பொறுப்பில்லாத இலக்கியவாதிகள்

 வீட்டில் அரிசியே இருக்காது.  செல்லம்மா கஷ்டப்பட்டு பக்கத்து வீட்டு மாமியிடமோ, தெருக்கோடி பாட்டியிடமோ கொஞ்சமா அரிசி  கடன் வாங்கி வந்து வைத்திருப்பார்.   

மற்ற வேலைகளை முடித்துக்கொண்டு சாதமோ, கஞ்சியோ வைக்க சாதத்தை எடுக்கலாம் என்று வந்தால்...  

அங்கு பாரதி அந்த அரிசி மணிகளை குருவிக்கும் காக்கைக்கும் போட்டுக் கொண்டிருப்பார்.  போதாதற்கு பாட்டு வேற..  

"காக்கைக்குருவி எங்கள் ஜாதி.."

கடுப்பு வருமா, வராதா செல்லம்மாவுக்கு?  

யோவ்..   சாதி இருக்கட்டும்..  மீதி இருப்பதையாவது கொடு..  அதை வைத்துதான் இன்றைய பாடு..​

அதே செல்லம்மா,  பாரதி ஏதோ சிந்தனையில் ஆழ்ந்திருந்தபோது நெல்குத்தும் பெண்மணியை வேறுபக்கம் சென்று குத்தச் சொன்னாராம்.  பாரதியின் எண்ணவோட்டத்துக்கு அது இடைஞ்சலாகக் கூடாது என்று.  

பாரதி, 'வேண்டாம் இங்கேயே அவர் வேலை செய்யட்டும் அந்தச் சத்தம் பராசக்தியிடம் வரம் வேண்டும்படி என்னைத் தூண்டுகிறது' என்றாராம். 

'முதலில் வயிறு நிறைய வழி கேளுங்கள் பராசக்தியிடம்' என்றாராம் செல்லம்மா.  

'என்னை கட்டாயப்படுத்தாதே, என் கையில் இருபப்தை உன்னிடம் கொடுத்து விட்டேன்' என்றாராம் பாரதி.  

'கையில் பணம் இருக்கும்போது புத்தகம் போடுங்கள் இப்போது என்ன தேவை' என்றாராம் செல்லம்மா..  

'இப்படி பேசினால் நான் தலைமேல் துண்டு போட்டுக்கொண்டு போய்விடுவேன்' என்றாராம் பாரதி.  

'நான் இந்தப் பக்கமாய் போய்விடுவேன்.  நம் குழந்தைகள் என்னவோ ஆகட்டும்' என்றாராம் செல்லம்மா...

இப்படி எல்லாம் சண்டை போட்டிருக்கிறார்கள் செல்லம்மாவும் பாரதியும்.  சொல்லி இருப்பவர் யதுகிரி அம்மாள்.  அந்த நேரத்தில் எழுதப்பட்ட பாடல்தான் மனதில் உறுதி வேண்டும்!  ஆனாலும் மனைவியை விட்டுக் கொடுக்காமல் பேசியிருக்கிறார் யதுகிரியிடம் பாரதி.

இலக்கியவாதிகள் என்றாலே இப்படியெல்லாம் பொறுப்பில்லாமல்தான் இருப்பார்கள் போல.  அல்லது பொறுப்பில்லாமல் இருந்தால் இலக்கியவாதிகள் ஆகிவிடலாமோ!

இன்னும் கு ப ரா, சிட்டி முதலானோர் கைக்காசைச் செலவழித்துதான் புத்தகம் போட்டிருக்கிறார்கள்.  'அறம்' தொகுப்பில் ஜெயமோகன் ஒரு கதை எழுதி இருப்பார்.  அது எம் வி வி பற்றி எழுதப்பட்டது என்பதற்கான அடையாளங்கள் இருக்கும்.  அதிலும் எழுத்தாளன் எவ்வளவு கஷ்டப்பட்டிருப்பான் என்பதற்கு சான்றுகள் இருக்கும்.

இப்போதைய எழுத்தாளர்கள் அவ்வளவு கஷ்டப்படுவதில்லை என்று நினைக்கிறேன்.  முன்னோடிகளாம் மூத்த எழுத்தாளர்கள் பட்ட பாட்டைப் பார்த்து உஷாராகி வயிற்றுப்பாடு வேறு, எழுத்துத்தொழில் வேறு என்று விவரமாகவே இருக்கிறார்கள் என்று நினைக்கிறேன்.

தி ஜானகிராமன், க நா சு போன்றோரெல்லாம் டெல்லியிலும் வேறு இடங்களிலும் நல்ல வேலையில் இருந்தார்கள்.  ஆனால் திஜர ஏழ்மையில்தான் இருந்தார்.  இதோ, இப்போதும் அவர் பேத்தி நம்மிடம் உதவி நாடி நிற்கிறார்.  

எழுத்தாளர்களுக்கு அப்போது இல்லாத பல வாய்ப்புகள் இன்றைய நிலையில் அவர்களுக்கு கிடைக்கும்.  ஊடகங்களிலும், சீரியல்கள் வாயிலாகவும் பல வழிகள் இன்றைய நிலையில் சுலபம்.  இன்றும் பழைய எழுத்தாளர்கள் புதுமைப்பித்தன், திஜர போல கஷ்டப்படுபவர்கள் இருக்கிறார்களா, தெரியவில்லை.

புதுமைப்பித்தன் சென்னை வந்து கஷ்டப்பட்டபோது அவருக்கு மணிக்கொடியில் புத்தக ஆசிரியர் பொறுப்பு கொடுத்து இரண்டு ரூபாய் முன்பணம் கொடுத்தால், அதை வாங்கி கொண்டுபோய் மனைவியிடம் தந்து வயிற்றுப்பாட்டுக்கு வழி செய்ய மாட்டாரோ..   மணிக்கொடி இருந்த நிலைக்கு இரண்டு ரூபாய் முன்பணம் மிகப்பெரிது!

நேராக கடைக்குச் சென்று ஒன்றேகால் ரூபாய்க்கு மாப்பஸான் கதைப் புத்தகமும், மீதிச் சில்லறைக்கு ஸ்பென்சர் சுருட்டையும் வாங்கிக்கொண்டு வந்து  நின்றாராம்.

என்ன பொறுப்பு!

இன்னொருமுறை கிடைத்த மொத்த காசுக்கும் பிளேடு வாங்கி வந்தாராம்.  ஒரு குரோஸ் என்றால் எவ்வளவு என்று தெரியவில்லை.

மணிக்கொடியின் நிதி நிலையே பரிதாபம்.   யாராவது விநியோகஸ்தர் பணம் கொடுத்தால் உண்டு.  அப்படித் தப்பித் தவறி பணம் கிடைத்து விட்டால் எல்லோரும் அந்தக் காசை எடுத்துக்கொண்டு கும்பலாக எதிரிலிருக்கும் காபி கிளப்புக்கு ஓடி சாப்பிட்டு விட்டு வருவார்களாம்!

மொத்த பேரும் இலக்கியவாதிகள்தான் போல!

நேற்று ஜூன் முப்பது புதுமைப்பித்தன் நினைவு நாள்.  சினிமா பக்கம் திரும்பிய அவர் கவனத்தில் 'ராஜமுக்தி' என்கிற படத்துக்கு கதை வசனம் எழுதும் வாய்ப்பு வந்தது.  ராஜமுக்தி என்பது எம் கே டி கடைசியாய் நடித்த திரைப் படம் என்று ஞாபகம்.  சிறைக்குச் சென்று திரும்பிய அவர் பழைய புகழ் எல்லாம் போயிருக்க, அதை மீட்டெடுக்க அவர் எடுத்த சொந்தப்படம்.   புதுமைப்பித்தனுக்கு காசு வந்ததோ இலையோ, காசநோய் வந்தது.  கதை வசனம் எழுத ராஜா மாதிரி கிளம்பி பூனா சென்றவர், வரும்போது தன்னுடலில் முக்தி அடையும் முதல்படி முன்னுரையுடன் வந்தார்.  அங்குதான் அவரை காசநோய் பற்றியது.

"ஐயா நான் 

செத்ததற்குப் பின்னால் 

நிதிகள் திரட்டாதீர் 

நினைவை விளிம்பு கட்டி 

கல்லில் வடித்து வையாதீர் 

வானத்து அமரன் 

வந்தான் காண்; வந்தது போல் 

போனான் காண் 

என்று பொறித்து வைக்காதீர் " 

 என்பாராம்.

அவர் மறைந்த நாள் நேற்று!

==================================================================================================

என் அக்கா சசிகலா விசுவேஸ்வரன் தினசரி எங்கள் பிளாக் படித்து விடும் இயல்புடையவர்.  அவ்வப்போது தொலைபேசியில் என்னிடம் அன்றன்றைய பதிவுகள் குறித்து சில கேள்விகள், சந்தேகங்கள் கேட்டுக்கொள்வார்.  

எஸ் ஏ பி,  பி வி ஆர் என்றெல்லாம் எழுத்தாளர்கள் பற்றி பதிவிலும், பின்னூட்டங்களிலும் உரையாடல் வரும்போது ஊன்றிப் படித்து, யாராவது 'சின்னக் கண்ணம்மா' என்கிற நாவல் பற்றி பேசுகிறார்களா என்று பார்ப்பாராம்.  அது யார் எழுதியது என்று நினைவில்லை என்றும், ஆனால் சிறுவயதில் தான் படித்து ரசித்த கதை என்றும் சொன்னார்.  மறுவாசிப்புக்கு கிடைத்தால் மீண்டும் நினைவுபடுத்திக் கொள்ளலாம் என்று விரும்புவதாகச் சொன்னார்.  அப்படி ஒரு கதை நான் கேள்விப்பட்டதில்லை.  நீங்கள்?

=======================================================================================================

குடும்ப க்ரூப்பில் உறவின் ஒரு புகைப்படம் வெளியானது.  அது எடுக்கப்பட்டிருந்த விதம் எனக்கு மிகவும் பிடித்துப்போய் விட்டது.  எடுக்கப்பட்ட இடமும்.  எதையாவது எழுத வேண்டும் போல தோன்றியது...

​மனங்களின் புரிதலில்

வார்த்தைகளுக்கு 

வேலையில்லை.

மௌனப் பரிமாற்றத்தில்

ஆயிரம் புரிதல்கள்.

மரங்களின் அடர்வில்

வனங்களின் அடர்த்தி

மனங்களின் இணைவில் 

புரிதலில் நேர்த்தி

ஆண்டவனின் படைப்பில்

ஆகாயம், ஆறு, வனம்,

நீ, நான்...

எல்லாமே அழகுதான்.

=========================================================================================================

சென்ற வாரம் பத்திரிகையில் படித்த செய்தித்துணுக்கு இது.  இது உண்மைதான் என்றாலும் சற்றே ஒரு மாறுபட்ட ஒரு கருத்தைச் சொல்லி இருப்பார் மபொசி தனது தமிழக சுதந்திரப்போராட்டம் நூலில்.  அதாவது மருது சகோதரர்களின் இந்தச் செயலுக்கு சற்றே சுயநலம் கலந்த ரணம் உண்டு என்கிற பொருளில் சொல்லி இருப்பார்.  எப்படி இருந்தாலும் வெள்ளையனை எதிர்த்ததால் அதுவும் போராட்டக் குறிப்புகளில் சேர்ந்து விடுகிறது என்பார்.

ஆங்கிலேயே ஆட்சிக்கு எதிரான ஜம்பு தீவு பிரகடனமே முதல் விடுதலை குரலாக பார்க்கப்படுகிறது. அந்த பிரகடனம் இதே நாளில் தான் 220 ஆண்டுகளுக்கு முன் வெளியிடப்பட்டது.

இதுகுறித்து தேசிய ஊடகவியலாளர் நலச்சங்க ஆலோசகர் சுப்பு வெளியிட்டுள்ள குறிப்பில் கூறப்பட்டுள்ளதாவது:ஆங்கிலேயருக்கு எதிராக புரட்சியில் ஈடுபட வேண்டும் என்பதற்காக 220 ஆண்டுகளுக்கு முன் கி.பி. 1801ம் ஆண்டு தென்னிந்திய நாடுகளின் கூட்டணியை உருவாக்கி வரலாற்றுச் சிறப்புமிக்க நாவலந்தீவு பிரகடனம் எனும் ஜம்பு தீவு பிரகடனத்தை மருது

சகோதரர்கள் வெளியிட்ட நாள் ஜூன் 16.கி.பி. 1800களின் துவக்கத்தில் ஆங்கிலேயருக்கு எதிராக தென்னிந்திய அளவில் மாபெரும் ஒரு தீபகற்ப கூட்டணியை மருது சகோதரர்கள் உருவாக்கினர். அப்போதுதான் திருச்சி மலைக் கோட்டையிலும் ஸ்ரீரங்கம் கோவிலிலும் நாவலந்தீவு பிரகடனம் என்ற ஜம்பு தீவு பிரகடனத்தை மருது சகோதரர்கள் வெளியிட்டனர்.

அந்த ஜம்பு தீவு பிரகடனம்

'இதை காண்போர் அனைவரும் கவனத்துடன் படிக்கவும்'மேன்மை தாங்கிய நவாபு முகமது அலி ஐரோப்பியர்களுக்கு நம்மிடையே இடங்கொடுத்து விட்டதன் காரணமாக ஐரோப்பியர்கள் தங்கள் வாக்குறுதிகளை மீறி அவரது அரசாங்கத்தையே தங்களுடையதாக ஆக்கி நாட்டு மக்கள் அனைவரையும் நாய்களாக கருதி ஆட்சி அதிகாரம் செய்து வருகின்றனர்.
மக்கள் பெரிதும் ஏழ்மையில் உழல்கின்றனர். சோற்றுக்குப் பதில் நீராகாரம்தான் உணவு என்று ஆகிவிட்டது. 1000 ஆண்டுகள் வாழ்வதாக இருந்தாலும் மனிதன் கடைசியில் செத்துத்தான் ஆக வேண்டும். ஆதலால் பாளையங்களில் உள்ள ஒவ்வொருவரும் போர்க்கோலம் பூண்டு ஒன்றுபட வேண்டும். ஆதலால் மீசை வைத்துக் கொண்டிருக்கும் நீங்கள் எல்லோரும் ராணுவம் அல்லது மற்ற தொழில்களில் ஈடுபட்டிருக்கும் நீங்கள் அந்நியன் கீழ் தொண்டு புரியும் சுபேதார்கள், அவில்தார்கள், நாயக்கர்கள், சிப்பாய்கள் மற்றும் போர்க் கருவிகளை பயன்படுத்தும் எல்லாரும் உங்களுக்கு வீரமிருந்தால் அதை கீழ்க்கண்டவாறு நீங்கள் வெளிப்
படுத்த வேண்டும்.ஐரோப்பியர்களை எவ்விடத்தில் கண்டாலும் கண்ட இடத்தில் அவர்களை அழித்துவிட வேண்டும். அவர்களுக்கு எவனொருவன் தொண்டூழியம் செய்கிறானோ அவனுக்கு இறந்தபின் மோட்சம் கிடையாது என்பதை நான் உறுதியாகக் கூறுவேன். ஒட்டப்பட்ட இந்த அறிவிப்பை சுவற்றிலிருந்து எவனொருவன் எடுக்கிறானோ அவன் பஞ்சமா பாதகங்களை செய்தவனாக கருதப்படுவான்.

இப்படிக்கு மருது பாண்டியன் பேரரசர்களின் ஊழியன் ஐரோப்பிய ஈனர்களின் ஜென்ம விரோதி.- இந்த அறிக்கைக்கு பின்னரே மருது சகோதரர்களுக்கு எதிரான யுத்தத்தை ஆங்கிலேயர்கள் தீவிரமாக்கினர். இந்த பிரகடனம் கி.பி. 1801ல் ஜூன் 10ம் தேதி வெளியிடப்பட்டது என்றும் ஜூன் 16ம் தேதி ஆங்கிலேயர் கைப்பற்றினர் என்றும் சில ஆய்வாளர்கள் சுட்டிக் காட்டினாலும் ஆங்கிலேய ஆட்சிக்கு எதிரான இந்த ஜம்பு தீவு பிரகடனமே முதல் விடுதலை குரலாக பார்க்கப்படுகிறது.

=================================================================================================

பெயர்ப்பலகை...   தெரிந்து செய்கிறார்களா, வேண்டுமென்றே செய்கிறார்களா?!!!

===================================================================================================

இந்தக் கேள்விக்கு விடை தெரிந்திருந்தும் பதில் சொல்லா விட்டால்....!!!

=======================================================================================

எப்படி இருக்கீங்க எல்லோரும்?  ரொம்ப நாளாச்சு உங்களையெல்லாம் பார்த்து...