச் சிரிக்கப் பேசுவியே, எதையாவது பேசு" என்று குழந்தையைப் போலக் கெஞ்சுவார். தனது மிமிக்ரி திறமைகளை வைத்து சிவாஜி கணேசனைச் சிரிக்க வைப்பார் கோபு.  ஸ்ரீதர் உட்பட அத்தனை பேரும் சிரித்தபடி உறங்கச் செல்வார்கள்.  சிவாஜியோ கொஞ்ச நேரம் நினைத்து நினைத்துச் சிரித்துவிட்டுத் தூங்கிப் போவார்.

செந்தில்வேல் சிவராஜ் பேஸ்புக்

============================================================================================

தவறான சிகிச்சையால் மரணமடைந்த பட்டுக்கோட்டையார் 

'பாட்டுக்கோட்டை' என்று போற்றப்பட்டவர், பட்டுக்கோட்டை கல்யாணசுந்தரம். தத்துவம், அரசியல், காதல், நகைச்சுவை, சோகம் என பல உணர்வுகளில் பாடல்கள் எழுதியுள்ளார். 187 பாடல்களை மட்டுமே எழுதியிருந்த சூழலில், தனது 29 வயதிலேயே மரணம் அடைந்தார்.

அவரது பாடல்களை பற் றி சிலாகித்து பேசுபவர்கள் கூட அவரது மரணம் பற்றி பேசுவதில்லை. 29 வயதிலேயே இறந்துவிட்டார் என்று பரிதாபமாக சொல்லிவிட்டு முடித்துக் கொள்வார்கள். ஆனால் அவரது மரணம் இயற்கையானது அல்ல. அது ஒரு மருத்துவக் கொலை.

பட்டுக்கோட்டை கல்யாணசுந்தரனாரின் பாடல் வரிகள் தான் வலிமையானதே தவிர அவரது உடல் அவ்வளவு ஆரோக்கியமானது அல்ல. வயதை தாண்டிய தோற்றம் மெலிந்த தேகம் என்றே கடைசி வரை காணப்பட்டார்.

பல உடல்நல பிரச்சனைகளில் அவர் சிக்கி இருந்தாலும் சைனஸ் பிரச்னை தான் அவருக்கு பெரிய பிரச்னையாக இருந்தது. ஒரு ஆபரேஷன் செய்ய வேண்டும் என்று மருத்துவர்கள் கூறியதை தொடர்ந்து அதற்கு ஒப்புக்கொண்டார். ஆனால் ஆபரேஷன் செய்தபோது, டாக்டர்கள் தவறான இடத்தில் ஆபரேஷன் செய்துவிட, அதன் பக்கவிளைவாக முகம் வீங்கி சிகிச்சை பலனின்றி, இறந்தார்.

இது குறித்து அப்போதைய மருத்துவர்கள் இது ஒரு 'மருத்துவ விபத்து' என்று குறிப்பிட்டு பட்டுக்கோட்டையார் மரணத்தை எளிதாக கடந்து சென்று விட்டார்கள் தவறான சிகிச்சைக்கு காரணமான டாக்டர்கள் மீதோ, மருத்துவமனையில் மீதோ எந்தவித புகாரும் யாரும் தரவில்லை என்பதுதான் ஆச்சரியமான விஷயம்.

- தினமலர் 27/12/25 பிளாஷ்பேக் -

பட்டுக்கோட்டை கல்யாணசுந்தரம் அவர்களின் அறம்!

1955.'படித்த பெண்' என்றொரு படம்.

இதில்தான் பட்டுக்கோட்டைக் கல்யாண சுந்தரம் தனது முதல் பாடலை எழுதி இருந்தார்.

150 ரூபாய் சன்மானம் பேசப்பட்டிருந்தாலும், படம் முடிந்து வெளிவரத் தாமதமாகிக் கொண்டிருந்ததால் பலமுறை அலைந்தும் பணம் கைக்கு வரவில்லை.

கடைசியாக, தயாரிப்பாளர் வீட்டுக்கு பட்டுக்கோட்டையார் பணம் கேட்கச் சென்றபோது அங்கிருந்த உதவியாளர் இவரை உள்ளே விடவே மறுத்திருக்கிறார்.

ஒரு துண்டுச் சீட்டை எடுத்து,

"தாயால் வளர்ந்தேன்

தமிழால் அறிவு பெற்றேன்

நாயே நேற்றுன்னை நடுத்தெருவில்

சந்தித்தேன்

நீயார் என்னை

நில்லென்று சொல்லுதற்கு?"

என்று எழுதி, "இதை உன் முதலாளியிடம் கொடு" என்று சொல்லி விட்டு வந்தார்.

படத்தாயாரிப்பாளர் பழமையில் நம்பிக்கைக் கொண்டவர்.

கவிஞர் பாடிய 'அறத்'தில் பயந்து போன அவர் உடனடியாக பணத்தைக் கொடுத்தனுப்பி விட்டாராம்.

-படித்தது -

இசை அமைப்பாளர் சிற்பி மனதில் ஏற்பட்ட காயம் 

'செண்பக தோட்டம்' படத்தின் மூலம் இசை அமைப்பாளராக அறிமுகமானவர் சிற்பி அன்னை வயல், கோகுலம், நாட்டாமை, உள்ளத்தை அள்ளித் தா, அம்மன் கோவில் வாசலிலே, சுந்தர புருஷன் உள்ளிட்ட பல படங்களுக்கு இசை அமைத்தார். ஆனால் அவரின் மனதில் ஆறாத காயம் ஒன்று உண்டு.

அது அவர் ரஜினி படத்திற்கு இசை அமைக்கும் வாய்ப்பை இழந்தது. மனோபாலா இயக்கத்தில் ரஜினி நடித்த படம் 'ஊர்க்காவலன்'. பாண்டியன், ராதிகா, ரகுவரன் சங்கிலி முருகன், மலேசியா வாசுதேவன் உள்ளிட்ட பலர் நடித்திருந்தனர்.
சத்யஜோதி பிலிம்ஸ் சார்பில் ஜி.தியாகராஜன் தயாரித்தார். இந்த படத்திற்கு அப்போது வளர்ந்து வந்த சிற்பி இசை அமைப்பதாக முடிவாகி இருந்தது. இதனால் மிகவும் சந்தோஷம் அடைந்த சிற்பி, வடபழனி முருகன் கோவிலுக்கு சென்று வழிபட்டு பிரசாத தட்டுடன் சத்யஜோதி பிலிம்சின் உரிமையாளர் ஆர்.எம்.வீரப்பனை சந்திக்க சென்றார்.

அப்போது அவர் சங்கர்-கணேஷை அழைத்து இசை குறித்து பேசிக் கொண்டிருந்தார். வெளியே வந்த உதவியாளர் பிரசாத தட்டுடன் நின்ற கொண்டிருந்த சிற்பியிடம் படத்திற்கு சங்கர்-கணேஷ் தான் இசை அமைக்க போகிறார்கள், நீங்கள் இல்லை என்று கூறிவிட்டுச் சென்றார். இதனால் அதிர்ச்சி அடைந்த சிற்பி அங்கேயே மயங்கி விழுந்தார்.

அப்போது அங்கு வந்த இயக்குனர் மனோபாலா அவரை தேற்றி அனுப்பி வைத்தார். ஆர்.எம்.வீரப்பனிடம் 'ஏன் சிற்பியை நீக்கினீர்கள்' என்று கேட்டதற்கு "அவன் சின்ன பையனாக இருக்கிறான். ரஜினி படத்திற்கெல்லாம் தாங்க மாட்டான். அதனால் மாற்றி விட்டேன்" என்றார். ஆர்.எம்.வீரப்பனின் முடிவை யாரும் மாற்ற முடியாது என்பதால் மனோபாலாவும் அமைதியாகி விட்டார்.

அதன்பிறகு சிற்பி ரஜினி படத்திற்கு இசை அமைக்கவே இல்லை. ரஜினி படத்திற்கு இசை அமைத்திருந்தால் தன் வாழ்க்கையே மாறி இருக்கும் என்றும், வாய்ப்பு மறுக்கப்பட்டது என் மனதில் ஏற்பட்ட பெரிய காயம் என்றும் சிற்பி பிற்காலத்தில் வேதனையோடு குறிப்பிட்டிருக்கிறார்.

தினமலர் பிளாஷ்பேக் 10/1/26

====================================================================================

குருவியூர் கோரக் கொலை

இருட்டு அறையின் ரகசியம் 

மஞ்சள்குடி மர்மம் 

மாமண்டையூர் மரணம் 

ஜமீன்தாரின் ஜன்ம விரோதி

மாயாபுரி மங்கை

கொட்டையூர் கோமளம்

இதெல்லாம் என்ன துப்பறியும் சாம்பு தன் காதல் மனைவி ஆசை மனைவி வேம்புவுக்காக மகாலட்சுமி லைப்ரரியிலிருந்து படிக்க கொண்டு வந்து கொடுத்த துப்பறியும் புத்தகங்களின் பெயர்கள் இதை படிக்கும் போது எனக்கு வேறு ஒன்றும் ஞாபகத்துக்கு வருகிறது காதலைக்க நேரமில்லை படத்தில் தான் இரண்டு படங்கள் எடுக்கப் போவதாக நாகேஷ் வேக வேகமாக இரண்டு படங்களின் பெயர்களை சொல்லுவார் அது கிட்டத்தட்ட இப்படி இருக்கும் சரியாக நினைவில் இல்லை வாழ்முனையில் முத்தம் கத்தி முனையில் ரத்தம் நிச்சயம் இந்த இரண்டு படங்களின் பெயர்களுக்கு திருத்தம் வரும் என்று நம்புகிறேன்.

============================================================================

செய்தி!  செய்தி..!!

ஒருபக்கம் எரிவாயு உருளை தட்டுப்பாடு..  பாருங்க..  இந்த மாதம் ஐந்தாம் தேதி சிலிண்டருக்கு பதிவு செய்து இன்னமும் எனக்கு உறுதிப்படுத்தும் தகவல் கூட வரவில்லை.  இவர்கள் என்னடான்னா....  தேர்தலில் பணிபுரிவோருக்கு "கவனிக்கிறார்கள்"!

அடங்கப்பா...  யார்யா நீங்கல்லாம்!

அடப்பாவிகளா...   ஒன்றரை கோடி கார் 

இந்நிலையில், சம்பந்தப்பட்ட குடும்பத்தினர் மீது உரிய நடவடிக்கை எடுக்கும்படி பலர் கோரிக்கை விடுத்தனர்.
இதைத்தொடர்ந்து, சீன அரசு, அந்த குடும்பத்தினரிடம் விசாரணையை நடத் தியது. அப்போது அதிகாரிகள், இச்செயல் நிலப்பிரபுத்துவ மூட நம்பிக்கை எனக்கூறி மெர்சிடிஸ் காரை புதைத்த சம்பவத்திற்கு அந்த குடும்பத்தினருக்கு எச்சரிக்கை விடுத்ததுடன், பொது மன்னிப்பையும் கேட்க வைத்தனர்.
இதுதவிர, சுற்றுச்சூழலை மாசுப்படுத்தியது உள்ளிட்ட குற்றச்சாட்டுகளுக்காக அக்குடும்பத்தினர் மீது அபராதம் விதிக்கவும் சீன அரசு முடிவு செய்துள்ளது.

================================================================================

'செக்ஸ் காமெடி' படம் எடுத்தார் பாலச்சந்தர் 1976ல்.  அவர் மறைவதற்கு முன் இதே படத்தை சித்தார்த்தை வைத்து ரீமேக் செய்ய நினைத்ததாகவும், சித்தார்த் மறுத்து விட்டதாகவும் தகவல்.  படம் மன்மத லீலை.  கமலஹாசன் நடித்த படம்.  கண்ணதாசன் பாடல்களுக்கு எம் எஸ் விஸ்வநாதன் இசை.

இந்தப் படத்திலிருந்து நான் பகிர நினைத்த பாடலை விட்டு வேறொரு பாடலைப் பகிர்கிறேன்.  பகிர நினைத்த பாடல் 'சுகம்தானா சொல்லு கண்ணே..'  பகிரும் பாடல் A V ரமணன் குரலில் வரும் ஆர்ப்பாட்ட, அட்டகாச பாடல்.   பெண் பித்தர் கமல்.  ஜெயப்பிரதா, ஹேமா சவுத்ரி, Y விஜயா என்று எல்லோரையும் வளைத்துப் போடுகிறார்.  அதில் அவருக்கும் அவர் மனைவி ரேகா (ஆலம்)வுக்கும் பிரச்னை வந்து விவாகரத்து வரை போகிறது.  படத்தில் ஒரு சுவாரஸ்யமான கேரக்டர் உண்டு.  ஆபீஸ் மானேஜராக நடிப்பவர் பாத்திரம்.

ஒரு பெண் தன் காதலன் தன்னை விட்டுவிட்டு வேறொரு பெண்ணுடன் சுற்றவதாகச் சொல்லி கமல் உதவியை நாட,  'கிடைத்தது சாக்கு, அடித்தது லாட்டரி' என்று பெண்பித்தர் கமல் அவளுடன் அந்தக் காதலன் பின்னால் சென்று அடிக்கும் லூட்டி பாடலாய்.  ராமணனுக்கு திரையில் முதல் பாடல் என்று நினைக்கிறேன்.  ஏனோ அவருக்கு அவர் மனைவி அளவு திரையில் வாய்ப்பு கிடைக்கவில்லை.

===============================================================================

ஜோக்ஸ்... ஜோக்ஸ்...  ஜோக்ஸ்...  ஜோக்ஸ்...