விம் பார் போட்ட சட்னி

​"

இந்தா இதை எல்லாம் அரைத்து.."  என்று ரவி ஆரம்பித்ததும் 

"ஏங்க கை வேலையாக இருக்கேன் என்று தெரிந்த பின்னும் என்ன அவசரம் உங்களுக்கு?  இன்றைக்கு சனிக்கிழமை தானே.."

"ஆமாம் கௌரி.  ஆனால் கொஞ்சம் வெயிலுக்கு முன்னாடியே பண்ணிக்கொடுத்துட்டேன்னா நல்ல இருக்கும்"

பேப்பரை வாங்கிப் படித்த கௌரி தேள் கொட்டியவளாய் "என்னங்க இது அந்த ஸ்ரீராமோட ரெசிப்பி...  புதுசா ட்ரை பண்ணறேன்னுட்டு இப்படி எல்லாமா பண்ணுவாங்க?  போகாத ஊருக்கு வழி..."

"10 ..15 பல பூண்டு சரி

10 பச்சை மிளகாய்

​​

10  அ 15 பட்டை மிளகாய்

ஏங்க உங்க ஸ்நேகிதருக்கு வெயில் அதிகம் ஆன உடனே ஏதாவது..."  என்று ஆரம்பித்தவளை ரவி கை அமர்த்தி 

"அதிலிருக்கும் எல்லாமே நம் வீட்டில் இருக்கிறதுதானே..  எதுவும் வாங்கி வரணுமா?" என்றான் ரவி.

"எல்லாம் இருக்கு.  வேண்டியது இருக்கு.."  என்று சொல்லிக் கொண்டே கௌரி சீட்டைத் தொடர்ந்து படித்தாள்.

2 அங்குல துண்டு இஞ்சி

1 ஸ்பூன் மிளகு, சிறிது லவங்கப்பட்டை, 10 கிராம்பு 2, வெங்காயம்

வேண்டுமானால் ஒரு சிறிய தக்காளி, 2 ஸ்பூன் எண்ணெய்...

எந்த எண்ணெயானாலும் பரவாயில்லை..  தேங்காய் எண்ணெய் கடலை எண்ணெய் சூரியகாந்தி எதுவானாலும்..

2 ஸ்பூன் vim இல்லையானால் hand wash.."

கடைசி அயிட்டத்தைப் படித்ததும் கௌரி மீண்டும் "அவர் பாட்டுக்க வாட்ஸாப்பில அனுப்பிட்டார்.  நீங்களும் என் கிட்ட எழுதிக் கொடுத்திட்டீங்க.  இன்னொரு தடவை ஃபோன் பண்ணி கேட்டுருங்க சோப் எல்லாம் யாராவது சட்னியில் போடுவங்களான்னு..  பைத்தியம் தான் பிடித்திருக்கணும் அந்த மனுஷனுக்கு..." என்று பேசிக்கொண்டே போன கௌரியைப் பார்த்து "பைத்தியம் அவருக்கில்லை உனக்குத்தான்" என்று சிரித்தான் ரவி

"பின்னே?" 

"செம்பருத்தி செடியில் வெள்ளைப்பூச்சி நிறைய இருக்கே என்ன செய்யலாம் என்று கேட்டதற்கு அவர் மாமாவைக் கேட்டு சொல்லியிருக்கிறார் செய்து பார்ப்போமே..

அரைத்து மிக்ஸி ஜார் கழுவிய நீருடன் ஒரு பாட்டிலில் போட்டு 2 நாள் வைத்திருந்து spray பண்ணணுமாம்.."  என்றான் ரவி.

====================================================================================================

படித்ததில் சேகரித்த துணுக்குகள் :

• இந்தியாவின் மூவர்ணக்கொடிக்கு மூலம் மேடம் காமா 1907 இல் ஜெர்மனியில் ஸ்டட்கார்ட்டில் ஒரு பொதுக் கூட்டத்தில் ஏற்றியது.

• ஸி ஆர் தாஸுக்கு தேசபந்து என்கிற பட்டத்தை வழங்கியது அரவிந்த கோஷ். 

• இங்கிலாந்தில் கேம்பிரிட்ஜ் பல்கலைக்கழகத்தில் பட்டம் பெற்று, பின்னர் ஐ ஸி எஸ் பரீட்சையும் பாஸ் செய்தாலும் ஆங்கிலேய அரசாங்கம் அவருக்கு அந்தப் பட்டத்தை வழங்காததற்குக் காரணம் அரவிந்தருக்கு அப்போது அந்தப் பதவிக்கு முக்கியமான தகுதியாகக் கருதப்பட்ட குதிரையேற்றம் தெரியாதது!

• டிசம்பர் 6 1907 ;  அப்போதே இந்தத் தேதிக்கு முக்கியத்துவம் உண்டு.  வங்காளத்துக்கான  ஆங்கிலேய லெப்டினன்ட் கவர்னரான ஃபிரேசர் என்பவரைக் கொல்வதற்காக இந்திய சுதந்திர புரட்சிப்படையினர் இவர் சென்ற ரயிலைக் கவிழ்த்தார்கள்.  (அவர் தப்பிவிட்டார்)

• கோஹினூர் வைரம் பஞ்சாப் மஹாராஜா ரஞ்சித்சிங் வசம் இருந்தபோது அந்த வைரத்தின் விலையைப் பற்றி ஒருவர் மஹாராஜாவிடம் கேட்டார்.  மஹாராஜா சொன்ன பதில் "இந்த வைரக்கல்லின் விலை ஐந்து செருப்புகள்!"  இதற்கு என்ன அர்த்தம் என்றால் எவன் ரஞ்சித்சிங்கைப் போரில் வென்று அவருடைய மாளிகையையும் தலைநகரையும் அழிக்க வல்லானோ, அவன்தான் அந்த வைரத்தை அடைய முடியும் என்பதாம்.  உண்மையில் இன்று வரை கோஹினூர் வைரத்தின் உண்மையான விலையை அறிந்தவர் இல்லையாம்.

==========================================================================================================

கடைசி தேதி ஜூன் 15.  கேட்டு வாங்கிப் போடும் கதைக்கு சிறுகதை அனுப்பும் நண்பர்கள் யாவரும் இதில் கலந்து கொள்ளலாமே....

===================================================================================================