ஒரே நாடு, ஒரே தேர்தல் ஒரே கேள்வி!

 

ஜெயக்குமார் சந்திரசேகரன்: 

ஒரு லோக்சபா தேர்தலையே ஒரே நாளில் நடத்தி முடிக்காமல் ஒன்றரை மாசம் நீட்டுகிறார்களே, ஒரே நாடு, ஒரே தேர்தல், என்பதை எப்படி ஒரே நாளில் நடத்துவார்கள்?

# ஒரே நாடு ஒரே தேர்தல் ஒன்றரை மாதத்தில் நடத்த  முடியுமல்லவா ?

& ஒரே நாடு,  ஒரே தேர்தல் என்பதை ஒரே நாளில் நடத்துவோம் என்று யாரும் சொல்லவில்லை! 

ஒரே நாடு, ஒரே தேர்தல் என்பது, நாடாளுமன்றம், சட்டசபை தேர்தல்கள் ( முடிந்தால் நகரசபை / பஞ்சாயத்து தேர்தல்கள் உட்பட ) எல்லாவற்றையும் ஒன்றாக நடத்துவது. இப்போது நாடாளுமன்றத் தேர்தல் - எல்லா தொகுதிகளுக்கும் ஒன்றாக நடந்தாலும் - சட்டசபை தேர்தல்கள் ஒவ்வொரு  மாநிலத்திலும் ஒவ்வொரு காலத்தில் நடந்து வருகிறது. 

1957 காலத்தில் ஒரே நாடு ஒரே தேர்தல் என்றுதான் நடந்தது. ஆட்சி கலைப்பு, ஆட்சி கவிழ்ப்பு, முன்கூட்டியே சட்டசபை ராஜினாமா செய்வது போன்ற சூழ்நிலைகளால் சட்டசபை தேர்தல்கள் திசை மாறிப் போயின. 

அநேகமாக 2029 முதல் ஒரே நாடு, ஒரே தேர்தல் நடைமுறைக்கு வரும் என்று நினைக்கிறேன். 

ஆனால் - நிச்சயம் ஒரே நாளில் நடத்த இயலாது. ஒரு மாதம் அல்லது ஒன்றரை மாத காலம் - படிப்படியாகத்தான் தேர்தல் நடக்கும். எல்லா தேர்தல்களும் நடந்து முடிந்தபின்தான் வோட்டுகள் எண்ணப்பட்டு முடிவு அறிவிக்கப்படும். இது தேர்தல் கமிஷனின் சௌகரியத்திற்காக மட்டுமே.  

நெல்லைத்தமிழன்: 

இரப்பவர்களில் அனேகர் உணவை விரும்புவதில்லையே... காரணம் என்னவாயிருக்கும்?

# "வேறு செலவு"க்காக இரக்கிறார்கள்.! 

& ஒருவேளை இறந்தவர்களுக்கும் ஒரு சாய்ஸ் கொடுத்தால் - " எனக்கு உணவு வகைகள், தயிர்வடை எல்லாம் படைக்காதீர்கள் - பணம், தங்கம், வெள்ளி எல்லாம் படையுங்கள் " என்று கேட்பார்களோ! 

முன்பு கிராமங்களில் இருந்த வழக்கத்தைப் போல, நாட்டாமைகள் ஓரிரு நாட்களில் தீர்ப்பு வாசித்து வழக்கை பைசல் செய்வது போல, எந்த வழக்கையும் பைசல் செய்யமுடியாத நீதிமன்றங்களால் நாட்டுக்கு என்ன பயன்?

# நாட்டாமை ,  பஞ்சாயத்து மக்களும் முன்போல் இல்லை. வழக்குகள் தீர்க்காயுசாக இருப்பது ஒரு தரப்பு செல்வாக்காக இருப்பதுவும், கோர்ட் ஓவர்லோடும் காரணமாக இருக்கும்.

= = = = = = =

எங்கள் கேள்விகள் : 

நீங்கள் வழக்கமாக விரும்பிப் பயன்படுத்தும் 

அ ) டூத் பேஸ்ட் 

ஆ ) சோப் 

இ ) காபிப்பொடி 

ஈ ) ஹேர் ஆயில் 

எவை? அதைப் பற்றி உங்களுக்குப் பிடித்த விஷயங்கள் என்னென்ன? 

= = = = = = =

KGG பக்கம்: 

கிராமத்தில், சித்தப்பா வீட்டில் பழைய அம்புலிமாமா புத்தகங்கள் நிறைய இருக்கும். அவைகளைப் படித்து, பரோபகாரி பழனி, ஸ்ரீமத் பாகவதம், மகாபாரதக் கதைகள், வேதாளம் விக்கிரமாதித்தன் கதைகள் என்று நிறையக் கதைகள் தெரிந்துகொண்டேன். 

எங்கள் கிராமத்தில் எனக்கு முற்றிலும் பிடிக்காத நேரம் இரவு நேரம். அந்த ஊரில் அப்பொழுது மின்சாரம் கிடையாது. அந்தி மங்கிய நேரம் தொடங்கி மறுநாள் காலை வரை இருட்டு சாம்ராஜ்யம்தான். வீட்டிற்குள் ஒரே ஒரு அரிக்கேன் விளக்கு மட்டுமே - எல்லோரும் பாய் போட்டுக் கொண்டு படுக்கும் வரை. அந்த ஒத்தை விளக்கு ஒளியில் யாராவது குறுக்கும் நெடுக்குமாக நடந்தால் - அவர்களின் உருவங்கள் சுவரில் பூதாகாரமான நிழல்களாகத் தெரியும்! ஏற்கெனவே பயந்த சுபாவம் உள்ள எனக்கு, அந்த இருட்டு, பூத நிழல்கள் எல்லாம் மேலும் பயம் காட்டும் ! 

இரவில் படுத்து உறங்கும்போது அல்லது உறங்க முயற்சி செய்யும்போது - நிலா முற்றத்தில் காயப் போட்டிருக்கும் தேங்காய் கொப்பரைகளின் அருகில் புரண்டு சென்று சில கொப்பரைகளை  நைசாக கவர்ந்து சாப்பிடுவேன்! ஆக எங்கள் சொந்த கிராமத்தில் எனக்குப் பிடித்தவை அம்புலிமாமா முதல் அரட்டைக் கச்சேரிகள் வரை இருந்தபோதிலும் இரவு இருட்டு எல்லாவற்றையும் பின்னுக்குத் தள்ளிவிட்டது. 

விடுமுறை முடிந்து பள்ளிக்கூடம் திறக்கும் நாள் வந்தவுடன் சந்தோஷமாக வண்டி, பஸ் , ரயில் பயணங்கள் ! 

- - - - - - - - 

கோடை விடுமுறையின்போது ஒருமுறை திருக்காட்டுப்பள்ளிக்கு நானும் என் தம்பியும் சென்றிருந்தோம். 

அக்காவின் கணவருக்கு திருக்காட்டுப்பள்ளி ராஜம் காபி கடையில் வேலை. அந்த ஊரில் பலரும் அந்தக் கடையே அவருடையதுதான் என்று நினைத்திருந்தனர்! எனது பள்ளிக்கூட நோட்டுகளின் பின் பக்க அட்டைகளில் கூட அப்போதெல்லாம் ராஜம் காபி விளம்பரம் காணப்படும். 

நாகையில் நான் செய்த ட்ரான்சிஸ்டர் ரேடியோவில் ( அண்ணன் எனக்குக் கொடுத்த டயோடு, ட்ரையோடு, டியூனிங் கண்டென்சர், capacitor  resistor ஸ்பீக்கர் போன்ற சில பாகங்கள் கொண்டு - இணப்பு கொடுத்து உருவாக்கிய ரேடியோ ) நாகை அருகில் ஒலிபரப்பு நிலையம் எதுவும் இல்லாததால் அதில் எந்த ஒலிபரப்பும் கேட்கவில்லை! 

நாகையைவிட திருக்காட்டுப்பள்ளி திருச்சிக்கு அருகே இருப்பதால், அங்கு ஒருவேளை என் ரேடியோ பாடும் என்று எண்ணி எல்லா பாகங்களையும் அங்கு வைத்து இணைப்பு கொடுத்தேன். ஊஹூம் - அங்கும் பேட்டரி இணைக்கப்படும்போது கேட்கும் கொர் கொர் சத்தம் தவிர வேறு எதுவும் ஸ்பீக்கரிலிருந்து கேட்கவில்லை!  

அப்பொழுது அங்கே வந்த ஒரு அண்டை வீட்டுக்காரர், " தம்பீ - ரேடியோ எல்லாம் கரண்ட்ல வேலை செய்யும் விஷயம். நீ ஏதாவது எக்குத் தப்பாக வயர் கனெக்ஷன் செய்து, 'ஷாக்' வாங்கிக்கொள்ளாதே " என்று அறிவுரை கூறினார்! 

டிரான்சிஸ்டர்  ரேடியோ - (டார்ச் லைட்) பேட்டரி செல் இவற்றிலிருந்து ஷாக் வருமா ! திகைத்துப் போன எனக்கு, அவருக்கு எப்படி புரிய வைப்பது என்று தெரியவில்லை! 

= = = = = = = = = =