"திங்க" க்கிழமை : காய்கறி கலவை சாதம் -- துரை செல்வராஜூ ரெஸிப்பி

 காய்கறி கலவை சாதம்.

துரை செல்வராஜூ  

தேவையான பொருட்கள்:

பாசுமதி அரிசி 2 கப்

பசு நெய் 2 டே ஸ்பூன்

குங்குமப்பூ ஒரு சிட்டிகை

பட்டை  சிறு துண்டுகளாக 2

கிராம்பு 4

ஏலக்காய் 4

முந்திரிப்பருப்பு 10

உலர் திராட்சை 15

பிரிஞ்சி இலை 2

அன்னாசிப் பூ 1

பெரிய வெங்காயம் 1 + 1

பச்சை மிளகாய் 3

இஞ்சி 1 அங்குலம்

பூண்டு 4 துணுக்குகள்

கல் உப்பு தேவையான அளவு

 

பச்சைப் பட்டாணி 50 கிராம்

பீன்ஸ் 50 கிராம்

கேரட் 1 நடுத்தரமாக

காலிஃப்ளவர் 1 சிறியதாக

குறிப்பு: 

பச்சைப் பட்டாணி என்றால் பறித்தெடுக்கப்பட்டவை.. 

உலர் பட்டாணி தான் வீட்டில் இருக்கின்றது என்றால் முதல் நாள் இரவே ஊறவைத்து காலையில்  வடிகட்டிக் கொள்ளவும்..

பச்சடிக்கு :

வீட்டுத் தயிர் ½ கப் ¼ கப்

பெரிய வெங்காயம் - 1 

முதலில் 

காலிஃப்ளவரை முத்து முத்தாக நறுக்கி

வெதுவெதுப்பான நீரில் சிறிது உப்பைக் கரைத்து அதில் ஊறவைக்கவும்..

அடுத்து

பாஸ்மதி அரிசியை சுத்தம் செய்து - 20 நிமிடங்களுக்கு

தண்ணீரில் ஊற வைக்கவும்.. 

இந்த 20 நிமிடங்களுக்குள்

பெரிய வெங்காயம் பீன்ஸ் மிளகாய்  இஞ்சி பூண்டு இவற்றை சுத்தம் செய்து கொள்ளவும்..

கேரட்டை சிறு சிறு சதுரத் துண்டுகளாக நறுக்கிக் கொள்ளவும்.. 

(ஏன்?.. கசமுசா என்று நறுக்கிக் கொள்ளக் கூடாதா?.. என்றால் அது உங்க சாமார்த்தியம்.. )

பீன்ஸ், பெரிய வெங்காயம்  இவற்றை மெல்லியதாகவும் 

பச்சை மிளகாய்களை நீளவாக்கிலும் நறுக்கிக் கொள்ளவும்.. 

இஞ்சி பூண்டு இரண்டையும் மிக்ஸியில் (அம்மி தான் இல்லையே!..) நைய அரைத்துக் கொள்ளவும்..

20 நிமிடங்கள் ஆயிற்றா!..

நீரை சுத்தமாக வடித்து விட்டு

ஒரு கப் பாசுமதி அரிசிக்கு ஒன்றரை கப் வீதம் நீர் சேர்த்து மிதமான சூட்டில் அடுப்பில் ஏற்றவும். 

இப்போது - இதனுடன்  நறுக்கி வைத்திருக்கும்   காலிஃப்ளவர், கேரட், பீன்ஸ் பச்சை மிளகாய், பச்சைப் பட்டாணி,  ஆகியவற்றை சேர்த்து விடவும்..

கைப்பக்குவத்திற்கு கல் உப்பு போட்டு இதில் 2 tsp நெய் சேர்த்து  பாத்திரத்தை மூடி வைக்கவும்...

அடுத்து வரும் 20 நிமிடங்கள் கவனத்துக்குரியவை..

1) நீளவாக்கில் நறுக்கிய  வெங்காயத்தை நெய்யில் வதக்கி தனியே வைக்கவும்..

வெங்காயத்தை பொன் நிறமாக வதக்க வேண்டும் என்றெல்லாம் சொல்வார்கள். அது நடக்காத காரியம்.. 

கருகி விடாமல் வதக்கிக் கொள்வதே முக்கியம்..

2) அடுப்பின் இந்தப்பக்கம் வாணலியில் மேலும் சிறிது நெய் விட்டு முந்திரிப் பருப்பு உலர் திராட்சையையும் 

3) அடுத்து  பட்டை, கிராம்பு, ஏலக்காய், பிரிஞ்சி இலை,

அன்னாசிப் பூ இவற்றையும் பொரித்துக் கொள்ளவும்.. 

4) அடுத்து இஞ்சி பூண்டு விழுதையும் நெய்யில் நன்கு வதக்கிக் கொள்ளவும்...

இந்நேரம் முதல் கொதி வந்திருக்கும்..  

பிறகென்ன.. 

குங்குமப் பூவுடன் நெய்யில் வதக்கி எடுத்த  (1, 2, 3, 4 ) வகையறாக்களை இதனுடன் சேர்த்து பதமாகக் கிளறி விடவும்..

அரிசியை அடுப்பில் ஏற்றிய 15/18 நிமிடங்களில் - 

தண்ணீர் வற்றிய நிலையில் அரிசி சோறாக மலர்ந்திருக்கும்..

நிறைவாக கொத்தமல்லித் தழை, புதினா இவற்றை (நம்ம காமாட்சியம்மாள் செய்த மாதிரி இல்லாமல்) கவனத்துடன் மெல்லியதாக நறுக்கிப் போட்டு  நெய்யில் வதக்கப்பட்ட வெங்காயத்தையும் சேர்த்து சிறிது நெய் ஊற்றி - பதமாகக் கிளறி விட்டு அடுப்பை நிறுத்தி விடவும்..

கலவை சாதம் (!?) தயார்..

 மீதமுள்ள ஒரு வெங்காயத்தை மிக மெல்லியதாக நறுக்கிப் போட்டு தயிர் பச்சடி செய்து கொள்ளவும்..

தயிர் பச்சடிக்கு வீட்டில் உரை ஊற்றிய தயிர் தான் சிறந்தது..

(மறுபடியும் சொல்லி விட்டேன்..)

இன்றைய சமையலில் வற மிளகாய், தக்காளி இல்லாததைக் கவனிக்கவும்..

கலவை சாதம் தயார்.. தயிர் பச்சடியும் தயார்..  ஊற்றிக் கொள்ள கார சாரமாக ஒன்றும் இல்லையா?.. என்றால் அதுதான் தயிர் பச்சடி இருக்கின்றதே.. அது போதும் ..  

தேவையானால் உருளைக் கிழங்கு குருமா செய்து கொள்ளுங்கள்..

அதி கார மசாலாக்கள் உடலுக்கு நல்லதல்ல!.. 

***