நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 01 நெல்லைத்தமிழன்

 

நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 01

முகவுரை

2024 ஆண்டு ஞாயிறு பதிவுகளாக, நான் சென்றுவந்த பஞ்சத்வாரகா யாத்திரையைப் பற்றி எழுத நினைத்திருக்கிறேன். இந்த யாத்திரைக்கு நான் இருமுறை சென்றிருக்கிறேன் (2020 மற்றும் 2022). 

நான் எப்போதும் திருவல்லிக்கேணியைச் சேர்ந்த ஒருவருடைய குழுவோடுதான் யாத்திரை செல்வேன். இந்த யாத்திரையும் அவர் குழுவோடுதான் சென்றேன். பொதுவாக அஹோபிலம் யாத்திரை, முக்திநாத் யாத்திரை மற்றும் சோளிங்கர் ஆகியவையே கடினமானதாக இருக்கும் என்று நினைத்திருந்தேன். ஆனால் ஐந்து துவாரகைகள் யாத்திரை என்பது பல்வேறு பட்ட மாநிலங்களைக் கடந்து செல்வதாலும் தொடர்ந்த பேருந்துப் பிரயாணத்தினாலும் சோர்வை உண்டாக்குவதாக இருக்கும் என்று யாத்திரை நடத்துபவர் சொல்வார். எனக்கும் அப்படித்தான் தோன்றியது. காலை 4 மணிக்கு ஒரு இடத்தை அடைந்தால், சிறிது நேரத்திலேயே குளித்துவிட்டு 7 மணிக்கு கோயிலுக்குச் செல்லவேண்டும், மதியம் உணவு, 2 மணிக்கு மேல் அந்த ஊரை விட்டுக் கிளம்புவது என்று தொடர்ந்து பிரயாணம் இருக்கும்.

ஒரு இடத்தில் முழுநாள் இருந்தால், மதியம் மற்றும் இரவு முழு உணவாக இருக்கும். பிரயாணங்களாக இருந்தால் கதம்ப சாதம், பொங்கல், தயிர் சாதம் என்று ஏதாவது, கிடைக்கும் நேரத்தைப் பொறுத்து, ஏதாவது நல்ல பெட்ரோல் பங்க் அருகில் பேருந்தை நிறுத்தி அனைவருக்கும் தருவார்கள். கோவில் தரிசனம் செய்துவிட்டு வருவதற்கு மதியம் 1 மணி ஆகிவிடும் என்று தோன்றினால், காலையில் சிறிய உணவு என்ற வகையில் ஏதாவது தருவார்கள். இவர்களுடன் நான் சென்ற யாத்திரை ஒன்றிலும் உணவுப் பிரச்சனையோ, இல்லை உணவினால் பிரச்சனையோ ஏற்பட்டதில்லை. தரிசனத்திற்கும் ஒரு குறைவும் ஏற்பட்டதில்லை.  

தங்கும் இடங்களின் அசௌகரியங்கள், பயணத்தினால் ஏற்படும் அலைச்சல் ஆகியன மாத்திரமே பிரச்சனையாகத் தோன்றும். தினமும் காலை 6 மணிக்கும், மாலை 4 மணி சுமாருக்கும் காபி/டீ/பால் கொடுத்துவிடுவார்கள். அதுபோல மாலையில் நிச்சயம் ஒரு இனிப்பும், காரமும் தருவார்கள். அதனால் வெளியில் சாப்பிடணும் என்ற தேவையே இருக்காது. அப்படி வெளியில் நாம் சாப்பிடுவதை (அவர்கள் அனுமதி இல்லாமல் சிறுதீனிகளை) விரும்ப மாட்டார்கள். வழியில் உடல்நிலைப் பிரச்சனை வந்தால் எல்லா யாத்ரீகர்களும் பாதிக்கப்படுவார்கள் என்பதால்.

இந்த துவாரகை யாத்திரையில் சென்னையில் மதியம் புறப்பட்டு, மறுநாள் மாலை வதோதராவை அடைந்தோம். பிறகு பஞ்சத் துவாரகை யாத்திரை பேருந்தில் துவங்கிற்று. இதுபோல, யாத்திரையின் முடிவில் தில்லியை அடைந்தோம். அங்குள்ள சில இடங்களைப் பார்த்துவிட்டு, இரவு தில்லியில் புறப்பட்டு, மூன்றாம் நாள் காலையில் சென்னை வந்து சேர்ந்தோம். யாத்திரை முழுவதுமே, அதாவது வதோதராவில் தொடங்கி, தில்லி வந்துசேர்ந்தது வரை பேருந்துப் பயணம்தான்.

பஞ்சத் துவாரகை யாத்திரையில், டாக்கூர் துவாரகை, கோமதி துவாரகை (துவாரகீஷ். இந்த இடத்திலிருந்துதான் ஸ்ரீகிருஷ்ணர் ஆட்சி செய்தார்), ருக்மணி கோவில் (துர்வாசரிடமிருந்து பெற்ற சாபத்தால், கிருஷ்ணருடன் தங்காமல், இந்த இடத்தில்தான் தங்கினாராம்), Bபேட் துவாரகா (இங்குதான் கிருஷ்ணரின் இருப்பிடம் அமைந்திருந்தது. இங்குதான் குசேலர் கிருஷ்ணரைச் சந்திக்க அவலுடன் வந்தார்), மூலத் துவாரகா (மதுராவிலிருந்து புறப்பட்டு, இந்த இடத்தில்தான் கிருஷ்ணர் தன் அரசாட்சியை முதலில் நிலைநிறுத்தினாராம். வட இந்திய பக்தர்கள் ஐந்து துவாரகைகளையும் தரிசிக்க, முதலில் மூல் துவாரகாவிலிருந்துதான் யாத்திரையை ஆரம்பிப்பார்கள்), பிறகு போர்பந்தர் அருகில் இருக்கும் சுதாமா (குசேலர்) பிறப்பிடம், காந்தி பிறந்த வீடு இவைகளைப் பார்த்த பிறகு, சோம்நாத் (இங்கு புகழ்பெற்ற சோம்நாத் கோவில், கிருஷ்ணர் உடல் தகனம் செய்யப்பட்ட பிரபாஸ் நதிக்கரை, சோம்நாத்திலிருந்து சில கிமீ தொலைவில் இருக்கும் விராவல் என்ற இடம், இங்குதான் வேடன் ஒருவனால் கிருஷ்ணர் இந்த உலகை விட்டுப் பிரிவது). 

சோம்நாத்திற்குப் பிறகு அகமதாபாத் சென்று அங்கிருக்கும் கோவில்களைத் தரிசனம் செய்த பிறகு, சபர்மதி ஆஸ்ரமம் (இங்குதான் காந்தி தன்னை நிலைநிறுத்திக்கொண்ட பிறகு, வசித்துவந்தார்), பிறகு அகமதாபாத்திலிருந்து நெடிய பேருந்து பிரயாணத்திற்குப் பிறகு நாத் துவாரகா என்று அழைக்கப்படும் ஸ்ரீநாத் துவாரகா, பிறகு அங்கிருந்து கங்க்ரோலி துவாரகா (இது பஞ்சத் துவாரகாவில் முக்கியமான கோவில். துவாரகீஷ் என்றும் அழைக்கப்படுகிறது), பிறகு புஷ்கர்.  புஷ்கர் முக்தி தரும் ஏழு நகரங்களுள் ஒன்று. அங்கிருக்கும் நீர்நிலையில் குளிப்பதுதான் முக்கியம். புஷ்கர் ஏரியில் புனித நீராடுவதுதான் யாத்திரைகளிலேயே தலைசிறந்தது என்று சொல்கிறார்கள். அங்குதான் பிரம்மாவிற்கான ஒரே கோவில் உள்ளது. புஷ்கரிலுள்ள கோவில்களைத் தரிசனம் செய்த பிறகு, அந்த ஊரிலிருந்து புறப்பட்டு, ஜெய்ப்பூர் வழியாக ஆக்ராவை அடைந்தோம்.  

ஆக்ராவில் தாஜ்மஹல் மற்றும் ஆக்ரா கோட்டையைப் பார்த்த பிறகு, மதியம் அங்கிருந்து புறப்பட்டு யமுனை நதிக்கரையில் இருக்கும் கோகுலம் (ஸ்ரீகிருஷ்ணர் வளர்ந்த இடம்), கோவர்தனம், இரவு மதுரா (கிருஷ்ணர் பிறந்த சிறைச்சாலை) தரிசனத்திற்குப் பிறகு, இரவு விருந்தாவனத்தை அடைந்து, மறுநாள், பிருந்தாவனத்தில் பல்வேறு கோவில்களைத் தரிசித்துவிட்டு, கிருஷ்ணர் வாழ்வோடு கூடிய இடங்களைப் பார்த்த பிறகு,  குருக்ஷேத்திரம் சென்றோம். அங்கிருக்கும் ப்ரம்ம சரோவரில் குளித்த பிறகு, போர் நடந்த குருக்ஷேத்திரத்திற்குச் சென்றோம், பிறகு பீஷ்மர் அம்புப் படுக்கையில் கிடந்த இடம். குருக்ஷேத்திரத்திலிருந்து புறப்பட்டு தில்லியை அடைந்தோம். இரவு ஓய்விற்குப் பிறகு மறுநாள் காலையில் தில்லியில் சில இடங்களைப் பார்த்த பிறகு, இரவு தில்லி இரயில் நிலையத்திலிருந்து சென்னை நோக்கிய பயணம்.

ஒரு பத்தியில் சென்ற இடங்களின் வரிசைகளைச் சொல்லிவிட்டாலும் யாத்திரை சுமார் 12 தினங்கள். 8 நாட்களில் யாத்திரைக்கான பிரயாணம்.

இந்த யாத்திரையில் நாங்கள் சென்றிருந்த இடங்களின் சுருக்கமான படத் தொகுப்புதான் இந்த வாரமும் வரும் வாரமும். அதற்குப் பிறகு வரும் வாரங்களில் விரிவாகப் பார்ப்போம்.

புகழ்பெற்ற சோம்நாத் கோவில் (பலத்த பாதுகாப்புடன்)

ஸ்ரீகிருஷ்ணர், வேடனால் கொல்லப்பட்ட இடம், விராவல். 

ஸ்ரீநாத்துவாரகை ஸ்ரீநாத்ஜி கோவில் பிரசாதங்கள். 

புஷ்கரில் தென் இந்தியப் பாணியில் அமைந்துள்ள விஷ்ணு கோவில்

புஷ்கரிலிருந்து கிளம்பி ஜெய்ப்பூர் வழியாக எங்கள் யாத்திரை தொடர்ந்தது.  அதனை வரும் வாரத்தில் பார்க்கலாம். (முகவுரையே நீண்டுக்கிட்டுப் போகுதே)

(தொடரும்)