நம்பவே முடியாத உண்மை

க.ப. அதிரா  :

1. பேய் பார்த்த அனுபவம் உண்டோ?  பழைய கதைகளை நம்புறீங்களோ? நாங்க பார்த்தமே  ..:)).

#  ​ பணப்பேய் சந்தேகப்பேய் நினைவுக்கு வருகின்றன.  மற்றது ஏதும் கண்டதில்லை.

*  சிலரை பேயாய்ப் பார்த்த அனுபவம் உண்டு.   அது இருக்கட்டும்...  நீங்கள் ஒரு அனுபவம் சொல்லத் தயாராய் இருப்பது தெரிகிறது.  கேட்க நாங்கள் ரெடி!


2. நாங்கள் எல்லோரும் விழுந்து புரண்டும் சிரிக்கும்படியா ஒரு ஜோக் சொல்லுங்கோவன்.

#  ​அது தெரிந்தால் தினமலருக்கு இந்நேரம் அனுப்பியிருப்பேனே.

*  நீங்கள் விழுந்து புரண்டு சிரிக்கிறீர்கள் என்று எப்படித் தெரியும்? வீடியோ எடுத்து அனுப்புவதாய் இருந்தால் சொல்லலாம்!


3. தன்குஞ்சு மட்டும்தான் பொன்குஞ்சு என நினைப்போரைப் பற்றி உங்கள் கருத்து?

#  ​என்னைப் போலவே..

*  இயற்கைதானே!


4. எந்தச் செயலைப் பார்க்கும்போது, இதெல்லாம் ஒரு பைத்தியக்காரத்தனம் எனத் தோன்றும்?  

#  ​டாட்டூ & தோனி கிராப்

*  நிறைய இருக்கிறது!  முள்ளம்பன்றி போல தலைமுடி வெட்டிக்கொள்வது, சற்றே குனிந்தாலும் பின்னால் உள்ளுடை தாண்டியும் தெரியும் வண்ணம் பேண்ட்ஸ் போடுவது... 

டி ஏ மாலதி சென்னையிலிருந்து சுஜாதாவைக் கேட்கிறார் :  "ஆவி, பேய், பிசாசு...   இவைகள் எல்லாம் இல்லாத தொலைக்காட்சித் தொடர்களைப் பார்ப்பது அரிதாக இருக்கிறதே, ஏன்?

சுஜாதா பதில் அளிக்கிறார் :  "மக்கள் பயமில்லாமல் பயப்படவிரும்புகிறார்கள் என்று தெரிகிறது!"

==========================================

ஏஞ்சல் :

1)  ஒரு எழுத்தாளரின் கதைகள் எழுத்துக்கள் அவர் இளவயது மற்றும் வாழ்க்கையின் அனுபவங்களை பிரதிபலிக்கிறதா ?

#  ​பெரும்பாலும் ஆம்.

* அப்படி அவசியமில்லை. எவ்வளவு அப்படி எழுத முடியும்?  கேட்ட கதைகளாகவுமிருக்கலாம்.  கற்பனையாகவும் இருக்கலாம்.

2) பொதுவாக வீடுகளில் அன்றைய சமையல் யாரால் தீர்மானிக்கப்படுகிறது ?  சமைப்பவராலா அல்லது சாப்பிடுபவராலா ?

#  ​ஃப்ரிட்ஜில் உள்ள பண்டங்களால் தான்.

*  குறை சொல்பவர்களிடம் பொறுப்பை ஒப்படைத்தால் இரண்டு நாட்களில், அதிக பட்சம் ஒரு வாரத்தில் வழிக்கு வந்து விடுவார்!

3) பேசியே கொல்வது பேசாமலே கொல்வது  எது சிறப்பு ? எதை பொறுத்துக்கொள்ளலாம் ?

#  ​பேசிக் கொள்வதை.

*  அதீதமாய் எதுவும் வேணாம்.  அளவோடு இருந்தால் போதும்!

4)  உயர் கல்வி எதை வைத்து தீர்மானிக்கப்படுகிறது ? எதிர்காலத்தில் வாழ்க்கைக்கான ஸ்ட்ரோங் அஸ்திவாரம், நிரந்தர வருமானம் பட்டம் பதவி அந்தஸ்து  இவற்றில் எது ?

#  ​ஆசை மற்றும் வசதிதான் தீர்மானம் செய்ய வைக்கிறது.

*  எல்லாம்.  தெரிந்து கொள்ள நினைப்பவர்கள் அதைக் கல்வியாக நினைக்க மாட்டார்கள்!

5) சுவை என்பது மனம் சம்பந்தப்பட்டதா அல்லது பசியுணர்வு சம்பந்தப்பட்டதா ?

#  ​அனுபவம் பாற்பட்டது.

*  பசி வந்ததும், மனம் தனக்குப் பிடித்த லிஸ்ட்டை மூளை நியூரான்களில் நிரடி ஆசையைத் தூண்டுகிறது!

6)  நீங்க நம்பவே முடியாத உண்மை என்ன ?

#  ​இதுவும் கடந்து போம் என்பதுதான்.

*  "இறந்தவனைச் சுமந்தவனும் இறந்துட்டான்...    அதை இருப்பவனும் எண்ணிப்பார்க்க மறந்துட்டான்..."

தெரியாத உண்மை எது?  தெரிந்த பொய் எது? -  இரா.  திருக்குமரன், நாமக்கல்.

தெரியாத உண்மை - கடவுள்.  தெரிந்த பொய் - தேர்தல் சபதங்கள்.- சுஜாதா.

7) வெளியிடங்களில் தெரியாம வழுக்கி விழுந்து, விறுவிறுன்னு எழும்பி யாரவது பார்த்திருப்பாங்களோன்னு சுற்றுமுற்றும் பார்த்து  திருப்தி பட்டிருக்கீங்களா :) ??? 

#  ​இல்லை.

*  இல்லை.  ஆனால் அப்படி விழுபவர்களில் பெரும்பாலானோர் ஆறுதல் தேடி சுற்றுமுற்றும் புலம்பலாய்ப் பார்த்ததைப் பார்த்திருக்கிறேன்!  அதிலும் எப்பவுமே அடுத்தவர் மேல் பழி!

8) குண்டு குண்டா இருக்கிற கொழுக் மொழுக் பாப்பாவை ஹெல்த்தினும் ஆரோக்கியமா இருக்குன்னும் ஏற்கும் மனம் அதே குண்டா ஆன பெண்களை மட்டும் ஆரோக்கியமில்லைன்னும் வெயிட்டை குறைக்கணும்னும்  சொல்வதேன் ?

#  ​முன்னது எதிர்கால வளர்ச்சிக்கு உத்தரவாதம் பின்னது கடந்த கால மிகைமீறல்களின் அடையாளம்.

*  பாப்பாவையே அப்படி நான் ஏற்பதில்லை!  அது சரி, பெண்களை மட்டும்தான் சொல்வார்களா?

9) பாராட்டும்போது இரு கரங்களை சேர்த்து தட்டுவோர் எதிர்ப்பு தெரிவிக்கும்போது ஒரு கரத்தை ஒங்கி மேஜையில் தட்டுவதேன்?

#  ​முன்னது ரசனையின் ஒலிக்குறிப்பு. பின்னது எதிரி மண்டையின் இடுகுறி.

*  அறிவிழக்க வைக்கும் ஆத்திரம்!  உணர்வுக் குழப்பம்.

10)  எல்லாத்துக்கும் நிறம் இருக்கா ?  நீரின் நிறம் என்ன? கண்ணாடியின் நிறம் என்ன ?

#  ​சுத்தமானதானால் நிறமற்றது என்றுதானே அறிவியல் சொல்கிறது !

*  எல்லா நிறமும் அதற்குச் சொந்தம்!

"நீங்கள் கவனிக்கும் விஷயங்களை எழுதுகிறீர்களா? அல்லது எழுதுவதற்காக கவனிக்கிறீர்களா?  இரண்டாவது என்றால் விஷயங்களை இயல்பாய் ரசிக்க முடியாமல் போய்விடுமே" -  இது ஜே. அர்விந்தின் கேள்வி.

சுஜாதா பதில் :  "கவனிக்கும்போது இரண்டும் இயங்கும்.  எங்காவது ஒரு மூலையில் மூளையில் பதிவாகும்.  பின்பு எழுத்தாகும்."

============================================

துளசிதரன்: 

வேலைக்குச் சென்று கொண்டிருக்கும் ஆண்களுக்கு விடுமுறை தினங்கள் வரமா? சாபமா?

#  ​வேலையை ரசித்துச் செய்வோருக்கு ஓய்வு மட்டுமே.  ஈட்டிய விடுப்பு.

*  வரமே!

பள்ளிக் கூடம் இல்லாமல் ஆன்லைனில் கல்வி கற்கலாம் என எதிர்காலத்தில் வந்துவிடும் என்று பேசப்படுவது சிறந்ததா? இதனால் பாதிப்புகள் என்ன நன்மைகள் என்ன?

#  ​ஆன்லைனில் கல்வி:  ​பணச்செலவு குறைவதால் லாபம்.  நட்புகள் நஷ்டம்.

$  ​பள்ளி செல்லாமல் கற்கலாம்.  ஆனால் பட்டம் பட்டயம் என்று சான்று கேட்குமிடத்தில் வேலை வேண்டும் என்றால்?

"​கேபிள்​ டீவியில் திரையுலகுக்குப் பாதிப்பு என்பதுபோல், இன்டர்நெட் வாயிலாக எத்துறைக்கு பாதிப்பு ஏற்படும் ஸார்?"​  என்று இரா. மாதவராமன் கிருஷ்ணகிரியிலிருந்து எழுத்தாளர் சுஜாதாவைக் கேட்டிருக்கிறார்.

சுஜாதாவின் பதில்  :  "எந்தத்துறைக்கும் பாதிப்பு ஏற்படாது.  எல்லாத்துறையும் செழிக்கும்."

================================================================================

வாட்ஸாப் கேள்விகள் 

நெல்லைத்தமிழன் :

​1. இப்போ தென்னாப்பிரிக்காவுக்காக ஆடும் செனூரன் முத்துசாமி அவர்களின் முன்னோர்கள் தமிழகத்தைச் சேர்ந்தவர்கள். இந்த 'செனூரன்' என்பது செந்தூரன் என்று அவர்கள் பெற்றோர் திருச்செந்தூரை மனதில் வைத்து, அவருக்கு வைத்த பெயராக இருக்குமா?

$  ​மெய்வழிசாலை சேர்ந்தவர்கள் செந்நூரன் என்றெழுதி செந்தூரன் என்று படிப்பார்கள். இவரும் அனந்ந ரோ?

#  ​இருக்கும். 

*  கேசவ் மகராஜுக்கு என்ன கற்பனை வைத்திருக்கிறீர்கள்?  

​2. புலம் பெயர்பவர்கள், தங்களுடைய வேர்களை, கலாச்சாரத்தை மெது மெதுவாக இழந்துவிடுகிறார்களா?

#  ​இழக்கிறார்கள் அதை சரிக்கட்ட சிரமமும் படுகிறார்கள்.

$  ​எத்தனை தலைமுறைக்கு முன் புலம் பெயர்ந்தனர், பின்னர் எத்தனை முறை திரும்ப வந்து உறவுகளை புதுப்பித்துக்கொண்டார்கள் என்பதெல்லாம் பொறுத்து மாறுதல்கள் வரலாம்.

* பெயர்ந்தவர்கள் அனுபவம் சொன்னால் பிரசுரிக்கலாம்;  சுவாரஸ்யமாக இருக்கலாம்.  விவாதிக்கலாம்.

​3)  சினிமா போன்ற, குறுகிய காலத்தில் மட்டும்தான் பெரும்பாலும் லைம் லைட்டில் இருக்க முடியும் என்பது போன்ற ப்ரொஃபஷன்களுக்கு எல்லோருக்கும் போடுவது மாதிரியான வரிவிதிப்பு நியாயமா? உதாரணமா, 20 வருஷம் சோத்துக்குச் செத்திருப்பான், 3 வருஷம் புகழ்ல இருக்கும்போது வருஷத்துக்கு 15-30 லட்சம் சம்பாதிச்சா, அதுக்கு அதிக வரி போட்டுவிட்டு, அப்புறம் வேலையில்லாமல் வீட்டுல இருக்கும்போது திரும்ப பிச்சை எடுக்க வைப்பதா அரசாங்க நோக்கம்?

#  ​வரிவிதிப்பு தவிர்க்க இயலாத சுமை. எனினும் கலைத்துறை வருமானத்துக்கு வரிச் சலுகைகளும் கணிசமான அளவில் உண்டு.

$  ​லாட்டரி அடித்தால் வருமானவரி கேட்க மாட்டீர்களா?