மணல் கயறு சாத்தியம்தானே? + சரோஜாதேவி பகுதி 15.

 

கேள்வி பதில்கள் :

அமரர் ஜெயக்குமார் சந்திரசேகரன் (சென்ற புதன் - 2.9.26 பதிவில் கேட்டிருந்த கேள்விகள். பதிலை பார்க்காமல் 4.9.26 கிருஷ்ண ஜெயந்தி அன்று மாலை மூன்றுமணிக்கு காலமாகிவிட்டார். 😔) 

​மணல் கயறு சாத்தியம்தானே? (நாங்கள் ... இஸ்ரோ மோல்ட் உண்டாக்கி பைபர் க்ளாஸில் ஹீலியம் காஸ் குடங்கள் உண்டாக்குகிறோம். )

# மணல் கயிறு சாத்தியமாக இருக்கலாம். ஆனால் அது அவசியம் இல்லை.

& என்னுடைய தொழிற்சாலையில் கூட, இரும்புத் தகடால் செய்யப்பட்ட Front end structure / cab விட்டு, ஃபைபர் கிளாஸ் கொண்டு தயாரிக்கப்பட்ட cab 1990 ஆம் ஆண்டிலிருந்து தயார் செய்தோம். மிகவும் உறுதியான தயாரிப்புதான். ஆனால் ஃபைபர் கிளாஸ் என்பது மண் என்று சொல்லிவிட இயலாது. அது கண்ணாடித்தூள் மற்றும் resin கொண்டு தயாரிக்கப்படுவது. 

3D பிரிண்ட்டிங்கில் ஒரு வீட்டையே 2 நாளில் IIT சென்னை கட்டி விட்டது. அது பற்றி பாமரர்க்கு விளங்கும் படியாக சொல்ல முடியுமா?

# 3D பிரிண்டிங் பற்றி பாமரனுக்கு விளக்க வேண்டுமா என்ன ? இதோ பார், இந்த மாதிரி வீடு * விலையில் கிடைக்கிறது என்று சொல்வதையே பாமரன் வரவேற்பான்.  (மேலும் இது பற்றி எனக்கும் என்னைப் போல பலருக்கும் அதிகம் தெரியாது. அப்புறமல்லவா விளக்குவது !!)

& முதலில் தேவையான முப்பரிமாண வடிவத்தை கணினியில் தயார் செய்து கொள்கிறார்கள். அதை concrete கலவை பரப்பும் ஒரு nozzle க்கு யந்திரம் மூலம் அனுப்புகிறார்கள். கொத்தனார்கள் செங்கல், சிமெண்ட் கலவையால் கட்டும் சுவரை 3 D யந்திரம் வெறும் concrete கலவையை layers மூலம் குறைந்த நேரத்தில் கட்டிவிடுகின்றது. ஆனால், ஜன்னல்கள் அமைப்பது, வாசல் படி, கதவுகள், pillars, roof எல்லாம் யந்திரம் செய்யாது. மனிதர்கள் மட்டுமே தற்போது செய்ய இயலும். அதற்கும் robot கண்டுபிடிக்கப்படும். 

3 D மூலம் கட்டப்பட்ட சுவர் அமைப்பு : 

இப்போது அத்தியாவசியம் ஆனால் சில வருடங்களில் தூக்கி எறியப்படும் என்று நீங்கள் கருதுவது யாது? உதாரணமாக நீராவி என்ஜின்கள்.

# பெட்ரோல் டீசல் வாகனங்கள்.

நெல்லைத்தமிழன் : 

டாய்லெட்டுக்கு தமிழில் ஒப்பனை அறை என்று பெயரிட்டிருப்பதன் காரணம் என்ன? பெண்கள் எங்க கண்ணாடியைப் பார்த்தாலும் மேக்கப் போட ஆரம்பிப்பதாலா?

# கழிவறை என்று சொல்வது கெட்ட வார்த்தை ஆனது எப்போதிலிருந்து என்று தெரியவில்லை. டாய்லெட், ரெஸ்ட் ரூம் என்பது போல இதுவும் ஒரு இடக்கரடக்கல் தான். இதில் ஏன் பெண்களை வம்புக்கு இழுக்கிறீர்கள் ? டாய்லெட் சாமான்கள் என்றால் சொந்த அலங்கார பொருட்கள் என்று பொருள்படும். அலங்காரம் ஒப்பனை ஆகிவிட்டது.  கடுமையாக இல்லாமல் காதுக்கு இதமாக இருப்பது தவறில்லை அல்லவா ?

பெங்களூரில் காணுமளவு அழகிய பெண்களே சென்னையில் காண முடிவதில்லையே. ஒரே வறட்சியாகத் தோன்றுவதன் காரணம் என்ன?

# இதற்கெல்லாம் ஒரு காரணம் சொல்ல முடியுமா என்ன ? நம்ம ஊர் பெண்கள் அதிகம் வெளியில் வந்து மற்றவர் கண்ணில் படுவது இல்லை என்று வைத்துக் கொள்ளலாமே. அழகு என்பது பார்ப்பவரை பொருத்தது.  அழகான பெண்கள் என்று வந்து விட்டால், எல்லா இடத்திலும் இருப்பார்கள்.

ஒருகால் நாகரிகம் கருதி நீங்கள் உற்றுப் பார்ப்பதில்லையோ என்னவோ !

& நான் என்ன நினைக்கிறேன் என்றால், சென்னையில் நீங்கள் வெளியே சுற்றும்போது மனைவியுடன் சேர்ந்து சுற்றுகிறீர்கள். பெங்களூரில் தனி ஆளாக நிறைய சுற்றுகிறீர்கள்! 

ஆமாம், ஒரு கேள்வி - தமன்னா இருப்பது சென்னையிலா அல்லது பெங்களூரிலா? 

பெங்களூரில் குறைந்தபட்சம் ஏழு மாதங்கள் நல்லா குளிரா ஜிலு ஜிலுன்னு இருப்பதைப்போல சென்னையில் ஒரு வருடத்தில் எவ்வளவு நிமிடங்கள் குளிர் காலம்?

# டிசம்பர் முதல் பிப்ரவரி வரை சென்னையில்  குளிர் காலம் என்பதை நான் உணர்ந்து இருக்கிறேன்.

& எவ்வளவு நிமிடங்கள்! ஹா ஹா ஹா !! எனக்குத் தெரிந்து சென்னையில் ஒரு வருடத்தில் நான் ஸ்வெட்டர் போட்டுக்கொண்ட நாட்கள் மிகவும் குறைவு. முப்பது நாட்கள் இருந்திருந்தால் அதிகம். பெங்களூரில் நவம்பர், டிசம்பர், ஜனவரி மாதங்களில் ஸ்வெட்டர் போடும் அவசியம் இருக்கும். 

ஒரு ஹோட்டலுக்கு அல்லது உணவகத்துக்கு ரேட்டிங் ஸ்டார் எப்படி கொடுக்கறாங்க? செக் இன் செக் அவுட்டுக்கு அதிக நேரம் எடுக்க எடுக்க ஸ்டார் ரேட்டிங் கூடுமா? அதுபோல ஆர்டர் செய்த உணவை கொண்டுவர  சர்வர் அதிக நேரம் எடுப்பதைப் பொறுத்து உணவகத்தின் மதிப்பு கூடுமா? சமீபத்தைய The Park Chennai மற்றும் Hotel Palm grove அனுபவம் அப்படி எண்ண வைத்தது. 

# வாடிக்கையாளர்கள் செய்யும் மதிப்பீடு அடிப்படையில் இப்படி ஒரு ரேட்டிங் கொடுக்கப்படுகிறது. இதில் பல காரணங்களால் சரியான உள்ளீடுகள் வருவதில்லை. இங்கே நல்ல ஹோட்டல் எது என்று கேட்டால் பல சமயம் சற்று கட்டமைப்பு நன்றாக இருக்கும் ஹோட்டல்களை குறிப்பிட்டுச் சொல்வார்கள். அங்கு பெரும்பாலும் உணவு சுத்தமாக இருக்கலாம் ஆனால் சுவையாக இருக்காது.

அதேபோல், இடுபொருட்கள் சுத்தமானதானாலும், உரம், ரசாயன தெளிப்பு இவற்றால் விளைச்சல் சுவை குன்றியிருப்பதும் காரணமாகலாம் . ஓட்டல் உணவு நன்றாக இருந்து நான் சுவைத்து சாப்பிட்டது 1960 என்று சொல்லலாம்.

= = = = = = = = =

படமும் பதமும் : 

நெல்லைத்தமிழன் : 

யானைகளைப் பார்ப்பது நம் எல்லோருக்குமே மிகுந்த மகிழ்ச்சி தரும். இல்லையா?  நாகர்கோயில் அருகே திற்பரப்பு நீர்வீழ்ச்சிக்குச் சென்றிருந்தபோது நாங்கள் யானையைக் குளிப்பாட்டுவதைப் பார்த்தோம். பாகனுக்கும் யானைக்கும் உள்ள உறவே தனிதான்.

அவ்வளவு பெரிய யானைகள்... பாகனுக்குக் கட்டுப்பட்டு நடக்கின்றன. கொஞ்சம் எகிறினால் பாகன் கதி?

சமீபத்தில் ஒரு செய்தி பார்த்தேன். ஏதோ கோபத்தினால் பாகனைச் சட்னியாக்கிக் கொன்ற யானை, அவனுடைய மகன்/மகள் வந்தபோது மிகுந்த வருத்தத்துடன் மன்னிப்பு கேட்பதுபோல நடந்துகொண்டதாம்.  மிருகங்களும் மனிதர்களைப் போலத்தானே..இல்லையா! 

= = = = = = = =

KGG பக்கம் : 

சரோஜாதேவி தொடர் கதை 

சென்ற வாரம் - சுட்டி : பகுதி 14: பெண் பார்க்கும் படலம்! 

இனி 

இந்த வாரப் பகுதி. 

பகுதி 15 : ஆனந்தின் சம்மதம். 

வீணா ஆனந்துடன் பேசிக்கொண்டிருந்த நேரத்தில், ஜயராமன் விமலா இருவரும் மற்றவர்களுடன் (நாநா, பாபா, ஆனந்தின் பெற்றோர் ) பேசிக்கொண்டிருந்தனர். 

ஜயராமன் நாநாவிடம் 'உங்க பிசினஸ் என்ன என்று சொன்னீர்கள்?' என்று கேட்டார். 

நாநா " பனானா enterprises " என்றான். 

" அடேடே ! மைலாப்பூர் கம்பெனி ஆயிற்றே ! சென்னையிலேயே அதிகம் இன்கம்டாக்ஸ் கட்டுகின்ற கம்பெனிகளில் ஒன்று ஆயிற்றே! உங்கள் ஆடிட்டர் வரதராஜன் & கோ தானே!  " 

" ஆமாம். உங்களுக்கு எப்படி தெரியும்? " என்று கேட்டான் நாநா. 

" நான் இன்கம்டாக்ஸ் ஆபீசில்தான் வேலை பார்க்கிறேன்.  பனானா எண்டர்ப்ரைஸஸ் பற்றி எங்கள் அலுவலகத்தில் அடிக்கடி கேள்விப்பட்டுள்ளேன். யு own that business? " என்றார் ஜயராமன். 

" ஆமாம். " 

" பார்ப்பதற்கு இவ்வளவு சாதாரண ஆளாக இருக்கீங்க!" 

" இப்படி இருப்பதுதான் எனக்குப் பிடித்துள்ளது!" 

பாபா வியப்புடன் " டேய் நாநா - அப்போ மெய்யாலுமே நீ பெரிய ஆளா ! நானும் உன்னை சாதாரண ஆளாக நெனச்சுக்கிட்டு இருக்கேன்!" என்றான். 

" என்னோடு பிசினஸ் பார்ட்னர் ஆக நீ வேலையில் சேர்ந்து இன்னும் ஒரு வாரம் கூட ஆகவில்லை. அதனால நம்ம பனானா எண்டர்ப்ரைஸஸ் பற்றி முழு விவரமும் உனக்கு அப்புறம் சொல்லலாம் என்று நினைத்திருந்தேன். ஆனால் ஜயராமன் சார் இன்கம்டாக்ஸ் அலுவலகத்தில் வேலை பார்ப்பதால் இன்றைக்கே கொஞ்சம் சொல்லவேண்டியதாகிவிட்டது. பரவாயில்லை" என்றான் நாநா. 

" அட! எதிர் வீட்டு பாபா - பனானா எண்டர்ப்ரைஸஸ் பிசினஸ் பார்ட்னரா! சூப்பர். சி ஏ முடித்தவுடனேயே வேலை - அதுவும் சென்னையின் அதிக வருமான வரி கட்டும் ஒரு கம்பெனியில்! ரொம்ப சந்தோஷம்" என்றார் ஜயராமன். 

முதன் முறையாக விமலா, பாபாவை ஆர்வமாகப் பார்த்தாள். 

*****       *******       ********

ஆனந்திடம் பேசி முடித்துவிட்டு அறையை விட்டு வெளியே வந்த வீணா, மொபைல் போனை ஆனந்தின் அப்பாவிடம் கொடுத்தாள். 

" என்னம்மா வீணா - ரெண்டு பேரும் பேசிக் கொண்டதில் ஒருவருக்கு ஒருவர் பிடித்திருந்ததா? கல்யாணம் பற்றி நாங்க தொடர்ந்து பேசலாமா ?" என்று கேட்டார் ஆனந்தின் அப்பா. 

" எனக்கு சம்மதம் மாமா. அவர் என்ன நினைக்கிறார் என்பதை அவரே உங்களுக்கு சற்று நேரத்தில் ஃபோன் பண்ணி சொல்வார் " என்றாள் வீணா. 

ஐந்து நிமிடங்கள் கழித்து ஆனந்த் அவருக்கு ஃபோன் செய்தான். 

போனை எடுத்துப் பேசிய ஆனந்தின் அப்பா " சொல்லு ஆனந்த். ஓ கே. சரி, சரி .. .. .. அப்படியே செய்துவிடலாம் " என்றார். 

பிறகு ஜயராமனிடம் " ஆனந்த் நிச்சயதார்த்தத்தை சீக்கிரம் முடித்து, அடுத்த மாதம் கல்யாண நாள் பிக்ஸ் செய்யலாம் என்று சொன்னான். அவனுக்கு இரண்டு வாரம்தான் லீவு கிடைக்குமாம். வரும் வெள்ளிக்கிழமை அன்று நிச்சயதார்த்தம் வீட்டுப் பெரியவர்கள் முன்னிலையில் செய்துவிடுவோம்" என்றார். 

" சரி " என்றார் ஜயராமன். 

(தொடரும்)